1, 2. Mang e rayog ni ngad rin’ed ndariy n’umngin nap’an?

 REB e walag nib pin ni Monika fithingan ni ke gaman 35 e duw ni ke un ko mabgol e yog ni gaar: “Gamow e pumoon rog e ri gamow manangew gamow nib fel’ rogon. Yugu aram rogon, ma ka bay boch ban’en ni ka gamow be fil u murung’agmow nda ug nangew kafram!” Dabisiy ni boor i gadad e ku er rogon figirngin, ara leengin, ara pi fager rok.

² Gad ma felfelan’ ni gad ma fil boch ban’en u murung’agen e piin ni yad ba t’uf rodad. Machane, kab gel e felfelan’ ni gad ma tay ni gad ma fil murung’agen Jehovah ni ir e bin th’abi fel’ e Fager nra yag ngodad. Dabiyog ni ngad nanged gubin ban’en u murung’agen. (Rom. 11:33) Rayog ni ngad filed murung’agen pi fel’ngin Jehovah ndariy n’umngin nap’an mi ri ga’ fan u wan’dad.​—Ekl. 3:11.

3. Mang e gad ra fil u lan e re article ney?

³ Fa binem e article ni ke yan e ke ayuwegdad ni nge ga’ fan l’agruw i fel’ngin Jehovah u wan’dad. Kad filed riy ni ir reb e Got nib mom ni ngan non ngak ma taareb rogon urngin e girdi’ u wan’. Re article ney e gad ra fil riy rogon nib gol Jehovah mab sumunguy. Re n’ey e ra ayuwegdad ni nge tamilang u wan’dad ni Jehovah e “ba fel’ e tin ni ma rin’ ngak urngin e girdi’, ma ma runguy urngin e tin ni ke sunumeg.”​—Ps. 145:9.

4. Uw rogon be’ nib gol?

⁴ Uw rogon be’ nib gol? Rayog ni ngad nanged e fulweg ko re deer ney ko fapi thin ni yog Jesus ni bay ko Acts 20:35 ni be gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” Ere, be’ nib gol e ma pi’ e tayim rok, nge gelngin, nge pi n’en ni bay rok ni nge ayuweg boch e girdi’ u fithik’ e felfelan’. Gathi nga fini pi’ be’ boch e tow’ath nib tolang puluwon mfin nog ni ir be’ nib gol,  ya be’ nib gol e ma pi’ ban’en ni ke yib u gum’irchaen. (Mu beeg e 2 Korinth 9:7.) Dariy be’ nib gol ni bod feni gol Jehovah.

5. Uw rogon ni ma dag Jehovah ni ir be’ nib gol?

⁵ Uw rogon ni ma dag Jehovah ni ir be’ nib gol? Be gaar e Bible: “Ba fel’ e tin ni ma rin’ [Jehovah] ngak urngin e girdi’.” Ma pi’ e tin nib t’uf ko gubin e girdi’ nib muun e piin ndarur liyorgad ngak. Ma “mateg ramaen e yal’ rok nga daken e girdi’ nib tagan nge girdi’ nib fel’ ntaareb rogon, ma be pi’ e n’uw ngak e piin ni yad be rin’ e tin nib mat’aw nge piin ni yad be rin’ e tin nib kireb.” (Matt. 5:45) Aram fan ni yog Paul ngak e piin ni gathi yad e Kristiano ni Jehovah e ir e ‘ma pi’ e n’uw ngorad u lang nge galwog u ngal’an; me ir e ma pi’ e ggan ngorad ma ma fal’eg lanin’rad.’ (Acts 14:17) Ere, ba tamilang ni ma gol Jehovah ngak urngin e girdi’.​—Luke 6:35.

6, 7. (a) Mini’ e piin nrib felfelan’ Jehovah ni nge ayuwegrad? (b) Mang e ke buch ni be dag ni ma pi’ Got e tin nib t’uf ko pi tapigpig rok?

