1, 2. Khonani dza Yehova dzi na tshibuli tshifhio?

MUṄWE Mukriste ane a pfi Monika o ri: “Ri na miṅwaha i ṱoḓaho u vha 35 ro vhingana. Nṋe na munna wanga ri a ḓivhana vhukuma. Naho ro no fhedza miṅwaha yeneyi minzhi-minzhi, ri kha ḓi guda zwithu zwinzhi zwe ra vha ri sa zwi ḓivhi nga ha muṅwe!” A zwi timatimisi uri zwo ralo kha mbingano nnzhi na vhukonani.

² Ri takalela u vha na vhukonani ha khwine na vhane ra vha funa. Naho zwo ralo, kha vhukonani vhunzhi vhune ra nga vhu ṱahulela, a hu na vhune ha vha ha ndeme u fhira vhukonani hashu na Yehova. Zwi nga si vhuye zwa konadzea u ḓivha zwithu zwoṱhe nga hae. (Vharoma 11:33) Ri ḓo wana tshibuli tsha u guda zwithu zwinzhi u ya nga hu sa fheli na dakalo ḽa u dzhiela nṱha pfaneleo dza Yehova.—Muh. 3:11.

3 Ri ḓo ṱhogomela mini kha yeneyi thero?

³ Thero yo fhiraho yo ri thusa uri ri dzhiele nṱha u dzhenea ha Yehova na u sa ṱalula hawe. Zwino kha ri ṱhogomele dziṅwe pfaneleo mbili dzi kungaho dza Yehova—mafunda na u humbulela hawe. Arali ra ita nga u ralo, ri ḓo ṱhogomela nga vhuḓalo uri “Yehova vhoṱhe u vha ita nga vhuthu, a khathutshela zwivhumbwa zwawe zwoṱhe.”—Ps. 145:9.

4. Zwi amba mini zwa vhukuma u vha na mafunda?

⁴ Zwi amba mini u vha na mafunda? Ri wana phindulo kha maipfi a Yesu o ṅwalwaho kha Mishumo 20:35: “U ṋea zwi ḓisa dakalo ḽihulu u fhira u ṋewa.” Nga maipfi eneo, Yesu o ita uri ri pfesese uri mafunda a vhukuma ndi mini. Muthu a re na mafunda u a ṋea tshifhinga tshawe, maanḓa na thundu dzawe u itela u vhuyedza vhaṅwe—nahone u zwi ita o takala. Ndi ngoho uri u vha na mafunda a zwi ḓitiki nga vhuhulwane ha tshifhiwa, fhedzi zwi ḓitika nga tshiṱuṱuwedzi  tsha muṋei. (Vhalani 2 Vhakorinta 9:7.) A hu na ane a vha na mafunda u fhira “Mudzimu o takalaho,” Yehova.—1 Tim. 1:11.

5. Yehova u sumbedza hani mafunda?

⁵ Yehova u sumbedza hani mafunda? U fusha zwishaiwa zwa vhathu vhoṱhe, u katela na vha sa athu u mu gwadamela. Ndi ngoho uri “Yehova vhoṱhe u vha ita nga vhuthu.” U “ṱavhisela ḓuvha ḽawe vhavhi na vhavhuya na u nisela mvula vho lugaho na vha songo lugaho.” (Mat. 5:45) Ndi ngazwo muapostola Paulo, musi a tshi amba na vhathu vhane vha si vhe vhatendi, o amba uri, Yehova o ita ‘zwivhuya nga u ni nisela mvula i bvaho ṱaḓulu a ni ṋea na zwiliṅwa nga tshifhinga tshazwo a ni ṋea zwiḽiwa nahone a takadza mbilu dzaṋu.’ (Mish. 14:17) Zwi tou vha khagala uri Yehova u sumbedza vhathu vhoṱhe mafunda.—Luka 6:35.

6, 7. (a) Yehova u takalela u fusha zwishaiwa zwa vhafhio? (b) Ṋeani tsumbo ya nḓila ine Mudzimu a ṱhogomela ngayo vhagwadameli vhawe vha fulufhedzeaho.

