Jabulela Kwephana Nekucabangela KwaJehova
“Simakadze muhle kubo bonkhe, uyayihawukela imisebenti yakhe yonkhe.”—HLA. 145:9.
1, 2. Bangani baJehova banaliphi litfuba?
UMKHRISTU libito lakhe lokunguMonika utsi: “Sekuphele iminyaka lengu-35 sishadile, futsi mine nendvodza yami satana kahle. Kodvwa nobe sekwendlule leminyaka lengaka kunetintfo lesisafundzana kuto lebesingatati.” Loku lesisandza kukusho, kuyenteka kubantfu labanyenti labashadene nakubangani.
2 Siyakujabulela kuba nebudlelwane lobuhle nalabo lesibatsandzako. Kunobe ngubuphi bungani lesingaba nabo, kute lobubaluleke kakhulu kwendlula bungani betfu naJehova. Angeke sitati tonkhe tintfo ngaNkulunkulu. (Rom. 11:33) Nasesiphila phakadze, sitawuba nelitfuba nenjabulo yekujulisa kujabulela kwetfu bunguye baJehova.—Shu. 3:11.
3. Sitawufundza ngani kulesihloko?
3 Sihloko lesendlulile sisisitile sakwati kujulisa kujabulela kwetfu kungeneka nekungakhetsi kwaJehova. Nyalo asesikhulume ngebunguye baJehova lobubili—kwephana kwakhe nekucabangela. Nasenta njalo, sitawukhona kubona kutsi “Simakadze muhle kubo bonkhe, uyayihawukela imisebenti yakhe yonkhe.”—Hla. 145:9.
JEHOVA UYEPHANA
4. Kubonakala njani kupha kweliciniso?
4 Kusho kutsini kwephana? Imphendvulo siyitfola emavini aJesu lasencwadzini yeMisebenti 20:35: “Kubusisiwe kupha kunekwemukela.” Lamavi aJesu lamelula aveta kubaluleka kwekupha kweliciniso. Umuntfu lowephanako unikela ngesikhatsi sakhe, ngemandla nangemcebo kute kuzuze labanye—futsi loko ukwenta ajabulile. Kwephana akukalwa ngebukhulu besipho, kodvwa kukalwa ngesisusa saloyo lophako. (Fundza 2 Khorinte 9:7.) Kute umuntfu lowephana kwendlula Jehova, ‘Nkulunkulu wetfu lojabulako.’—1 Thim. 1:11.
5. Jehova ukhombisa ngatiphi tindlela kutsi uyephana?
5 Nguyiphi indlela Jehova lakukhombisa ngayo kwephana? Uyatinakekela tidzingo tabo bonkhe bantfu, ngisho nalabo labangamkhonti. Kuliciniso kutsi “Simakadze muhle kubo bonkhe.” “Uphumisa lilanga lakhe kulababi nalabahle, anise imvula yakhe kulabalungile nalabangakalungi.” (Mat. 5:45) Kungako umphostoli Pawula nakakhuluma nalabangakholwa, abengasho kutsi Jehova ‘wenta imisebenti lemihle: Unehlisela imvula nekudla ngesikhatsi lesifanele; uninika kudla agcwalise tinhlitiyo tenu ngenjabulo.’ (Imis. 14:17) Kuyacaca kutsi Jehova upha bonkhe bantfu.—Luk. 6:35.
6, 7. (a) Jehova ngalokukhetsekile ujabulela kunakekela tidzingo tabobani? (b) Niketa sibonelo sendlela Nkulunkulu latinakekela ngayo tinceku takhe letetsembekile.
6 Jehova ukujabulela ngalokukhetsekile kunakekela tidzingo tetinceku takhe letetsembikile. INkhosi Davide yatsi: “Bengingumntfwana, manje sengimdzala, angizange sengimbone lolungile alahliwe, ngisho nebantfwabakhe abahambi bacela kudla.” (Hla. 37:25) EmaKhristu lamanyenti letsembekile abofakazi bekutsi Jehova uyanakekelana. Asewucabange nganasi sibonelo.
