1, 2. Yumi bai gat rot long mekim wanem samting inap oltaim oltaim?

 WANPELA sista nem bilong em Monika, em i bin marit inap olsem 35 yia nau, em i tok: “Mi na man bilong mi i save gut long narapela narapela. Tasol maski planti yia i go pinis, mipela i wok long lain yet long narapela narapela!” Planti bilong yumi inap mekim wankain tok long poroman marit o ol pren bilong yumi.

² Yumi save amamas long kisim sampela save moa long ol lain yumi laikim. Yumi save kisim bikpela amamas moa taim yumi kisim save long Jehova, em nambawan gutpela Pren bilong yumi. Tasol yumi no inap tru long save long olgeta liklik samting long God. (Rom 11:33) Yumi bai gat rot long kisim save yet long ol pasin bilong Jehova inap oltaim oltaim na laikim moa yet ol dispela pasin.—Sav. 3:11.

3. Long dispela stadi yumi bai kisim save long wanem samting?

³ Stadi i kamap paslain i bin helpim yumi long pilim tru 2-pela pasin bilong Jehova. Yumi kisim save olsem ol man i no pret long i go long em, na em i save mekim wankain pasin long olgeta man. Long dispela stadi yumi bai kisim save long pasin bilong Jehova long givim samting na bihainim stretpela tingting. Dispela bai helpim yumi long kliagut olsem Jehova “i save mekim gutpela pasin long olgeta manmeri na em i save marimari long olgeta samting em i bin wokim.”—Sng. 145:9.

4. Man husat i gat pasin bilong givim, em i save mekim wanem?

⁴ Man husat i gat pasin bilong givim, em i save mekim wanem? Tok bilong Jisas long Aposel 20:35 i bekim dispela askim, em i tok: “Amamas bilong givim samting i winim amamas bilong kisim samting.” Olsem na man husat i gat pasin bilong givim, em i save amamas long givim taim, strong, na ol narapela  samting bilong em long helpim ol arapela. Taim yumi tok man i gat pasin bilong givim samting, yumi tingim pasin bilong em long pilim tru long bel na givim samting, na yumi no tingim bikpela pe bilong samting em i givim. (Ritim 2 Korin 9:7.) Jehova em “God bilong amamas,” na i no gat wanpela man i winim em long pasin bilong givim samting.—1 Tim. 1:11.

5. Olsem wanem Jehova i soim olsem em i gat pasin bilong givim samting?

⁵ Olsem wanem Jehova i soim olsem em i gat pasin bilong givim samting? Baibel i tok: “[God] i save mekim gutpela pasin long olgeta manmeri.” Em i save givim ol samting long olgeta man, long ol man husat i lotuim em na long ol man husat i no lotuim em. “Em i save mekim san bilong en i kam antap long ol man nogut na ol gutpela man, na em i save mekim ren i kam daun long ol stretpela man na ol man i no mekim stretpela pasin.” (Mat. 5:45) Pol i tingim dispela, olsem na taim em i toktok long sampela lain em ol i no Kristen, em i tokim ol olsem Jehova “i mekim ren i lusim skai na i kam daun long yupela, na mekim planti gutpela kaikai i kamap na mekim bel bilong yupela i amamas.” (Apo. 14:17) Dispela i kamapim klia olsem Jehova i save givim ol samting long olgeta kain man.—Luk 6:35.

6, 7. (a) Jehova i save amamas moa yet long helpim husat? (b) Olsem wanem God i save lukautim ol wokman bilong em long ol samting ol i nidim?

⁶ Jehova i save amamas moa yet long givim ol samting em ol wokman bilong em i nidim. King Devit i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru.” (Sng. 37:25) Planti gutpela Kristen i luksave tru olsem Jehova i bin lukautim ol.

⁷ Olsem: Nancy i mekim wok painia, na sampela yia i go pinis wanpela bikpela hevi i painim em. Em i nidim 66 dola bilong baim rent bilong haus long neks de. Tasol em i no gat mani. Em i tok: “Mi kamapim dispela hevi long beten bilong mi, na bihain mi go long wok bilong mi olsem wanpela weitres. Mi no bin ting olsem ol man bai givim planti ekstra mani long mi long dispela nait, long wanem, em wanpela de we wan wan man tasol i save kam long restron. Tasol mi kirap nogut olsem sampela moa kastama i kam long restron long dispela nait. Taim mi pinis long wok na kaunim olgeta ekstra mani ol kastama i givim long mi, olgeta mani inap olsem 66 dola.” Nancy i bilip tru olsem Jehova tasol i bin helpim em long kisim stret samting em i nidim.—Mat. 6:33.