⁶ Yehova u a takala zwihuluhulu musi a tshi ṋea vhashumeli vhawe vha fulufhedzeaho zwine vha zwi shaya. Khosi Davida o ri: “Tshee nda bebwa nda vhuya nda kalaha, a thi athu u vhona muvhuya ó laṱiwa, a tho ngo vhona vhana vhawe vhó tshinyala.” (Ps. 37:25) Vhakriste vhanzhi vha fulufhedzeaho vho no tshenzhela u ṱhogomelwa nga Yehova. Ṱhogomelani tsumbo i tevhelaho.

⁷ Miṅwahani yo fhiraho, muṅwe muvulanḓila wa tshifhinga tsho ḓalaho ane a pfi Nancy o vha e kha vhuleme vhu konḓaho vhukuma. Nancy o ri: “Ndo vha ndi tshi ṱoḓa R570 ya u badela rennde, yo vha i tshi ṱoḓea ḓuvha ḽi tevhelaho. Ndo vha ndi sa ḓivhi hune nda ḓo wana hone yeneyo tshelede. Nda rabela nga ha honohu vhuleme, nga murahu ha zwenezwo nda ya mushumoni wanga wa u ṋea vhathu zwiḽiwa resiturenteni. Ndo vha ndi songo lavhelela u wana tshelede nnzhi ya ndivhuho madekwana eneo ngauri ho vha hu vhukati ha vhege nahone hu songo ḓala. Zwe zwa mmangadza ndi uri vhusiku honoho ho ḓa vharengi vhanzhi. Musi ndi tshi tshaisa ndo vhala tshelede yanga ya ndivhuho ye nda i wana, tshelede yeneyo yo vha i tshi lingana R570.” Nancy u na vhungoho ha uri Yehova o mu ṋea nga mafunda zwine a zwi shaya.—Mat. 6:33.

8. Ndi tshifhio tshifhiwa tshihulwanesa tsha mafunda a Yehova?

⁸ Tshifhiwa tshihulwanesa tsha mafunda a Yehova tshi nga waniwa nga vhathu vhoṱhe. Ndi tshifhio? Ndi tshiṱhavhelo tshi rengululaho tsha Murwa wawe. Yesu o ri: “Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.” (Yoh. 3:16) Kha enea mafhungo, “shango” ḽi ambela kha vhathu. Ndi ngoho uri tshifhiwa tsha mafunda a Yehova tsho vulea kha vhoṱhe vhane vha khetha u tshi ṱanganedza. Vhoṱhe vhane vha vha na lutendo kha Yesu vha ḓo wana vhutshilo nga vhunzhi—vhutshilo vhu sa fheli! (Yoh. 10:10) Vhukuma, ndi vhungoho vhufhio vhune ra vha naho ha uri Yehova u na mafunda?

9. Ri nga edzisa hani mafunda a Yehova?

 ⁹ Ri nga edzisa hani mafunda a Yehova? Yehova u “ri pfumisa nga zwoṱhe zwine ra ḓiphina ngazwo”; nga zwenezwo, ri fanela u “ḓiimisel[a] u kovhela vhaṅwe” zwenezwo zwi engedza dakalo ḽavho. (1 Tim. 6:17-19) Ri shumisa thundu dzashu u itela u ṋea vhane ra vha funa zwifhiwa na u thusa vhane vha shaya. (Vhalani Doiteronomio 15:7.) Ndi mini zwine zwa nga ri thusa u humbula u vha mafunda? Vhaṅwe Vhakriste vha vhona zwi tshi thusa u amba hezwi: Musi vha tshi ṋewa tshifhiwa, vha wana tshibuli tsha u ṋea muṅwe muthu tshifhiwa. Tshivhidzo tsha Vhukriste tshi na vhahashu vhanzhi vha tshinnani na vha tshisadzini vhane vha ṱahulela muya wa mafunda.

