1, 2. Ita bele halo saida ba nafatin?

 IRMÁN ida naran Monika hatete: “Haʼu ho haʼu-nia laʼen kaben besik tinan 35 ona, no ami koñese malu ho didiʼak. Maibé, ami naʼin-rua hakarak koñese malu diʼak liután tanba sei iha buat barak neʼebé ami seidauk hatene!” Klaru katak ita hotu hanoin hanesan neʼe kona-ba ita-nia kaben no belun neʼebé diʼak.

² Kuandu ita koñese didiʼak ema neʼebé ita hadomi, ida-neʼe halo ita kontente. Maibé relasaun neʼebé importante liu mak ho Maromak Jeová, no buat neʼebé ita hatene kona-ba Jeová sei la iha rohan. (Rom 11:33) Sin, ita bele aprende no hafolin liután Jeová nia hahalok sira ba nafatin.—Ecle 3:11.

3. Iha lisaun neʼe, ita sei aprende kona-ba saida?

³ Iha lisaun uluk, ita aprende kona-ba Jeová nia hahalok rua, fasil atu hakbesik no la fihir ema. Iha lisaun neʼe, ita sei aprende kona-ba Jeová nia hahalok furak rua tan, neʼe mak laran-luak no la ulun-toos. Liuhusi lisaun neʼe, ita sei haree ho momoos katak “Jeová mak diʼak ba ema hotu, no ninia laran-sadiʼa hatudu iha buat hotu neʼebé nia kria”.—Sal 145:9.

4. Hahalok laran-luak katak sá?

⁴ Hahalok laran-luak katak sá? Ita bele hetan resposta ba pergunta neʼe husi Jesus nia liafuan iha Apostolu 20:35, neʼebé dehan: “Diʼak liu fó liu fali simu.” Ema neʼebé laran-luak mak ema neʼebé ho haksolok fó ninia tempu, forsa, sasán ka osan hodi ajuda ema seluk. Sin, buat neʼebé importante liu mak fó ho laran, laʼós fó prezente neʼebé folin-boot. (Lee 2 Korinto 9:7.) No ezemplu diʼak liu hotu kona-ba neʼe mak Maromak Jeová.

5. Iha dalan saida deʼit mak Jeová hatudu ninia laran-luak?

 ⁵ Iha dalan saida deʼit mak Jeová hatudu ninia laran-luak? Bíblia hatete: “Jeová mak diʼak ba ema hotu.” Nia fó buat hotu neʼebé ita ema presiza, inklui mós ba ema neʼebé la adora nia. Nia “halo loron saʼe ba ema aat no ba ema diʼak, halo mós udan-been tun ba ema laran loos no ba ema laran laloos”. (Mt 5:45) Apóstolu Paulo mós hatete ba ema jentiu sira: “Nia haraik nia laran-luak no nia fó ba imi udan husi lalehan no tempu diʼak atu imi hetan ai-fuan barak, no fó han no halo imi haksolok iha imi-nia moris.” (Apos 14:17) Klaru katak Jeová hatudu laran-luak ba ema hotu.—Lc 6:35.

6, 7. (a) Jeová sente haksolok atu hatudu laran-luak liuliu ba sé? (b) Oinsá mak Jeová tau matan ba ninia atan sira? Fó toʼok ezemplu.

⁶ Maibé, Jeová sente haksolok atu hatudu laran-luak liuliu ba ninia atan sira. Liurai David hatete: “Uluk haʼu mane joven, agora haʼu sai idade ona, maski nuneʼe haʼu seidauk haree ema ida neʼebé loos la hetan ajuda, ka ninia oan sira buka paun.” (Sal 37:25) Ema kristaun barak mós hetan ona ajuda husi Jeová. Mai ita haree ezemplu ida.