8. Jehova i bin givim wanem bikpela presen?

⁸ Jehova i bin givim wanpela bikpela presen bilong helpim olgeta manmeri. Em i givim wanem presen? Em i givim ofa bilong Pikinini bilong em bilong baim bek ol man. Jisas i tok: “God i laikim tumas olgeta manmeri bilong graun, olsem na em i givim dispela Pikinini tru bilong en long ol bai olgeta man husat i bilip long em ol inap abrusim bagarap na kisim laip oltaim.” (Jon 3:16) Olsem na Jehova i givim dispela presen long olgeta manmeri husat i orait long kisim dispela presen. Olgeta man husat i bilip long Jisas, ol bai kisim  laip bilong i stap oltaim oltaim! (Jon 10:10) Dispela presen i kamapim klia tru olsem Jehova i gat pasin bilong givim samting.

9. Olsem wanem yumi inap bihainim pasin bilong Jehova long givim samting?

 ⁹ Olsem wanem yumi inap bihainim pasin bilong Jehova long givim samting? Jehova i save givim yumi planti samting bilong mekim yumi i amamas, olsem na yumi tu i mas givim samting long ol narapela bilong mekim ol i amamas. (1 Tim. 6:17-19) Yumi amamas long givim ol presen long ol pren na famili bilong yumi na helpim ol arapela husat i sot long ol samting. (Ritim Lo 15:7.) Wanem samting inap helpim yumi long bihainim pasin bilong givim samting? Sampela i wokim disisen olsem taim ol narapela i givim presen long ol, ol tu bai painim rot bilong givim presen long ol narapela. Planti manmeri bilong Jehova long nau i stap gutpela piksa long pasin bilong givim samting.

10. Wanem wanpela gutpela rot tru bilong givim samting?

¹⁰ Wanpela gutpela rot tru bilong givim samting em long yusim taim na strong bilong yumi long helpim na strongim ol arapela. (Gal. 6:10) Olsem wanem? Yu bihainim dispela pasin? Yu ken askim yu yet olsem: ‘Mi save soim olsem mi redi long putim yau long ol narapela? Sapos wanpela i askim mi long helpim em long mekim wanpela wok o long go kisim wanpela samting bilong givim long em, mi save redi long helpim em? Wanem laspela taim we mi bin tok amamas long wanpela long famili o wanpela insait long kongrigesen?’ Taim yumi “bihainim pasin bilong givim ol samting,” dispela bai helpim yumi long pas gut moa wantaim Jehova na ol pren bilong yumi.—Luk 6:38; Snd. 19:17.

11. Yumi ken givim wanem ol samting long Jehova?

 ¹¹ Yumi ken givim ol samting tu long Jehova. Baibel i kirapim yumi long “kisim ol namba wan hap kaikai,” olsem ol nambawan gutpela samting bilong yumi, na givim long Jehova na dispela bai givim biknem long em. (Snd. 3:9) Ol dispela nambawan gutpela samting i makim taim, strong, na  mani em yumi inap yusim long mekim wok bilong Jehova. Ol liklik pikinini tu inap lain long givim samting long Jehova. Wanpela papa nem bilong em Jason, em i tok: “Taim famili bilong mipela i laik givim donesen long Haus Kingdom, mipela i save larim ol pikinini bilong mipela long putim mani long kontribiusen boks. Ol i save amamas, long wanem, taim ol i putim donesen, ol i tingim olsem ol i ‘givim samting long Jehova.’” Taim ol pikinini i stap liklik yet na ol i luksave olsem ol i kisim amamas taim ol i givim samting long Jehova, dispela bai helpim ol long bihainim yet pasin bilong givim samting taim ol i kamap bikpela.—Snd. 22:6.

