1, 2. (a) Jehovamut attaveqarluartuarumalluta susariaqarpugut? (b) Inuit Guutip perorsaatissiineranut qanoq periarnerannik oqaluttuat qanoq iluaqutigisinnaavavut?

“GUUTI qanillugu inuuneq tassa pilluarnartora. Qimarnguffigaara Guuti Naalagaq suliatit tamaasa oqaluttuarisinnaaniassagakkit.” (Tuss 73:28) Sooq tussiaasiortup Guutimik tatiginninnini taama oqaatigaa? Siusinnerusukkut tussiaasiortup guutiitsut pilluarpasillutik inuunerat narrutsaatigaa. Ima kappialavoq: “Uummatiga minguitsuutinniarsimavara asuliinnaasumik, pinngitsuutinniarlungalu assakka asattarsimallugit.” (Tuss 73:2, 3, 13, 21) Kisianni “Guutip illernartuutaanut” pivoq, tamannalu eqqarsartaatsiminik allannguinissaminut Guutimullu attaveqarluartuarnissaminut iluaqutigaa. (Tuss 73:16-18) Tussiaasiortup pingaarutilik una paasivaa: Inuk Jehovamut attaveqarluartuarumaguni Guutip innuttaasa akornanniittariaqarlunilu ilitsersorneqarnini akueralugulu maleruartariaqarpaa. — Tuss 73:24.

² Guutimut piviusumut ilumoortumullu attaveqarluartuarumagatta perorsaatissiinera siunnersuineralu akuerisariaqarparput. Taamaalioraangatta Jehovap ilusilersortarpaatigut, tassa inuttut kissaatigisamisut allanngortittarpaatigut. Itsaq Guutip inuit — allaat ilaannikkut inuiaqatigiikkuutaat — nallittorlugit perorsaatissiinerminik akuerinninnissaannut periarfissittarpai. Oqaluttuat taakku allanneqarsimapput “uatsinnut ilinniutissaallutik” ullunilu kingullerni inuusunut “mianersoqqussutaallutik”. (Rom 15:4; 1 Kor 10:11) Allaaserisami matumani oqaluttuat taakkua ilaasa sammineratigut ilinniarsinnaavarput Jehova qanoq eqqarsartarnersoq taassumalu ilusilersuinera qanoq iluaqutigisinnaaneripput.

3. Biibilimi Esajami kapitalimi 64-imi Jeremiamilu kapitalimi 18-imi Jehovap inunnut oqartussaanera qanoq allaatigineqarpa? (Allaaserisap aallaqqaataani assiliaq takuuk).

³ Biibilimi Jehova inunnut inuiaqatigiinnullu oqartussaassuseqarami marriortutut allaatigineqarpoq. Esajami 64:7-imi ima allassimasoqarpoq: “Marraavugut, illillu [Guuti] sanaaraatsigut, tamatta assavit piliaraatigut.” Marriortup marriukkani kissaatigisamisut sanasinnaavaa. Marriukkap marriortumi suliarissagaani aalajangersinnaanngilaa. Taamatuttaaq Guutip qanoq ilusilersorsinnaaneraatigut aalajangersinnaanngilarput, soorlu marriukkap immersagaliatut qanoq ittunngussanerluni aalajangersinnaanngikkaa. — Jeremia 18:1-6 atuakkit.

4. Jehovap inuit inuiaqatigiillu pinngitsaalillugit ilusilersortarpai? Nassuiaagit.

⁴ Jehovap Israelikkut ilusilersortarpai soorlu marriortup marriukkani ilusilersortaraa. Jehovali inummit marriortumit qanoq allaanerua? Jehovap inuit namminneq piumasaattut iliorsinnaatippai, tassa namminneq aalajangersinnaatippai. Inuit ilaat ajortunngortinneq ajorlugillu allat ajunngitsunngortinneq ajorpai. Aamma oqartussaanini atorlugu inuit pinngitsaalillugit imminut naalatsinneq ajorpai. Aap, inuit Jehovamit Pinngortitsisiminnit ilusilersorneqarumanerlutik namminneq aalajangertariaqarpaat. — Jeremia 18:7-10 atuakkit.

