1, 2. (a) Dahme kitail anahne wia pwehn ahneki nanpwungmwahu rehn Siohwa? (b) Ia duwen atail kak paiekihda sang atail koasoiapene karasaras kan en Paipel duwen aramas akan ar kin mwekidki sapwellimen Koht kaiahn?

 “A DUWEN ngehi, ia uwen kesempwal en ei karanih Koht, pwe I en diar silepei rehn KAUN-O Koht, Wasa Lapalahpie.” (Mel. 73:28) Dahme kahrehda sounmelkahkao koasoiahki met duwen eh kin likih Koht? Mwohn mwo, ni sounmelkahkao eh kilangada aramas suwed kan ar mwomwen ahneki popohl, e nsensuwedla oh nda: “Eri dah, sohte pahn katepen ei mour mwakelekel oh sohte wiahda dihp?” (Mel. 73:2, 3, 13, 21) Ahpw ni eh patohlong ‘nan Tehnpas en Koht,’ e kak kapwungala eh madamadau oh karanihte Koht. (Mel. 73:16-18) Sounmelkahkao esehda mehn kasukuhl kesempwal ehu: Ma emen men ahneki nanpwungmwahu keren rehn Siohwa, e anahne wia emen sapwellimen Koht aramas oh kin pwungki oh doadoahngki sapwellime kaweid.​—Mel. 73:24.

² Kitail men ahneki nanpwungmwahu keren rehn Koht mehlelo me ketin ieias. Eri e kesempwal kitail en pwungki sapwellime peneu oh kaweid. Ni ahl wet, Siohwa kin ketin kaiahne de sewese kitail en wiahla soangen aramas me e ketin kupwurki. Mahs, Koht ketin kasalehiong aramas mahk kalahngan oh ekei pak ong wehi kan sang ni eh ketikihong irail ahnsou mwahu en pwungki sapwellime kaiahn. Karasaras pwukat ntingdi nan Paipel “pwe en padahkih kitail” oh pil wia “mehn kataman ehu ong kitail” ni imwin rahn akan. (Rom 15:4; 1 Kor. 10:11) Iren onop wet pahn koasoia ekei karasaras pwukat. Kitail pahn sukuhlki mwomwen sapwellimen Siohwa madamadau oh ia duwen atail kak paiekihda eh kin ketin kaiahne kitail.

3. Ia duwen Paipel eh kawehwehda sapwellimen Siohwa pwuhng pohn aramas nan Aiseia 64:8 oh Seremaia 18:1-6? (Menlau kilang tepin kilel.)

³ Paipel mahsanih me Siohwa ketin duwehte sounwia sah men pwehki eh sapwellimanki pwuhng pohn aramas oh wehi kan. Aiseia 64:8 mahsanih: “Ahpw komwi me samat, Maing KAUN. Se rasehng pwehl, a komwi sounwia sah. Komwi me ketin wiaikitada.” Sounwia sah men kak wiahda dahme e mwahuki wiahda sang pwehl. Pwehlo sohte kak ndaiong sounwia saho dahme en wiahda. Met duwehte aramas oh Koht. Kitail sohte ahneki pwuhng en ndaiong Koht ia mwomwen eh pahn ketin kaiahne kitail, duwehte pwehlo eh sohte kak ndaiong sounwia saho mwomwen sah, de dahl dah en wiahda.​—Wadek Seremaia 18:1-6.

4. Siohwa kin ketin idingkihong aramas akan de wehi kan ren mweidohng ih en ketin kaiahne irail? Dahme kahrehda?

⁴ Rasehng sounwia sah men eh wiahda sah sang pwehl, Siohwa ketin kaiahne mehn Israel kan ren wiahla soangen aramas me e ketin kupwurki. Ahpw ia duwen Siohwa eh ketin weksang sounwia sah aramas men? Siohwa ketikihong aramas akan oh wehi kan kisakis tohrohr en saledek en wiahda pilipil me iei, e ketin mweidohng irail en wiahda pein arail pilipil kan. E sohte ketin wiahda ekei aramas ren mwahu a ekei ren suwed. E pil sohte ketin doadoahngki sapwellime pwuhng en ketin idingkihong aramas akan ren peikiong ih. Ahpw aramas akan anahne pilada ma re men mweidohng Sounkapikadao Siohwa en ketin kaiahne irail de soh.​—Wadek Seremaia 18:7-10.

