1, 2. a) Sẽn na yɩl n tall zood sõma ne a Zeova, bõe la d segd n maane? b) Wãn to la kibay nins yell d sẽn na n gomã na n naf-do?

YƖƖL-GƲLSDÃ wilgame tɩ yẽ teega Wẽnnaam, n yeel woto: “Ne maam, mam sã n kolg Wẽnnaam n yaa sõma. Mam geta Zu-soabã sẽn yaa Soaalã tɩ b yɩ m zĩ-lilldga.” (Yɩɩl 73:28) Bõe n kɩt t’a wa yeel woto? A sã n da get nin-wẽnsã, ra yaa wa b pa tar zu-loeese, tɩ sãamd a sũuri. A yeela woto: “Yaa zaalem tɩ mam zĩnd ne pʋ-peelem n nudg m nus ne bʋʋm.” (Yɩɩl 73:2, 3, 13, 21) La a sẽn wa n kẽng “Wẽnnaam sɛk-zĩigẽ wã,” a tõog n demsa a tagsgã n kell n tall tẽebo. (Yɩɩl 73:16-18) Yɩɩl-gʋlsdã bãngame tɩ ned sã n dat n tall zood sõma ne a Zeova, a soabã segd n tigimda ne a tẽed-n-taasã, la a sakd a Zeova saglsã.—Yɩɩl 73:24.

² Tõnd ratame tɩ tõnd ne Wẽnnaam zoodã kell n tall pãnga. Rẽnd yaa tɩlae tɩ d kelgd a saglsã la d sakd a kiblgã. Rẽ la a Zeova na n dems-do, n sõng-d tɩ d yɩ neb sẽn tat a yam. Pĩnd wẽndẽ, a zoee neb la soolem tõr neb nimbãanega, n kõ-b weer tɩ b sak a kiblgã wall b zãgse. A kɩtame tɩ b gʋls kiba-kãens Biiblã pʋgẽ “tõnd zãmsg yĩnga,” la “tõnd saglg yĩnga, tõnd sẽn be dũniyã sɛɛb wakatã yĩnga.” (Rom 15:4; 1 Kor. 10:11) Sõs-kãngã pʋgẽ, d na n goma kiba-kãens kẽer yelle. Rẽ na n sõnga tõnd tɩ d bãng a Zeova n paase, la d bãng d sẽn tõe n dɩ a kiblgã nafa to-to.

3. Ezai 64:7 ne Zeremi 18:1-6 yeela bõe a Zeova zugu? (Ges-y fotã sẽn be yĩngrã.)

³ Biiblã maka a Zeova ne yagda. Bala, wa yagd  sẽn tõe n maan bũmb ning fãa a sẽn dat ne yagdã, a Zeova me tõe n maana woto ne ninsaalbã. Ezai 64:7 yeta woto: “Zu-soaba, yãmb yaa tõnd ba. Tõnd yaa yagdo, la yãmb yaa tõnd yagda. Tõnd fãa yaa yãmb nug-tʋʋmde.” Yagd sã n zãad tãnd a nugẽ, yẽ n yãkd a sẽn na n maan bũmb ninga. Tãndã pa tõe n yeel yagdã a sẽn dat n yɩ bũmb ning ye. Wẽnnaam ne ninsaalbã sʋk me yaa woto. Tõnd pa tõe n wilg Wẽnnaam sẽn yaa Naandã a sẽn segd n dems-d to-to ye.—Karm-y Zeremi 18:1-6.

4. Wẽnnaam modgda nebã tɩ b sak-a bɩ? Wilg-y y leoorã võore.

⁴ A Zeova sẽn tall manesem ning ne Israyɛll nebã yɩɩ wa yagd sẽn maand to-to ne yagdã. La welgr n be manesem a yiibã sʋka. Yagd sã n zãad tãndo, yẽ n yãkd a sẽn na n maan bũmb ninga. La a Zeova kõo ninsaalbã fãa lohorem, tɩ b tõe n yãk b toorẽ yam. A pa yãkd kẽer n maan tɩ b yaa nin-sõamya, n maan sãnda tɩ b yaa wẽns ye. A pa modg ned baa a ye t’a tũ a raabã me ye. Yaa ned kam fãa n yãkd a sã n na n basame t’a Zeova sẽn yaa d Naandã rems-a.—Karm-y Zeremi 18:7-10.