⁶ Ri ma felfelan’ Jehovah ni nge pi’ e tin nib t’uf ko pi tapigpig rok. I yog David ni Pilung ni gaar: “Chiney e kug pilibthir, ni gathi ku gub pagel, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.” (Ps. 37:25) Boor e Kristiano ni yad ba yul’yul’ e kar guyed rogon ni ma ayuwegrad Jehovah.

⁷ Boch e duw kafram ma immoy reb e walag nib pioneer ni Nancy fithingan ni bay e magawon rok. Ba t’uf rok 66 e dolla ni nge pi’ puluwon e naun ni ma par riy. Machane, dariy e salpiy rok. I yog ni gaar: “Kug yibilay e magawon rog ngak Jehovah, ma aram mug wan ko maruwel ni gu ma tay u reb e tafen e abich. Yu ngiyal’ e yira pi’ puluwon e ggan ngog ma yima uneg in e salpiy ngay ni fan ngog, ma dag lemnag ni boor e salpiy nra yag ngog e re nep’ nem ni bochan e rofen nem e ba ga’ nde yoor e girdi’ ni ma yib ko abich e ngaram. Machane, kug gin ya boor e girdi’ nra bad ni ngar abichgad u rom ko re nep’ nem. Ma nap’an ni gu mu’ ko maruwel ni gu theeg urngin e salpiy ni ke yag ngog ma 66 e dolla u gubin.” Kari mich u wan’ Nancy ni Jehovah e ke ayuweg ni nge yag ngak e tin nib t’uf rok.​—Matt. 6:33.

8. Mang tow’ath e ke pi’ Jehovah ni be m’ug riy ni ir e th’abi gol ngak urngin e girdi’?

⁸ Fare tow’ath ni ke pi’ Jehovah ni be m’ug riy ni ir e th’abi gol e rayog ni nge yag ngak urngin e girdi’. Mang e re tow’ath nem? Aram fare biyul ni maligach ni pi’ Fak. I gaar Jesus: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Ere, ra pi’ Jehovah e re tow’ath ney ngak urngin e piin nra m’agan’rad ngay. En nra mich Jesus u wan’ e ra yag e yafas ndariy n’umngin nap’an ngak! (John 10:10) Ireray e bin th’abi ga’ e mich riy nrib gol Jehovah.

9. Uw rogon ni ngad boded Jehovah nib gol?

 ⁹ Uw rogon ni ngad boded Jehovah nib gol?  Susun ni ngad adaged ni ngaud pied boch ban’en ngak e girdi’ ni yad ra felfelan’ ngay, ni bod rogon Jehovah ni boor ban’en ni ma pi’ ngodad ni ngad felfelan’gad ngay. (1 Tim. 6:17-19) Gad ba felfelan’ ni gad ma pi’ e tow’ath ngak e pi fager rodad, nge chon e tabinaw rodad, ma gad ayuweg e piin nib t’uf e ayuw rorad. (Mu beeg e Deuteronomy 15:7.) Mang e ra ayuwegdad ni ngaud golgad ko girdi’? Boch e girdi’ e kar dugliyed nnap’an nra pi’ be’ e tow’ath ngorad, ma ngkur gayed rogon ni ngkur pied reb e tow’ath ku be’. Boor e pi tapigpig rok Jehovah e ngiyal’ ney ni yad ba gol.

10. Mang reb e kanawo’ nib fel’ nrayog ni ngaud golgad riy ko girdi’?

¹⁰ Reb e kanawo’ nib fel’ nrayog ni ngaud golgad riy ko girdi’ e ngaud fanayed e tayim rodad nge gelngidad ni ngad ayuweged boch e girdi’ ma gad pi’ e athamgil nga lanin’rad. (Gal. 6:10) Ga ma rin’ e re n’ey, fa? Rayog ni ngam fithem ni nge lungum: ‘Gu ma dag nib m’agan’ug ngay ni nggu motoyil ngak boch e girdi’, fa? Faanra yog be’ ngog ni nggu ayuweg u ban’en, ara l’ogeg ni nggu wan gu fek ban’en, ma gu ma rin’, fa? Wuin e tomur nu gog ngak reb i chon e tabinaw rog ara be’ u lan e ulung nib fel’ e n’en ni ke rin’?’ Faanra ud “golgad ngak e girdi’,” ma ra fel’ e tha’ u thildad Jehovah nge pi fager rodad.​—Luke 6:38; Prov. 19:17.