5. Ni aramas akan ar sohte mweidohng Siohwa en ketin kaiahne, dahme e kin ketin wia?

⁵ Ia duwen ma emen kin keptakai oh sohte mweidohng Sounwia Saho Siohwa en ketin kaiahne ih? Ia duwen Siohwa eh pahn ketin doadoahngki sapwellime pwuhng nin duwen sounwia sah men? Eri ni eh kin apwal en wekidala pwehlo nin duwen me sounwia saho men wia, e kak pilada en wia mehkot me weksang, de e kak kesehla pwehlo. Met kin kalapw wiawi pwehki sounwia saho sohte wekidala mwomwen pwehlo ni pwung. Ahpw Siohwa kin ketin kaiahne aramas ni pwung ahnsou koaros. (Deud. 32:4) Ni aramas men eh sohte kin mweidohng Siohwa en ketin kaiahne ih, sapwungo kin ahnsou koaros en aramaso. Siohwa kin ketin wekidala mwomwen eh kin kaiahne aramas men sang mwomwen ahn aramaso kin mwekidki sapwellime kaweid. Ni aramas akan ar kin peikiong Siohwa, Siohwa kak ketin doadoahngki irail. Karasepe, Kristian keidi kan “milahr pahn sapwellime kalahngan” oh wiahlahr “einpwoat [“sah,” NW] . . . ehu me kaselel ong ni doadoahk kesempwal akante.” Ahpw aramas akan me sohte kin peikiong sapwellimen Koht kaweid “milahr pahn sapwellime engieng” oh e sohte kak ketin doadoahngki irail.​—Rom 9:19-23.

6, 7. Ia mwomwen Nanmwarki Depit oh Nanmwarki Sohl ara mwekidki Siohwa eh ketin panawih ira?

 ⁶ Ehu ahl me Siohwa kin ketin kaiahne aramas iei sang ni eh kin ketin kaweid de panawih irail. Karasepe, medewehla mwomwen Siohwa eh ketin kaiahne tepin nanmwarki en Israel riemeno, Sohl oh Depit. Mie imwila suwed ong Nanmwarki Depit oh meteikan ni eh wiahda dipen kamwahl rehn Padsipa. Mendahki Depit wia nanmwarki, Siohwa ketikihong ih kaweid kehlail. Koht ketin poaronehla Nadan rehn Depit en wahla kaweid kehlailo. (2 Sam. 12:1-12) Ia duwen Depit eh mwekidki met? E uhdahn koluhkihla dahme e wiahdao. Pwehki Depit koluhla, Koht ketin kasalehiong mahk kalahngan.​—Wadek 2 Samuel 12:13.

 ⁷ Nanmwarki Sohl weksang Depit. E sohte  rong kaweid. Siohwa ketin poaronehla Samuel pwehn padahkihong Nanmwarki Sohl en kemehla mehn Amalek kan koaros oh neirail mahn kan koaros. Ahpw Sohl sapeikiong sapwellimen Siohwa kehkehlik. E mweidohng Nanmwarki Akak en mourla, oh e sohte kemehla mahn me keieu kaselel ko. (1 Sam. 15:1-3, 7-9, 12) Eri Siohwa ketin poaronehla Samuel en kihong kaweid. Sohl anahne rong kaweido oh pwungki Siohwa en ketin kaiahne. Ahpw, Sohl sohte men wekila. E medewe me e ahneki kahrepe mwahu en pohnsehsehla sapwellimen Siohwa kaweid kan. E nda me e pahn meirongki mahn ako nin duwen kisakis ehu ong Siohwa. Koht ketin soikala Sohl nin duwen nanmwarki, oh Sohl solahr ahneki nanpwungmwahu reh.​—Wadek 1 Samuel 15:13-15, 20-23.

8. Dahme kitail kak sukuhlki sang mwomwen mehn Israel kan arail mwekidki Siohwa eh ketin kaiahne irail en wekila?

⁸ Siohwa pil ketikihong wehi kan ahnsou mwahu ren peikiong ih. Mwurin Siohwa ketin kapitala mehn Israel kan sang Isip nan pahr 1513 mwohn Krais, re wiahla sapwellime aramas tohrohr kei. Koht ketin inoukihda en kaiahne irail. Ahpw aramas ako sohte mwekidki met ni ahl pwung oh doulahte wia dahme suwed mwohn silangin Siohwa. Re pil kin kaudokiong koht likamw en wehi kan me kapilirailpene. Pak tohto Siohwa ketin poaronehla soukohp kan rehn mehn Israel kan pwehn sewese irail en weksang arail wiewia, ahpw re soikala kaweid me soukohp ko kihong irail. (Ser. 35:12-15) Pwehki  arail sapeikiong Siohwa, e ketikihong irail kaweid kehlail. Mehn Asiria kan kalowehdi paliepeng en wehin Israel. Mwuhr, mehn Papilon kan kalowehdi palieir en wehin Suda. Kitail sukuhlki mehkot kesempwal sang met. Ahl ehute me kitail kak paiekihda sapwellimen Siohwa kaiahn iei ma kitail kin mwekidki ni pwung.

