Manyani Makora Mtima Wa Yehova Wa Kupeleka Na Wa Kupulikiska
“Ku wose Yehova ndi muwemi; ciwuravi cake cili pa vyose vilengiwa vyake.”—SAL. 145:9.
1, 2. Kasi ŵabwezi ŵa Yehova ŵali na mwaŵi wuli?
MUDUMBU munyake zina lake Monika wakati: “Takhala mu nthengwa kwa vyaka pafupifupi 35. Ine na afumu ŵane tikumanyana makora comene. Ndipouli, nangauli pajumpha vyaka vinandi, kweni waliyose wacali kumanya mikhaliro ya munyake iyo pakwamba wakayimanyanga yayi.” Ndimo ŵanthu ŵanandi awo ŵali mu nthengwa panji paubwezi ŵakuwonera nthena.
2 Tikukhumba comene kuti tiŵamanye makora awo tikuŵatemwa. Ubwezi withu na Yehova ndiwo ngwakuzirwa comene kuluska ubwezi uliwose uwo tingaŵa nawo. Tizamuvimanyapo cara vyose vyakukhwaskana na Yehova. (Rom. 11:33) Tili na mwaŵi wa kusambira vinthu vyakukhwaskana na Yehova kwamuyirayira.—Muph. 3:11.
3. Kasi tisambirenge vici mu nkhani iyi?
3 Nkhani iyo yajumpha yikatovwira kumanya umo Yehova waliri wakufwatuka na ŵanji ndiposo wambura kutemwera. Sono tiyeni tiwone mikhaliro yinyake yiŵiri yakukondweska ya Yehova. Mikhaliro iyi nkhupeleka na kupulikiska. Para tacita nthena, timanyenge nadi kuti “ku wose Yehova ndi muwemi; ciwuravi cake cili pa vyose vilengiwa vyake.”—Sal. 145:9.
YEHOVA WALI NA MTIMA WA KUPELEKA
4. Kasi munthu wa mtima wa kupeleka wakuŵa wuli?
4 Kasi mtima wa kupeleka ni vici? Zgoro tikulisanga mu mazgu gha Yesu agho ghali pa Milimo 20:35 ghakuti: “Muli kukondwa kukuru mu kupeleka kuluska mu kupokera.” Na mazgu ghapusu agha, Yesu wakayowoya umo munthu uyo wali na mtima wa kupeleka wakuŵira. Munthu uyo wali na mtima wa kupa, wakupeleka mwawanangwa nyengo yake, nkhongono na katundu kuti ŵanyake ŵasange candulo, ndipo wakucita ivi mwakukondwa. Nakuti munthu wakumanyikwa kuti ngwakupeleka cifukwa ca ukuru wa cawanangwa yayi kweni cilato ico wapelekera cawanangwa ico. (Ŵazgani 2 Ŵakorinte 9:7.) Palije munyake uyo wali na mtima wa kupeleka kuluska Yehova, ‘Ciuta withu wakukondwa.’—1 Tim. 1:11.
5. Kasi Yehova wakulongora wuli kuti wali na mtima wa kupeleka?
5 Kasi Yehova wakulongora wuli kuti wali na mtima wa kupeleka? Wakupeleka vinthu vyakukhumbikwa ku ŵanthu wose, nanga ni awo ŵandambe kumusopa. Nadi, “ku wose Yehova ndi muwemi.” Iyo ‘wakukwezgera dazi lake pa ŵanthu ŵaheni na ŵawemi ndipo wakulokweska vula pa ŵanthu ŵarunji na ŵambura urunji.’ (Mat. 5:45) Lekani apo Paulosi wakayowoyanga na ŵanthu ŵambura kugomezga wakati Yehova “wakacita uwemi, kumupani vula kufuma kucanya na nyengo za vipambi, kuzuzga mitima yinu mwakuzara na vyakurya ndiposo kukondwa.” (Mil. 14:17) Ivi vikulongolerathu kuti Yehova wakupeleka vinthu ku ŵanthu wose.—Luka 6:35.