7 Eminyakeni letsite leyendlulile, sisebenti sasikhatsi sonkhe libito laso lokunguNancy satitfola singene shi elubishini. Nancy utsi: “Bengidzinga R570 kute ngibhadale irenti yalapho bengihlala khona, lebekufanele ngiyikhiphe ngakusasa. Bengingati kutsi ngitayitsatsaphi lemali. Ngathantaza ngalenkinga lebengibhekene nayo, ngabese ngiya emsebentini wami wekuba nguweta. Bengingakagadzi kutsi bantfu bangangipha imali lenyenti yekungibonga ngemsebenti lengibentele wona ngalobo busuku ngesizatfu sekutsi bekusikhatsi lesingasimatasa evikini. Ngamangala nangibona bantfu labanyenti beta kulendzawo yekudlela ngalobo busuku. Nangishayisa emsebentini ngatsi nangibala imali labangiphe yona, ngatfola kutsi bangiphe R570.” Nancy uyaciniseka kutsi Jehova wamupha loko labekudzinga.—Mat. 6:33.
8. Ngusiphi sipho saJehova lesihamba embili?
8 Sipho saJehova lesihamba embili singatfolwa bantfu bonkhe. Ngusiphi leso sipho? Ngumhlatjelo wenhlawulo weNdvodzana yakhe. Jesu watsi: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.” (Joh. 3:16) Kulelivesi, ligama lelitsi “live” lisho bantfu. Lesipho saJehova lesihamba embili singatfolwa ngibo bonkhe labafuna kusemukela. Labo labakhombisa kukholwa kuJesu batawutfola kuphila lokuphakadze. (Joh. 10:10) Abukho bufakazi lobendlula lobu lobukhombisa kutsi Jehova uyephana.
LINGISA KWEPHANA KWAJEHOVA
Ema-Israyeli akhutsatwa kutsi alingise kupha kwaJehova (Buka sigaba 9)
9. Singakulingisa njani kwephana kwaJehova?
9 Singakulingisa njani kwephana kwaJehova? Jehova ‘usipha tonkhe tintfo ngalokuphelele, kuze sitfokote ngato’; kungako-ke kufanele sifise ‘kupha’ labanye kute nabo batfokote. (1 Thim. 6:17-19) Siyakujabulela kusebentisa imali yetfu kute siphe labo lesibatsandzako tipho futsi sisite labeswele. (Fundza Dutheronomi 15:7.) Yini lengasisita kutsi sikhumbule kupha labanye? Lamanye emaKhristu enta loku: Nakatfola sipho nawo afuna litfuba lekupha lotsite sipho. Libandla lebuKhristu libusiswe ngebazalwane nabodzadze labanyenti labanemoya wekupha.
10. Nguyiphi indlela lehamba embili yekhombisa kutsi siyephana?
10 Lenye indlela lehamba embili yekupha ikunikela ngatsi ngekwetfu ngemavi nangetento. Singakwenta njani loko? Ngekutsi sisebentise sikhatsi setfu nemandla kute sisite futsi sikhutsate labanye. (Gal. 6:10) Kute sibone kutsi sikwenta ngelizinga lelingakanani loku, singase sitibute: ‘Labanye bayabona yini kutsi ngitimisele kutinika sikhatsi ngikulalele loko lokubakhatsatako? Nangabe lotsite angicela kutsi ngimsite ngemsebenti lotsite, ngiyavuma yini kuwenta nangabe ngingakhona? Ngigcine nini kuncoma ngalokusuka enhlitiyweni lilunga lemndeni nobe loyo lengikholwa naye?’ Nangabe ‘sephana,’ nakanjani sitawusondzela kuJehova nakubangani betfu.—Luk. 6:38; Taga 19:17.
11. Singamupha ngatiphi tindlela Jehova?
11 Singamupha naJehova. ImiBhalo isikhutsata kutsi ‘sidvumise Simakadze ngalokuhle lesinako.’ (Taga 3:9) Letintfo ‘letinhle’ tihlanganisa sikhatsi setfu, emandla kanye nemcebo lesingawusebentisa ngalokukhululekile emsebentini wakhe. Ngisho nebantfwana labancane bangafundza kumupha Jehova. Lomunye babe libito lakhe lokunguJason utsi: “Umndeni wami nawunikela eHholweni leMbuso, imali siyiniketa bantfwana betfu bayifake ebhokisini lemnikelo. Bayakujabulela kwenta njalo ngobe nabayifaka basuke ‘bayipha Jehova.’” Bantfwana labajabulela kupha Jehova basebancane bangase bakhone kuchubeka bamupha ngisho sebabadzala.—Taga 22:6.
