1, 2. (a) Jehovah he pehtlaihnak ṭha ngeih awkah zeidah kan tuah a herh? (b) Pathian cawnpiaknak kha mi nih zeitindah an lehrulh timi Baibal tahchunhnak kan i ruahnak in zei ṭhatnak dah kan hmuh lai?

“KEI ca tu ahcun, Pathian pawng um cu a va nuam hringhran dah! BAWIPA chungah khan himnak ka hmuh.” (Salm 73:28) Salm caṭialtu nih Pathian a zumhnak kong kha cutin a rak chim. Zeicah cutin a chim? A hmasa ahcun miṭhalo pawl nih daihnak an hmuhmi kha a hmuh tikah a thin a hung ngai i hitin a ti: “Thiang tein nun kaa zuam i ka kut in sualnak tuah lo kaa sum hi pakpalawng maw a si ko lai?” (Salm 73:2, 3, 13, 21) Asinain “Biakinn chung” i a luh tikah a ruahnak kha a remh khawh i Pathian he naih tein a um kho ṭhan. (Salm 73:16-18) Salm caṭialtu nih a biapi ngaimi thil a hun hngalh: Mah cu Jehovah he pehtlaihnak ṭha ngeih a duhmi nih cun Pathian miphun si le a cawnpiaknak kha cohlan in zulh a hau ti kha a si.—Salm 73:24.

² A hmaanmi le a nungmi Pathian he pehtlaihnak ṭha ngeih kan duh. Cutin ngeih khawh awkah a cawnpiaknak kha cohlan a hau. Mah nih Jehovah cohlanmi minung si awkah a kan sersiam. Hlanlio ah Pathian nih mi pakhat cio le miphun hna kha a cawnpiaknak cohlan awk caanṭha a pek hnanak thawng in an cungah zaangfahnak a langhter. Mah kong hna cu donghnak caan ah a nungmi “kanmah cawnpiaknak caah” le “kan i ralrinnak ding caah” Baibal ah ṭial an si. (Rom 15:4; 1 Kor. 10:11) Mah kong hna lak i cheukhat kha hi capar ah kan i ruah lai. Mah nih Jehovah ruahning le a kan sersiam tikah zeitindah ṭhatnak kan hmuh khawh ti kha a kan hngalhter lai.

3. Isaiah 64:8 le Jeremiah 18:1-6 nih minung cung i Jehovah nawlngeihnak kha zeitindah a langhter? (A hramthawknak i hmanthlak kha zoh.)

³ Jehovah cu minung le miphun hna cungah nawl a ngeih caah umsertu he an i lo tiah Baibal nih a ti. Isaiah 64:8 nih hitin a ti: “BAWIPA, nangmah cu kan Pa na si. Kannih cu tlak bantuk kan si i nangmah cu umsertu bantuk na si. Nangmah nih kannih cu na kan ser.” Umsertu nih tlak in a duhmi zei bantuk um paoh a ser khawh. Tlak nih umsertu kha zeitin rak ka ser tiah a ti kho lo. Pathian le minung zong cutin kan si ve. Tlak nih umsertu kha zei bantuk um ah rak ka ser tiah a ti khawh lo bantukin kannih zong Pathian kha zeitin rak kan sersiam tiah kan ti kho ve lo.—Jeremiah 18:1-6 rel.

4. Jehovah nih mi pakhat cio le miphun hna kha a sersiamnak cohlan awkah a hnek hna maw? Zeicah?

⁴ Umsertu nih tlak kha a sersiam bantukin Jehovah nih Israel mi kha a sersiam hna. Asinain an i thleidannak a um. Jehovah nih minung kha zalong tein i thimnak nawl a pek hna. Cheukhat kha miṭha in, cheukhat kha miṭhalo in a ser hna lo. Cun a nawlngeihnak kha hmang in a nawl ngaih awkah a hnek hna lo. Minung nih Sertu Jehovah sersiamnak kha an cohlan lai le cohlan lai lo an i thim a hau.—Jeremiah 18:7-10 rel.

