Yehova Ngwakupaska Ndipuso Ngwakoroŵa

“Ambuya [Yehova] mbamampha kwaku wosi, ndi achitima paku vosi vo akulenga.”—SUMU 145:9.

KUMBI MUNGAKONKHOSKA WULI?

Kumbi ndi mijalidu yiŵi niyi yaku Yehova yo tikhumbika kuyiziŵa ukongwa?

Kumbi tingaja wuli akupaska nge Yehova?

Kumbi ndi nthowa nizi zo tingalongole kuti ndisi akoroŵa nge Yehova?

1, 2. Kumbi ŵanthu wo ŵe pa ubwezi ndi Yehova ŵe ndi mwaŵi wuli?

 MUZICHI munyaki zina laki Monika, wangukamba kuti, “Ndaja ndi murumu wangu kwa vyaka pafupifupi 35. Chinanga kuti ini ndi murumu wangu tiziŵana umampha ukongwa ndipuso taja limoza kwa vyaka vosi ivi, kweni weyosi wechekusambira mijalidu yifya ya munyaki.” Mwambula kukayika, venivi vichitikiya so ŵanthu anandi akutolana ndipuso pakati paku isi ndi wo titanjana nawu.

² Tikondwa kusambira mijalidu yifya ya ŵanthu wo titanjana nawu. Kweni ubwezi widu ndi Yehova ngwakukhumbika ukongwa kuluska chechosi. Tazamufiska cha kuziŵa mijalidu yosi yaku Yehova. (Ŵar. 11:33) Tazamuja ŵaka ndi mwaŵi wakulutirizga kusambira mijalidu yaku Yehova mpaka muyaya.—Wak. 3:11.

3. Kumbi tikambiskanengenji m’nkhani iyi?

³ Nkhani yaluta yatiwovya kuziŵa kuti Yehova ngwakufikirika ndipuso ngwambula sankhu. Sonu tiyeni tikambiskani so mijalidu yamampha yiŵi yaku Yehova, kupaska ndi koroŵa. Kuchita viyo, kutiwovyengi kuziŵa kuti, “Ambuya mbamampha kwaku wosi, ndi achitima paku vosi vo akulenga.”—Sumu 145:9.

YEHOVA NGWAKUPASKA

4. Kumbi kupaska kung’anamuwanji?

⁴ Kumbi kupaska kung’anamuwanji? Tisaniya kwamuka m’mazu ngaku Yesu ngo nge pa Machitidu 20:35, iyu wakukamba kuti: ‘Kupaska kuzisa likondwa kuruska kuronde.’ Ndi mazu ngenanga, Yesu wangukonkhoska vo kupaska ndi mtima wosi kung’anamuwa. Munthu wakupaska wakondwa kugwiriskiya nchitu nyengu yaki, nthazi zaki kweniso vinthu vaki kuti wawovyi anyaki. Kukamba uneneska, munthu yo wapaska ndi mtima wosi waziŵika chifukwa chakuti wapereka vinthu vinandi cha, kweni chifukwa  chakuti wapereka kutuliya pasi pa mtima. (Ŵerengani 2 Ŵakorinte 9:7.) Palivi munthu wakupaska kuluska Yehova Chiuta widu.

5. Kumbi Yehova walongo wuli kuti ngwakupaska?

⁵ Kumbi Yehova walongo wuli kuti ngwakupaska? Iyu wapaska ateŵeti ŵaki ndipuso wo atimusopa cha vinthu vo akhumbika. Mbuneneska kuti, ‘Ambuya [Yehova] mbamampha kwaku wosi.’ Yiwu ‘atuzgiya lumwi pa ŵaheni ndi ŵamampha, ndipu anyiskiya vuwa pa ŵarunji ndi pa ŵazira urunji.’ (Mat. 5:45) Ndichu chifukwa chaki, wakutumika Paulo wangukambiya ŵanthu wo ŵenga Akhristu cha kuti, Yehova “wanguchita umampha, pakupaska imwi kutuwa kuchanya vuwa ndi nyengu zakupasiya, ndi pakugutiska mitima yinu ndi vakurya ndi likondwa.” (Mac. 14:17) Vakuwoneke limu kuti Yehova wapaska vinthu ŵanthu wosi.—Luka 6:35.