10. Ndi ifhio nḓila ya khwine ine ra nga vha na mafunda ngayo?

¹⁰ Iṅwe nḓila yavhuḓi ya u vha na mafunda ndi nga zwine ra zwi amba na nga u ṋea vhathu zwine ra vha nazwo. Ri nga zwi ita hani zwenezwi? Nga u shumisa tshifhinga tshashu na maanḓa u thusa vhaṅwe na u vha khuthadza. (Gal. 6:10) U itela u wana arali ri tshi zwi ita zwenezwi, ri nga ḓi vhudzisa hezwi: ‘Naa vhaṅwe vha a kona u vhona uri ndi ḓiṋea tshifhinga tsha u thetshelesa thaidzo dzavho? Arali muthu a humbela uri ndi mu thuse u ita zwiṅwe kana u mu wanela zwiṅwe, naa ndi a tenda arali zwi tshi konadzea? Ndo guma lini u khoḓa zwi tshi bva mbiluni muraḓo wa muṱa kana mutendi nga nṋe?’ Arali ra ‘ḓiḓowedza u ṋea,’ ri na vhungoho ha uri ri ḓo sendela tsini na Yehova na khonani dzashu.—Luka 6:38; Mir. 19:17.

11. Ndi dzifhio dziṅwe nḓila dzine ra nga sumbedza ngadzo Yehova mafunda?

 ¹¹ Ri nga sumbedza mafunda na kha Yehova. Maṅwalo a ri ṱuṱuwedza uri: “Hulisa Yehova nga zwi re lupfumo lwau.” (Mir. 3:9) Lwonolwo “lupfumo” lu katela tshifhinga, maanḓa na thundu dzashu, dzine ra nga dzi shumisa nga u tou ḓifunela vhuḓinḓani hawe. Na vhana vhaṱuku vha nga guda u sumbedza  Yehova mafunda. Muṅwe khotsi ane a pfi Jason o ri: “Musi muṱa washu u tshi ita muṋeelo Holoni ya Muvhuso, ri tendela vhana vhashu vha tshi dzhenisa tshelede kha bogisi ḽa muṋeelo. Vha a zwi takalela ngauri musi vha tshi dzhenisa tshelede vha vha tshi khou ‘ṋekedza zwiṅwe zwithu kha Yehova.’” Vhana vhane vha takalela u ṋea Yehova musi vha tshee vhaṱuku zwi vhonala uri vha ḓo bvela phanḓa vha tshi mu sumbedza mafunda na musi vho no aluwa.—Mir. 22:6.

12. Zwi amba mini u humbulela?

¹² Iṅwe ya pfaneleo dzi kungaho dza Yehova ndi u humbulela. Zwi amba mini u humbulela? Kha luambo lwa u thoma lwo shumiswaho kha New World Translation kanzhi ipfi ḽo ṱalutshedzelwaho nga uri “humbulela” nga lwa thevhedzaipfi ḽi amba “u tendelana na zwiimo.” (Tito 3:1, 2) Muthu ane a humbulela ha fareleli kha zwine mulayo wa amba zwone tshifhinga tshoṱhe, ha konḓisi kana u vha na vhuhali. Nṱhani hazwo, u lwela u vha na vhulenda musi a tshi khou shumisana na vhaṅwe, na u dzhiela nṱha vhuimo havho. O ḓiimisela u thetshelesa vhaṅwe, nahone arali zwi tshi konadzea, u a tendelana na zwine vhaṅwe vha zwi tama na u shandula ṱhoḓea dzawe.

13, 14. (a) Yehova u sumbedza hani u humbulela? (b) Ndi mini zwine ra nga zwi guda nga ha u humbulela musi ri tshi sedza nḓila ye Mudzimu a shumisana ngayo na Loto?

¹³ Yehova u sumbedza hani u humbulela? U ṱolisisa maḓipfele a vhashumeli vhawe nga vhulenda, nahone a ṱanganedza khumbelo dzavho. Sa tsumbo, ṱolisisani nḓila ye Yehova a shumisana na Loto munna o lugaho. Musi Yehova o ḓiimisela u fhelisa muḓi wa Sodoma na Gomora, o ṋea Loto vhulivhisi ho livhaho ha uri a shavhele dzithavhani. Nga nṱhani ha zwiṅwe zwiitisi, Loto o humbela u shavhela huṅwe fhethu. Edzani u humbula—Loto o humbela Yehova uri a shandule ndaela dzawe!—Vhalani Genesi 19:17-20.