JEHOVA UYACABANGELA
12. Kusho kutsini kuba ngulocabangelako?
12 Lenye indlela Jehova lakhombise ngayo bunguye bakhe, kucabangela. Kusho kutsini kucabangela? Ku-New World Translation, ligama lelihunyushwe ngekutsi ‘kucabangela’ lisho ‘kuhocisa.’ (Thit. 3:1, 2) Umuntfu locabangelako akahlali abambelela emtsetfweni, acinise sandla ngendlela lengakafaneli nobe abe nelunya. Kunaloko, usebentelana nalabanye ngemusa acabangele netimo tabo. Ukulungele kulalela labanye, nangabe kufanele uyatemukela tifiso tabo futsi avumelanise loko lakufunako netimo tabo.
13, 14. (a) Jehova ukhombisa njani kutsi uyacabangela? (b) Yini lesingayifundza ngekucabangela endleleni Nkulunkulu lasebentelana ngayo naLoti?
13 Jehova ukukhombisa njani kucabangela? Ngemusa uyayicabangela indlela tinceku takhe letitiva ngayo, futsi ngalokuvamile uyakwati kwemukela ticelo tato. Nasi sibonelo: Cabanga ngendlela Jehova lasebentelana ngayo nendvodza lelungile lenguLoti. Ngesikhatsi Jehova atsi utawubhubhisa lidolobha laseSodoma neGomora, waniketa Loti sicondziso lesicacile sekutsi abalekele etintsabeni. Ngesizatfu lesitsite, Loti wacela imvume yekubalekela kulenye indzawo. Cabanga nje—Loti wacela Jehova kutsi ashintje sicondziso saKhe.—Fundza Genesisi 19:17-20.
14 Kungaba lula ngalotsite kutsi atsi Loti abebutsakatsaka nobe abengalaleli. Asingabati kutsi Jehova abetamsindzisa Loti ngisho nobe akuphi, ngako-ke bekute sidzingo sekutsi Loti esabe. Nobe kunjalo, Loti abesaba, futsi abetiva ngaleyondlela, kodvwa Jehova wasemukela sicelo sakhe. Wamvumela Loti kutsi abalekele edolobheni labefuna kulibhubhisa. (Fundza Genesisi 19:21, 22.) Kuyacaca kutsi Jehova akasiye umuntfu lolukhuni. Ukulungele kuhocisa futsi uyacabangela.
15, 16. UMtsetfo waMosi wakukhombisa njani kucabangela kwaJehova? (Buka sitfombe lesisekucaleni)
15 Ase ucabange ngalesinye sibonelo sekucabangela kwaJehova njengobe sivetwe eMtsetfweni waMosi. Nangabe umIsrayeli abephuye kangangekutsi ehluleke kunikela ngemvu nobe ngembuti kute ibe ngumhlatjelo, abenganikela ngematuba lamabili nobe emazini lamabili. Kodvwa kwakwentiwa njani nangabe umIsrayeli aphuyile futsi ete ngisho nalamazini lamabili? Esimeni lesinjalo, Jehova abemvumela umIsrayeli loweswele kutsi anikele ngafulaha lomncane. Nobe kunjalo, naka naku lokubalulekile: Kwakungakafaneli anikele nganome ngumuphi fulaha, kodvwa kwakufanele anikele ‘ngafulaha locolisakele,’ lowawusetjentiswa nakufike tivakashi. (Gen. 18:6) Yini lebeyenta loko kubaluleke?—Fundza Levithikhusi 5:7, 11.
16 Ticabange ungumIsrayeli futsi uphuyile. Nawufika ethendeni lekukhontela nafulaha lomncane kute unikele ngaye njengemhlatjelo, ubona ema-Israyeli lanjingile anikela ngetilwane. Bowungase utive uhlazekile ngemnikelo wakho longasho lutfo wafulaha. Bese uyakhumbula kutsi emehlweni aJehova, umnikelo wakho ubalulekile. Yini lebeyingabangela loko? Kungobe Jehova abefuna kutsi lofulaha ube welizinga lelisetulu. Ecinisweni, Jehova abetsi kuma-Israyeli laphuyile: ‘Ngiyati kutsi angeke nikhone kunikela ngendlela labanikela ngayo labanye, kodvwa ngiyati kutsi loko leningipha kona ngulokuncono kakhulu.’ Kuliciniso kutsi Jehova ukhombisa kucabangela ngekutsi akhumbule kutsi tinceku takhe tilinganiselwe futsi netimo tato atifani.—Hla. 103:14.