5. Inuit Jehovamit ilusilersorneqarumanngikkaangata Jehova qanoq iliortarpa?

⁵ Inulli naalasseriitsoq Marriortorsuarmit ilusilersorneqarumanngippat Jehovap oqartussaanini qanoq atussavaa? Marriugaq marrioruminaappat marriortup allamik sananiarluni imaluunniit marriukkani iginniarlugu aalajangersinnaavaa. Marriugarli marrioruminaakkaangat marriortoq amerlanertigut pisuusarpoq. Jehovali kukkusumik marriorneq ajorpoq. (5 Mos 32:4) Inuk Jehovamit ilusilersortinneqarumanngikkaangami nammineq pisuujuaannarpoq. Inuit qanoq isiginnittaaseqarnerat apeqqutaalluni Jehovap ilusilersueriaatsini allanngortittarpaa. Inuit Jehovamut naalakkunik ilusilersoruminarsinnaapput. Assersuutigalugu kristumiut tanitat tassaapput ‘immersakkat nallittorneqartut’, taakkulu ‘immersagalianngorsimapput akimasut’. Inuilli Guutip siunnersuutaanut naalakkumanngitsut tassaapput ‘immersakkat kamaanneqartut aserortiinnagassanngortut’. — Rom 9:19-23.

6, 7. Daavi Saulilu Jehovamit oqaaqqissaarneqaramik qanoq pippat?

 ⁶ Jehovap inunnik ilusilersueriaasiisa ilaat tassaavoq siunnersuineq imaluunniit perorsaatissiineq. Assersuutigalugu eqqarsaatigeriaruk Jehovap Israelikkut kunngii siulliit marluk, Sauli Daavilu, qanoq ilusilersorai. Daavip Batseba allasiorfigimmagu Daavimut allanullu kingunipiloqarpoq. Daavi kunngiugaluartoq Jehovap perorsaatissippaa. Guutip pruffiitini Natani sukannersumik oqaaqqissaariartoqqullugu Daavimukartippaa. (2 Sam 12:1-12) Daavi qanoq piva? Ajortuliani qamuuna peqqissimissutigingaarpaa. Daavilu allamik isumataarmat Guutip nallittorpaa. — 2 Samueli 12:13 atuaruk.

 ⁷ Kunngili Sauli Daavimit allaanerulluinnarpoq, taassumami siunnersorneqarnini akueriumanngilaa. Jehovap Samueli aqqutigalugu kunngimut Saulimut Amalekikkut uumasuutaallu tamaasa toqoqquai. Saulilli Amalekikkut kunngiat Agagi uumasullu pitsaanerpaat asattuukkamigit Jehovap peqqussutaa naalanngilaa. (1 Sam 15:1-3, 7-9, 12) Taamaattumik Jehovap Samueli Saulimukartippaa  oqaaqqissaariartoqqullugu. Saulip Jehovap siunnersuutaa tusarnaarlugulu Jehovap ilusilersuinera akuerisimasussaagaluarpaa. Saulili allanngorumanngilaq. Jehovap ilitsersuussutaanik sumiginnaanissaminut pissutissaqarluarsorivoq. Uumasut Jehovamut tunissutisiatut pilliutissaanerarpai. Guutip Sauli kunngiusussaajunnaarsippaa, Saulillu Jehova attaveqarluarfigileqqinngisaannarpaa. — 1 Samueli 15:13-15, 20-23 atuakkit.

8. Israelikkut Jehovamit ilusilersorneqarumannginnerat qanoq ilinniutigisinnaavarput?

⁸ Jehovap aamma inuiaqatigiikkuutaat imminut naalannissamut periarfississimavai. Ukiumi 1513-imi Kr.in.si. Jehovap Israelikkut Egyptenimit aniguisereerlugit immikkut ittumik innuttarilerpai. Taamaattumillu Guutimit ilusilersorneqarnissartik immikkut pisinnaatitaaffigaat. Israelikkulli ilusilersorneqarumannginnamik Jehovap isaani ajortuliortuarput. Allaat inuiaqatigiit allat guutipilui guutisiorfigaat. Jehovap Israelikkut pissusilersoriaasiat allanngortinniarlugu arlaleriarluni pruffiitini aallartittarpai, Israelikkulli pruffiitit tusarnaarumanngilaat. (Jer 35:12-15) Taakku naalanngimmata Jehovap sukannersumik perorsaatissippai. Soorlu immersagaq aserortiinnagassanngortoq, naalagaaffik avannarleq Israeli Assyriamiunit piuneerunneqarpoq. Kingusinnerusukkut naalagaaffik kujalleq Juda Babyloniamiunit tiguarneqarpoq. Tamanna uagutsinnut ilinniutissaavoq pingaarutilik! Jehovap uagutsinnik ilusilersuinera kajumilluta akuerigutsigu aatsaat iluaqutigisinnaavarput.

9, 10. Ninevemiut Jehovamit mianersoqquneqaramik qanoq pippat?