⁷ Tinan balu liubá, irmán pioneiru ida naran Nancy hasoru susar ida. Nia presiza selu osan dolar 66 ba nia uma aluga iha loron aban, maibé ninia osan la toʼo. Nia hatete: “Haʼu halo orasaun kona-ba neʼe, hafoin haʼu bá haʼu-nia serbisu iha restaurante. Iha kalan neʼebá, haʼu la hein atu simu bonus barak husi kliente neʼebé mai han tanba loron baileet. Maibé, haʼu hakfodak tanba kliente barak mai han. No bainhira haʼu serbisu hotu no sura osan neʼebé haʼu hetan, ninia folin mak dolar 66.” Irmán Nancy fiar katak Jeová mak ajuda nia hodi taka buat neʼebé nia kuran.—Mt 6:33.

8. Saida mak Jeová nia prezente neʼebé folin-boot liu hotu?

⁸ Jeová mós fó prezente folin-boot ba ema hotu neʼebé hakarak simu. Saida mak neʼe? Neʼe mak fó ninia Oan-Mane nuʼudar sakrifísiu. Jesus hatete: “Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.” (Joao 3:16) Iha eskritura neʼe, liafuan “mundu” mak kona-ba ema. Neʼe katak Jeová fó oportunidade ba ema hotu atu simu ninia prezente neʼebé folin-boot tebes. No sira neʼebé tau fiar ba Jesus sei hetan moris rohan-laek! (Joao 10:10) Ida-neʼe hatudu ho momoos katak Jeová mak laran-luak.

9. Oinsá mak ita bele banati-tuir Jeová nia laran-luak?

 ⁹ Oinsá mak ita bele banati-tuir Jeová nia laran-luak? Jeová fó “buat hotu neʼebé  ita kuran atu moris haksolok”, tan neʼe ita mós hakarak hatudu laran-luak ba ema seluk hodi halo sira haksolok. (1 Tim 6:17-19) Ita mós ho laran-kontente fó ita-nia sasán ba ita-nia família, kolega sira, no ema neʼebé kuran. (Lee Deuteronômio 15:7. a) Saida mak bele ajuda ita atu hatudu laran-luak nafatin? Ema kristaun balu, bainhira sira simu buat ruma husi ema, sira mós bele halo fali hanesan neʼe ba ema seluk. Kongregasaun kristaun hetan bensaun liuhusi irmaun-irmán barak neʼebé hatudu laran-luak ba malu.

10. Saida mak dalan ida neʼebé diʼak tebes atu hatudu laran-luak?

¹⁰ Dalan ida neʼebé diʼak tebes atu hatudu laran-luak mak hodi uza ita-nia tempu no forsa atu ajuda no fó laran-manas ba ema seluk. (Gal 6:10) Atu bele hatene se ita hatudu laran-luak duni ka lae, husu ba ita-nia an: ‘Haʼu prontu atu fahe haʼu-nia tempu ba ema seluk hodi see tilun ba sira ka lae? Se ema ruma husu haʼu atu ajuda kona-ba buat ruma, haʼu prontu ka lae? Horibainhira mak haʼu hatudu laran-luak hodi gaba haʼu-nia família ka maluk kristaun?’ Kuandu ita iha toman atu “fó”, ida-neʼe sei halo ita hakbesik liután ba Jeová no mós ba ita-nia maluk sira.—Lc 6:38; Prov 19:17.

11. Iha dalan saida deʼit mak ita bele hatudu laran-luak ba Jeová?

 ¹¹ Ita mós bele hatudu laran-luak ba Jeová. Bíblia hatete: “Hahiʼi Jeová ho ó-nia sasán neʼebé folin.” (Prov 3:9) “Sasán neʼebé folin” inklui mós ita-nia tempu, forsa no osan neʼebé uza atu serbí Jeová. Kona-ba hatudu laran-luak ba Jeová, labarik sira  mós bele aprende. Porezemplu, irmaun ida naran Jason hatete: “Bainhira ami fó kontribuisaun iha reuniaun-fatin, ami husik ami-nia oan sira atu tau osan iha kaixa kontribuisaun. Sira kontente atu halo ida-neʼe, tanba sira sente katak sira ‘fó buat ruma ba Jeová’.” Labarik sira neʼebé husi kiʼik kedas aprende atu hatudu laran-luak ba Jeová, karik sira sei laran-luak nafatin toʼo boot.—Prov 22:6.

