1, 2. (a) Iehova ita tura henia namonamo totona, dahaka ita karaia be mai anina bada? (b) Baibel ai haida be Dirava ena matahakani idia abia dae eiava lasi sivaraidia ita stadilaia karana, ese edena dala ai ita do idia durua?

 “TO LAU be Dirava badibadinai lau noho. Inai be namo herea momokani. Siahu Ibounai Lohiabada e, oi be lauegu magu momokani.” (Sal. 73:28) Unai siri ai Salamo torea tauna ia hahedinaraia ia be Dirava ia abidadama henia. To, dahaka dainai unai bamona ia hereva? Badina guna ia itaia kara dika taudia be maino ai idia noho bona unai ia moalelaia lasi. Unai dainai ia gwau: “Nega ibounai lauegu lalona lau hagoevaia, bona kara dika ta lau karaia lasi. Inai kara dekena amo namo ta lau davaria, a?” (Sal. 73:2, 3, 13, 21) To, gabeai “Dirava ena Dubu Helaga” lalonai ia vareai neganai, ena lalohadai ia hamaoromaoroa bona Dirava kahirakahira ia noho. (Sal. 73:16-18) Salamo torea tauna be mai anina bada gauna ta ia dibaia: Dirava ia tura henia totona, namona be Dirava ena taunimanima huanai ia noho, Iena sisiba ia abia dae, bona ia badinadia.—Sal. 73:24.

² Ita danu ita ura ia mauri noho Dirava momokanina do ita tura henia. Unai dainai, namona be iena sisiba bona matahakani ita abia dae, iseda kara ita hamaoromaoroa bena unai amo Iehova do ita hamoalea! Guna negadiai, Dirava ese taunimanima bona bese haida dekenai dala ia kehoa idia sibona ese abia hidi do idia karaia, iena matahakani do idia badinaia eiava lasi. Unai sivarai be Baibel lalonai idia torea, “inai nega oromana ena dokona ai ita noho taudia idia hadibaia totona.” (Roma 15:4; 1 Kor. 10:11) Unai Baibel sivaraidia ese ita idia durua Iehova ena kara do ita diba namonamo, bona iena matahakani amo do ita abia namo ita lalopararalaia totona.

3. Edena dala ai Isaia 64:8 bona Ieremia 18:1-6 be laulau dalanai, Iehova ese taunimanima dekenai ena siahu ia gaukaralaia dalana idia herevalaia? (Laulau ginigunana itaia.)

³ Baibel ia gwau Iehova be uro karaia tauna bamona, badina ia ese taunimanima ta ta bona bese badadia ia biagudia. Isaia 64:8 ia gwau: “Lohiabada e, oi be aiemai Tamana. Ai be raro bamona, bona oi be raro gaukaralaia tauna bamona. Oi ese ai oi karaia.” Uro karaia tauna ese raro ia biagua dainai, iena ura hegeregerena ai ia gaukaralaia diba. Raro ese uro karaia tauna ia biagua diba lasi. Unai hegeregerena, taunimanima be Dirava idia biagua diba lasi. Anina be taunimanima ese Dirava do idia oda henia lasi edena bamona taudia ai idia do ia halaoa.—Ieremia 18:1-6 duahia.

4. Iehova ese taunimanima ta ta bona bese badadia ia doria ia idia badinaia totona, a?

⁴ Uro karaia tauna ese raro be ena imana ai ia gaukaralaia bamona, Iehova ese Israela besena ia hamaoromaoroa. To, Iehova be uro karaia tauna amo ia idau. Uro karaia tauna ese ena diba hegeregerena ai raro amo uro idauidau ia karaia diba. To, Iehova be ena ura hegeregerena ai, taunimanima ta ta o bese haida be namodia ai ia halaoa, bona ma haida be dikadia ai ia halaoa, a? Baibel ia gwau, Iehova be unai bamona ia karaia lasi. Iehova ese taunimanima dekenai harihari gauna namona ta, ura kwalimu ia henia. Ia ese idia ia doria lasi ia idia badinaia totona. To, idia sibona ese abia hidi idia karaia, edia Havaraia Tauna, Iehova, ese idia do ia hamaoromaoroa eiava lasi.—Ieremia 18:7-10 duahia.