6, 7. (a) Kumbi Yehova wakondwa kupaska ŵanthu naŵa vinthu vakukhumbika? (b) Konkhoskani mo Chiuta wawovye ateŵeti ŵaki akugomezgeka.

⁶ Yehova wakondwa kupaska ateŵeti ŵaki akugomezgeka vinthu vo akhumbika. Fumu Davidi yingukamba kuti: ‘Ndenga muhurwa [mwana], ndipu sonu ndakota; kweni ndilivi kuwona kuti murunji wasiyika pamwenga ŵana ŵaki achipempha chakurya.’ (Sumu 37:25) Akhristu anandi akugomezgeka awona kuti Yehova waphwere nadi. Ŵanaŵaniyani chakuwoniyapu ichi.

⁷ Vyaka vajumpha, Nancy yo wachita uteŵeti wanyengu zosi wenga ndi suzgu ndipu wangukamba kuti: “Ndakhumbikanga kusaniya ndalama zakukwana madola 66 nga ku America kuti ndilipiri nyumba yo ndajanga. Ndakhumbikanga kulipira mawa laki. Ndaziŵanga cha mo ndatingi ndisaniriyengi ndalama zenizi. Ndinguromba kwaku Yehova za suzgu lenili ndipu pavuli paki ndinguluta ko ndagwiranga nchitu yakupereke vakurya. Ndati ndaluta ku nchitu mazulu, ndaziŵanga cha kuti ŵanthu andipaskengi ndalama zakundiwonga chifukwa chakuti ŵanthu atuza anandi cha mukati mwa sabata. Ndinguzizwa kuti kunguza ŵanthu anandi kuzigula chakurya. Ndati ndamala kugwira nchitu, ndinguŵerengeske ndalama zo ŵanthu angundipaska, zingukwana madola 66.” Nancy wagomezga kuti Yehova wapaska nadi munthu vinthu vo wakhumbikiya.—Mat. 6:33.

8. Kumbi Yehova ngwakunozgeka kupaska ŵanthu chawanangwa nichi?

⁸ Yehova ngwakunozgeka kupaska munthu weyosi chawanangwa chakuzirwa ukongwa. Kumbi chawanangwa chenichi ndi nichi? Sembi yakutiwombo ya Mwana waki. Yesu wakukamba kuti: “Pakuti Chiuta wangwanja viyo charu, viyo kuti wangupaska Mwana waki wakuwa yija, alinga kuti yosi wakuvwana mwaku iyu wareki kutayika, kweni waŵi ndi umoyu wamuyaya.” (Yoh. 3:16) M’lemba ili, mazu ngakuti “charu” ngang’anamuwa ŵanthu. Mwaviyo, Yehova wapereka chawanangwa chakuzirwa chenichi kwaku weyosi yo wasankha kuchilonde. Ŵanthu wo avwana mwaku Yesu azamulonde umoyu wamuyaya! (Yoh. 10:10)  Uwu mbukaboni ukuru wakuti Yehova ngwakupaska.

JANI AKUPASKA NGE YEHOVA

9. Kumbi tingaja wuli akupaska nge Yehova?

  ⁹ Kumbi tingaja wuli akupaska nge Yehova? Yehova, ‘watipaska vosi kwakusakata kuti tikakondwere.’ Mwaviyo, tikhumbika kuja “apusu kupaska” anyidu vinthu, venivi vitovya kuti ajengi ndi likondwa. (1 Tim. 6:17-19) Tikondwa kupaska abali ŵidu vinthu kweniso kuwovya ŵanthu wo akhumbika chovyu. (Ŵerengani Marangu 15:7.) Nchinthu wuli cho chingatikumbuska kuti tijengi akupaska? Akhristu anyaki atesesa kuti nyengu yeyosi yo alonde chawanangwa, nawuso asaniya mpata wakupereka chawanangwa ku munthu munyaki. Mpingu wachikhristu ngwakutumbikika ukongwa chifukwa mwe abali ndi azichi anandi wo atesesa kuja ndi jalidu lakupaska.

