1, 2. (a) Yisinke twa hepa kurugana mokukara nelikwatakano lyewa naJehova? (b) Ngapi omu natu gwanena mo uwa pokukonakona yihorokwa yomoMatjangwa yokuhamena omu vantu va tambwire episuro lyaJehova?

“YOYIWA po kwange ame, yokukara pepi naKarunga! HOMPA Karunga yige a popere nge.” (Epis. 73:28) Muepisarome apa kwa pwagesere ehuguvaro lyendi mwaKarunga. Maukaro musinke ga mu ninkisire a uyunge nonkango odo? Apa ga mwene vadinikarunga kuna kara mombili, pomuhowo age kwa lizuvhire kukora komutjima. Neguwo, age kwa tente asi: “Ngesi na zona sa nye kulizeresa nyaamwange, ni dire kuzonesa ko komawoko gange ndi?” (Epis. 73:2, 3, 13, 21) Nye apa ga zire ‘kontembeli zaKarunga,’ ya mu vaterere a rundurure magazaro gendi ntani a twikire kukwaterera kelikwatakano lyendi naKarunga. (Epis. 73:16-18) Muepisarome kwa lirongere sirongwa somulyo esi asi: Kukara mokatji kovantu vaKarunga nokutambura mapukururo nokugatura pasirugana kwa kara nomulyo mokukara nelikwatakano lyenene naJehova.—Epis. 73:24.

² Nose tuna hara kukara nelikwatakano lyenene naKarunga gosili gomunamwenyo. Ayo mulyo asi tu pulisire mapukururo ndi episuro lyaKarunga li tu honge yipo tu kare vantu wokumuhafesa. Moyiruwo yanare, nkenda zaKarunga kwa geve mpito kovantu nokonomuhoko va tambure episuro lyendi. Yihorokwa nayinye oyo kwa yi tjangera moBibeli asi “yi tu ronge” ntani “yi kare erondoro lyetu, ose tuna ya karere pouhura wouzuni ou.” (Rom. 15:4; 1 Kol. 10:11) Kukonakona yihorokwa oyo ngayi tu vatera tu dive yikara yaJehova ntani nomu natu gwanena mo uwa omu a tu hongo.

3. Ngapi Jesaya 64:8 naJeremiya 18:1-6, va singonona nonkondo daJehova kovantu? (Tara efano pepenuno 24.)

³ Nonkondo daJehova kovantu nokonomuhoko kwa di singonona monkedi zopasifanekeso mwaJesaya 64:8 asi: “Ove nyove guhyetu, HOMPA. Ose kwa fana ngwendi erova, ove ngwendi muhongi. Ove nyove wa tu unga.” Muhongi kwa kara nononkondo dokuhonga erova monkedi omu ana li harere. Erova kwato eyi nali vhura kurugana ko. Yina lifana tupu nomuntu naKarunga. Muntu kwa kara mokuwoko kwaKarunga ngwendi moomu ali kara erova mokuwoko komuhongi goyipako.—Resa Jeremiya 18:1-6.

4. Jehova kuhonga vantu ndi nomuhoko moomu tupu ana harere ndi? Faturura.

⁴ Jehova kwa hongere Vaisraeli ngwendi moomu muhongi goyipako a hongo erova. Nye pwa kara elisigo lyenene. Muhongi goyipako kuvhura a rugane yininke yokulisiga-siga kerova limwe tupu. Ngoso Jehova kuhonga vantu ndi nomuhoko moomu tupu ana harere, yipo vamwe va kare vawa ano vamwe va kare wovadona ndi? Bibeli kulimburura asi hawe. Jehova kwa pa vantu uhwi wouwa, emanguruko lyokutura po matokoro. Age kapi a ruganesa nonkondo dendi monkedi omu nayi limbikisa uhwi wendi. Vantu vene va hepa kutokora mokuvahonga Musiti, Jehova.—Resa Jeremiya 18:7-10.