5. Jehovah nih a sersiamnak a cohlang lomi hna kha zeitindah a tuah hna?

⁵ Mi pakhat cu a lung a khon i umsertu Jehovah sersiamnak a cohlan lo ah tah zeitin? Jehovah nih umsertu in a nawlngeihnak kha zeitindah a hman lai? Umsertu caah tlak cu a duhmi um phun in ser awkah a har ahcun a dang um ah a ser khawh asiloah a hlonh khawh. Umsertu nih tlak kha ṭha tein a sersiam lo caah cutin a si tawn. Jehovah tu nih cun minung kha ṭha tein a sersiam zungzal hna. (Deut. 32:4) Mi nih Jehovah sersiamnak kha an duh lo ahcun mah cu anmah palh a si ko. Mi nih an lehrulh ning cungah i hngat in Jehovah nih a sersiam hna ning kha a thlen. A nawl an ngaih ahcun a caah man ngeimi an hung si. Tahchunhnak ah, chiti thuhmi hna cu “zaangfahmi” um, a “sawhsawh men i hman lo dingah” sermi an si. Asinain Pathian cawnpiaknak a ngai lomi hna cu hman awk a tlak lomi “a thin a huntertu” um an si.—Rom 9:19-23.

6, 7. Siangpahrang David le Sawl nih Jehovah cawnpiaknak kha zeitindah an lehrulh?

 ⁶ Jehovah nih mi a sersiam hnanak lamkhat cu a cawnpiak hnanak thawng in a si. Tahchunhnak ah, Jehovah nih Israel siangpahrang a rak ṭuan hmasa bikmi Sawl le David a sersiam hnaning kha ruat hmanh. Siangpahrang David cu Bath-sheba he nupa sualnak an tuah tikah amah le midang cu harnak an tong. David cu siangpahrang a si ko nain Jehovah nih fakpi in a cawnpiak. David kha fakpi in chimhhrinh awkah profet Nathan kha a thlah. (2 Sam. 12:1-12) David nih zeitindah a lehrulh? A tuahmi ruangah a lung a ṭhalo i aa ngaichih. Cucaah Pathian nih a zaangfah ṭhan.—2 Samuel 12:13 rel.

 ⁷ Siangpahrang Sawl cu cutin a si lo. Cawnpiaknak kha a ngai lo. Jehovah nih Amalek mi le an saṭil kha na thah dih hna lai tiah Samuel hmang in a chimh. Asinain a ngai lo. Siangpahrang Agag kha a that lo i saṭil a ṭha bik pawl zong  kha a zuah hna. Zeicah? Thangṭhatnak hmuh a duh caah a si kho men. (1 Sam. 15:1-3, 7-9, 12) Cucaah Jehovah nih Sawl cawnpiak awkah Samuel kha a thlah. Sawl nih Jehovah cawnpiaknak le sersiamnak kha a cohlan awk a si nain a cohlang lo. A tuahsernak kha aa silhnalh. Saṭil pawl cu Jehovah sin raithawinak caah a si tiah a ti. Cucaah Pathian nih Sawl kha Siangpahrang in a hlawt i amah he pehtlaihnak ṭha an ngei kho ṭhan ti lo.—1 Samuel 15:13-15, 20-23 rel.

8. Israel mi nih Jehovah sersiamnak an lehrulh ningin zeidah kan i cawn khawh?

⁸ Jehovah nih miphun ning zong in amah nawl ngaih awkah caanṭha a pek hna. Israel mi kha BC 1513 ah Izipt ram in a luatter hna hnuah annih cu a miphun an hung si. Pathian nih kaan sersiam hna lai tiah bia a kamh hna. Asinain Israel miphun nih Pathian sersiamnak kha an cohlang lo i Jehovah mit hmuh ah a ṭhalomi thil an tuah zungzal. An pawngkam mi hna i an pathian hmanh kha an biak. Jehovah nih an tuahsernak i thlen awkah profet hmang in voi tampi a cawnpiak hna nain an ngai duh lo. (Jer. 35:12-15) Cucaah fakpi in a chimhhrinh hna. Assiria mi nih chaklei Israel pennak kha an hrawh. A hnuah Babilon mi nih thlanglei Judah pennak kha an tei ve. Mah in a biapi ngaimi thil kan cawn khawh. Mah cu Jehovah sersiamnak kan cohlan lawng ah ṭhatnak kan hmu lai ti kha a si.

9, 10. Nineveh khuami hna nih Jehovah ralrin peknak kha zeitindah an lehrulh?