11. Mang boch ban’en nrayog ni ngad rin’ed ni be m’ug riy ni gad ba gol ngak Jehovah?

 ¹¹ Ku rayog ni ngad rin’ed boch ban’en ni be m’ug riy ni gad ba gol ngak Jehovah. Be pi’ e Bible e athamgil nga lanin’dad ni ngad pied e “tin th’abi fel’” rodad ngak Jehovah. (Prov. 3:9) “Tin th’abi fel’” ni bay rodad e ba muun ngay e tayim rodad, nge gelngidad, nge salpiy ni gad ma pi’ ni fan ko pigpig ni gad ma tay ngak Jehovah. Mus ko piin bitir ma rayog ni ngar filed rogon ni ngar golgad ngak Jehovah. I yog reb e matam ni Jason fithingan ni gaar: “Ra taw nga nap’an ni nge pi’ e tabinaw romow e salpiy ni ayuw u Kingdom  Hall, ma gamow ma pag pi fakmow ni nga ron’ed e salpiy nga lan e kahol ni yima tay e salpiy ni ayuw ngay. Yad ma felfelan’ ni ngar rin’ed e re n’em ni bochan e yad ma yog ni ‘yad be pi’ ban’en ngak Jehovah.’” Faan yira fil ko bitir nib gel e felfelan’ ni yad ra tay ni faan yad ra pi’ ban’en ngak Jehovah, ma aram e ra ur rin’ed e re n’ey ngki mada’ ko ngiyal’ ni kar ilalgad.​—Prov. 22:6.

12. Uw rogon be’ nib sumunguy?

¹² Ku reb i fel’ngin Jehovah nib fel’ e aram e ba sumunguy. Uw rogon be’ nib sumunguy? (Titus 3:1, 2) Be’ nib sumunguy e kub tamilangan’. Gathi gubin ngiyal’ ni thingari fol ko motochiyel. Gathi ir be’ ni ma lemnag nrogon ni ke yog ban’en e aram rogon ni ngan rin’ fa ir be’ nib gel e thin rok. Ma sumunguy ngak e girdi’ ma ma gay rogon ni nge nang fan rarogorad. Ba m’agan’ ngay ni nge motoyil ko girdi’, ma ma pagrad ni ngar rin’ed e n’en ni yad be lemnag ara yad baadag ni ngar rin’ed ni faanra ba puluw ni ngan rin’.

13, 14. (a) Uw rogon ni ma dag Jehovah ni ir be’ nib sumunguy? (b) Mang e kam fil u rogon ni i ngongol Got ngak Lot u fithik’ e sumunguy?

¹³ Uw rogon ni ma dag Jehovah ni ir be’ nib sumunguy? Ma gay rogon ni nge nang fan laniyan’ e pi tapigpig rok, maku ma pagrad ni ngar rin’ed boch ban’en nrogon ni yad be lemnag. Mu lemnag rogon e ngongol rok Jehovah ngak Lot ni ir be’ nib mat’aw. Nap’an ni dugliy Jehovah ni nge gothey fagal mach nu Sodom nge Gomorrah me yog ngak Lot ni nge mil nga daken e burey. Machane, me wenig Lot ngak Jehovah ni nge pag nge yan nga yugu reb e binaw. Aygum lemnag! Ke yog Lot ngak Jehovah ni nge thilyeg laniyan’!​—Mu beeg e Genesis 19:17-20.

¹⁴ Nap’an ni ga ra beeg e re chep ney, ma sana ga ra lemnag nde gel e michan’ rok Lot ara de fol. Demtrug e gin nra yan ngay ma rayog rok Jehovah ni nge ayuweg e yafas rok, ere dariy rogon ni nge rus. Yugu aram rogon ma ke rus. I tay Jehovah fan e n’en ni i lemnag Lot me pag ni nge mil nga yugu reb e binaw ni yugu aram rogon ni baadag Jehovah ni ngki gothey e re binaw nem. (Mu beeg e Genesis 19:21, 22.) Ere, ba tamilang ni Jehovah e gathi ir be’ ni ma lemnag nrogon ni ke yog ban’en e aram rogon ni ngan rin’ fa ir be’ nib gel e thin rok. Ya ir be’ nib sumunguy.