5. Apa vantu ava nyoka kuvahonga Jehova, ngapi omu a ruganesa nonkondo dendi kwawo?

⁵ Ngapi nsene vantu wokurunda mutwe va nyoka kuvahonga Muhongi goMunene? Makura, ngapi omu Karunga na ruganesa nonkondo dendi ngomuhongi? Gazara eyi nayi horoka kerova nsene li dira kuwapera sitambo esi vana li harere. Muhongi kuvhura a li honge mokulirugana sipako sapeke ndi kulizonagura po. Eyi kuhoroka morwa muhongi kapi ana li hongo monkedi zongwa. Eyi kapi ya lifana noMuhongi gwetu, Jehova. (Deut. 32:4) Apa muntu a dili kutambura Jehova a mu honge, ngoso epuko kuna kara komuntu mwene. Jehova kuruganesa nonkondo dendi kovantu pokutura po marunduruko monkedi omu a ruganene kumwe nawo kuliza nomu vana kutambura ehongo lyendi. Ava ava tambura Jehova a va honge awo ngava gwanena mo uwa. Pasihonena, Vakriste wovagwavekwa awo ‘yipako eyi va zaverera’ eyi ya ya kara ‘yipako yefumano.’ Nye ava ava nyoka kulimburukwa epukururo lyaKarunga kuyakara “yipako yemehandu, kuninka asi vantu ava va fira kuvazonagura po.”—Rom. 9:19-23.

6, 7. Ngapi omu hompa Ndafita nahompa Sauru va lisigire mokutambura mapukururo gaJehova?

 ⁶ Nkedi zimwe omu Jehova a hongo vantu kuna kara kupitira momapukururo ndi mepisuro. Natu ka mona omu ga ruganesere nonkondo dendi kowo ga hongere pokukakonakona yihonena yovahompa vavali wokuhova woVasraeli, Sauru naNdafita. Apa hompa Ndafita ga honderere naBateseba, ayo kwa mu kundamene momudona ntani nava wopeke. Jehova ga hepere kupisura Ndafita nampili ngomu ga kere hompa. Karunga kwa tumine muporofete Natana kwaNdafita nombudi zononkondo. (2 Sam. 12:1-12) Ngapi Ndafita ga tambwire episuro? Age kwa liverere nokulitezurura. Makura Karunga ta mu fire nkenda.—Resa 2 Samwere 12:13.

 ⁷ Mokulisiga, hompa Sauru kapi ga tambwire mapukururo. Jehova kwa tumine Samwere a ka tantere hompa Sauru asi ga hepa kuhanagura po Vaamareki navenye noyimuna yawo nayinye. Sauru kapi ga limburukwire kompangera ozo. Age kapi ga dipagere hompa Agage ntani noyimuna yimwe. Morwasinke? Morwa  Sauru kwa liharerere mwene mfumwa. (1 Sam. 15:1-3, 7-9, 12) Apa va mu pere mapukururo, Sauru ngano ga ga tambwire yipo a mu honge Muhongi goMunene. Nye age kwa nyokere kumuhonga. Age kwa ligusa-gusire mo koyirugana yendi. Ntani kwa ligusa-gusire mo asi eyi ga rugene kwa hungamene, pokutanta asi yimuna kuvhura ngava yi ruganese ngonzambo, ntani age kwa sensere epukururo lyaSamwere. Jehova kwa nyokere Sauru mouhompa, ntani Sauru kapi ga tengwidilire po hena elikwatakano lyendi naKarunga gosili.—Resa 1 Samwere 15:13-15, 20-23.

8. Yisinke natu lirongera ko monkedi omu Vaisraeli va tere ehongo lyaJehova?

⁸ Jehova kwa gava mpito konomuhoko nadinye yipo di mu limburukwe. Nomvhura 1 513 komeho zokuwiza Kristusa, apa Vaisraeli va tundire moupika moEgipite, awo kwa tulire po egwanekero naKarunga. Vaisraeli kwa kere muhoko gwendi ogu ga horowere ntani va kere nomfumwa zokuvahonga Muhongi goMunene. Nye vantu ngava twikire kurugana yininke yoyidona, ntani ngava karere yikarunga yonomuhoko edi da va kundurukidire. Yikando yoyinzi, Jehova nga va tumine vaporofete va va pukurure, nye Vaisraeli kapi ngava tambura mapukururo ogo. (Jer. 35:12-15) Morwa nkareso zawo zokurunda nomutwe, Vaisraeli kwa hepere kuvapisura. Ngwendi yipako ya fira ezonauko, uhompa wokoMuzogo womazimo murongo kwa u zonagwire po Vaasiliya ano womazimo gavali wokoMbindakano kwa u zonagwire po Vababironi.  Esi kuna kara sirongwa somulyo unene kwetu. Nsene tupu tu tambura ehongo lyaJehova ose ngatu gwanena mo uwa.