 ⁹ Jehovah nih Assiria khualipi Nineveh khuami hna kha ralrin a pekmi hna lehrulh awkah caanṭha a pek hna. Jonah kha hitin a ti: “Nineveh khualipi ahcun va kal tuah, atu ah va kal law a ṭhatlonak nih khan a cerh in a ka cerh caah va si.” Nineveh khuami hna cu an ṭhatlo tuk caah Jehovah nih khua kha hrawh awkah bia a khiah.—Jonah 1:1, 2; 3:1-4.

¹⁰ Mah kong kha Jonah nih a chimh hna tikah “Pathian bia cu an zumh.” An i ngaihchih kha langhter an duh caah rawl an ul i buri an i aih. An siangpahrang zong “a bawiṭhutdan cung khan a tho i a siangpahrang puan kha aa phoih i buri kha aa aih i vutcam lakah a ṭhu.” Nineveh khuami hna nih Jehovah sersiamnak kha an cohlan i an i ngaichih. Cucaah Jehovah nih a hrawk ṭhan hna lo.—Jonah 3:5-10.

11. Jehovah nih Israel mi hna le Nineveh khuami hna a pehtlaih hnaning in zeidah kan hngalh khawh?

¹¹ Jehovah nih a miphun a simi Israel mi kha a cawnpiak hna. A miphun a si lomi Nineveh khuami zong kha a cawnpiak hna. Annih nih Jehovah sersiamnak kha ṭha tein an cohlan caah an cungah zaangfahnak a langhter i a hrawk ṭhan hna lo. Mah nih Jehovah cu “duhdanh a ngei lo” ti kha a langhter.—Deut. 10:17.

12, 13. (a) Mi nih an tuahsernak an i thlen tikah Jehovah nih zeicah a biakhiahnak kha a thlen ve? (b) Jehovah cu Sawl le Nineveh khuami hna kong ah aa ngaichih timi nih zeidah a chim duhmi a si?

¹² Mi nih an tuahsernak an i thlen tikah Jehovah zong nih a biakhiahnak kha lungtho tein a thlen ve. Tahchunhnak ah, Jehovah nih Sawl kha Israel siangpahrang ah a ser caah aa ngaichih tiah Baibal nih a ti. (1 Sam. 15:11) Cun Nineveh khuami hna cu an i ngaichih i an ziaza ṭhalo an hlawt tikah ‘Pathian cu aa ngaichih i an cungah ka tlunter lai a timi ṭhatlonak kha a tlunter ṭhan lo’ tiah Baibal nih a ti.—Jonah 3:10.

¹³ Baibal nih Jehovah cu ‘aa ngaichih’ tiah a ti tikah mi pakhat cungah a lungput aa thleng asiloah ka tuah lai tiah bia a khiahmi kha a thlen ṭhan tinak a si. A hmasa ahcun Jehovah nih Sawl kha mithmai ṭha a pek. Asinain Sawl nih a nawl a ngaih lo tikah siangpahrang in a rak hlawt. Mah cu Sawl kha siangpahrang in a rak thimmi kha a palh caah a si lo. Sawl nih a nawl a ngaih lo ca tu ah a si. Nineveh khuami hna cu an i ngaihchih tikah Jehovah nih a biakhiahnak kha a thlen i a hrawk ṭhan hna lo. Jehovah cu lungnemmi le zaangfahnak a ngeimi a si i mi nih an tuahsernak an i thlen tikah a biakhiahnak thlen a duh ve timi hngalh cu kan caah hnemtu a si.

14. (a) Tuchan ah Jehovah nih kanmah sersiam awkah zeidah a hman? (b) Pathian nih a kan sersiam tikah zeidah kan tuah awk a si?

¹⁴ Tuchan ah, Jehovah nih kanmah sersiam awkah Baibal le a bupi a hman. (2 Tim. 3:16, 17) Mah in kan hmuhmi cawnpiaknak vialte kha lunglawm tein kan cohlan awk a si. Tipil kan innak zei can a si cang hmanhah asiloah Khrihfabu ah zei bantuk tinvo kan hmuh hmanhah Jehovah cawnpiaknak kha kan zulh zungzal awk a si. Cutin Jehovah nih a kan sersiammi kha kan cohlan ahcun Pathian nih siter a kan duhmi minung kan si kho lai.

15, 16. (a) Mi pakhat nih Khrihfabu ah a hmuhmi tinvo a sungh tikah zeitindah a um khawh? Tahchunhnak chim. (b) Chimhhrinh kan si tikah ningzak le hmaichia in kan ummi kha tei awkah zeinihdah a kan bawmh khawh?