5. Bema ta ia ura lasi matahakani ia abia dae, Iehova be edena dala ai ena siahu ia gaukaralaia?

⁵ Bema taunimanima idia ura lasi Iehova, Uro Karaia Tauna Badana, ese edia kara ia hamaoromaoroa be edena bamona? Edena dala ai Iehova ese ena siahu ia gaukaralaia? Bema uro karaia tauna ese ia gaukaralaia raro be ia dika, dahaka do ia karaia? Unai raro ia gaukaralaia diba uro idauna ta ia karaia totona, eiava unai raro ia negea diba! Bema raro be ia namo lasi, nega momo unai be uro karaia tauna ena kerere. To, Uro Karaia Tauna Badana be unai bamona lasi. (Deu. 32:4) Bema tau ta ia ura lasi Iehova ena matahakani ese ia hamaoromaoroa, unai be Iehova ena kerere lasi. Unai tau ena kara dainai, Iehova ese ena matahakani dalana ia haidaua diba. To, Iehova ena matahakani idia abia dae taudia be namo idia davaria. Hegeregere, horoa Keristani taudia be “ia hebogahisi henia urodia” bona idia be “anina bada gaukaradia” karaia totona ia hamaoromaorodia. To, Dirava ena matahakani idia abia dae lasi taudia be “ia badu henia urodia” bamona bona “dika do idia davaria.”—Roma 9:19-23.

6, 7. King Davida bona King Saulo be Iehova ena matahakani idia abia neganai, dahaka idia karaia?

 ⁶ Iehova ese taunimanima ia hamaoromaoroa dalana ta be, sisiba o matahakani henia karana amo. Hegeregere, Iehova ese Israela edia king ginigunadia rua, Saulo bona Davida, ia kara henia dalana mani ita laloa. King Davida be Bataseba ida ia heudahanai neganai, ena kara ese ia bona ma haida edia mauri ia hadikaia. Herevana Davida be king, to Iehova ese ia matahakani henia. Peroveta tauna Natana ia siaia Davida ia sisiba auka henia totona. (2 Sam. 12:1-12) Davida be dahaka ia karaia? Ia lalohisihisi bona ia helalo-kerehai momokani dainai, Dirava ese ia hebogahisi henia.—2 Samuela 12:13 duahia.

 ⁷ To, King Saulo be sisiba ia abia dae lasi. Iehova ese peroveta tauna Samuela amo Saulo ia oda henia, Amaleka taudia bona edia animal ibounai do ia hamasea ore. To Saulo be Dirava ena oda ia badinaia lasi. Ia ese King Agaga bona animal namodia ia abia mauri. Dahaka dainai? Badina ia ura sibona ena ladana ia abia isi. (1 Sam. 15:1-3, 7-9, 12) Samuela ese ia sisiba henia neganai, ia kamonai bona Uro Karaia Tauna Badana ena hamaoromaoroa dalana ia abia  dae be namo. To, Saulo be ia ura lasi Dirava ese do ia hamaoromaoroa. Ena kara dainai ekskius ia gwauraia. Ia gwau ia karaia karana be kerere lasi, badina unai animal be Dirava dekenai do ia bouboulaia. Danu, ia ese Samuela ena sisiba ia laloa bada lasi. Unai dainai, Iehova ese Saulo ena king dagina ia kokia bona ia tura henia lou lasi.—1 Samuela 15:13-15, 20-23 duahia.

8. Israela besena ese Iehova ena hamaoromaoroa karana idia dadaraia sivaraina amo dahaka ita dibaia?

⁸ Iehova ese taunimanima ta ta sibona lasi, to bese badadia danu ia hamaoromaorodia. Lagani 1513 B.C.E. ai, Israela taudia be Dirava ese Aigupito amo ia hamauria neganai, Dirava be idia ida kontraka ta ia karaia. Uro karaia tauna ese ena uro giroagiroa patana dekenai raro ia gaukaralaia hegeregerena, Uro Karaia Tauna Badana, Iehova, ese Israela taudia ia hamaoromaoroa be hahenamo badana. To, Israela taudia be idia kara dika bona kahirakahira idia noho besedia edia dirava koikoidia idia tomadiho henia. Iehova be ena peroveta taudia ia siaia loulou, Israela taudia edia kara idia hamaoromaoroa totona, to idia kamonai lasi. (Ier. 35:12-15) Israela taudia idia gwau-edeede dainai, Iehova ese ia matahakani auka henidia. Uro dikana idia hamakohia hegeregerena, Asuria taudia ese not kahana ena iduhu 10 basileiana idia hadarerea, bona Babulonia ese saut kahana ena iduhu rua basileiana idia abia. Edia sivarai amo ita dibaia gauna be inai: Iehova ena hamaoromaoroa karana amo namo ita abia totona, iena matahakani ita abia dae be gau badana.

9, 10. Nineva taudia be Dirava ena hadibaia herevana idia kamonai neganai, dahaka idia karaia?