15, 16. Uw rogon ni ke m’ug ko fare Motochiyel ni pi’ Jehovah ngak piyu Israel ni ir be’ nib sumunguy? (Mu guy fare sasing ni bay u tabolngin e re article ney.)

¹⁵ Fare Motochiyel ni pi’ Jehovah ngak piyu Israel e ku be m’ug riy ni ir be’ nib sumunguy. Bod ni, faanra rib gafgow be’ nu Israel ndabiyog ni nge pi’ reb e saf ara reb e kaming ni maligach, ma rayog ni nge pi’ l’agruw e arche’ ni dove ara l’agruw e bulogol. Machane, uw rogon ni faanra dabiyog rok ni nge pi’ l’agruw e bulogol? Ke yog Jehovah nrayog ni nge pi’ boch e flowa. Machane, ba mudugil e miti flowa ni nge pi’. Rogon ni bay ko motochiyel e thingari pi’ e “tin th’abi fel’ e flowa” ni tin ni ma fal’eg piyu Israel e flowa riy ni nge kay boch e girdi’ nib ga’ farad ni kar bad nga tabinaw rorad. (Gen.18:6) Uw rogon ni be m’ug ko re n’ey ni Jehovah e ir be’ nib sumunguy?​—Mu beeg e Levitikus 5:7, 11.

¹⁶ Am susunnag ni gur be’ nu Israel ni gab gafgow. Nap’an ni kam fek i yan e flowa ni maligach rom nga tabernacle ma gguy boch e girdi’ nu Israel ni boor e salpiy rorad ni kar feked i yib boch e gamanman ni ngar pied ni maligach. Sana ga ra tamra’ ko maligach ni ngam pi’. Machane, ke yib ngan’um nib ga’ fan e maligach rom u wan’ Jehovah. Mang fan? Ya rogon ni bay ko Motochiyel rok Jehovah e thingar mu pi’ e “tin th’abi fel’ e flowa.” Ere, bod ni ke gaar Jehovah ngom: ‘Gu manang ndabiyog ni ngam pi’ e maligach ni bod rogon e tin baaram e girdi’, machane gu manang ni kam pi’ e tin nrayog rom.’ Re n’ey e be tamilangnag ni Jehovah e ir be’ nib sumunguy ma der ma yog ngak e pi tapigpig rok ni ngar rin’ed boch ban’en ndabiyog rorad.​—Ps. 103:14.

17. Ba miti mang liyor e ba m’agan’ Jehovah ngay?

  ¹⁷ Bochan ni kad nanged ni Jehovah e ir be’ nib sumunguy mab fel’ u wan’ e liyor ni gad be tay ngak ni faanra gad be rin’ u rogon nrayog rodad, ma re n’ey e be pi’ e athamgil nga lanin’dad. (Kol. 3:23) Reb e walag nib pin ni ke pilibthir ni Constance fithingan ni ma par u Italy e gaar: “Ri gu baadag ni nggu weliy ko girdi’ murung’agen e En Tasunmiy. Aram fan ni gu be ulul ko machib ma gu be fil e Bible ko girdi’. Yu ngiyal’ e ma kireban’ug ni bochan e dabkiyog rog ni nggu rin’ boch ban’en ni bochan e m’ar rog. Machane, gu manang nib ga’ fan e maruwel ni gu ma tay u wan’ Jehovah ya manang e gin ni nggu mus riy, ma gub t’uf rok, ma kub ga’ fan u wan’ e tin ni be yag ni nggu rin’.”

