1, 2. a) Ka katei lunbei ladügüni aban gürigia lun lakipurun aban lubuidun umadaguaü luma Heowá? b) Kaba buiti wasagara lídangiñe wakutihani abahüdaguni burí le tídanbei Bíbülia luáguti ámuñegueinarügü ligaburi hóunabun gürigia lun lererehan Heowá?

“ÁNHEINTI au, nayarafahóuba lun Bungiu, ladüga anihán lubuidun-ágeibei katei nun. Buguya, Nabureme, buguya naramudaguagülebei.” (Sal. 73:23.) Lau burí dimurei le, larufudei abürühati Sálumu lafiñen luagu Bungiu. Ka anügübalin ariñagei lira? Ariha laali meha darangilañu haña lan wuribatiña, ariñaga ligía lau igarigu: “Málati haruma tan nanigi, ani haruma ligía núhabu lídangiñe sun wuribani!” (Sal. 73:2, 3, 13, 21). Gama lumoun, íderagua lumuti lebelurun “lúbiñoun Bungiu” asansirei ligaburi lisaminan luma lun lakipuruni lumadagua luma Bungiu (Sal. 73:16-18). Furendeiti meha wügüri úaraguati le aban katei súdiniti lídangiñe sügǘ ligía: lun lakipurun aban gürigia aban buiti umadaguaü luma Heowá, mosu lóundaragun hama amu lubúeingu Bungiu, falaleime adundehani le líchugubei (Sal. 73:24).

² Busentiwa giñe buidu lan wamadagua luma Bungiu le wínwanbei ani inarüniti. Lun wibihini lira, mosu wafurendeirun lídangiñe leweridihan luma lererehan, anhein wadüga ítara, gürigiabadiwa ha áutiña lagundaara. Adimurehóuati tidan Bíbülia hawagu gürigia luma luagu burí néchani ha meha únbaña larufuda Heowá gudemehabu lau líchugun chansi houn lun hóunabun buidu lun lererehan. “Lun larufudahóun woun labürühóua” abahüdaguni burí ligía tidan Bíbülia lun lahuudun keisi eweridihani “woun, wagía le wínwanbei lidan lagumuhóun dan” (Rom. 15:4; 1 Ko. 10:11). Líderagubadiwa wakutihani abahüdaguni burí le buidu lun buídutima lan wasubudiruni ligaburi Heowá, ani larufudubei giñe woun ka lan buiti lanügübei wígiraguagüdün woungua lun lawadigimariduniwa Heowá.

3. Ka uma konpararua lan lubafu Heowá hawagu gürigia lidan Isaíasi 64:8 luma Heremíasi 18:1-6? (Ariha huméi dibuhu le lídanbei páhina 23.)

³ Dan le tayanuhan Bíbülia luagu lubafu Heowá hawagu gürigia luma hawagu néchanigu, aba konpararü tani ítara: “[Heowá], buguya Wáguchibei, múa wagía, buguya nadagimeinti múa ligía, ladügün lubeiti búhabu sun wagía” (Isa. 64:8). Gayarati laranseruni nadagimeinti múa múa kei auti labusenra ani siñati lariñagun múa ni kata luagu lira. Ligiaméme asuseredubei hama gürigia luma Bungiu. Ítara kei siñá lan lariñagun múa lun nadagimeinti múa ka lan lunbei ladügüni lau, siñati giñe wariñaguni lun Bungiu ida luba lan lawadigimariduniwa (aliiha huméi Heremíasi 18:1-6).

4. Nadagimein lumutiña san Bungiu gürigia hama néchanigu kei auti ladagaragua luagu? Afuranguagüda huméi hóunabagüle.

⁴ Arufuda lumuti Heowá lau le ladügübei hau binadu ísüraelina gayara lan ladügüni lememe ladügübei nadagimeinti múa lau múa. Gama lumoun, anihein aban katei le ídanbei mítaran lan Heowá kei aban nadagimeinti múa. Gayarati lárügüdün aban nadagimeinti múa murusun múa lun ladügün furumiñeguarügü ágeidinaü lau ítara kei auti liabin lun lidoun lichügü. Anti Heowá, nadagimein lumutiña san gürigia hama néchanigu kei auti ladagaragua luagu lun ladügüniña híbiri buítiña híbiri wuribatiña? Ariñagatu Bíbülia mítaran lan. Rúhali Heowá aban idewesei súdiniti houn sun gürigia: líbürei lun desidírü hamá. Gabaroun lumuti Heowá idewesei le dan le layusuruni lubafu. Ligíati, lun gayara lan lawadigimaridun Bungiu luagu aban gürigia mosu gürigiaba lan ligía abusenrei (aliiha huméi Heremíasi 18:7-10).