6, 7. (a) Kasi mbanthu wuli awo Yehova wakukondwa comene kuŵapa vyakukhumbikwa? (b) Yowoyani ciyelezgero ico cikulongora umo Ciuta wakupelekera vinthu ku ŵateŵeti ŵake ŵakugomezgeka.
6 Yehova wakukondwa comene para wakupa ŵateŵeti ŵake ŵakugomezgeka vinthu vyakukhumbikwa. Themba Davide likati: “Nkhaŵa mwanici ndipo sono ndili mucekuru, kweni ndilije kuwona murunji kuti wasidika, panji mphapu yake kulomba vyakurya.” (Sal. 37:25) Ŵakhristu ŵanandi ŵakugomezgeka ŵawona ukaboni wakuti Yehova wakuŵapwelelera. Wonani ico cikacitika.
7 Vyaka ivyo vyajumpha, muteŵeti wanyengozose zina lake Nancy wakasuzgika comene. Nancy wakuti: “Nkhakhumbanga ndalama zakukwana madola 66 kuti nipeleke renti macero ghake. Nkhamanyanga yayi umo ningasangira ndalama izi. Nkhalomba kwa Ciuta, na kuluta ku nchito yane ya kupelekera vyakurya mu resitiranti. Nkhakhazganga kuti ningapokera vyawanangwa yayi mise iyi cifukwa cakuti yikaŵa nyengo iyo ŵanthu ŵakatemwanga viŵi yayi kwiza ku resitiranti. Kweni nkhazizwa kuwona unandi wa makasitomala agho ghakiza mise iyi. Pakuwera, nkhati nasazga pamoza vyawanangwa ivyo ŵanthu ŵakanipa vikakwana madola 66.” Nancy wakukhorwa kuti Yehova ndiyo wakamupa ndalama izo wakakhumbanga.—Mat. 6:33.
8. Kasi cawanangwa cikuru comene ico Yehova wapeleka nchivici?
8 Yehova wali kupeleka cawanangwa cikuru comene ku ŵanthu wose. Kasi nchawanangwa wuli? Ni sembe yakuwombora ya Mwana wake. Yesu wakati: “Ciuta wakacitemwa comene caru, mwakuti wakapeleka Mwana wake wapadera yekha, ntheura kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.” (Yoh. 3:16) Pa nkhani iyi, “caru” mbanthu. Nadi, Yehova wapeleka cawanangwa cikuru ici ku wose awo ŵangacipokelera. Awo ŵali na cipulikano mwa Yesu ŵazamupokera umoyo wanadi, enya, umoyo wamuyirayira. (Yoh. 10:10) Nadi, uwu mbukaboni ukuru comene wakuti Yehova wali na mtima wa kupeleka.
YEZGANI YEHOVA PA NKHANI YA KUPELEKA
Ŵaisrayeli ŵakaciskika kuti ŵayezgenge Yehova pa nkhani ya kupeleka (Wonani ndime 9)
9. Kasi tingamuyezga wuli Yehova pa nkhani ya kupeleka?
9 Kasi tingamuyezga wuli Yehova pa nkhani ya kupeleka? Yehova “wakutipa vinthu vyose mwakuzara mwakuti tikondwenge.” Ntheura nase tiŵenge “ŵakunozgeka kugaŵana” na ŵanyithu vinthu, mwakuti nawo ŵakondwenge. (1 Tim. 6:17-19) Mwakukondwa tikupeleka vyawanangwa ku ŵakutemweka ŵithu na kovwira ŵakusuzgika. (Ŵazgani Duteronome 15:7.) Nchivici ico cingatovwira kuti tikumbukenge kupako ŵanyithu vinthu? Ŵakhristu ŵanji ŵakuyezga kucita ivi: Para iwo ŵapokera cawanangwa, ŵakupenja nthowa iyo nawo ŵangapelekera cawanangwa kwa munthu munyake. Mu mpingo waunenesko muli ŵabali na ŵadumbu ŵanandi awo ŵali na mzimu wa kupeleka.