10. Kumbi ndi nthowa yamampha niyi yo tingalongole kuti ndisi akupaska?

¹⁰ Mo tiŵereŵete ndipuso vo tichita vingalongo kuti ndisi akupaska. Kumbi ŵanthu tingaŵapaska mu nthowa wuli? Tingachita venivi, mwakugwiriskiya nchitu nyengu yidu ndi nthazi zidu kuti tichiski anyidu. (Ŵag. 6:10) Kuti tiziŵi asani tichita nadi venivi, tingajifumba kuti: ‘Kumbi anyaki awona kuti nde wakujipereka kweniso nde wakunozgeka kuvwisiya masuzgu ngawu? Asani nde ndi nyengu, kumbi ndizomera asani munthu watindipempha kuti ndimuwovyi kugwira nayu nchitu pamwenga watindituma kuti nkhamutole vinthu vo wakhumba? Kumbi ndi zukwanji po ndingulumba munthu wa m’banja langu pamwenga Mkhristu munyangu?’ Mwambula kukayika, asani ‘tipaska,’ tindere kufupi ndi Yehova kweniso anyidu.—Luka 6:38; Nthanthi 19:17.

11. Kumbi ndi nthowa zinyaki nizi zo tingapaskiya Yehova?

 ¹¹ Tingaja so akupaska kwaku Yehova. Malemba ngatitichiska kuti: “Tumbikanga Ambuya ndi chuma chaku.” (Nthanthi 3:9) “Chuma” cho chikambika yapa chisazgapu nyengu, nthazi kweniso vinthu vidu vo tingagwiriskiya  nchitu pakuteŵete Chiuta. Ŵana nawu angasambira kupaska Yehova. Mubali munyaki zina laki Jason wangukamba kuti: “Asani banja lidu likhumba kupereka ndalama, tituma ŵana ŵidu kuti ndiwu akaponyi m’bokosi ku Nyumba ya Ufumu. Yiwu akondwa ukongwa asani achita viyo chifukwa chakuti ‘apereka kwaku Yehova.’” Ŵana wo aziŵa ŵeche anamana kuti kupaska Yehova kuzisa likondwa, alutirizga kupaska Yehova asani akuwa.—Nthanthi 22:6.

YEHOVA NGWAKOROŴA

12. Kumbi kuja wakoroŵa kung’anamuwanji?

¹² Koroŵa, ndi jalidu linyaki lamampha laku Yehova. Kumbi kuja wakoroŵa kung’anamuwanji? (Tito 3:1, 2) Munthu wakoroŵa wasuzga cha kuzomerezga kuti vinthu vinyaki vichitiki. Nyengu zosi wachita vinthu chifukwa chakulondo dangu pe cha. Iyu wachita vinthu mwankhaza cha kweni wachitiya ŵanthu vinthu mwachanju ndipuso watesesa kuvwisa masuzgu ngawu. Waja wakunozgeka kuvwisiya vo anyaki akamba kweniso asani nkhwakwenere, watiŵapaska vo akhumba pamwenga watiŵazomerezga kuchita vinthu vinyaki.

13, 14. (a) Kumbi Yehova walongo wuli kuti ngwakoroŵa? (b) Kumbi tingasambiranjipu pa vo Chiuta wanguchita ndi Lote?

¹³ Kumbi Yehova walongo wuli kuti ngwakoroŵa? Iyu waŵanaŵaniya mo ateŵeti ŵaki avwiya ndipu kanandi watiŵapaska vo apempha. Mwakuyeruzgiyapu, ŵanaŵaniyani mo Yehova wanguchitiya ndi Lote, yo wenga munthu murunji. Yehova wati wasimikizgiya kuti wabwanganduwengi msumba wa Sodomu ndi Gomora, wangupaska Lote ulongozgi wambula kusuzga kuti wathaŵiyi kumapiri. Pa chifukwa chambula kuziŵika, Lote wangupempha kuti wathaŵiyi ku malu nganyaki. Aŵanaŵaniyani, kuti Lote wafiki pakupempha Yehova kuti wasinthi ulongozgi Waki!—Ŵerengani Chiyambo 19:17-20.

