1, 2. Eaha ta te mau hoa a te Atua e fanaˈo nei?

 FATATA e 35 matahiti faaipoiporaa to Monika. Te na ô nei teie tuahine: “Ua matau maitai mâua ta ˈu tane. Noa ˈtu râ teie roaraa matahiti, mea rahi â ta mâua e haapii nei no nia ia mâua!” Mea papu e hoê â no e rave rahi faaipoiporaa e auhoaraa.

² E oaoa tatou i te matau atu â i te feia ta tatou e here ra. Te auhoaraa faufaa roa ˈˈe râ te atuatu, o to tatou ïa auhoaraa e o Iehova. Eita roa ˈtu tatou e ite pauroa no nia ia ˈna. (Roma 11:33) E nehenehe tatou e oaoa e e haafaufaa ˈtu â i to Iehova mau huru maitatai e a muri noa ˈtu.—Koh. 3:11.

3. Eaha ta tatou e hiˈopoa i roto i teie tumu parau?

³ Ua tauturu mai to na mua ˈtu tumu parau ia haafaufaa ˈtu â e piti huru maitatai au mau o Iehova: te ohieraa ia haafatata ˈtu e te paetahi ore. E hiˈo anaˈe i teie nei i to ˈna aau horoa noa e huru au noa. E taa atu â ïa ia tatou e ‘mea hamani maitai Iehova i te taata atoa e tei nia to ˈna aroha faaherehere rahi i ta ˈna atoa mau ohipa.’—Sal. 145:9.

4. Eaha mau na te aau horoa noa?

⁴ Eaha te hoê taata aau horoa noa? Teie te pahonoraa i roto i ta Iesu mau parau i roto i te Ohipa 20:35: “Mea maitai i te horoa ˈtu i te rave mai.” Ua faaite Iesu eaha mau na te aau horoa noa. O te horoa-noa-raa ma te oaoa i to ˈna taime, puai e faufaa no te maitai o vetahi ê. Aita te reira i taaihia i te rahi o te hoê ô, i te manaˈo turai râ o te taata i horoa. (A taio i te Korinetia 2, 9:7.) Te hiˈoraa maitai roa ˈˈe, o to tatou ïa Atua oaoa ra o Iehova.—Tim. 1, 1:11.

5. E nafea Iehova e faaite ai e e Atua horoa noa oia?

 ⁵ E nafea Iehova e faaite ai e e Atua horoa noa oia? Te haapao nei oia i te mau hinaaro o te taata atoa, tae noa ˈtu o te feia tei ore â i haamori ia ˈna. E “hamani maitai [hoi] to Iehova i te taata atoa.” “Te faahiti nei [oia] i to ˈna mahana i nia i te ino e te maitai, e te haamairi mai nei oia i te ûa i nia i te parau-tia e te parau-tia ore.” (Mat. 5:45) No reira i tia ˈi i te aposetolo Paulo ia parau i te feia tiaturi ore e ua “hamani maitai mai” Iehova ma te horoa mai i “te ûa no nia i te raˈi ra, e te anotau auhune, e te faaîraa mai i to tatou aau i te maa e te oaoa.” (Ohi. 14:17) E Atua horoa noa Iehova no te taata atoa.—Luka 6:35.

6, 7. (a) Te oaoa taa ê nei Iehova i te haapao i to vai ma mau hinaaro? (b) A faataa na e nafea te Atua e haapao ai i ta ˈna mau tavini taiva ore.

⁶ Te oaoa taa ê nei Iehova i te haapao i te mau hinaaro o ta ˈna mau tavini taiva ore. Ua tapao te arii Davida: “I vai apî na hoi au, e teie nei ua ruhiruhia; aitâ râ vau i ite i te feia parau-tia i te faarueraahia, e to ˈna ra huaai i te aniraa i te maa.” (Sal. 37:25) Mea rahi te Kerisetiano taiva ore tei ite i te haapao maitai o Iehova. Teie te tahi hiˈoraa.