5. Ida liña layusuruni Heowá lubafu hawagu gürigia ha mígiraguagüdünbaña houngua lun lawadigimariduniña?

⁵ Ida liñati layusuruni Heowá lubafu keisi Nadagimeinti Múa le Wéirigutimabei hawagu gürigia ha derebaña ani mígiraguagüdüntiña houngua lun hawadigimariduniwa? Dan le siñá lan layusurún aban murusun múa lun le yebe unbei labusenrúa, másiñati mosu lan ladügǘniwa amu luwuyeri ágeidinaü lau o lagünrinchawagun. Libe-agei dan, susereti lira ladüga mawadigimaridun lani nadagimeinti múa múa ligía buidu. Gama lumoun, maweiyasunti aban katei ítarati asusereda lun Nadagimeinti Múa le Wéirigutimabei (2 Lur. 32:4). Dan le masansirun lani Heowá ligaburi aban gürigia, ladügarügü liña mígiraguagüdün lan gürigia ligía lungua lun lawadigimariduniwa. Yusu lumuti Heowá lubafu lun lawadigimaridun hawagu gürigia según hígiraguagüdün houngua. Gürigia ha ígiraguagüdübaña houngua lun lawadigimaridun hawagu, awadigimarida lumutiña lun habuidun guánarügü. Aban hénpulu, ítara haña kristiánugu anuadirúaaña kei sóudieru “le unbei gudemehabu lan” le adügǘbei lun “sóudieru [lan] le díseguati layusurun [o le mayusurúnti lun furumiñeguarügü katei]”. Ánhañati ha mígiraguagüdünbaña houngua lun lawadigimaridun Bungiu hawagu, chülüti oura “lun larufuduni lueirin ligañi hawagu [lun] [...] hagünrinchawagun” (Rom. 9:19-23).

6, 7. Ka idan mítaran lan ligaburi lóunabun Saulu lun lererehan Bungiu kei ligaburi lóunabun Dawidi?

 ⁶ Awadigimarida lumutiña Heowá gürigia lau lererehan houn ru ligía eweridihani houn. Gayarati warihini ida liña lan layusuruni Heowá lubafu hawagu gürigia ha uágubaña luadigimarida lau wakutihani habagari bián furumiñetiña lurúeitegu ísüraeli: Saulu luma Dawidi. Adügati meha Dawidi damichi dandu lúniwagua kei houn amu gürigia dan le lagabarahanbei tuma Betüsawé. Lau sun meha urúei lan ligía, ébecha lumuti Heowá, óunaha lumuti Natán le lani profeta lau aban uganu le dǘgüdati lun (2 Sam. 12:1-12). Ida liña lóunabun Dawidi? Aba lasandiragun lungua wuriba, ábati lasakürihan tídangiñe sun lanigi, ligía lóuserunbalin Heowá lau gudemehabu (aliiha huméi 2 Samueli 12:13).

 ⁷ Ánheinti urúei Saulu, le meha arúeihabei lubaragiñe Dawidi, máhati laganbun eweridihani. Óunaha laali meha Heowá profeta Samueli íchiga gumadi lun lun láfaraguniña sun amaléküna hama habiñanigu. Madügünti Saulu gasu lau gumadi le, máfarun lumuti urúei Agagü ni habuidun-agei mudún, bágasu hama gábara. Ka uagu? Busenti meha libihin uéiriguni, ligía aban  resun (1 Sam. 15:1-3, 7-9, 12). Dan le lálugunbei yebe Samueli líderaguni arihei wuriba lan le ladügübei, mañuludaguagüdün lumutu urúei le lanigi lun luadigimariduni Nadagimeinti Múa le Wéirigutimabei. Lubaragiñe lira, aba larufudun mabahüdǘni lun uganu le líchugubei Samueli lun ani aba lálugun laricharaguagüdüni luriban lóuserun ariñaga luagu gayarabei lan hadagaragüdüniwa animaalugu hagía keisi sákürifisiu lun Heowá. Kei resultóu, aba mabusenrun laali lan Bungiu, le inarüniti, Saulu kei urúei ani féridi lumuti lumadagua luma lun súnwandan (aliiha huméi 1 Samueli 15:13-15, 20-23).