17. Ngumsebenti lonjani lesingaciniseka kutsi Jehova uyawemukela?
17 Singadvudvuteka ngekwati kutsi kucabangela kwaJehova kumenta awemukele umsebenti lesiwenta ngemphefumulo wonkhe. (Khol. 3:23) Dzadze losakhulile wase-Italy libito lakhe lokunguConstance utsi: “Kukhuluma nalabanye ngeMdali wami ngiko lengitsandza kakhulu kukwenta. Kungako ngichubeka ngishumayela futsi ngichuba tifundvo teliBhayibheli. Ngaletinye tikhatsi ngiyatisola ngekutsi angikwati kwenta lokunyenti ngenca yemphilo yami. Kodvwa ngiyati kutsi Jehova uyasati simo sami nekutsi uyangitsandza futsi uyakujabulela loko lengikhona kukwenta.”
LINGISA KUCABANGELA KWAJEHOVA
18. Nguyiphi indlela batali labangalingisa ngayo sibonelo saJehova?
18 Singakulingisa njani kucabangela kwaJehova? Cabanga futsi ngendlela Jehova lasebentelana ngayo naLoti. Jehova abesesikhundleni lesisetulu; nobe kunjalo, wamlalela ngemusa Loti ngesikhatsi aveta indlela lativa ngayo. Nkulunkulu wasilalela sicelo saLoti. Nangabe ungumtali, ungasilingisa yini sibonelo saJehova? Ungatilalela yini ticelo tebantfwana bakho futsi nakungenteka wente ngekuvumelana netifiso tabo? Sikhuluma ngaloku, Sicongosekulindza saSeptember 1, 2007, (ngesiZulu) saveta kutsi labanye batali bangase bacoce nebantfwana babo nabenta imitsetfo yasekhaya. Nasi sibonelo: Batali bangancuma kubeka sikhatsi sekubuya ekhaya, futsi banelilungelo lekukhetsa sikhatsi lesitsite labafuna kutsi bantfwana babo babuye ngaso ekhaya. Nobe kunjalo, batali labangemaKhristu bangahle balalele imibono yebantfwana babo ngesikhatsi labasibekile. Ngaletinye tikhatsi, batali bangakhetsa kwenta lushintjo kuleso sikhatsi labasibekile nangabe nje loko kungaphikisani netimiso teliBhayibheli. Batali bangatfola kutsi nabalalela imibono yebantfwana babo mayelana nemitsetfo yasekhaya, labantfwana bayayicondza lemitsetfo futsi bayayilalela.
19. Labadzala bangetama njani kulingisa kucabangela kwaJehova?
19 Labadzala belibandla bayetama kulingisa kucabangela kwaJehova ngekutsi batinake timo emakholwa labakanye nawo labhekana nato. Khumbula kutsi Jehova abeyijabulela imihlatjelo lebeyentiwa ngema-Israyeli laphuyile. Ngendlela lefanako, labanye bazalwane nabodzadzewetfu abakhoni kwenta lokwengetiwe emsebentini wekushumayela, mhlawumbe ngenca yetinkinga temphilo nobe kukhula. Kutsiwani nangabe laba labatsandzekako beva buhlungu ngekwehluleka kwabo? Ngemusa labadzala bangabacinisekisa kutsi Jehova uyabatsandza ngenca yekutsi bamnika lokuncono kakhulu.—Mak. 12:41-44.
20. Kucabangela kusho kutigodla yini ekukhonteni Nkulunkulu? Chaza.
20 Kuliciniso kutsi asifuni kuphambatisa kucabangela nekutigodla ekukhonteni kwetfu Nkulunkulu, kute sibe nemusa kitsi. (Mat. 16:22) Asifuni kukutsatsa melula bese siyatitsetselela ngendlela lesenta ngayo tintfo ngekutitjela kutsi siyacabangela. Kunaloko, sonkhe kudzingeka ‘siphikelele’ kute sisekele uMbuso waNkulunkulu. (Luk. 13:24) Sifuna kulinganisela kuletimiso letimbili. Kwekucala, asifuni kutigodla emsebentini wetfu wekushumayela. Kwesibili, siyakhumbula kutsi Jehova akaceli lokungetulu kwaloko lesingamnika kona. Nasimniketa lokuncono, singaciniseka ngekutsi uyajabula. Asijabuli yini ngekukhonta Nkulunkulu lobongako nalocabangelako? Esihlokweni lesilandzelako, sitawucoca ngaletinye tincenye letimbili tebunguye baJehova.—Hla. 73:28.