5. Bõe la a Zeova maand ne neb nins sẽn pa sakd t’a rems-bã?

⁵ La ned sã n yaa tõata, n pa rat n bas t’a Zeova rems-a yẽ? D tẽeg t’a maanda wa yagda. Yagd sã n pa tõe n maan bũmb ning a sẽn datã ne tãnd a sẽn zãade, a tõe n yãka yam n maan bũmb a to, wall a lob tãndã. La sã n wa yaa woto, naoor wʋsgo pa tãndã yell ye. Yaa yagdã n pa tõog a tʋʋmdã. A Zeova yẽ sẽn demsd ninsaalbã to-to wã zemsda wakat fãa. (Tõo. 32:4) Ned sã n pa bas t’a Zeova rems-a, yaa a soabã yelle. A Zeova sẽn demsd tõnd to-to wã bee ne d manesmã sẽn yaa to-to ne a remsgã. D sã n sakd-a, d lebgda sõma n paasdẽ. Wala makre, kiris-neb nins sẽn paam vʋʋsem sõng zaeebã lebga ‘waoogr laase,’ Wẽnnaam sẽn maan a ‘nimbãan-zoeerã yĩnga.’ La neb nins sẽn yaa tõatb n pa sakd Wẽnnaam saglsã lebgda ‘laas sẽn zems sãoongo.’—Rom 9:19-23.

6, 7. Rĩm a Davɩɩd manesem yɩɩ wãn ne a Zeova saglsã, la rĩm a Sayull manesem yɩɩ wãna?

 ⁶ Bũmb a Zeova sẽn maand n demsd tõnd yaa a sẽn mi n kõt-d sagls wall a sẽn mi n kibind tõndã. D ges a sẽn maan dẽ to-to ne a Sayull sẽn yɩ Israyɛll pipi rĩmã, la ne a Davɩɩd sẽn yɩ rĩm a yiib-n-soabã. A Davɩɩd sẽn yo ne a Batseba wã, namsa yẽ la neb a taaba. Baa a sẽn da yaa rĩmã, a Zeova pa bas-a taal ye. A tʋma a Natã t’a tɩ leng-a. (2 Sãm. 12:1-12) A Davɩɩd manesem yɩɩ wãna? A sũurã saamã wʋsg ne a sẽn maanã, t’a tek yam n kos sugri. Rẽ kɩtame tɩ Wẽnnaam zoe a nimbãanega.—Karm-y 2 Sãmwɛll 12:13.

 ⁷ La rĩm a Sayull yẽ? A Zeova kɩtame t’a Sãmwɛll yeel-a t’a tɩ kʋ Amalɛk soolmã neb fãa ne b rũmsã. La a Sayull basa Amalɛk naab a Agaag n pa kʋ ye. A tũusa rũms kẽer me n pa kʋ ye. Bõe yĩng t’a maan woto? Tõe tɩ yaa sẽn na yɩl n bao yʋʋre. (1 Sãm. 15:1-3, 7-9, 12) Yaa rẽ n kɩt t’a Zeova tʋm a Sãmwɛll t’a tɩ leng-a. A Sayull ra  segd n kelga a Sãmwɛll saglsã, n bas t’a Zeova rems-a. La a pa maan woto ye. A sɩngame n na n padme. A yeelame tɩ rũmsã yaa sẽn na n yãk n kʋ maoong n kõ a Zeova. A sẽn pa kelg a Sãmwɛll saglgã kɩtame t’a Zeova yeel t’a pa na n le yɩ rĩm ye. Sẽn paase, a pa tol n le paam a Zeova zood ye.—Karm-y 1 Sãmwɛll 15:13-15, 20-23.

8. Israyɛll nebã sẽn tall manesem ning ne a Zeova remsgã zãmsda tõnd bõe?

⁸ A Zeova kõo soolem tõr neb weer tɩ b sak a kiblgã wall b zãgse. Yʋʋmd 1513 sẽn deng a Zezi rogmã, a yiisa Israyɛll nebã Ezipt yembdẽ wã. Rẽ poore, a maana kaool ne-ba, tɩ b lebg buud a sẽn so. A Zeova ra rat n demsd-b-la wa yagd sẽn maand to-to wã. La b ra maanda sẽn yaa wẽng a nifẽ, hal n da pʋʋsd tẽn-yagsã wẽnnaam-dãmbã. A Zeova tʋma no-rɛɛsdb naoor wʋsg tɩ b sagl Israyɛll nebã, la b pa kelg ye. (Zer. 35:12-15) Rẽ kɩtame t’a sɩbg-ba. A basame tɩ Asiiri nebã sãam Israyɛll buud piigã rĩungã. Kaoosg zugẽ, Babilon nebã me wa n sãama Zida soolmã. Yam bʋg la d tõe n dɩk kiba-kãngã pʋgẽ? Wilgdame tɩ d sã n dat t’a Zeova rems-do, d segd n saka a saglsã.

9, 10. Wẽnnaam sẽn kɩt tɩ b keoog Niniiv nebã, b manesem yɩɩ wãna?