¹⁴ Vingaŵa vambula kusuzga kuti munthu wakambi kuti Lote wengavi chivwanu pamwenga wenga wambula kuvwiya. Kukamba uneneska, Lote wengavi chifukwa chakuchitiya mantha pakuti Yehova watingi wamuvikiliyengi kwekosi ko watingi wakengi. Iyu wenga ŵaka ndi mantha kweni Yehova wanguvwisa mo Lote waŵanaŵaniyanga. Yehova wanguzomerezga Lote kuthaŵiya kumsumba wo Iyu wakhumbanga kuwubwanganduwa. (Ŵerengani Chiyambo 19:21, 22.) Yapa viwoneke limu kuti Yehova wamizgiriya vinthu cha. Iyu ngwakumira mtima cha kweni ngwakoroŵa.

15, 16. Kumbi Chilangulu chaku Mosese chilongo wuli kuti Yehova ngwakoroŵa? (Wonani chithuzi cho che papeji lo payambiya nkhani yeniyi.)

¹⁵ Ŵanaŵaniyani so chakuwoniyapu chinyaki chaku Yehova pa nkhani ya koroŵa cho che m’Chilangulu chaku Mosese. Asani munthu wa Chiyisraele ndi mukavu ukongwa ndipu watondeka kupereka sembi ya mwana wa mbereri pamwenga mbuzi, waperekanga nkhunda ziŵi pamwenga viwunda viŵi. Nanga asani watondeka kupereka nkhunda ziŵi? Yehova wazomerezganga kuti wapereki ufwa umanavi. Kweni ziŵani fundu yakukhumbika iyi: Wakhumbikanga kusaniya “ufwa wamampha,” wo ŵanthu agwiriskiyanga nchitu asani kwaza alendu akutumbikika. (Chiy. 18:6) Nchifukwa wuli kupereka ufwa wamampha kwenga kwakukhumbika?—Ŵerengani Ŵalevi 5:7, 11.

¹⁶ Ŵanaŵaniyani kuti ndimwi Muyisraele, ndipu ndimwi mukavu ukongwa. Pa nyengu yo mufika pachihema ndi ufwa umanavi kuti mukapereki sembi, muwona Ayisraele akukhupuka atuza ndi viŵetu. Mungachita soni ukongwa chifukwa cha sembi yinu ya ufwa yo yiwoneka nge kuti njambula kukhumbika. Pavuli paki, mukumbuka kuti Yehova watiyiwona kuti njakukhumbika ukongwa. Nchifukwa wuli tikamba viyo? Chifukwa chakuti Yehova wakhumbanga kuti ufwa wakuchipereka sembi ujengi wamampha ukongwa. Tingakamba kuti Yehova wakambiyanga Ayisraele akavu kuti: ‘Ndiziŵa kuti mungafiska cha kupereka vinandi nge  mo anyinu achitiya, kweni ndiziŵa so kuti mutindipaska vinthu vo ndi mtima wosi.’ Kukamba uneneska, Yehova walongo kuti ngwakoroŵa mwa kuziŵa vo ateŵeti ŵaki angafiska ndipuso mo vinthu viliri pa umoyu wawu.—Sumu 103:14.

17. Kumbi muwona kuti Yehova wazomerezga uteŵeti wa mtundu wuli?

¹⁷ Tichiskika kuziŵa kuti Yehova wazomerezga kumuteŵete ndi mtima wosi chifukwa chakuti ngwakoroŵa. (Ŵakol. 3:23) Muzichi munyaki wakukota zina laki Constance, wangukamba kuti: “Ndaja ndichikambiya ŵanthu za Mulengi wangu. Nchitu yeniyi nditiyiyanja ukongwa. Ndichu chifukwa chaki ndilutirizga kupharazga kweniso kusambiza ŵanthu Bayibolo. Nyengu zinyaki ndidandawula kuti ndichita vinandi cha chifukwa chakuti ndilivi nthazi. Kweni ndiziŵa kuti Yehova waziŵa vo ndingafiska, watindiyanja ndipuso wawonga vo ndifiska.”