9, 10. Ngapi omu Vaninivhe va tambwire erondoro lyaKarunga?

⁹ Jehova kwa pere Vaasiliya womositata saNinivhe mpito zokutambura erondoro lyendi. Jehova kwa tanterere Jona asi: “Zende kositata sosinene Ninivhe o ka si udisire; udinikarunga wovantu vamo nina u mono.” Sitata saNinivhe kwa fililire ezonauko.—Jona 1:1, 2; 3:1-4.

¹⁰ Apa Jona ga udisire mbudi zompanguro, “vantu womoNinivhe tava pura kombudi zaKarunga. Tava tokora asi nkenye ogu a dilire, vantu navenye, a kare mukurona a kare munona, va dware nonsako va likide asi vana litezurura.” Apa ga yi zuvhire hompa gwawo, “ta katuka ko kosipundi sendi souhompa, ta hutura erwakani lyendi, ta dwara nsako, makura ta hingire menoto.” Vaninivhe va tambwire Jehova a va honge ntani va litezwilire. Makura Jehova kapi ga va zonagwire po.—Jona 3:5-10.

11. Sikara musinke ga likidire Jehova meruganeno lyendi kumwe noVaisraeli noVaninivhe?

¹¹ Nampili ngomu Vaisraeli va kere muhoko gwaJehova ogu ga horowere, age ga va piswire. Mokulisiga, Vaninivhe kapi va kere negwanekero naKarunga. Nye simpe, Jehova ga va tuminine mbudi zompanguro ntani ga va likidire nkenda apa va tambwire ehongo lyendi. Yihonena oyo yivali kulikida asi Jehova Karunga gwetu “kapi a tara sipara somuntu.”—Deut. 10:17.

12, 13. (a) Morwasinke Karunga a rundwilire matokoro gendi kowo ava tambura ehongo lyendi? (b) Yisinke kwa tente “kulivera” kwaJehova mosihorokwa saSauru ntani nesi soVaninivhe?

¹² Mokumona asi Karunga ga kara neharo lyokutuhonga, eyi kulikida asi age mugomoki ntani kurundurura matokoro gendi kuliza noukaro. Pasihonena, Bibeli kututantera asi Jehova ‘kwa liverere eyi ga pakerere Sauru mouhompa.’ (1 Sam. 15:11) Apa Vaninivhe va litezwilire nokusiga nkareso zawo zondona, Bibeli kwa tanta asi: ‘Makura Karunga ta rundurura magazaro gendi ta hageke kuvafutisa, kapi hena ga rugene moomu ga yi tente.’—Jona 3:10.

¹³ Nkango zoRuhebeli va toroka “kulivera” kutanta asi kurundurura magazaro ndi matokoro. Nampili ngomu Jehova ga horowere Sauru a kare hompa ga ya rundwilire magazaro gendi pokumunyoka mouhompa. Erundururo eli kapi lya horokerere morwa Jehova kwa lipukire pokuhorowora Sauru, nye kwa horokererere morwa Sauru kapi ga likidire epuro ntani kapi ga limburukwire. Mosihorokwa soVaninivhe, Karunga gosili kwa liverere, eyi kutanta asi age kwa rundwilire etokoro lyendi lyokuvafutisa. Ayo kuhengagwida mokudiva asi Jehova Muhongi gwetu ga kara nonkenda nezaverero nougomoki ntani kurundurura matokoro gendi kuliza noukaro.

14. (a) Ngapi omu Jehova ana kutuhonga naina? (b) Yisinke twa hepa kurugana nsene ta tu hongo Karunga?

¹⁴ Jehova naina kutuhonga kupitira moNonkango dendi nomombunga zendi. (2 Tim. 3:16, 17) Twa hepa kutambura mapukururo ndi episuro lyendi noruhafo eli atu gwana monongedeseso odo. Yi kare asi nomvhura dokuhura kupi twa kara mousili ndi yitumbukira musinke twa kara nawo, twa hepa kutwikira kutambura mapukururo gaJehova nokugapulisira ga tu honge yipo tu kare yipako yefumano.

15, 16. (a) Malizuvho musinke gomadona natu kara nago nsene episuro kuna kwatere mo kuzumbanesa yitumbukira? Gava sihonena. (b) Yisinke nayi tu vatera tu funde po malizuvho gomadona gokutundilira kepisuro?