⁹ A Zeova kõo Niniiv nebã me  weer tɩ b sak a kiblgã wall b zãgse. Niniiv ra yaa Asiiri na-tẽnga. A Zeova yeela a Zonas woto: “Yik n kẽng Niniiv sẽn yaa tẽn-kãsengã n tɩ moon n yeel t’a nebã kongame. Tɩ bõe, mam yãa bãmb wẽnemã.” A ra yãka yam n na n sãam tẽn-kãngã.—Zon. 1:1, 2; 3:1-4.

¹⁰ La a Zonas sẽn tɩ moon n wilg tɩ Wẽnnaam na n sãama tẽngã, “Niniiv nebã tẽe Wẽnnaam koɛɛgã n maan no-loeere. La sẽn sɩng ne nin-kãsems n tɩ ta nin-bõonegã fãa sẽgna boto.” B rĩmã “yikame n bas a geerã n yeeg a kobrã n dɩgl la a sẽgen bot n zĩnd tompeglem pʋgẽ.” Niniiv nebã saka a Zeova kiblgã, n tek yam n kos sugri. Woto kɩtame tɩ Wẽnnaam me tek yam n ka sɩbg bãmb wa a sẽn da yeelã ye.—Zon. 3:5-10.

11. A Zeova sẽn tall manesem ning ne Israyɛll nebã la ne Niniiv nebã wilgda tõnd bõe?

¹¹ Israyɛll sẽn da yaa buud a Zeova sẽn so wã pa kɩt t’a pa sɩbg-b ye. La baa a sẽn da pa maan kaool ne Niniiv nebã, a kɩtame t’a Zonas moon n wilg t’a na n sãam-b lame. La b sẽn tek yam n kos sugrã, a zoe b nimbãaneg n pa sãam-b ye. Woto wilgda vẽeneg t’a Zeova “ka tũusd neb ye.”—Tõo. 10:17.

12, 13. a) Wẽnnaam manesem yaa wãn ne ned sẽn sak a kiblgã? b) Rẽ kɩtame t’a manesem yɩ wãn ne a Sayulli, la ne Niniiv nebã?

¹² A Zeova sẽn demsd tõnd to-to wã wilgdame t’a pa dem-dem ye. Bũmb sẽn wilgd rẽ yaa t’a sã n yãk yam n na n sõng ned wall n sɩbg-a, n wa mik t’a toeemame, yẽ me toeemdame. Wala makre, Biiblã wilgame t’a Zeova wa n yeelame t’a bãngẽ a pa yãkd a Sayull t’a lebg Israyɛll rĩm ye. (1 Sãm. 15:11) La Niniiv nebã sẽn wa n tek yam n bas b tʋʋm-wẽnsã, “Wẽnnaam me teka yam n ka sɩbg bãmb wa b sẽn da yeelã ye.”—Zon. 3:10.

¹³ A Zeova ra nonga a Sayulli, la a sẽn wa n kɩɩs-a wã, a yeelame t’a bãngẽ a pa yãkd-a t’a lebg rĩm ye. Pa a Zeova sẽn tudg yĩng ye. Yaa a Sayull sẽn kɩɩs a noorã yĩnga. La Niniiv nebã sẽn tek yamã, a Zeova toeema yam n pa sãam-b ye. Woto wilgame t’a yaa nimbãan-zoɛt la wʋmda. A manesem sẽn yaa to-to ne tõndã bee ne tõnd sẽn sakd-a wall d sẽn zãgsd-a wã. Woto pa kengd raood sɩda?

14. a) Wãn to la a Zeova remsd tõnd rũndã-rũndã? b) D manesem segd n yɩɩ wãn ne a remsgã?

¹⁴ Rũndã-rũndã, a Zeova tũnugda ne a Gomdã la ne a siglgã n demsd tõndo. (2 Tɩm. 3:16, 17) Rẽ n so tɩ d segd n sakd sagls nins a sẽn tũnugd ne Biiblã, la ne a siglgã n kõt-dã. Sẽn paase, b sã n wa kibl-d bɩ d sake. Baa d sẽn deeg lisgã sã n kaoosame, wall d tara tʋʋm wʋsg tigingã pʋgẽ, d segd n ket n sakda a Zeova saglsã. Rẽ la a na n dems-do, n sõng-d tɩ d yɩ neb sẽn tat a yam.

15, 16. a) Ned sã n maan yel-wẽnd tɩ b reeg tʋʋmd a sẽn da tar tigingã pʋgẽ, wãn to la rẽ tõe n nams-a? Kõ-y makre. b) B sã n kibl ned t’a sũur sãam wʋsgo, bõe n tõe n sõng-a t’a ra koms raoodo?