9, 10. Ia duwen mehn Ninipe kan ar mwekidki ni Siohwa eh ketikihong irail kehkehlik ehu?

⁹ Siohwa pil ketikihong aramas akan nan Ninipe, kahnimw laud nan Asiria, ahnsou mwahu rehn mwekidki sapwellime kehkehlik. Siohwa ketin mahsanihong Sona: “Kohwei Ninipe, kahnimw kalaimwuno, oh panawih irail, pwe I rongehr duwen suwed laud en aramas akan wasao.” Siohwa ketin koasoanehdi me Ninipe anahne kasohrala pwehki aramas ako me inenen suwed.​—Sona 1:1, 2; 3:1-4.

¹⁰ Ni Sona eh padahkihong aramas ako dahme Koht ketin mahsanih, re “pwosonla mahsen en Koht.” Re men kasalehda me re koluhla, eri re sohte mwenge, oh likawihada likoun nsensuwed. Pil arail nanmwarkio “ahpw ketida sang nan mwoale, oh kesehsang sapwellime likou puhp, oh pwuhriong nan likoun nsensuwed oh ketidiong nan pehs.” Mehn Ninipe kan mweidohng Siohwa en ketin kaiahne irail oh re koluhla. Imwilahn met, Siohwa sohte ketin kasohrehla kahnimwo.—Sona 3:5-10.

11. Dahme kitail sukuhlki sang mwomwen sapwellimen Siohwa wiewia kan ong mehn Israel oh mehn Ninipe?

¹¹ Mendahki mehn Israel kan wia sapwellimen Siohwa aramas tohrohr kei, e anahne ketin kaiahne irail. Mehn Ninipe kan kaidehn sapwellimen Koht aramas tohrohr kei, ahpw re mwekidki mwahu duwen Siohwa eh ketin kaiahne irail. Kahrehda Siohwa ketin kasalehiong irail mahk kalahngan oh ketin koasoanehdi me e sohte pahn ketin kasohrehla irail. Siohwa sohte ketin lipilipilki aramas, me wehwehki e kin ketin kadeik aramas koaros nin duwen mwomwen arail wiewia kan.​—Deud. 10:17.

12, 13. (a) Dahme kahrehda Koht ketin wekidala sapwellime koasoandi kan ni ahnsou me emenemen aramas eh mwekidki sapwellime kaweid? (b) Dahme kitail sukuhlki duwen Siohwa sang ire mehlel me e kin ketin wekidala kupwure me pid Saul? Me pid Ninipe?

¹² Siohwa kak ketin wekidala sapwellime koasoandi kan duwen aramas akan ni ahnsou me re weksang arail wiewia kan. Karasepe, Paipel padahkihong kitail me Siohwa ketin koluhkilahr eh ketin kesepwilada Sohl nin duwen nanmwarki en Israel. (1 Sam. 15:11) Oh ni ahnsou me mehn Ninipe kan koluhla oh uhdihsang arail wiewia suwed kan, Paipel mahsanih: “Koht eri ketin wekidala kupwure, oh sohte ketikihong irail apwal laud me e ketin kaunopadahng irail.”​—Sona 3:10.

¹³ Ni ahnsou me Paipel mahsanih me Siohwa ketin “koluhkilahr,” met wehwehki me e ketin wekidala kupwure duwen aramas men, de e ketin wekidala dahme e ketin koasoanedier en wia. Mie ahnsou ehu me Siohwa ketin kupwurki Sohl. Ahpw ni Sohl eh sapeikiong, E ketin soikala Sohl nin duwen nanmwarki. Met kaidehn pwehki Siohwa ketin wiahda sapwung ni eh ketin pilada Sohl nin duwen nanmwarki, ahpw pwehki Sohl sapeikiong ih. Ni ahnsou me mehn Ninipe kan koluhla, Siohwa ketin kupwurki wekidala dahme e ketin koasoanehdier oh ketin mweidohng irail en mourla. E mwahu en ese me Siohwa ketin kadek oh mahk oh me e ketin kupwurki wekidala sapwellime koasoandi ni aramas akan ar weksang arail wiewia kan.

14. (a) Dahme Siohwa kin ketin doadoahngki pwehn ketin kaiahne kitail rahnpwukat? (b) Dahme kitail anahne wia ni Koht eh kin ketin kaiahne kitail?

¹⁴ Rahnpwukat, Siohwa kin ketin doadoahngki Paipel oh sapwellime pwihn pwehn ketin kaiahne kitail. (2 Tim. 3:16, 17) Kitail anahne perenki soangen kaweid oh kaiahn  koaros me kitail kin alehdi sang met. Sohte lipilipil ia uwen werei kitail papidaiskier de uwen tohtohn pwais kaselel me kitail ahneki nan mwomwohdiso, kitail anahne pousehlahte peikiong sapwellimen Siohwa kaweid kan. Ni atail kin mwekidki sapwellimen Siohwa elen kaiahne kitail, kitail kak wiahla soangen aramas me e ketin kupwurki.