⁹ Iehova ese dala ia kehoa Asuria ena siti  badana, Nineva ai idia noho taudia ese iena hadibaia herevana idia kamonai totona. Iehova ese Iona ia hamaoroa: “Do oi toreisi, hanua badana ladana Nineva dekenai do oi lao, do oi gwau henia, badina unuseni idia noho taudia lau itaia, edia kara be idia dika herea noho.” Nineva taudia edia kara dika dainai, Dirava ese ia panisidia be namo.—Iona 1:1, 2; 3:1-4.

¹⁰ To Iona be unai hahemaoro herevana ia harorolaia neganai, “Nineva dekenai idia noho taudia ese Dirava ena hereva idia abidadama henia. Unai dainai taunimanima ibounai ese aniani ania lasi taravatu idia gwauraia. Edia ladana bada bona ladana maragi taudia ibounai danu ese puse dabua idia karaia, edia lalona giroa toana do idia hedinaraia totona. Nineva ena king ese inai sivarai ia kamonai neganai, iena helai gauna dekena amo ia toreisi, iena dabua namona ia kokia, puse dabua ia karaia, bona lahi ena kahu lalonai ia helai diho.” Nineva taudia be Iehova ena sisiba idia abia dae bona idia helalo-kerehai dainai, Iehova ese idia ia hadikaia lasi.—Iona 3:5-10.

11. Iehova ese Israela besena bona Nineva taudia ia kara henidia dalana amo dahaka ita dibaia?

¹¹ Ena be Israela be Iehova ena abia hidi besena, to ia matahakani henidia. Nineva taudia be Dirava ida kontraka ta idia karaia lasi, to Iehova ena hahemaoro herevana idia abia dae bona edia kara idia haidaua dainai, Iehova ese ia hebogahisi henidia. Iehova ena imana lalonai idia be raro manokana bamona. Unai sivarai rua ese idia hahedinaraia, Iehova, iseda Dirava be maka tamona ai taunimanima ibounai ia kara henidia!—Deu. 10:17.

12, 13. (a) Dahaka dainai nega haida Dirava ese matahakani ia henia dalana ia haidaua? (b) Iehova ese Saulo bona Nineva taudia dekenai ena lalona ia haidaua karana amo dahaka ita dibaia?

¹² Dirava ese ita ia hamaoromaoroa dalana amo ia hahedinaraia, ia be laloa maoromaoro tauna bona ena lalona ia haidaua diba. Nega haida Iehova be ena kara maoromaoro taravatudia hegeregerena lalona ia hadaia taunimanima do ia hahemaoro henidia. To idia helalo-kerehai neganai, ena lalona ia haidaua. Hegeregere, Baibel ia hahedinaraia Iehova be ia lalohisihisi bona ‘ia laloa bema Saulo be king dagi ia henia lasi be namo.’ (1 Sam. 15:11) Baibel ia gwau, Nineva taudia idia helalo-kerehai bona edia kara dika idia rakatania neganai, Iehova “ese iena lalona ia giroa, bona idia hadikaia kara, ia ese ia karaia gwauraia gauna, ia karaia lasi.”—Iona 3:10.

¹³ Baibel ia hahedinaraia nega haida Iehova be ia matahakani henia tauna dekenai ena lalona ia haidaua, eiava ia ura do ia karaia hahemaoro karana ia karaia lasi. Hegeregere, guna Iehova ese Saulo be king ai ia halaoa, to gabeai ena lalona ia haidaua bona Saulo ia dadaraia. Iehova ese Saulo ia abia hidi neganai, ia be abia hidi kererena ia karaia lasi. To, Iehova ese ena lalona ia haidaua, badina Saulo be Iena oda herevana ia badinaia lasi. Danu, Nineva taudia idia helalo-kerehai neganai, Iehova ese ia gwauraia hahemaoro karana ia karaia lasi. Oibe, ita moale badina Iehova, iseda Uro Karaia Tauna Badana, be laloa maoromaoro tauna bona ena lalona ia haidaua diba. Bema kerere tauna ese ena kara ia hanamoa, Iehova ese ena lalona ia haidaua bona ia dekenai hebogahisi ia hahedinaraia!

14. (a) Hari, edena dala ai Iehova ese eda kara ia hamaoromaoroa noho? (b) Dirava ese ita ia hamaoromaoroa neganai, dahaka ita karaia be namo?

¹⁴ Hari inai negai, Iehova ese ena orea bona Baibel amo ita ia hamaoromaoroa. (2 Tim. 3:16, 17) Namona be ena orea bona Baibel amo idia mai sisiba bona matahakani ita abia dae. Herevana lagani momo orea lalonai ita noho vadaeni, o maduna momo ita huaia, to Iehova ena sisiba ita abia dae noho be gau badana.  Badina unai ese iseda kara do ia hamaoromaoroa, bena Iehova ese ita do ia gaukaralaia mai anina bada gaukaradia ita karaia totona.