 ¹⁵ Jehovah nih zeitindah a kan cawnpiak? Tuahter a kan duhmi kha a kan chimh i kan ruahnak kha a kan remhpiak. A caan ahcun sualnak ngan kan tuah caah fakpi in chimhhrinh kan herh men lai. Mah tikah Khrihfabu i kan hmuhmi tinvo cheukhat kan sung kho men. Khrihfa upa a simi Dennis kong hi ruat hmanh. * Chawlehnak he aa tlaiin biakhiahnak tuah aa palh caah chimhhrinh a rak si. Khrihfabu ah Khrihfa upa a si ti lo tiah an thanh zan ah zeitindah a um? A sungmi pakhat bantuk ah kaa ruat tiah a chim. “A luancia kum 30 chung, tinvo sung tampi ka rak ngei. Hmaanhmaan ka rak si, Bethel ah ka rak ṭuan, cun bu rianṭuantu zong ka si i a hnuah Khrihfa upa ka hung si. Pengkomh civui ah a voikhatnak phung ka rak chim. Asinain mah vialte kha ruahlo piin ka sung dih.” Ningzak le hmaichia in a um i bupi caah man a ngeimi ka si kho ti lai lo tiah a ruah.

¹⁶ Dennis nih a tuahsernak kha a thlen. A ruahning kha thlen awkah zeinihdah a bawmh? Baibal kha ṭha tein a hlathlai, phungchimnak le pumhnak ah hmaan tein aa tel. Bupi chuahmi cauk le unau hna sinin thapeknak a hmuh caah aa lawm tuk. Hitin a chim: “2009, August 15, Vennak Innsang i ‘Hlanah Na Rak Ṭuan Maw? Na Ṭuan Ṭhan Kho Lai Maw?’ timi capar cu ka thlacammi lehnak cakuat he aa lo.” Dennis nih ka caan le ka thazaang hmang in Jehovah he kan i pehtlaihnak fehter ṭhan khawh a si ti kha mah capar in a hngalh. Chimhhrinh a simi in ṭhatnak aa lak i kum tlawmpal a rauh hnuah bu rianṭuantu a si ṭhan.

17. Bu chung chuahnak nih sualnak a tuahtu kha zeitindah a bawmh khawh? Tahchunhnak chim.

¹⁷ Bu chung in chuahnak cu Jehovah cawnpiaknak phunkhat a si ve. Mah nih sualnak a tuahtu i a ṭhalomi huham in Khrihfabu kha a huhphenh i sualnak a tuahtu kha i ngaihchih awkah a bawmh khawh. (1 Kor. 5:6, 7, 11) Robert cu kum 16 hrawng bu chung in chuah a rak si. Mah caan chungah a nu le a pa le a unau pali nih Baibal lamhruainak kha an zulh i pehtlaihnak an tuah lo, a chawnh hmanh an chawn lo. Atu ah Robert cu bu chungah a luhnak kum tlawmpal a si cang i thlaraulei ah a ṭhangcho ṭhan. Caan saupi a rauh hnuah bu chungah a luh ṭhannak a ruang pakhat cu a chungkhar nih an ka chawhbiak lo caah a si tiah a ti. Ka chungkhar nih keimah he caan tlawmpal hmang hna sehlaw asiloah zeidah na lawh tiah rak ka hal hna sehlaw mah tlukin ka ngai hna hnga lo tiah a ti. Amah he pehtlaihnak an tuah lomi nih Jehovah le a miphun sin kir ṭhan awkah a bawmh.

18. Pathian nih a kan sersiam tikah zeitindah kan lehrulh awk a si?

¹⁸ Kannih cu cutin chimhhrinh kan herh men lai lo. Asinain Pathian nih a kan sersiam tik le a kan cawnpiak tikah zeidah kan tuah lai ti tu cu kan ruah a hau. Cawnpiaknak kha zeitindah kan lehrulh lai? David bantukin kan cohlang lai maw? Asiloah Sawl bantukin dah kan al lai? A Liannganmi Umsertu, Jehovah cu kan Pa a si. “Pa nih a duhmi a fapa cu a mawhchiat bangin BAWIPA nih a dawtmi kha a mawhchiat ve hna” ti kha zeitik hmanhah philh hlah. Cucaah Jehovah “chimhhrinnak cu zei rel loin um hin hlah. Aan mawhchiatnak nih cun in nor hlah seh.”—Ptb. 3:11, 12.