10. Kasi nchinthu wuli ciwemi comene ico tingacita kuti tiŵe na mtima wa kupeleka?
10 Cinthu ciwemi comene ico tingacita kuti tiŵe na mtima wa kupeleka nkhujipata mu mazgu na mu vyakucita. Kasi tingacita wuli nthena? Tigwiliskirenge nchito nyengo na nkhongono zithu kuti tovwire na kukhozga ŵanji. (Gal. 6:10) Kuti tiwone umo tikucitira pa nkhani iyi, tingajifumba kuti: ‘Kasi ŵanji ŵakuwona kuti nili wakunozgeka kupulikizga para ŵakuniphalira masuzgo ghawo? Usange munthu munyake wanipempha kuti nimovwireko kanchito kanyake, kasi nkhuzomera usange ningafiska? Kasi mphawuli apo nkhawonga yumoza wa ŵamumbumba yane panji Mkhristu munyane?’ Para ‘tikupa’ tisendelerenge kwa Yehova na ku ŵabwezi ŵithu wuwo.—Luka 6:38; Zinth. 19:17.
11. Kasi ni nthowa wuli zinyake izo tingapelekera vinthu kwa Yehova?
11 Tingalongoraso mtima wa kupeleka para tikupako Yehova vinthu vithu. Malemba ghakuticiska kuti: “Cindika Yehova na mphango zako.” (Zinth. 3:9) “Mphango” yingaŵa nyengo yithu, nkhongono, na vyuma, ivyo tingapeleka mwawanangwa kwa Yehova pakumuteŵetera. Ŵana ŵacoko nawo ŵangasambira kupeleka vinthu kwa Yehova mwawanangwa. Dada munyake zina lake Jason wakati: “Para mbumba yithu yikupeleka vyawanangwa pa Nyumba ya Ufumu, tikutuma ŵana ŵithu kuti ndiwo ŵakaponye mu bokosi. Ŵakukondwa comene para ŵakuponyamo, cifukwa ŵakuwona kuti ‘ŵakupeleka kanthu kwa Yehova.’” Ŵana awo ŵakupeleka vinthu kwa Yehova apo ŵacali ŵacoko, kanandi para ŵakura ŵakuŵa na mtima wa kupeleka vinthu kwa iyo.—Zinth. 22:6.
YEHOVA NGWAKUPULIKISKA
12. Kasi kupulikiska cikung’anamuraci?
12 Mukhaliro unyake wakukondweska wa Yehova nkhupulikiska. Kasi kupulikiska cikung’anamuraci? (Tito 3:1, 2.) Munthu wakupulikiska wakungangamira pa cinthu cimoza yayi, wakukhwimiska vinthu yayi, ndiposo wakuŵa mukali yayi. M’malo mwake, wakuyezgayezga kuŵa wakuzika pakucita vinthu na ŵanji, wakughanaghanira umo vinthu viliri kwa iwo. Wakuŵa wakukhumbisiska kutegherezga para ŵanji ŵakuyowoya, ndipo para mphakwenelera wakupulikira ivyo ŵanyake ŵayowoya na kusintha ivyo iyo wakhumbanga.
13, 14. (a) Kasi Yehova wakulongora wuli kuti ngwakupulikiska? (b) Kasi tingasambira vici vyakukhwaskana na kupulikiska pa umo Ciuta wakacitira vinthu na Loti?
13 Kasi Yehova wakulongora wuli kuti ngwakupulikiska? Wakughanaghanira ŵateŵeti ŵake, ndipo kanandi wakucita ivyo ŵamupempha. Mwaciyelezgero, wonani umo Yehova wakacitira na munthu murunji Loti. Yehova wakati watema kuti waparanye Sodomu na Gomora, wakaphalira Loti kuti wacimbilire ku mapiri. Kweni pa vifukwa vinyake, Loti wakaŵeya Yehova kuti wamuzomerezge kuti wacimbilire kunyake. Ghanaghanirani waka. Apa Loti wakapempha Yehova kuti wasinthe ivyo wakamuphalira!—Ŵazgani Genesis 19:17-20.