⁷ Tau matahiti aˈenei, tei mua te hoê pionie o Nancy to ˈna iˈoa i te fifi. Te haamanaˈo ra oia e hoê mahana i toe no te aufau i ta ˈna tarahu fare e 66 tara Marite (fatata e 6 000 CFP). Te na ô ra Nancy: “Aita vau i ite ia aha ia noaa mai tera moni. Ua pure au no nia i tera fifi e ua haere au i ta ˈu ohipa ei tuati maa. Aita vau i manaˈo e e noaa mai e rave rahi moni haamauruururaa, mea iti roa hoi te taata i tera taime o te hebedoma. Ua maere roa vau i te ite e rave rahi taata matau tei haere mai i te fare tamaaraa i tera po. I te otiraa ta ˈu ohipa, ua taio vau i te moni haamauruururaa, ua noaa mai e 66 tara Marite.” Ua papu ia Nancy e ua horoa Iehova i ta ˈna iho â i hinaaro.—Mat. 6:33.

8. Eaha te ô horoa noa rahi roa ˈˈe a Iehova?

⁸ E nehenehe te taata atoa e fanaˈo i te ô horoa noa rahi roa ˈˈe a Iehova. Eaha te reira? Te tusia taraehara o ta ˈna Tamaiti. Ua parau Iesu: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioa. 3:16) “Te ao” i ǒ nei, o te huitaata ïa. O te taata atoa o te maiti i te farii i tera ô horoa noa rahi roa ˈˈe a Iehova te nehenehe e fanaˈo i te reira. E fanaˈo te feia o te faatupu i te faaroo ia Iesu i te ora mure ore! (Ioa. 10:10) E ere anei te reira i te haapapuraa rahi roa ˈˈe e e Atua horoa noa o Iehova?

9. E nafea ia pee i to Iehova aau horoa noa?

 ⁹ E nafea ia pee i to Iehova aau horoa noa? O Iehova “te horoa hua mai i te mau mea maitatai ia rave tatou.” E mea tia ïa ia hinaaro tatou ia riro ei taata o te “horoa atu ia vetahi ˈē” a oaoa ˈtu ai ratou. (Tim. 1, 6:17-19, Te Faufaa Api) Te faaohipa nei tatou ma te oaoa i ta tatou faufaa no te horoa i te mau ô no to tatou feia herehia e no te tauturu i te feia e fifi ra. (A taio i te Deuteronomi 15:7.) Eaha te tauturu mai ia haamanaˈo i te faaite i te aau horoa noa? Teie ta te tahi mau Kerisetiano e rave nei: ia fanaˈo ratou i te hoê ô, e na reira atoa ratou i nia ia vetahi ê. E haamaitaihia te amuiraa ia faaite te taeae e tuahine e rave rahi i te hoê huru feruriraa horoa noa.

10. Eaha te tahi ravea maitai roa no te faaite i te aau horoa noa?

¹⁰ Teie te tahi ravea maitai roa no te faaite i te aau horoa noa: te horoaraa ia tatou iho na roto i ta tatou mau parau e ohipa. E nafea? Ma te faaohipa i to tatou taime e puai no te tauturu e te faaitoito ia vetahi ê. (Gal. 6:10) No te ite e te na reira ra anei tatou, e uiui anaˈe: ‘Ua ite anei vetahi ê e ua ineine au i te horoa ia ˈu iho e i te horoa i te tariˈa faaroo? Ia ani mai te tahi i te tauturu no te hoê ohipa, e parau anei au E ia tia ia ˈu? Afea ra vau i te haapopouraa ma te haavare ore i te hoê melo o to ˈu utuafare aore ra i te hoê hoa Kerisetiano?’ Ia “horoa” noa tatou, e piri atu â tatou ia Iehova e i to tatou mau hoa.—Luka 6:38; Mas. 19:17.

11. E nafea ia faaite i te aau horoa noa i nia ia Iehova?

 ¹¹ E nehenehe atoa tatou e faaite i te aau horoa noa i nia ia Iehova. Te faaue maira te mau Papai: “E faatura ˈtu ia Iehova i ta oe ra mau taoˈa rarahi.” (Mas. 3:9) Teie mau “taoˈa rarahi,” o to tatou  atoa ïa taime, puai e faufaa ta tatou e faaohipa noa i roto i ta ˈna taviniraa. E nehenehe atoa te mau tamarii e haapii i te faaite i te aau horoa noa i nia ia Iehova. Te na ô nei te hoê papa o Jason to ˈna iˈoa: “Ia horoa to matou utuafare i te tahi ô i te Piha a te Basileia, na ta mâua na tamarii e tuu i te moni i roto i te afata ô. E oaoa raua. E au ra hoi te horoa nei raua i te tahi mea na Iehova.” Mai te peu e e ite te mau tamarii i te oaoa ia horoa na Iehova i to ratou apîraa, e faaite noa ratou i te aau horoa noa a paari mai ai.—Mas. 22:6.