18. Mang reb e kanawo’ nrayog ni nge folwok e piin gallabthir rok Jehovah riy?

¹⁸ Uw rogon ni ngad sumunguygad ni bod rogon Jehovah? Am sul ngam lemnag rogon e ngongol rok Jehovah ngak Lot. Bay mat’awun Jehovah ni nge yog ngak Lot e gin ni nge mil ngay. Machane ba gol Jehovah, ya ke motoyil ngak Lot u nap’an ni be weliy laniyan’ me pag ni nge mil ko gin ni be lemnag. Ere, faanra bay e bitir rom, ma gur, rayog ni ngam folwok rok Jehovah? Sana rayog ni ngam motoyil ngorad ngar weliyed e n’en ni yad baadag, ngemu’ mfin mu dugliy e n’en ni ga baadag ni ngar rin’ed. Uw rogon ni ngam rin’ e re n’ey? Be yog Fare Wulyang Ntagil’ E Damit ko December 1, 2007 nu m’on ni nge fal’eg e gallabthir boch e motochiyel ni fan ko tabinaw mab fel’ ni ngar motoyilgad ko n’en ni nge yog e bitir rorad. Bod ni, sana baadag e gallabthir ni nge fal’eg e motochiyel u murung’agen e ngiyal’ ni nge sul e bitir nga tabinaw ko blayal’. Bay mat’awun e gallabthir ni nge rin’ e re n’ey, machane ba fel’ ni ngar nonad pi fakrad u m’on ni ngar dugliyed ban’en. Bay yu ngiyal’ nrayog ni nge thilyeg e gallabthir e ngiyal’ ni nge sul e bitir nga tabinaw ni faanra der togopuluw ko n’en ni be yog e Bible. Faanra non e gallabthir ngak pi fakrad u m’on ni ngar fal’eged boch e motochiyel, ma ra mom ko fapi bitir ni ngar nanged fan e pi motochiyel nem, maku ra m’agan’rad ngay ni ngar folgad riy.

19. Uw rogon ni nge athamgil e piin piilal ni ngar folwokgad rok Jehovah u rogon ni ma dag e sumunguy?

¹⁹ Piin piilal ko ulung e susun ni ngar sumunguygad ni bod Jehovah. Rogon ni ngar rin’ed e re n’ey e aram e dab ur lemnaged ni nge rin’ pi walagrad boch ban’en ndabiyog rorad. Dab mu pagtalin nib ga’ fan u wan’ Jehovah e pi maligach ni i pi’ piyu Israel ni yad ba gafgow. Re n’ey e taareb rogon ngak boch e walag ni kemus ni buchuuw e tayim nrayog ni ngar uned ko machib riy, ni sana bochan e yad ba m’ar ara kar pilibthirgad. Uw rogon ni faanra ke mulan’rad ni bochan e dabkiyog rorad ni ngar rin’ed boch ban’en ni bod rogon ni ur rin’ed kafram? Rayog ni nge ayuwegrad e piin piilal ni ngar nanged ni yad ba t’uf rok Jehovah ni bochan e yad be rin’ e tin nrayog rorad ni fan ko pigpig ni yad be tay ngak.​—Mark 12:41-44.

20. Mang e be yip’ fan ni ngad pigpiggad ngak Got u rogon nrayog rodad?

²⁰ Ra ngad sumunguygad ma gathi be yip’ fan ni ngad rin’ed buchuuw ban’en ni fan ko pigpig ni gad be tay ngak Got ni bochan e nge chuw e thin riy. (Matt. 16:22) Dubdad ni ngad rin’ed buchuuw ban’en ni faanra gad manang ni boor ban’en nrayog ni ngad rin’ed, ya ba t’uf ni ngad lemnaged e n’en ni yog Jesus ni gaar: “Mu athamgilgad.” (Luke 13:24) Ere, thingar da rin’ed boch ban’en u rogon nrayog rodad. Ba ga’ fan ni ngad pigpiggad ngak Got u rogon nrayog rodad, machane, ku thingar dab da paged talin nder ma lemnag Jehovah ni ngad rin’ed boch ban’en ndabiyog rodad. Faan gad ra rin’ e tin nrayog rodad, mab mudugil nra felfelan’ ngodad. Ri gad ba felfelan’ ni gad be pigpig ngak reb e Got nib sumunguy! Bin migid e article e gad ra weliy riy murung’agen l’agruw i fel’ngin Jehovah ni kub manigil.​—Ps. 73:28.