JANI AKOROŴA NGE YEHOVA

18. Kumbi ndi nthowa yimoza niyi yo apapi angayezge Yehova?

¹⁸ Kumbi tingaja wuli akoroŵa nge Yehova? Ŵanaŵaniyani so mo Yehova wanguchitiya ndi Lote. Yehova ndiyu wenga ndi udindu wakumukambiya ko wangathaŵiya, iyu wanguvwisiya ndi mtima wosi po Lote wakonkhoskanga vo waŵanaŵananga. Chiuta wanguzomerezga vo Lote wangupempha. Asani ndimwi mupapi, kumbi mungalondo wuli chakuwoniyapu chaku Yehova? Kumbi mungavwisiya asani ŵana ŵinu atikupemphani ndipu asani nkhwakwenere mungazomerezga vo apempha? Pa nkhani yeniyi, Chigongwi cha Alinda cha Chichewa cha September 1, 2007, chingukamba kuti apapi anyaki angakambiskana ndi ŵana ŵawu asani akhumba kujalikiska marangu panyumba. Mwakuyeruzgiyapu, apapi angasankha nyengu yo ŵana ŵawu angafikiya panyumba chifukwa yiwu ndiwu ŵe ndi udindu wenuwu. Chinanga kuti ve viyo, apapi achikhristu atenere kuvwisiya vo ŵana ŵawu angakamba vakukwaskana ndi nyengu yo apapi akujalikiska. Nyengu zinyaki, apapi angasankha kusintha nyengu yo akujalikiska asani vo asankha vikoliyana ndi fundu za m’Bayibolo. Apapi aziŵi kuti asani aŵanaŵaniya vo ŵana ŵawu akamba pa nkhani ya marangu ngo ajalikiska, ŵana aziŵengi chifukwa cho ajalikiskiya marangu ngo ndipu avwiyengi.

19. Kumbi ŵara angayesesa wuli kuja akoroŵa nge Yehova?

¹⁹ Ŵara atesesa kuyezga Yehova pa nkhani yakoroŵa mwakuŵanaŵaniya masuzgu ngo Akhristu anyawu akumana nangu. Kumbukani kuti Yehova warumbanga chinanga ndi sembi zo Ayisraele akavu aperekanga. Mwakuyanana ŵaka, abali ndi azichi anyaki achita vinandi cha mu uteŵeti chifukwa cha kutama pamwenga kukota. Nanga abali ndi azichi akwanjiwa ŵenaŵa asani adandawula kuti achita vinandi cha mu uteŵeti? Ŵara akhumbika kuŵasimikizgiya mwachanju abali ndi azichi ŵenaŵa kuti Yehova watiŵayanja chifukwa cha uteŵeti wawu wo achita ndi mtima wosi.—Marko 12:41-44.

20. Kumbi kuja wakoroŵa kung’anamuwa kutondeke dala kuteŵete Chiuta? Konkhoskani.

²⁰ Kukamba uneneska, tikhumbika cha kujigowoke asani titondeke dala kuteŵete Chiuta tichiŵanaŵana kuti ndisi akoroŵa. (Mat. 16:22) Tikhumbika cha kuchita ulesi pakuteŵete ndi kwamba kujigowoke mwakukamba kuti tachita vo tingafiska. M’malu mwaki, tosi tikhumbika ‘kulimbalimba mwanthazi’ kuti tiwovyi nchitu za Ufumu. (Luka 13:24) Mbuneneska kuti titesesa kulondo fundu ziŵi izi: Kuchita chechosi cho tingafiska pakuteŵete Chiuta kweniso tikumbuka kuti Yehova watitipempha kuchita vo tingatondeka cha kufiska. Asani titimuteŵete ndi mtima wosi, tikhoza kuja ndi chigomezgu kuti wakondweseka nasi. Kumbi tikondwa cha kuteŵete Ambuya wo alumba kweniso mbakoroŵa? M’nkhani yakulondopu, tikambiskanengi so mijalidu yamampha yiŵi yaku Yehova.—Sumu 73:28.

[Mafumbu]

[Chithuzi papeji 13]

Ayisraele anguchiskika kuti ajengi akupaska nge Yehova (Wonani pa  ndimi 9)

[Chithuzi papeji 14]

“Tumbikanga Ambuya ndi chuma chaku.”—Nthanthi 3:9 (Wonani pa  ndimi 11)

“Chosi cho mungachita, chitani nge mbakutakatakiya Ambuya.”—Ŵakol. 3:23 (Wonani pa  ndimi 17)