8. Ka gayarabei wafurendeiruni lídangiñe ligaburi hóunabun ísüraelina lun sun le ladügübei Heowá lun lawadigimariduniña?

⁸ Mámarügüñein houn gürigia líchiga Heowá chansi lun hígirun lun lawadigimaridun hawagu, ru lumuti giñe chansi ligía houn néchanigu. Adügati Bungiu aban daradu hama ísüraelina lárigiñebei lalibüreruniña lídangiñe amudirawaguni Ehiptu, lidan irumu 1513 lubaragiñe lidaani Hesusu. Ísüraeli meha néchani le lanúadirubei ani ibiha lumuti lubuidun chansi lun lawadigimariduniwa luagu “lawadigimaridagüle múa” le lani Nadagimeinti Múa le Wéirigutimabei. Gama lumoun, sigitiña ísüraelina adügei le wuribabei ligibugiñe Heowá, darí lun háhuduragun houn búngiugu ha únbaña heseriwida lílana burí néchani le geyegubei hau. Óunahati meha Heowá profetagu houn, saragu wéiyaasu, lun yebe híderaguniña asansirei luriban hóuserun, gama lumoun madügüntiña gasu hau (Her. 35:12-15). Hanarimeti habeichúniwa ladüga hadere. Ítara kei ágeidinaü le lunti lagünrinchawagun, aba meha hagünrinchaguniña asiriana lílana arúeihani ísüraelina le lánina diisi türibu, ánheinti arúeihani hudaana le lánina bián türibu, babilóniana ábürühabaña hawagun lílana. Ma lanarime katei le wafurendeirubei lídangiñe sügǘ le!  Ánhawagubeirügü afurendeira lídangiñe lererehan Heowá ligíarügübei buidu lan lidin woun.

9, 10. Ida liña hóunabun níniwena lun leweridihan Bungiu?

⁹ Ruti giñe Heowá chansi houn lílana Níniwe, uburugu le lichügüdinabei ageiraü Asiria, lun haganbuni leweridihan. Ariñagati lun Honasi: “Beiba lidan óunwenbu uburugu le Níniwe, bariñagame houn sun lílana fulasu luagu nagünrinchaguaali lan, ladüga aganbaadina luagu hariban”. Lagünrinchawagúa meha Níniwe (Hon. 1:1, 2; 3:1-4).

¹⁰ Danti le líchugunbalin Honasi uganu le houn, “aba hafiñerun [...] luagu Wabungiute, wéinamuhaña ñǘbürigiña, aba hayunarun, aba hadaüragun daüguaü súsutu, arufudei hagarigu”. Aba lásaarun “lurúeite Níniwe [...] luéigiñe lálana larúeihan, aba laragachunu ladaüragun to lánina arúeihani, aba ladaürün daüguaü súsutu, aba lañuurun múarugu”. Kei ígiraguagüda habéi níniwena houngua lun lawadigimariduniña Heowá ani asaküriha hagía aba máfaragun laaña lan (Hon. 3:5-10).

11. Ka ligaburi Heowá arihíbei furangu lidan ligaburi lóuserun hama lílana Ísüraeli luma hama lílana Níniwe?

¹¹ Lau sun meha lílana lan néchani le lanúadirubei Heowá ísüraelina, mosu meha labeichuniña. Ánheinti níniwena, lau sun meha madügün lan daradu hamá, arufudati gudemehabu houn ladüga óusera hamá kei múa ñuluti lúhaburugu. Furanguti larufuduni bián sügǘ le ‘aban lan labu lanügüniña Wabungiute sun gürigia’ (2 Lur. 10:17).

12, 13. a) Ka uagu lasansirei Bungiu le yebe lasaminarubei ladügün dan le lígiraguagüdün gürigia lungua lun luadigimariduni? b) Ka mini lubéi lahürüdün lun Heowá le desidírü láalibei ladügün lun Saulu luma houn níniwena?