15, 16. (a) Dahaka lalohadai kereredia oi abia diba bema matahakani oi abia dainai, maduna haida oi haboioa? Haheitalai gwauraia. (b) Edena dala ai unai hemarai karana oi hanaia diba?

¹⁵ Edena dala ai Iehova ese ita ia hamaoromaoroa? Dala ta be ita dekenai iena taravatu ia hadibaia bona iseda lalohadai ia hamaoromaoroa. Dala ma ta be kerere ita karaia neganai, ita ia matahakani henia. Unai matahakani dainai, reana kongrigeisen lalonai iseda maduna ita haboioa diba. Mani elda ta ladana, Dennis a ena sivarai ita laloa. Bisinesi karadia lalonai abia hidi kereredia ia karaia dainai, sisiba aukana ia abia. Kongrigeisen idia hadibaia, Dennis be ena elda maduna amo idia kokia neganai, ena hemami be edena bamona? Ia gwau: “Lau lalohisihisi badina egu maduna lau haboioa. Idia hanaia lagani 30 lalonai, maduna momo lau abia. Lau be regula painia gaukara lau karaia, Betele dekenai lau gaukara, hesiai tauna bona elda maduna lau abia. Danu, distrik hebouhebou ai nega ginigunana tok lau henia. To, karaharaga unai maduna ibounai lau haboioa. Lau hemarai bada bona lau mamia orea lalonai lau be anina lasi.”

¹⁶ Dennis ese ena kara ia haidaua bona ia karaia kerere ia dadaraia. Dahaka ese Dennis ia durua? Ia gwau: “Egu lalona lau hadaia tomadiho karadia lau goadalaia totona. Bona Keristani tadikaka oreana bona iseda buka bona magasin amo lau abia hahegoada herevadia ese lau idia durua bada. August 15, 2009, ena Gima Kohorona ai atikol ladana, ‘Guna Hesiai Gaukara ta Oi Karaia, A? Hari Oi Ura Karaia Lou, A?’ be hegeregere Iehova ese egu guriguri ia haerelaia. Lau ura henia sisiba namona be inai, ‘Kongrigeisen ai maduna ta oi do huaia lasi lalonai, emu hetura karana Iehova ida oi hagoadaia guna be gau badana.’” Dennis be unai matahakani amo dahaka namo ia davaria? Lagani haida murinai, ia gwau: “Iehova ese lau ia hanamoa bona hesiai tauna ena maduna lau abia lou.”

17. Kongrigeisen amo ta atoa siri karana ese edena dala ai kerere tauna ia durua diba? Haheitalai gwauraia.

¹⁷ Kongrigeisen amo ta atoa siri karana be Iehova ena matahakani karana ta. Unai kara ese kongrigeisen ia gimaia bona kara dika tauna ia durua ia helalo-kerehai totona. (1 Kor. 5:6, 7, 11) Robert be kahirakahira lagani 16 kongrigeisen murimurinai ia noho. Unai nega ai, ena tama sina bona tadikaka be Baibel ena sisiba idia badinaia dainai, Robert idia bamoa lasi bona idia hereva henia lasi. Hari, lagani 10 idia hanaia vadaeni, bona Robert be orea lalonai ia vareai lou bona ia goada noho. Dahaka ese Robert ia durua Iehova bona ena orea dekenai ia giroa lou totona? Ena famili edia Dirava badinaia karana ese ia durua. Ia gwau: “Bema egu famili taudia ese nega haida lau idia bamoa, unai ese lau do ia durua lasi Dirava dekenai lau giroa totona.”

18. Namona be Uro Karaia Tauna Badana ena imana ai, ita be edena bamona raro?

¹⁸ Reana ita be unai bamona matahakani do ita abia lasi. To, Uro Karaia Tauna Badana ena imana lalonai ita be edena bamona raro? Iehova ese ita ia hamaoromaoroa neganai, dahaka do ita karaia? Ita be Davida o Saulo bamona do ita kara, a? Iehova, Uro Karaia Tauna Badana be iseda Tamana. Unai dainai, namona be inai ita laloatao: “Lohiabada ese ia lalokau henia taudia, be ia matakani henidia noho, tamana ta ese iena natuna, ia lalokau henia merona, ia matakani henia bamona.” Momokani, “Lohiabada ena matakani oi dekenai, be do oi abia dae, bona iena sisiba dekenai do oi hesiku lasi.”—Aon. 3:11, 12.