12. Hahalok “la ulun-toos” katak sá?

¹² Jeová nia hahalok furak ida seluk mak nia “la ulun-toos”. (Tito 3:1, 2, MF) Hahalok neʼe katak sá? Ema neʼebé la ulun-toos, nia iha hanoin neʼebé luan atu troka ninia hanoin hodi tuir situasaun. Duké sempre kaer metin deʼit ba ukun-fuan no lei sira, nia hatudu laran-diʼak ba ema seluk hodi tuir sira ida-idak nia situasaun. Ema hanesan neʼe prontu atu rona ba ema seluk, no se bele, nia halo tuir sira-nia hakarak hodi halo mudansa kona-ba ninia hanoin.

13, 14. (a) Oinsá mak Jeová hatudu katak nia la ulun-toos? (b) Liuhusi istória kona-ba Lot, ita bele aprende saida kona-ba Jeová?

¹³ Oinsá mak Jeová hatudu katak nia la ulun-toos? Nia hanoin ninia atan sira-nia sentimentu, no dala barak nia mós halo mudansa hodi simu buat neʼebé sira husu. Porezemplu, mai ita hanoin kona-ba oinsá mak Jeová hatudu laran-diʼak ba ninia atan ida, naran Lot. Bainhira Jeová deside atu halakon sidade Sodoma no Gomorra, nia haruka Lot atu halai ba foho. Maibé, Lot husu fali Jeová atu halai ba fatin seluk. Hanoin toʼok, Lot husu Jeová atu troka Ninia mandamentu!—Gên 19:17-19; lee Gênesis 19:20. b

¹⁴ Lot nia hahalok neʼe bele halo ita hanoin katak nia mak ema neʼebé fiar la metin no la halo tuir Maromak. Tuir loloos, Lot la iha razaun atu sai taʼuk tanba Jeová mak sei proteje nia iha situasaun naran deʼit. Maski nuneʼe, Jeová hanoin Lot nia sentimentu no simu buat neʼebé nia husu hodi halai ba sidade neʼebé uluk Jeová hanoin atu halakon. (Lee Gênesis 19:21, 22. c) Klaru katak Jeová la ulun-toos no prontu atu halo mudansa hodi hanoin ema nia sentimentu no situasaun.

15, 16. Oinsá mak Moisés nia Ukun-Fuan hatudu katak Jeová la ulun-toos? (Haree dezeñu iha pájina 12.)

¹⁵ Moisés nia Ukun-Fuan mós hatudu katak Jeová mak Maromak neʼebé la ulun-toos. Porezemplu, tuir Ukun-Fuan, kuandu ema Israel ida la iha osan atu hasaʼe bibi-malae ka bibi-timur nuʼudar sakrifísiu, nia bele lori manu-pombu rua. Maibé oinsá ho ema neʼebé kiak tebes toʼo la bele lori manu-pombu rua? Ema hanesan neʼe bele hasaʼe trigu uitoan nuʼudar sakrifísiu. Maibé, buat neʼebé Jeová husu sira mak laʼós trigu baibain deʼit. Sira tenke lori “trigu diʼak”, hanesan trigu neʼebé sira uza ba bainaka importante ruma. (Gên 18:6) Ida-neʼe hatudu saida kona-ba Jeová?—Lee Levítico 5:11. d

¹⁶ Hanoin toʼok se ita mak ema Israel neʼebé kiak. Nuʼudar ita lori trigu uitoan ba tabernákulu, ita haree ema riku sira lori animál sira. Ita sente moe tanba ita-nia  sakrifísiu mak kiʼik deʼit, maibé hanoin-hetan fali katak ita-nia sakrifísiu mós iha folin. Tanbasá? Jeová husu ita atu lori trigu neʼebé kualidade diʼak. Neʼe hanesan Jeová hatete ba ita: ‘Haʼu komprende ó la iha kbiit atu fó buat neʼebé hanesan ho ema seluk, maibé haʼu mós hatene katak ó hakaʼas an duni atu fó buat diʼak neʼebé ó iha.’ Loos duni, Jeová la ulun-toos, no nia hanoin ninia atan ida-idak nia kbiit no situasaun.—Sal 103:14.