12. Eaha te hoê taata au noa?

¹² Teie te tahi atu huru maitai au mau o Iehova: to ˈna huru au noa. Eaha ïa? Te auraa o te taˈo tumu i hurihia i roto i ta tatou Bibilia ei “mǎrû,” aore ra huru au noa, o te tuu-noa-raa ˈtu aore ra te fariiraa ïa. (Tito 3:1, 2) E ere te hoê taata manaˈo au noa i te mea etaeta i nia i te tahi ohipa rii. E tutava râ o ˈna i te faaite i te mǎrû i nia ia vetahi ê ma te haapao i to ratou huru tupuraa. Ua ineine oia i te faaroo ia ratou e, ia nehenehe, i te farii i to ratou mau hinaaro a faatano atu ai i ta ˈna mau titauraa.

13, 14. (a) E nafea Iehova e faaite ai i te huru au noa? (b) Eaha te haapii mai i ta te Atua i rave e o Lota no nia i te huru au noa?

¹³ E nafea Iehova e faaite ai i te huru au noa? Ma te hamani maitai, te haapao ra oia i te mau huru aau o ta ˈna mau tavini. E e pinepine oia i te farii i ta ratou mau aniraa. A hiˈo na i ta ˈna i rave e te taata parau-tia ra o Lota. A faaoti ai Iehova e haamou ia Sodoma e Gomora, ua faaue papu o ˈna ia Lota ia horo i nia i te mouˈa. No te tahi râ tumu, ua taparu Lota e horo i te tahi atu vahi. A feruri na, ua ani Lota ia Iehova ia taui i ta ˈNa mau faaueraa!—A taio i te Genese 19:17-20.

¹⁴ Mea ohie paha ia parau e mea paruparu aore ra mea faaroo ore o Lota. No te aha o ˈna i mǎtaˈu ai i te mea e e faaora iho â Iehova ia ˈna? Atira noa ˈtu, ua mǎtaˈu o Lota. Ua farii ihora Iehova i ta ˈna aniraa e ua faatia ia ˈna ia horo i te hoê oire ta ˈNa i faaoti na i te haamou. (A taio i te Genese 19:21, 22.) Papu maitai e e ere roa ˈtu Iehova i te mea etaeta. E Atua au noa o ˈna.

15, 16. Mea nafea te Ture a Mose i faaite ai i te huru au noa o Iehova? (A hiˈo i te hohoˈa matamua.)

¹⁵ E itehia te tahi atu hiˈoraa o to Iehova huru au noa i roto i te Ture a Mose. Mea veve roa anaˈe te hoê Iseraela no te pûpû ei tusia i te hoê pinia mamoe aore ra te hoê pinia puaaniho, ua tia ia ˈna ia pûpû e piti uupa aore ra e piti uuairaˈo. Eaha râ mea veve roa anaˈe o ˈna no te hoo mai e piti uuairaˈo? I roto i tera tupuraa, ua faatia Iehova i te Iseraela veve ia pûpû maa faraoa, aore ra faraoa ota. Teie râ te hoê parau rii faufaa e tapao mai: I titauhia na te “faraoa hua,” oia hoi te faraoa ota tei faaohipahia no te mau manihini taa ê. (Gen. 18:6) No te aha mea faufaa ˈi te reira?—A taio i te Levitiko 5:7, 11.

¹⁶ A feruri na e e Iseraela veve roa oe. A tapae ai i te hiero e ta oe maa faraoa ota no te pûpû ei tusia, e ite oe i te mau Iseraela taoˈa rahi e ta ratou nǎnǎ. E haama paha oe i ta oe tusia e au ra e mea faufaa ore. Haamanaˈo aˈera oe e no Iehova mea faufaa ta oe tusia. No te aha? No te mea ua titau Iehova i te faraoa ota maitai roa. E au ra e te parau nei Iehova  i te mau Iseraela veve: ‘Ua ite au e aita ta oe e nehenehe e pûpû i te tusia mai i ta vetahi ê, ua ite atoa râ vau e te horoa mai nei oe i tei maraa ia oe.’ Oia mau, te faaite ra Iehova i to ˈna huru au noa ma te haapao i te mau taotiaraa e huru tupuraa o ta ˈna mau tavini.—Sal. 103:14.