12. Man i bihainim stretpela tingting em bai mekim wanem?

¹² Narapela gutpela pasin bilong Jehova em olsem, em i save bihainim stretpela tingting. Man i bihainim stretpela tingting em bai mekim wanem? (Tai. 3:1, 2) Em bai redi long daunim laik bilong em yet na bihainim laik bilong ol narapela. I no olsem oltaim em i mas bihainim wanpela lo. Na tu, em i no gat hatpela pasin na em i no strong long ol narapela i mas bihainim tingting bilong em, nogat. Em i save helpim ol narapela na wok strong long pilim tru hevi bilong ol. Em i save redi long putim yau long ol narapela, na sapos i stret, em i save tok orait long ol i kisim samting ol i laik kisim o mekim ol samting ol i laik mekim.

13, 14. (a) Olsem wanem Jehova i soim olsem em i bihainim stretpela tingting? (b) Taim yumi tingim pasin em God i mekim long Lot, dispela i givim wanem skul long yumi long pasin bilong bihainim stretpela tingting?

¹³ Olsem wanem Jehova i soim olsem em i bihainim stretpela tingting? Em i save tingim filings bilong ol wokman bilong em, na em i save larim ol long mekim ol samting long pasin ol yet i makim. Olsem: Tingim pasin em Jehova i mekim long Lot, em man bilong bihainim stretpela pasin. Taim Jehova i laik bagarapim taun Sodom na Gomora, em i tokim Lot long ranawe i go long ples maunten. Tasol sampela samting i mekim na Lot i askim Jehova long larim em long ranawe i go long narapela ples. Tingim! Lot i askim Jehova long senisim tingting bilong Em long ples em bai ranawe i go long en!—Ritim Stat 19:17-20.

¹⁴ Taim yu ritim dispela stori, ating yu pilim olsem Lot i sot long bilip na em i sakim tok. Em tru olsem maski Lot i go long wanem hap, Jehova inap lukautim em na bagarap i no inap painim em. Olsem na i no gat as long Lot i mas pret. Tasol Lot i pret. Jehova i pilim tingting bilong Lot na em i larim em i ranawe i go long narapela taun, maski Jehova i bin tingting pinis long bagarapim dispela taun. (Ritim Stat 19:21, 22.) Dispela i kamapim klia olsem Jehova i no gat hatpela pasin na em i no strong long ol narapela i mas bihainim tingting bilong em, nogat. Oltaim em i save bihainim stretpela tingting.

15, 16. Olsem wanem Lo em Jehova i givim long lain Israel i soim olsem em i save bihainim stretpela tingting? (Lukim piksa long kirap bilong stadi.)

¹⁵ Lo em Jehova i givim long lain Israel i soim tu olsem em i save bihainim stretpela tingting. Olsem: Sapos wanpela Israel i stap rabis na em i no inap long bringim 1-pela sipsip o meme bilong givim olsem ofa, em inap givim 2-pela liklik pisin o 2-pela pisin balus. Tasol olsem wanem sapos wanpela man Israel i stap rabis tru na em i no inap long givim 2-pela pisin balus? Long ol kain man olsem, Jehova i orait long ol i ken givim sampela plaua bilong kukim bret. Tasol Jehova i tokaut stret long wanem kain plaua ol i mas givim. Lo i tok ol Israel i mas givim “gutpela plaua,” em plaua ol i save yusim bilong redim kaikai bilong ol man husat i gat biknem. (Stt. 18:6) Olsem wanem dispela stori i soim olsem Jehova i save bihainim stretpela tingting?—Ritim Wok Pris 5:7, 11.

¹⁶ Orait tingim olsem yu bilong lain Israel na yu stap rabis tru. Taim yu bringim plaua bilong yu i go long alta, yu lukim olsem planti arapela lain Israel husat i gat planti mani i bringim ol animal i kam bilong ofaim. Ating yu bai pilim sem long liklik samting yu bringim olsem ofa. Tasol long dispela taim yu bai tingim olsem ofa bilong yu i dia tru long ai bilong Jehova. Bilong wanem? Lo bilong Jehova i makim olsem yu mas bringim “gutpela plaua,” em plaua i dia tumas. I olsem Jehova i tokim yu: ‘Mi luksave olsem yu no inap givim mi  planti samting olsem ol narapela, tasol mi save olsem yu givim mi ol nambawan gutpela samting bilong yu.’ Dispela stori i kamapim klia tru olsem Jehova i save bihainim stretpela tingting. Em i no save askim ol wokman bilong em long givim ol samting em ol i sot long en.—Sng. 103:14.