17. Jeová simu ita-nia serbisu hanesan saida?

 ¹⁷ Kuandu ita hatene katak Jeová la ulun-toos no nia simu ita-nia serbisu neʼebé ita halo ho laran, ida-neʼe halo ita sente kmaan. (Kol 3:23) Irmán ferik ida husi rai-Itália, naran Constance, hatete: “Haʼu sempre kontente atu koʼalia ba ema seluk kona-ba Kriadór. Ida-neʼe book haʼu atu kontinua haklaken no estuda Bíblia ho ema. Dala ruma, haʼu sai triste tanba haʼu-nia saúde fraku no la bele halo buat barak. Maibé, haʼu hanoin fali katak Jeová hatene haʼu-nia kbiit toʼo iha neʼebé, no nia hadomi haʼu no hafolin buat neʼebé haʼu bele halo.”

18. Oinsá mak inan-aman bele banati-tuir Jeová?

¹⁸ Oinsá mak ita bele banati-tuir Jeová nia hahalok furak neʼe? Mai ita hanoin fali kona-ba dalan neʼebé Jeová hatudu laran-diʼak ba Lot. Maski Jeová mak iha direitu atu haruka Lot, maibé ho laran-diʼak nia rona ba Lot no simu buat neʼebé Lot husu. Nuʼudar inan-aman, ita mós bele halo nuneʼe, hodi rona ba buat neʼebé oan sira husu, no se ida-neʼe diʼak, ita bele halo mudansa ruma tuir sira-nia hakarak. Iha Menara Pengawal, 1 Setembru 2007, hatete katak kuandu inan-aman atu halo lei ruma iha família laran, sira mós bele koʼalia hamutuk ho oan sira antes atu halo desizaun. Porezemplu, inan-aman iha direitu atu halo desizaun kona-ba oras neʼebé oan sira tenkesér fila ba uma. Maibé diʼak atu koʼalia uluk ho oan sira, no dala ruma bele simu buat neʼebé oan husu se ida-neʼe la kontra Bíblia nia matadalan. Se inan-aman hatudu katak sira prontu atu hanoin oan sira-nia hakarak, ida-neʼe sei ajuda oan sira atu simu inan-aman nia lei no halo tuir.

19. Oinsá mak katuas sira bele banati-tuir Jeová neʼebé la ulun-toos?

¹⁹ Katuas kristaun sira mós bele banati-tuir Jeová neʼebé la ulun-toos hodi hanoin maluk ida-idak nia situasaun. Hanoin-hetan katak Jeová hafolin ema Israel kiak sira-nia sakrifísiu. Nuneʼe mós ho ohin loron, irmaun-irmán balu la konsege bá haklaken beibeik tanba moras ka idade ona, no dala ruma ida-neʼe halo sira laran-tun. Ba maluk sira hanesan neʼe, katuas sira bele fó fiar ba sira katak Jeová sei hadomi sira no hafolin buat neʼebé sira halo ho laran.—Mc 12:41-44.

20. Hahalok la ulun-toos katak ita lalika hakaʼas an atu serbí Jeová ka lae? Esplika toʼok.

²⁰ Maski nuneʼe, hatudu hahalok la ulun-toos la dehan katak ita lalika hakaʼas an atu serbí Jeová. (Mt 16:22) Ita labele hanoin sala katak serbisu uitoan deʼit ba Jeová toʼo ona maski ita bele halo buat barak. Sin, ita hotu presiza hanoin-hetan nafatin katak Jesus haruka ita “hakaʼas an” atu halo Jeová nia serbisu. (Lc 13:24) Tan neʼe, ita presiza halo tuir matadalan rua. Ida mak hakaʼas an atu serbí Jeová ho ita-nia kbiit tomak, no ida seluk mak Jeová nunka husu buat neʼebé ita la bele halo. Kuandu ita hakaʼas an atu halo buat hotu neʼebé ita bele, ita fiar duni katak ita halo Jeová nia laran haksolok. Ita kontente tanba ita serbí Maromak neʼebé la ulun-toos no hafolin ita-nia serbisu, loos ka lae? Iha lisaun tuirmai, ita sei koʼalia kona-ba Jeová nia hahalok furak rua tan.—Sal 73:28.