¹² Arufuda lumuti ligaburi lawadigimariduniwa Heowá luagu richá lan ani méredun lan luagu ábanmeme katei. Anihein dan, lárigiñe ariñaga laali lan, lau irichaü, kaba lan abeichúni libiha aban gürigia, sansi lumuti le lasaminarubei ladügün según ligaburi lóunabun gürigia ligía. Aban hénpulu, ariñagatu Bíbülia aba lan lahürüdün lun Heowá ‘líchuguni Saulu urúeime’ (1 Sam. 15:11). Ani ariñagatu giñe dan le lan larihinbalin Heowá hasakürihan níniwena, aba lan “madügün laali lan abeichúni le yebe uágubei lariñaga houn” (Hon. 3:10).

¹³ Dimurei ebüréu le ásügürawagüdübei kei “hǘrühali”, gániti luma lasansirun aritaguni o le yebe saminawabei ladügǘn. Sánsiti meha ligaburi laritagun Heowá libügürü Saulu, lugundun lárigiñe lanúadiruni urúeime aba mabusenrun laali lan kei urúei. Mama hamugatia ladüga chará lan dan le lanuadirúnbalin, lasuseredunbei lira, ladüga lalouguadun lafiñen Saulu ábati maganbadi haali lan. Aba giñe ‘lahürüdün’ lun Bungiu le inarünibei le yebe lasaminarubei ladügün hau níniwena, mini lan lira, aba lan lasansiruni laritagun hawagu. Ruti saragu dǘgüdaguaü woun wasubudiruni richá lan Heowá, Nadagimeinti Múa le Wéirigutimabei, ani méredun lan luagu ábanmeme katei, gudemehabu ligía, ani aranseñu liña lan lun lasansiruni le yebe lasaminarubei ladügün dan le asakürihaali lan gürigia le afigouhabei.

14. a) Ida liña lawadigimariduniwa Heowá uguñe weyu? b) Ida luba wóunabun lun sun le ladügübei Heowá lun lawadigimariduniwa?

¹⁴ Lereruntima Heowá tuma lóundarun layusuruboun lun lawadigimaridun wawagu (2 Tim. 3:16, 17). Ligía lunti lubéi gaganbadi wamá lun eweridihani luma ererehóuni le weresibirúbei lúmagiñe Heowá tídangiñe Bíbülia luma tídangiñe lóundarun. Meberesenga átirihali lan dan wau lúmagiñe wabadiseirun o anhein gibe lubéi wani buligasion tidan lóundarun Bungiu, mosu gaganbadiméme wamá súnwandan lun adundehani le líchugubei Heowá woun ani ígira wagíame lun ladügüniwa según ligaburi.

15, 16. a) Ka luriban saminaü gayarabei liabin wábulugun dan le wabeichúniwa lau lagidarúniwa somu buligasion lidan damuriguaü wawéi? Ru humá aban hénpulu. b) Kaba íderaguawa lun mígiraguagüdün wamá woungua lun luriban saminaü le lanügübei abeichúni?

¹⁵ Ida liña lererehan Heowá woun? Anihein dan, aba larufudahani woun ka lan lagurabubei  wámagiñe o íderagua lumutiwa asansirei ligaburi wasaminan. Gama lumoun, háfuga ñeinbei lan dan mégeibadiwa lan ebechúni le dǘgüdatimati ladüga adügaadiwa lan somu katei wuribati. Gayarati ladügǘn luwuyeri ererehóuni le lau lagidarúniwa buligasion le wagunfulirubei lidan damuriguaü wawéi. Ariha waméi le asuseredubei lun Dennis, * le meha eseriwidubei kei wéiyaali lidan afiñeni. Adügati meha aban figóu wéiriti ladüga ua lan duari lan lidan katei luáguti seinsu, aba lebechúniwa lábuguarügü. Ida liña lasandiragun lungua dan le lawisahóunbei lidan damuriguaü luagu mámaali lan wéiyaali lidan afiñeni? Ariñagati: “Sandiguatina nungua kei aban móuniti. Lidan meha darandi irumu le naubei tidan lóundarun Heowá gíbeeli meha lubuidun chansi lánina eseriwiduni neresibirun. Seriwihadina meha kei prekursoru le adügübei ǘrüwa-wein-diisi oura sagü hati, Betelirugu, kei ídehati lidan damuriguaü ani iridúaadina meha kei wéiyaali lidan afiñeni. Ani sun liña meha giñe níchuguni furumiñeti niyanun lidan adamurini distritu. Sódini, aba neferidiruni súngubei. Wéiriti meha nibusigari ani saminatina meha giñe úaali lan ubaraü nun tidan lóundarun Heowá”.