¹⁴ Zwi nga leluwa uri muṅwe muthu a dzhie Loto sa munna a si na maanḓa kana a sa thetshelesi. Hu sa londwi zwenezwo, Yehova o vha a tshi ḓo tshidza Loto huṅwe na huṅwe, nga zwenezwo Loto o vha e si na tshiitisi tsha u ofha. Naho zwo ralo, o vha a kha ḓi ofha—hu na zwe zwa mu vhilaedzisa, nahone Yehova a tendelana na vhuimo hawe. Yehova o tendela Loto a tshi shavhela kha muḓi we a vha a tshi ḓo u fhelisa. (Vhalani Genesi 19:21, 22) Zwi tou vha khagala uri Yehova u a pfesesa. U a tendelana na vhuimo nahone u a humbulela.

15, 16. Mulayo wa Mushe wo sumbedza hani u humbulela ha Yehova? (Sedzani tshifanyiso tsha u thoma)

¹⁵ Ṱhogomelani iṅwe tsumbo ya u humbulela ha Yehova ine ya vha Mulayoni wa Mushe. Arali Muisiraele o vha e mushai lune a nga kundelwa u ṋekedzela ngwana kana mbudzi sa tshiṱhavhelo, o vha a tshi ṋekedza maivha-muronzhe mavhili kana mafhondo. Fhedzi hu pfi mini arali Muisiraele o vha e mushai, lwe a vha a tshi nga kundelwa na u renga maivha-muronzhe mavhili? Arali zwo ralo, Yehova o tendela uri Muisiraele wa mushai a ṋekedze vhukhopfu vhuṱuku. Naho zwo ralo, ṱhogomelani zwidodombedzwa zwa ndeme zwi tevhelaho: Ho vha hu sa shumiswi vhukhopfu vhuṅwe na vhuṅwe, fhedzi ho vha vhu “vhukhopfu” vhune ha shumiselwa vhaeni vha ndeme. (Gen. 18:6) Ndi ngani zwenezwo zwi zwa ndeme?—Vhalani Levitiko 5:7, 11.

¹⁶ Edzani u humbula ni Muisiraele nahone ni mushai vhukuma. Musi ni tshi swika nḓuni ya mulanga no fara vhukhopfu vhuṱuku ha tshiṱhavhelo, ni vhona Vhaisiraele vha zwigwili vha tshi khou ḓisa zwifuwo. Ni nga kha ḓi shona u ṋekedzela vhukhopfu vhuṱuku sa tshiṱhavhelo. Nahone nga murahu na humbula uri phanḓa ha Yehova tshiṱhavhelo tshaṋu ndi tsha ndeme. Ndi ngani? Zwine zwa vha zwone ndi uri Yehova o ṱoḓa uri vhukhopfu vhu vhe ha vhuimo ha nṱha. Nga maṅwe maipfi, Yehova o vha a tshi khou amba na Vhaisiraele vha vhashai u ri: ‘Ndi a zwi ṱhogomela uri a ni koni u ṋea zwizhi u nga vhaṅwe,  fhedzi ndi a zwi ḓivha uri zwine na khou ṋea zwone ndi zwine na zwi kona.’ Vhukuma, Yehova u sumbedza u humbulela nga u dzhiela nṱha vhushayanungo na zwiimo zwa vhashumeli vhawe.—Ps. 103:14.

17. Ni nga vha na vhungoho ha uri Yehova u ṱanganedza mushumo wa mufuda-ḓe?

 ¹⁷ Ri nga wana khuthadzo nga u ḓivha uri u humbelela ha Yehova hu ita uri a ṱanganedze mushumo washu wa u ḓiṋekedzela. (Vhakol. 3:23) Muṅwe wahashu wa tshisadzini wa mulala wa ngei Italia ane a pfi Constance o ri: “U amba na vhaṅwe nga ha Musiki wanga ndi zwe nda vha ndi tshi funa u zwi ita nga maanḓa. Ndi ngazwo ndi tshi bvela phanḓa ndi tshi huwelela na u fara pfunzo dza Bivhili. Zwiṅwe zwifhinga ndi a ḓisola ngauri a thi koni u ita zwo engedzeaho nga nṱhani ha mutakalo wanga. Fhedzi ndi a zwi ṱhogomela uri Yehova u a ḓivha vhushayanungo hanga na uri u a mpfuna nahone u takalela zwine nda kona u zwi ita.”