14 Munthu munyake wangayowoya kuti Loti wakaŵa wakulopwa panji wambura kupulikira. Nakuti Yehova mphanyi wakamuvikilira kulikose, ntheura Loti wakaŵavya vifukwa vyakopera. Ndipouli, Loti wakawopanga, ndipo Yehova wakapulikira. Wakazomerezga Loti kuti wacimbilire ku msumba uwo pakwamba wakakhumbanga kuwuparanya. (Ŵazgani Genesis 19:21, 22.) Apa vikulongolerathu kuti Yehova wakungangamira pa cinthu cimoza yayi nesi kunonopeska vinthu. Iyo ngwakupulikiska.
15, 16. Kasi Dango la Mozesi likalongora wuli kuti Yehova ngwakupulikiska? (Wonani cithuzithuzi cakwamba.)
15 Wonani ciyelezgero cinyake ca mu Dango la Mozesi ico cikulongora kuti Yehova ngwakupulikiska. Usange Muisrayeli ni mukavu comene mwakuti wangapeleka yayi mberere panji mbuzi kuti yiŵe sembe, wakazomerezgekanga kupeleka nkhunda ziŵiri panji njiŵa ziŵiri. Kweni wuli usange Muisrayeli wakaŵa mukavu comene mwakuti wangazisanga yayi nkhunda ziŵiri? Para vyaŵa nthena, Yehova wakazomerezganga kuti wapeleke ufu ucoko waka. Ndipouli, wonani fundo yakukhumbikwa iyi: Ufu uwu ukeneranga kuŵa uliwose yayi, kweni “ufu uwemi.” Ufu uwo ŵakaphikiranga ŵalendo ŵakucindikika. (Gen. 18:6) Cifukwa wuli fundo iyi njakukhumbikwa?—Ŵazgani Leviticus 5:7, 11.
16 Tiyelezgere kuti ndimwe Muisrayeli, ndipo muli ŵakavu comene. Apo mukufika na tuufu twinu pa cihema cakukumanamo, mukuwona Ŵaisrayeli ŵasambazi ŵakwiza na viŵeto vyawo. Soni zingamukorani na sembe yinu ya ufu iyi, iyo yingawoneka yambura kuzirwa. Mbwenu mwakumbuka kuti kwa Yehova sembe yinu njakuzirwa. Cifukwa wuli? Cifukwa cakwamba nchakuti Yehova wakukhumba kuti ufu uŵenge uwemi comene. Apa vikaŵa nga ni para Yehova wakaphaliranga Ŵaisrayeli ŵakavu kuti: ‘Nkhumanya kuti mungapeleka yayi vinandi ivyo ŵanji ŵangapeleka, kweni nkhumanya kuti ivyo mukunipa ni viwemi comene.’ Nadi, Yehova wakulongora kuti ngwakupulikiska cifukwa cakuti wakumanya ivyo ŵateŵeti ŵake ŵangatondeka kufiska ndiposo umo vinthu viliri kwa iwo.—Sal. 103:14.
17. Kasi Yehova wakupokelera uteŵeti wamtundu wuli?
17 Tikukhozgeka comene pakumanya kuti Yehova ngwakupulikiska, ndipo wakuzomera uteŵeti withu uwo tikucita na mtima wose. (Kol. 3:23) Mudumbu munyake mucekuru ku Italy zina lake Constance wakati: “Nyengo zose nkhutemwa comene kuphalira ŵanji vya Mlengi wane. Lekani nkhulutilira kupharazga na kusambizga ŵanthu Baibolo. Nyengo zinyake nkhudandawura kuti nkhucita vinandi yayi cifukwa ca kulwaralwara. Kweni nkhumanya kuti Yehova wakumanya ivi, wakunitemwa ndipo wakukondwa na ivyo nkhufiska.”