¹⁶ Mosu meha lasansirun Dennis, masigirun ligíame adügei katei wuribati le adügübei lun lebechúniwa. Ka méhati íderagubalin lun mígiraguagüdün lan lungua lun luriban saminaü? Ariñagati: “Aba desidírü nan naturiahanu Bíbülia estodi, náfuridun apurichiha luma nidin adamuridagua. Íderagua hamutina giñe íbirigu lidan afiñeni saragu ani ruti burí le naliihabei tidan agumeiraguagüdüni dǘgüdaguaü nun. Ariha numuti meha arütíkulu le gíribei ‘Le gustaría recuperar su privilegio de servicio?’, le áfuridubei tidan Garüdia Atalaya to lánina 15 lidan widü-hati, irumu 2009, kei aban gárada to ounahóuboun nun keisi lóunabagüle nafurieidun. Lídangiñe adundehani ligía, anihán le hínsiñetimabei nun: ‘Guentó kei míbeeli lubéi hani buligasion lidan damuriguaü, yusu huméi hidaani lun hederebudagüdüni humadagua luma Bungiu’”. Ka buiti lasagarubei Dennis lídangiñe ererehóuni le leresibirubei? Lárigiñe sügühali lan fiú irumu, ariñagati: “Biniya láadina Heowá lau líchuguni lubuidun chansi nun lun neseriwidun kei ídehati lidan damuriguaü”.

17. Ida liña gayara lan lídehan labugún aban gürigia lídangiñe damuriguaü lunya lagiribudun lun Heowá? Ru humá aban hénpulu.

¹⁷ Labugún aban gürigia lídangiñe damuriguaü ligía ábanya manera le aubei labeiha Heowá. Lau lira, góunigi lumuti damuriguaü luéi gabafu lan wuribani luagu ani gayarati lídehan lun lárügüdagun le afigouhabei lungua giribu láamuga lun (1 Ko. 5:6, 7, 11). Sügüti meha Robert yarafa lun disisi irumu bóugudi luéi damuriguaü lúmagiñe labugún, lidan sun dan ligía úaraguatiña lagübürigu hama líbirigu lun gumadi tídangiñeti Bíbülia luáguti moun lumuti lan wóundaragun hama afigouhatiña nírügü lun wabusuragun houn. Guentó, barühali saragu irumu lúmagiñeya lanharúniwa lun lidan damuriguaü ani lawanseruña lidan leseriwidun lun Bungiu. Dan le lálügüdünwabei ka lan ínchahabalin lun lagiribudun lidoun damuriguaü lárigiñe saragu irumu bóugudi, óunabati ínchaha lani húaragun liduheñu lun lugumadin Heowá. Ariñagati giñe: “Lun hamuga meha óundaragua hamá niduheñu numa íbinirügü murusun lun harihini ida niña lan, buídurügübei yebe lira nun, ani háfuga mínchahan lubadina lan hamuga nabusenrun násügürün dan hama lun nagiribudun lun Bungiu”.

18. Ka luwuyeri múa lunbei ítara wamá lúhaburugu Nadagimeinti Múa le Wéirigutimabei?

¹⁸ Másiñati memegeirúnbadiwa lan aban abeichúni le hanarimeti ítara, gama lumoun, kaba san luwuyeri múa wagía lúhaburugu Nadagimeinti Múa le Wéirigutimabei? Ida luba wóunabun danme le lébechuniwa? Wóuseruba san kei Dawidi o kei Saulu? Wáguchi, Nadagimeinti Múa le Wéirigutimabei. Maweiyasun wamá abulieidei luagu “wéridi lumutiña [lan] Bungiu gürigia ha hínsiñebaña lun, kei ladüga aban úguchili lun liráü le hínsiñetimabei lun”. Ligíati, mamahara wamá lun lererehan luma ladeinhan Heowá (Ari. 3:11, 12).