17. Yumi mas mekim wanem na bai Jehova i ken orait long wok lotu bilong yumi?

 ¹⁷ Yumi belgut long save olsem Jehova i save bihainim stretpela tingting na em i orait long wok lotu bilong yumi taim yumi givim bel olgeta long mekim wok bilong em. (Kol. 3:23) Wanpela lapun sista bilong Itali, nem bilong em Constance, em i tok: “Oltaim mi save amamas tru long toktok wantaim ol arapela long Man Bilong Wokim yumi. Olsem na mi wok yet long autim tok na mekim ol Baibel stadi. Sampela taim mi save bel hevi olsem mi no inap mekim bikpela wok tumas, long wanem, helt bilong mi i no gutpela tumas. Tasol mi luksave olsem Jehova i save long skel bilong mi, em i laikim mi tru, na em i save amamas long ol wok mi inap long mekim.”

18. Wanem wanpela rot we ol papamama i ken bihainim pasin bilong Jehova?

¹⁸ Olsem wanem yumi inap bihainim stretpela tingting olsem Jehova? Tingim gen pasin em Jehova i mekim long Lot. Jehova i gat rait long tokim Lot long wanem hap em i mas ranawe i go long en. Tasol Jehova i gat gutpela pasin, olsem na em i putim yau taim Lot i kamapim tingting bilong em, na em i larim Lot yet long makim ples em i laik ranawe i go long en. Sapos yu gat pikinini, yu ting yu inap bihainim pasin bilong Jehova? Ating yu ken putim yau na larim pikinini i tokim yu long samting em i laikim, na bihain sapos i stret, orait yu ken senisim tok yu yet i bin mekim. Wastaua bilong Septemba 1, 2007 i tok, taim ol papamama i laik putim ol lo bilong famili, ol i save putim yau na harim tingting bilong pikinini. Olsem: Ating papamama i laik kamapim lo long wanem taim pikinini i mas kamap long haus long apinun. Papamama i gat rait long putim lo, tasol ol i ken toktok wantaim pikinini paslain long ol i makim wanpela taim stret. Sampela taim, i no gat rong long papamama i senisim taim bilong pikinini long kamap long haus; ol i ken mekim olsem sapos disisen bilong ol i no kalapim lo bilong Baibel. Taim papamama i toktok wantaim pikinini paslain long ol i putim lo, ol pikinini bai kliagut na redi long bihainim lo.

19. Olsem wanem ol elda i ken bihainim stretpela tingting olsem Jehova?

¹⁹ Ol elda long kongrigesen i mas bihainim stretpela tingting olsem Jehova. Bilong bihainim stretpela tingting, ol i no ken strong tumas long ol bratasista long mekim samting em ol i no inap long mekim. Tingim, Jehova i laikim tru ofa em ol rabisman bilong lain Israel i givim long em. Long wankain pasin, sampela bratasista inap lusim liklik haptaim tasol long mekim wok autim tok, long wanem, ol i gat hevi long helt bilong ol o ol i wok long kamap lapun. Olsem wanem sapos ol i bel hevi, long wanem, ol i no inap mekim planti wok olsem ol i laik mekim? Ol elda i ken helpim ol long luksave olsem Jehova i laikim ol tru, long wanem, ol i givim bel olgeta long mekim wok bilong em.—Mak 12:41-44.

20. Taim yumi bihainim stretpela tingting na mekim wok bilong God, dispela i makim wanem samting?

²⁰ Taim yumi bihainim stretpela tingting, dispela i no makim olsem yumi mekim liklik wok tasol long wok bilong God, long wanem, yumi laik ‘marimari long yumi yet.’ (Mat. 16:22) Yumi no laik mekim liklik wok tasol taim yumi gat strong inap long mekim bikpela wok moa, nogat. Yumi olgeta i mas tingim tok bilong Jisas olsem: “Yupela i mas taitim bun tru.” (Luk 13:24) Olsem na yumi mas holim stretpela tingting. Yumi mas givim bel olgeta long mekim wok bilong God, na tu, yumi mas tingim olsem Jehova i no inap askim yumi long mekim samting em yumi no inap long mekim. Taim yumi givim bel olgeta long mekim wok bilong God, yumi ken bilip olsem em bai amamas long yumi. Em gutpela tru olsem yumi lotuim God husat i gat pasin bilong bihainim stretpela tingting! Jehova i gat ol gutpela pasin, na long neks stadi yumi bai stori long 2-pela moa bilong ol dispela pasin.—Sng. 73:28.