15, 16. (a) Soangen pepehm dah me emen ele ahneki ni eh sohla ahneki pwais kaselel nan mwomwohdiso? Menlau kihda ehu karasaras. (b) Dahme kak sewese kitail en powehdi pepehm en namenek ni atail alehdi peneu?

¹⁵ Ia duwen Siohwa eh kin ketin kaiahne kitail? E kin ketin padahkihong kitail dahme e ketin kupwurki kitail en wia, oh ketin kapwungala atail madamadau. Ekei pak, kitail ele anahne peneu kehlail pwehki kitail wiahda sapwung laud ehu. Met kak imwikihla atail sohla ahneki ekei pwais kaselel nan mwomwohdiso. Karasepe, medewehla eldero me ede Dennis. * E alehdi peneu pwehki e wiahda pilipil sapwung me pid pesines. Ia en Dennis pepehm nipwongo me e pakairda nan mwomwohdiso me e solahr wia elder men? E koasoia me e pehm duwehte emen me sohte kin pweida. “Daulih sounpar 30, mie pwais kaselel tohto me I ahneki. I wia pioneer men, iang doadoahk Pedel, idihdida nin duwen sounsawas men oh mwuri elder men. I ahpwtehn wia tepin ei padahk nan mihting tohrohr laud ehu. Ahpw pwais pwukat koaros wiahkintehieu sohrala.” E namenekla oh e kin medewe ma sapwellimen Siohwa pwihn pahn kak pwurehng doadoahngki ih.

¹⁶ Dennis anahne wekidala eh wiewia kan. Ahpw dahme sewese ih en powehdi eh namenek? E kin tehk mwahu pwe en kin onopki Paipel, kaukaule iang kalohk, oh towehda mihting kan koaros. E kalahnganki kangoang me e kin ale sang riatail Kristian kan oh sang nan neitail pwuhk kan. E koasoia: “Ehu oaralap sang nan Watchtower (lokaiahn wai), August 15, 2009 me koasoia, ‘Mie Pak Ke Papah? Ke Kak Pwurehng Papah?’ (‘Did You Once Serve? Can You Serve Again?’) kin duwehte kisinlikou ehu me wiawihda ong ie pwehn sapengala ei kapakap kan.” Dennis sukuhlki sang nan ire ko me e kak doadoahngki eh ahnsou pwehn kakehlaka eh nanpwungmwahu rehn Siohwa. E paiekihda peneu me e alehdio oh mwurin sounpar kei, e pwurehng wiahla sounsawas men.

17. Ia duwen koasoandi en piskenla eh kin sewese me dipan emen? Menlau kihda ehu karasaras.

¹⁷ Pil ehu soangen kaiahn sang Siohwa iei koasoandi en piskenla. Met kin pere mwomwohdiso sang irair suwed en me dipano, oh e kak sewese me dipano en koluhla. (1 Kor. 5:6, 7, 11) Robert piskenkilahr kereniong sounpar 16. Erein ahnsowo, eh pahpa nohno oh rie ko kin idawehn kaweid en Paipel oh sohte kin werekiong ih, de pil rahnmwahwih. Met Robert pwurodohr nan mwomwohdiso erein sounpar kei oh e kehlail nan padahk mehlel. E kawehwehda me ehu kahrepe eh pwurodo nan padahk mehlel mwurin ahnsou reirei iei pwehki eh peneinei sohte kin werekiong. E koasoia me ma eh peneinei werekiong ih, mehnda ma pil ekiste ahnsou de idekte ia ire, e sohte pahn loaleidkin irail duwehte me e wiaho. Met sewese ih en men pwurodo rehn Siohwa oh Sapwellime aramas akan.

18. Ia duwen atail pahn mwekidki ni Koht eh kin ketin kaiahne kitail?

¹⁸ Mwein soangen peneuo sohte wiawihong kitail. Ahpw kitail anahne medewe duwen dahme kitail pahn wia ni Koht eh pahn ketin kaiahne kitail. Ia duwen atail pahn mwekidki? Kitail pahn pwungki ale kaweid duwehte Depit? De kitail pahn soikala duwehte Sohl? Siohwa atail Sounwia Sah Lapalap, iei Samatail. Dehr manokehla me Siohwa “kin ketin kapwungala irail kan me e kin ketin loalloale, duwehte sahm emen eh kin kapwungala nah pwutak me e kin suweiki.” Mweidohng Siohwa en ketin kaiahne iuk ahnsou koaros.​—Lep. Pad. 3:11, 12.