17. E farii Iehova i teihea huru taviniraa?

 ¹⁷ E mahanahanahia tatou i te ite e no to ˈna huru au noa, te farii ra Iehova i ta tatou taviniraa ma to tatou aau atoa. (Kol. 3:23) Ua na ô Constance te hoê tuahine paari no Italia: “Mai mutaa iho mai â, mea au roa na ˈu e paraparau ia vetahi ê no nia i to ˈu Atua Poiete. No reira vau e poro e e faatere noa ˈi i te mau haapiiraa Bibilia. I te tahi taime, e oto vau. No to ˈu hoi ea, aita ta ˈu e nehenehe e rave hau atu â. Ua taa râ ia ˈu e te ite ra Iehova i to ˈu mau taotiaraa, te here ra o ˈna ia ˈu e te haafaufaa ra i tei tia ia ˈu ia rave.”

18. E nafea te mau metua e pee ai i te hiˈoraa o Iehova?

¹⁸ E nafea ia pee i to Iehova huru au noa? A feruri faahou na i ta Iehova i rave i nia ia Lota. Tei ia Iehova ra te mana. Noa ˈtu râ, ua faaroo o ˈNa ia Lota a faaite ai oia i to ˈna huru aau e ua farii i ta ˈna aniraa. E nehenehe anei outou, ei metua, e pee i to Iehova hiˈoraa ma te faaroo i te aniraa a ta outou tamarii e ma te farii atoa paha i ta ˈna e hinaaro ra? Ia au i Te Pare Tiairaa o te 1 no Tetepa 2007, e ani paha vetahi mau metua i te manaˈo o ta ratou tamarii no nia i te mau ture o te utuafare. Ei hiˈoraa, e faaoti paha te mau metua i te hoê hora e mea tia ia hoˈi mai ta ratou tamarii i te fare. E tiaraa to ratou no te na reira. Noa ˈtu râ, e faaroo te mau metua Kerisetiano i te manaˈo o ta ratou tamarii no nia i te hora i faaotihia. E maiti paha vetahi i te faatano i tera hora. Ia haapao te mau metua i te manaˈo o ta ratou tamarii no nia i te mau ture o te utuafare e hinaaro atu â te mau tamarii e taa e e pee i te reira.

19. E nafea te mau matahiapo e tutava ˈi i te pee i to Iehova huru au noa?

¹⁹ E tutava te mau matahiapo i te pee i to Iehova huru au noa ma te haapao i te huru tupuraa o to ratou mau hoa haamori. A haamanaˈo e ua haafaufaa atoa Iehova i te mau tusia a te mau Iseraela veve aˈe. Oia atoa, ua taotia-mau-hia te taviniraa a vetahi mau taeae e tuahine no to ratou paha ea aore ra matahiti rahi. Ia aha ïa ia toaruaru teie mau hoa herehia? Ma te hamani maitai, e haamanaˈo atu te mau matahiapo e te here ra Iehova ia ratou no te horoaraa i tei maraa ia ratou.—Mar. 12:41-44.

20. Eaha te auraa e faaite i te huru au noa a tavini ai i te Atua?

²⁰ E ere te faaiteraa i te huru au noa i te faaitiraa i ta tatou taviniraa i te Atua no te hamani maitai noa ia tatou iho. (Mat. 16:22) Aita tatou e hinaaro ra e rave noa maa vahi iti ia nehenehe ta tatou e rave hau atu â. Mea faufaa râ ia “faaitoito hua” tatou i te turu i te mau ohipa taaihia i te Basileia. (Luka 13:24) Ia vai faito noa tatou e tia ˈi. E rave anaˈe i tei maraa i roto i te taviniraa a Iehova. E i te hoê â taime, e haamanaˈo anaˈe e eita roa ˈtu Iehova e ani mai hau atu i tei maraa ia tatou. Ia na reira tatou, e oaoa o ˈna. Mea oaoa ia tavini i te hoê Fatu î i te mauruuru e te au noa, e ere anei? I to muri iho tumu parau, e hiˈopoa tatou e piti atu â huru maitatai au mau o Iehova.—Sal. 73:28.