 ⁹ Jehovap aamma Assyriamiut illoqarfiit pingaarnersaanni, Ninevemi, innuttaasut allamik isumataarnissaannut periarfissippai. Jehovap Jona ima peqquaa: “Illoqarfissuarmut Ninevemut aallarit, suaarlutillu ilisimatikkit ajussusiat uanga arajutsisimanngikkiga.” Ninevemiut ajortuliungaarnerat pissutigalugu Jehova aalajangerpoq taakku piuneerukkumallugit. — Jon 1:1, 2; 3:1-4.

¹⁰ Jonap “Guutip oqaasia” tusarliummagu Ninevemiut tamanna ‘upperaat’. Peqqissiminertik ersersikkumallugu iisinnginniarput puunillu atisillutik. Allaat kunngi “issiavissaarsuarminit nikuilluni qallersaataajarpoq, puunik atisilluni pujoralannut ingippoq”. Ninevemiut Jehovamit ilusilersortillutillu peqqissimimmata Jehovap taakku piuneerutinngilai. — Jon 3:5-10.

11. Jehovap Israelikkunnik Ninevemiunillu pinnissimanera qanoq ilinniarfigisinnaavarput?

¹¹ Israelikkut Jehovap immikkut innuttarigaluarai Jehovamit perorsaatissinneqartariaqarput. Ninevemiulli Jehovap immikkut innuttarinngilai, taamaakkaluartorli taakku Jehovamit ilusilersorneqarumapput. Taamaattumik Jehovap taakku nallittorpai aalajangerlunilu piuneerussaatinniarnagit. Jehova ‘nakerisarsiortuunnginnami’, imaluunniit kinaassusersiortuunnginnami, inuit tamaasa iliuuserisimasaat naapertorlugit eqqartuussisarpoq. — 5 Mos 10:17.

12, 13. (a) Sooq Guutip aalajangikkani allanngortittarpai? (b) Jehovap Saulimut aamma Ninevemut tunngatillugu ‘peqqissiminera’ qanoq paasisariaqarpa?

¹² Inuit iliuuserisatik allanngortikkaangatigit Jehovap aalajangikkani allanngortittarpaa. Assersuutigalugu Biibilimi allassimavoq Jehovap Sauli Israelimi kunnginngortissimagamiuk ‘peqqissimissutigigaa’. (1 Sam 15:11) Ninevemiullu allamik isumataarlutillu ajortuliortarunnaarmata Guutip “aalajangigarigaluani allanngortippaa perluk sioorasaarutigigaluani nalliutinngitsoortillugu”. — Jon 3:10.

¹³ Biibilimi Jehovap ‘peqqissimineranik’ allassimasoqarmat paasisariaqarpoq Jehovap aalajangikkani imaluunniit isiginnittaatsini allanngortikkaa. Jehovap Sauli kunngitut akuerigaluarpaa, Saulili naalanngimmat kunngitut akueriunnaarpaa. Imaanngilarli Sauli kunnginngortinneqarmat Jehova kukkusoq. Sauliuna naalanngitsuliortoq. Ninevemiullu peqqissimimmata Jehovap aalajangikkani kajumilluni allanngortippaa piuneerussaatinnagillu. Jehovap ingasaassiniartuunanilu naleqqussarsinnaanera aamma inuit peqqissimippata nallittorlugit aalajangikkaminik allanngortitsiumanera nalunagu tuppallernaqaaq!

14. (a) Ullumikkut suut aqqutigalugit Jehovap ilusilersortarpaatigut? (b) Guutip ilusilersoraangatigut susariaqarpugut?

¹⁴ Ullumikkut Jehovap Biibili peqatigiissortanilu aqqutigalugit ilusilersortarpaatigut. (2 Tim 3:16, 17) Taakku aqqutigalugit qanorluunniit siunnersorneqaraluarutta perorsaatissinneqaraluaruttaluunniit siunnersuutit kajumilluta maleruartariaqarpavut, ilaa? Qanorluunniit sivisutigisumik kuisimasuugaluarutta ilagiinniluunniit immikkut pisinnaatitaaffeqartigigaluarutta Jehovap siunnersuinera naalattuartariaqarparput. Taamatut Jehovamit ilusilersortikkutta inuttut kissaatigisaatut ilersinnaavugut.

15, 16. (a) Ilagiinni immikkut pisinnaatitaaffeqarunnaartoq qanoq misigisinnaava? Assersuuteqarit. (b) Perorsaatissinneqarutta nuanniitsunik misigissuseqarunnaarnissatsinnut suut iluaqutigisinnaavavut?