18. Ndi ifhio iṅwe nḓila ine vhabebi vha nga edzisa ngayo tsumbo ya Yehova?

¹⁸ Ri nga edzisa hani u humbulela ha Yehova? Humbulani hafhu nga ha nḓila ye Yehova a shumisana ngayo na Loto. Zwithu zwo vha zwi tshi khou langwa nga Yehova; fhedzi o thetshelesa nga vhulenda musi Loto a tshi amba maḓipfele awe. Nahone Mudzimu o ita zwe Loto a humbela. Arali ni mubebi, naa ni nga edzisa tsumbo ya Yehova? Naa ni nga thetshelesa khumbelo ya vhana vhaṋu, nahone arali zwi tshi konadzea na tendelana na lutamo lwavho? U tshimbidzana na zwenezwi, Tshiingamo tsha ḽa 1 September, 2007, tsho amba uri vhaṅwe vhabebi vha nga katela vhana vhavho musi vha tshi haseledza nga ha milayo ya hayani. Sa tsumbo, vhabebi vha nga phetha u vhea tshifhinga tsha u vhuya hayani, nahone vha na ndugelo ya u vhea tshifhinga tsho teaho tshine vhana vhavho vha tea u vhuya ngatsho hayani. Naho zwo ralo, vhabebi vha Vhakriste vha nga thetshelesa mavhonele a vhana vhavho malugana na tshifhinga tsho vhewaho. Kha maṅwe masia, vhabebi vha nga khetha u ita tshanduko kha tshifhinga tsho vhewaho tenda vha sa pfuki maitele a Bivhili. Vhabebi vha nga wana uri musi vha tshi ṱolisisa mahumbulele a vhana vhavho nga ha milayo ya hayani, zwi ita uri vhana vhavho vha pfesese yeneyi milayo na u i tevhedza.

19. Vhahulwane vha nga lwela hani u fana na Yehova kha u humbulela?

¹⁹ Vhahulwane vha tshivhidzo vha lwela u edzisa u humbulela ha Yehova nga u dzhiela nṱha vhuimo ha vhatendi ngavho. Humbulani uri Yehova o dzhiela nṱha tshiṱhavhelo tshe tsha ṋekedzwa nga Vhaisiraele vha vhashai. Zwi fanaho na zwenezwo, vhaṅwe vhahashu vha tshinnani na tshisadzini a vha koni u shuma tshifhinga tshilapfu vhuḓinḓani, khamusi nga nṱhani ha thaidzo dza mutakalo kana vhulala. Hu pfi mini arali vhenevha vhahashu vha funwaho vha kulea nungo nga nṱhani ha vhushayanungo havho? Vhahulwane vha nga vha khwaṱhisa nga vhulenda uri Yehova u a vha funa nga nṱhani ha zwine vha khou zwi ita.—Marko 12:41-44.

20. Naa u humbulela zwi amba u sa ḓidina musi ri tshi shumela Mudzimu? Ṱalutshedzani.

²⁰ Vhukuma, ri songo vhuya ra kanganyisa u humbulela na u sa shumela Mudzimu nga nṱhani ha uri ri ṱoḓa u ḓivhavhalela. (Mat. 16:22) A ri ṱoḓi u litshelela zwithu nahone ra ḓiimelela ngauri ri khou ḓihumbulela. Nṱhani hazwo, roṱhe ri fanela u ‘ita vhuḓidini vhuhulwane’ ha u tikedza zwithu zwi tshimbidzanaho na Muvhuso. (Luka 13:24) I ngoho, ri lwela u linganyisela anea maitele mavhili. Naho zwo ralo, ri a ḓidina tshumeloni yashu. Zwiṅwe hafhu, ri a zwi ḓivha uri Yehova a nga si vhuye a humbela uri ri ite zwine ra sa ḓo zwi kona. Musi ri tshi mu ṋea zwi re maanḓani ashu, ri ḓo vha na vhungoho ha uri u ḓo takala. Ri a takalela u shumela Muṋe ane a ri dzhiela nṱha na u ri humbulela! Kha thero i tevhelaho, ri ḓo ṱolisisa dziṅwe nḓila mbili dza vhuthu vhu kungaho ha Yehova.—Ps. 73:28.