YEZGANI YEHOVA PA NKHANI YA KUPULIKISKA
18. Kasi nthowa yimoza iyo ŵapapi ŵangayezgera Yehova njakuti wuli?
18 Kasi tingamuyezga wuli Yehova pa nkhani ya kupulikiska? Ghanaghaniraniso umo Yehova wakacitira na Loti. Yehova ndiyo wakaŵa na mazaza kumuphalira cakucita Loti; kweni wakategherezga makora apo Loti wakayowoyanga maghanoghano ghake. Ndipo Ciuta wakacita ivyo Loti wakapempha. Usange ndimwe mupapi, kasi mungamuyezga Yehova pa nkhani iyi? Kasi mungategherezga para ŵana ŵinu ŵakumupemphani vinthu vinyake, na kuŵacitira ivyo ŵamupemphani usange nchamacitiko? Pa nkhani iyi, Gongwe la Mulinda la Seputembala 1, 2007, likayowoya kuti ŵapapi ŵanyake ŵakudumbiskana na ŵana ŵawo para ŵakupanga malango gha pa nyumba. Mwaciyelezgero, ŵapapi ŵangatema nyengo iyo waliyose wakwenera kusangikira pa nyumba. Ndipo nadi, ŵapapi ŵali na mazaza kutema nyengo iyo ŵana ŵawo ŵakwenera kufikira pa nyumba. Nangauli vili nthena, ŵapapi awo Mbakhristu ŵangapeleka mwaŵi ku ŵana ŵawo kuti ŵayowoyepo maghanoghano ghawo pa nyengo iyo yatemeka. Nyengo zinyake ŵapapi ŵangasankha kuti ŵasinthe nyengo iyo ŵatema usange vikuleka kususkana na fundo za mu Baibolo. Ŵapapi ŵawonenge kuti para ŵakughanaghanira ivyo ŵana ŵawo ŵakughanaghana pa malango gha pa nyumba, ŵana ŵakughapulikiska na kughalondezga.
19. Kasi ŵalara ŵangayezga wuli Yehova pa nkhani ya kupulikiska?
19 Ŵalara ŵa mpingo ŵakuyezga Yehova para ŵakughanaghanira masuzgo gha Ŵakhristu ŵanyawo. Kumbukani kuti Yehova wakazirwiskanga sembe nanga zingaŵa za Ŵaisrayeli ŵakavu comene. Ntheura pera, ŵabali na ŵadumbu ŵanji ŵangacita vinthu vicoko comene mu uteŵeti, panji cifukwa ca ulwari panji ucekuru. Wuli usange ŵabali na ŵadumbu ŵithu ŵakutemweka aŵa citima cikuŵakora cifukwa cakuti ŵakutondeka kucita vinandi? Ŵalara ŵangaŵasimikizgira kuti Yehova wakuŵatemwa comene cifukwa ca kupeleka vyose ivyo ŵangafiska.—Mrk. 12:41-44.
20. Kasi kupulikiska cikung’anamura kugowozgako pakuteŵetera Ciuta? Longosorani.
20 Kweni tikwenera yayi kupusikizgira kuti tikucita vinthu mwamahara uku tili ŵakata pakuteŵetera Ciuta na kujilengera waka lusungu. (Mat. 16:22) Tikukhumba yayi kujileremeka mu uteŵeti withu na kujikhungurufya, kuyowoya kuti tikucita vinthu mwamahara. M’malo mwake tose tikwenera ‘kulimbalimba comene’ pakukhozgera vinthu vya Ufumu. (Luka 13:24) Tikuyezgayezga kulondezga fundo ziŵiri mwakwenelera. Yakwamba njakuti: Tikulimbalimba pakuteŵetera, tikuwezgako yayi uteŵeti withu. Yaciŵiri njakuti: Tikukumbuka kuti Yehova wakukhumba yayi kuti timupe vinthu ivyo tingatondeka kufiska. Para tamupa vyose ivyo tingafiska, tikugomezga kuti iyo wakukondwa. Kasi tikukondwa yayi kuteŵetera Fumu yithu yakuwonga kweniso yakupulikiska iyi? Mu nkhani yakulondezgapo, tizamusambira mikhaliro yinyake yiŵiri yakukondweska ya Yehova.—Sal. 73:28.