¹⁵ Jehovap qanoq perorsaatissittarpaatigut?  Uagut qanoq piumaffigineraatigut ilinniartittarpaatigut eqqarsartaaserpullu naqqillugu. Ilaannikkulli eqqunngitsuliorsimanerput pissutigalugu sukannersumik perorsaatissinneqartariaqartarpugut. Tamanna ilagiinni immikkut pisinnaatitaaffeqarunnaarnitsinnik kinguneqarsinnaavoq. Dennis * utoqqaanertaasimasoq eqqarsaatigeriaruk. Dennis niuernermut tunngatillugu aalajangiinerlunnini pissutigalugu oqaaqqissaarneqartariaqarsimavoq. Ilagiinni utoqqaanertatut kiffartorunnaarnini nalunaarutigineqarmat Dennis qanoq misigisimava? Ima oqarpoq: “Suunngitsutut misigivunga. Ukiut 30-t kingulliit ingerlaneranni immikkut pisinnaatitaaffippassuaqarnikuuvunga. Pioneriunikuuvunga, Betelimi kiffartornikuuvunga, ilagiinni kiffartortutut toqqagaanikuuvunga kingusinnerusukkullu utoqqaanertatut toqqagaanikuullunga. Aamma ataatsimeersuarnermi siullermeerlunga oqalugiarnikuuvunga. Taava taakku tamaasa pisinnaatitaaffigiunnaariataarpakka.” Kanngusuppoq, peqatigiissortanilu akisussaaffeqalersitaaqqinnissani apeqquserpaa.

¹⁶ Dennisip pissusilersornini allanngortittariaqarpaa. Nuanniitsunilli misigissuseqarunnaarnissaminut suut iluaqutigai? Biibilimik atuaqqissaartuarnissani, oqaluussisarnissani, ataatsimiigiartuarnissanilu aalajangiusimavai. Aamma anersaakkut qatanngutiminit atuagaatitsinnillu kajumissaarneqarnini qujamasuutigaa. Napasuliaq Alapernaarsuiffik-mi allaaserisaq atuarpaa, tassanilu qatanngutit ilagiinni pisinnaatitaaffeqarsimasut akisussaaffeqaqqilernissaminnik kajumissaarneqarput. * Ima oqarpoq: “Tassa soorlu uannut allataq qinnutinnut akisisoq.” Allaaserisami iluaqutigisaani ima allassimasoqarpoq: “Ilagiinni akisussaaffeqanngikkallarnerit piffissat Jehovamut attaveqarninnik nakussatsitsinissannut atoruk.” Perorsaatissinneqarnini iluaqutigaa, ukiullu arlaqanngitsut qaangiummata ilagiinni kiffartortutut toqqagaaqqippoq.

17. Ajortuliortup ilagiinnut ilaajunnaarsitaanini qanoq iluaqutigisinnaavaa? Assersuuteqarit.

¹⁷ Jehovamit perorsaatisseeriaaseq alla tassaavoq ilagiinnut ilaajunnaarsitaaneq. Ilaajunnaarsitsisoqartarpoq ilagiit ajortuliortumit sunnertinneqannginniassammata ajortuliortorlu allamik isumataarnissaanut iluaqutaaniassammat. (1 Kor 5:6, 7, 11) Robert ukiuni 16-ingajanni ilaajunnaarsitaaqqasimavoq. Ukiuni taakkunani angajoqqaavisa nukaata angajuisalu najoqqutassiaq Biibilimeersoq maleruarlugu ilagineq ajorpaat, aap, allaat ilassineq ajorpaat. Ukiualuit matuma siorna ilagiinnut ilanngutiteqqinneqarpoq maannakkullu sallusuissummi ingerlalluarluni. Nassuiarpaa sallusuissummut uteqqinnissaminut pissutaaqataasoq ilaquttami imminik ilaginnikkumannginnerat. Ima oqarpoq: “Ilaquttama ilagilaaginnarlungaluunniit imaluunniit qanoq innersunga aperisarsimasuuppannga naammagiinnarsimassagaluarpara, Guutimullu uternissamut kajumississutigisimanavianngikkaluarpara.”

18. Marriortorsuup ilusilersorniaraangatigut qanoq ittuusariaqarpugut?

¹⁸ Immaqa uagut taamatut perorsaatissinneqartariaqanngilagut. Eqqarsaatigisariaqarparpulli Marriortorsuup ilusilersorniaraangatigut qanoq ittarnersugut. Perorsaatissinneqarnerput qanoq isigissavarput? Daavitut issaagut? Imaluunniit Saulitut issaagut? Jehova, Marriortorsuaq, Ataatagaarput. Puiunngisaannaruk Jehovap ‘asasani anusinngorsartaraa soorlu ataatap ernini asasani taama iliorfigisaraa’. Taamaattumik Jehovap “perorsaanera asiginnaqinagu ilitsersuineralu asissornagu”. — Uss 3:11, 12.