¹⁵ Wãn to la a Zeova kibind tõndo? A wilgd-d-la bũmb nins a sẽn  dat tɩ d maanã, la a remsd d tagsgã. Wakat ninga, yaa d sẽn maan bũmb sẽn pa segd yĩnga. Rẽ tõe n kɩtame tɩ b reeg tʋʋmd d sẽn da tar tigingã pʋgẽ n bas-do. Wala makre, saam-biig yʋʋr sẽn boond t’a Dennis * n da yaa kãsem-soab la b kibl-yã. A ra kẽe afɛɛr-dãmb pʋgẽ n pa reng n tags tɩrga, tɩ kɩt t’a maan sẽn pa segde. Yʋng ning b sẽn togs tigingã neb t’a Dennis pa le yaa kãsem-soabã, a sũur sãama wʋsgo. A tagsame t’a pa le tar yõod ye. Ad a sẽn yeele: “Yʋʋm 30 pʋgẽ, m paama tʋʋm wʋsg tigingã pʋgẽ. Mam yɩɩ wakat fãa so-pakda, m tʋma Betɛllẽ, m yɩɩ kãsemb-sõngda, n wa lebg kãsem-soaba. Rẽ tɩ mam kõo m pipi sõsg rasem a tãab tigis-kãsengẽ tɩ nan pa kaoose. Zĩig pʋgẽ, woto fãa saame. Yãndã sẽn da tar-mã toor sẽn ka be, m da tagsdame tɩ m pa le tõe n tall yõod ne a Zeova siglgã ye.”

¹⁶ A Dennis ra segd n toeemame. La bõe n sõng-a t’a pa koms raoodo? A kell n modga ne Biiblã zãmsgo, koɛɛgã mooneg la tigissã kẽnde. Saam-biisã la saam-bi-pogsã me kenga a raoodo. A paama belsg tõnd sɛbã pʋsẽ me. A yeela woto: “Yʋʋmd 2009 sa-sik kiuug rasem 15 Gũusg Gasgã sõsg ning gom-zug sẽn yaa ‘ Pouvez-vous de nouveau exercer des responsabilités ? ’ wã yɩɩ wa lɛtr b sẽn gʋls n leok mam pʋʋsgã.” A Dennis sẽn karem sõsgã, a bãngame t’a tõe n paama sẽk masã n maan bũmb wʋsg n paas a tẽebã pãnga. Kiblgã nafa a Dennis wʋsgo. Bala, yʋʋm a wãn poore, a lebga kãsemb-sõngd yɛsa.

17. B sã n yiis ned tigingã pʋgẽ, wãn to la tõe n naf-a? Kõ-y makre.

¹⁷ Bũmb a to me a Zeova sẽn maan n kibind tõnd yaa a sẽn mi n kɩt tɩ b yiis yel-wẽn-maand tigingã pʋgẽ wã. Woto kogenda tigingã, la tõe n sõnga bɛɛgdã t’a tek yam n kos sugri. (1 Kor. 5:6, 7, 11) Wala makre, b yiisa a Robert tɩ kolg yʋʋm 16 t’a yaool n lebg n wa. La yʋʋm kãens fãa pʋgẽ, a ba wã, a ma wã, a kẽem-dãmbã la a yaopã tũu Biiblã saglsã, n da pa baood a zĩigẽ ye. B ra pa pʋʋsd-a meng ye. Yʋʋm a wãn la woto, b sẽn lebg n deeg a Robert tigingã pʋgẽ. A le modgda wʋsg a Zeova tũudmã pʋgẽ. B sok-a-la bũmb ning sẽn sõng-a t’a lebg n wa baa sẽn kaoos woto wã, t’a yeel tɩ yaa a zakã rãmb sẽn tũ Biiblã saglsã. A yeelame t’a zakã rãmb sã n da sakd n sõsd ne-a baa yaa bilfu, bɩ n mi n bao n bãng a keelem, ra na n sek-a lame. La b sẽn pa maan woto wã kɩtame t’a modg n lebg n wa tigingã pʋgẽ.

18. D manesem segd n yɩɩ wãn ne Wẽnnaam kiblgã?

¹⁸ Tõe tɩ pa na n wa yɩ tɩlae tɩ b kibl tõnd woto ye. La b sã n wa sagl-do, d manesem yɩta wãna? D na n saka saglgã wa a Davɩɩd bɩ, bɩ d na n maana wa a Sayulli? D ra yĩm t’a Zeova sẽn yaa d saasẽ Ba wã maanda wa yagd ye. Biiblã yeta woto: “Zu-soabã [“kibinda,” MN] b sẽn nong a soab wa ned sẽn [“kibind,” MN] a bi-nongre.” Woto yĩnga, bɩ d ‘ra paoog Zu-soabã zãmsgo, la d ra zoe b tãsgã ye.’—Yel. 3:11, 12.