 ¹⁵ Episuro kuvhura li kare monkedi zokuturonga ndi zokutuvyukisa. Ano poyiruwo yimwe kuvhura tu hepe episuro morwa kuna rugana epuko. Episuro lyangoso kuvhura kukwatera mo kuzumbanesa yitumbukira yetu. Tarurura sihonena saDennis * ogu ga kere mukuronambunga. Age kwa gwililire monkareso zondona morwa kuruganesa ngesefa mepuko, makura tava mu pisura mokahore-hore. Ngapi omu Dennis ga lizuvhire ngurova ozo va mu divisire mombunga asi kapi ana kara hena mukuronambunga? Age kwa tanta asi: “Ame kwa lizuvhire asi yina yipire nge. Monomvhura 30, ame kwa kere noyitumbukira yoyinzi. Ame kwa kere muzuvhisi gokukarerera nokurugana koBeteli ntani mukwafimbunga ano konyima tani ya kara mukuronambunga. Ntani tupu na geve siuyungwa sange sokuhova posigongi somazuva gatatu. Hararasi tupu, nayinye oyo kwa yi zumbanesere. Kugusa ko kulizuvha nomuga, ame kwa gazarere asi mombunga zaJehova mwato hena evango lyange.”

¹⁶ Dennis ga hepere kutjindja nokusiga nkareso zendi ezi va mu piswilire. Nye yisinke ya mu vaterere a funde po malizuvho gomadona? Age kwa faturura asi: “Ame kwa tokomenene nokukwaterera koupampepo wange. Ntani yomulyo po ame kwa gwene evatero kovanavazinyetu nekorangedo lyomoyimbapiratjangwa yetu. Sirongwa ‘Wa kere nositumbukira ndi? Kuvhura o kare naso hena ndi?’ somoRuhungu 15 Siwogedi 2009 kwa kere ngwendi mbilive ezi za limbwilire makanderero gange. Epukururo eli na haferere mo unene kwa kere asi: ‘Posiruwo esi ono dili kukara noyitumbukira mombungakriste, demenena unene mokunkondopeka elikwatakano lyoge naJehova.’” Ngapi omu Dennis ga gwanene mo uwa mepisuro? Konyima zonomvhura dongandi, age kwa tanta asi: “Jehova ga tungika nge hena nositumbukira soukwafimbunga.”

17. Ngapi omu egusomo mombunga ali vatere munanzo a litezurure? Gava sihonena.

¹⁷ Egusomo mombunga kuna kara nalyo episuro lyokutunda kwaJehova. Alyo kupopera mbungakriste ntani kuvatera munanzo a litezurure. (1 Kol. 5:6, 7, 11) Robert kwa mu gusire mombunga ure wonomvhura 16, ano posiruwo oso vakurona novamumbya vendi kwa kwaterere kevyukiso lyomoNonkango daKarunga mokudira kulikwatakana nendi nampili kumumorora kooku. Monomvhura edi da ka pita Robert kwa mu tengwidira mombunga ano ngesi kuna kutura po ezokomeho lyewa. Apa va mu pulire eyi ya mu tumangedere a tengure kwaJehova nokovantu vendi konyima zosiruwo sosire ngoso, age kwa limbwilire asi ulimburukwi wava vemepata lyawo kwa mu kundamene unene. Age kwa tanta asi: “Ngano vemepata kwa likwatakanene name nampili pokumorora nge, ngano kwato eyi ya tumangedere nge ni tengure kwaKarunga.”

18. Sipako musinke serova tuna hara kukara mokuwoko koMuhongi gwetu goMunene?

¹⁸ Kuvhura tu dire kugwana episuro, nye sipako musinke serova tuna hara kukara mokuwoko koMuhongi gwetu goMunene? Ngapi natu tambura episuro? Tuna hara kukara ngwendi Ndafita ndi ngwendi Sauru? Guhyetu gemeguru yige Muhongi goMunene. Wa ha divara asi “HOMPA kupukurura ava ga hara, moomu a pukurura guhya munwendi ogu a linenepeke.” Yipo nye, nsene ‘ta ku pukurura HOMPA, yi purakena unene, ove o yi tare asi erondoro.’—Yis. 3:11, 12.