Simu Jeová nia dixiplina atu hadiʼa ita-nia hahalok
“Ho Ita-nia konsellu Ita sei hatudu dalan mai haʼu, no depois Ita sei halo haʼu hetan glória.”—SAL 73:24.
1, 2. (a) Atu bele iha relasaun diʼak ho Jeová, ita presiza halo saida? (b) Oinsá mak istória husi Bíblia kona-ba ema neʼebé hetan dixiplina bele ajuda ita?
“ATU hakbesik ba Maromak mak diʼak mai haʼu. Haʼu halo Naʼi Jeová, Ukun-Naʼin Boot Liu, sai haʼu-nia fatin protesaun.” (Sal 73:28) Saida mak book ema neʼebé hakerek salmu neʼe atu hatudu sai ninia fiar ba Maromak? Foin antes nia hatete nuneʼe, nia sai laran-tun tanba haree ema aat sira moris ho dame. Nia dehan: “Saugati deʼit haʼu hamoos haʼu-nia laran no haʼu fase liman hodi hatudu katak haʼu la iha sala.” (Sal 73:2, 3, 13, 21) Maibé, bainhira nia tama iha “Maromak nia santuáriu boot”, nia hadiʼa ninia hanoin no hametin ninia desizaun atu hakbesik nafatin ba Maromak. (Sal 73:16-18) Esperiénsia neʼe hanorin lisaun importante ida ba hakerek-naʼin salmu neʼe: Atu bele nafatin iha relasaun diʼak ho Jeová, nia presiza hakbesik ba Maromak nia povu, simu konsellu, no halo tuir.—Sal 73:24.
2 Ita mós hakarak hametin ita-nia relasaun ho Maromak neʼebé loos. Tan neʼe, importante tebes ba ita atu simu Jeová nia konsellu no dixiplina hodi bele hadiʼa ita-nia hahalok. Iha tempu uluk, Jeová hatudu laran-sadiʼa ba ema no nasaun sira hodi fó oportunidade atu simu ninia dixiplina. Bíblia konta kona-ba oinsá mak sira hatán ba Jeová nia dixiplina, no ida-neʼe “hanorin ita” no fó avizu ba ita neʼebé moris iha loron ikus sira-neʼe. (Rom 15:4; 1 Kor 10:11) Hodi buka-hatene istória sira-neʼe sei ajuda ita atu hatene Jeová nia hahalok no mós oinsá mak ita bele hatán ba ninia dixiplina.
OINSÁ BADAIN SANAN-RAI HALAʼO NINIA KBIIT
3. Isaías 64:8 no Jeremias 18:1-6 esplika oinsá kona-ba Jeová nia kbiit? (Haree dezeñu iha pájina neʼe.)
3 Kona-ba Jeová nia kbiit ba ema no nasaun sira, Isaías 64:8 hatete: “Oh, Jeová, Ita mak ami-nia Aman. Ami mak rai-mean, no Ita mak ami-nia Badain Sanan-Rai; no ami hotu Ita-nia liman mak halo.” Badain sanan-rai sira halo rai-mean sai fali sanan ka buat naran deʼit hodi tuir ninia hakarak. Rai-mean la bele halo buat ida. Nuneʼe mós ho relasaun entre Maromak no ema. Hanesan rai-mean neʼebé iha badain nia liman, ita mós la iha direitu atu kontra hasoru Jeová nia hakarak.—Jer 18:1-5; lee Jeremias 18:6. a
4. Jeová obriga ema ka nasaun atu simu ninia dixiplina ka lae? Tanbasá?
4 Ba nasaun Israel iha tempu uluk, Jeová hatudu ninia kbiit nuʼudar “Badain Sanan-Rai”. Maibé iha buat neʼebé la hanesan ho Jeová no ema neʼebé serbisu nuʼudar badain sanan-rai. Oinsá? Badain sanan-rai sira halo rai-mean sai fali buat naran deʼit tuir sira-nia hakarak. Maibé, ba Jeová, nia fó liberdade ba ema atu halo desizaun rasik. Nia la obriga ema atu halo tuir nia. Loos duni, ema mak tenke foti desizaun atu simu ka la simu Jeová nia dixiplina.—Jer 18:7-10.
5. Kuandu ema lakohi simu Jeová nia matadalan, Jeová sei halo saida ba sira?
5 Se ema ruma ulun-toos no lakohi simu Jeová nia matadalan, oinsá mak Jeová sei uza ninia kbiit nuʼudar Badain Sanan-Rai? Hanoin toʼok, kuandu badain sanan-rai ida la kontente ho sanan neʼebé nia halo, nia halo saida? Karik nia halo fali seluk, ka soe deʼit! Baibain, kuandu nia halo sanan neʼebé la diʼak, ida-neʼe tanba ninia sala. Maibé, ita-nia Badain Sanan-Rai Jeová nunka halo sala. (Deut 32:4) Kuandu ema ida la simu Jeová nia matadalan, ema neʼe mak sala. Jeová bele halo mudansa kona-ba saida mak nia halo ba ema, neʼe depende oinsá sira simu ka la simu Ninia matadalan. Ema neʼebé simu Jeová nia matadalan, Jeová bele uza sira iha dalan neʼebé diʼak. Porezemplu, ema kristaun kose-mina sira sai hanesan “sanan laran-luak nian”, neʼebé ikusmai Maromak bele uza nuʼudar “sanan ba buat kmanek”. Maibé, ema neʼebé la halo tuir Jeová sei sai hanesan “sanan laran-nakali nian atu sobu rahun hotu”.—Rom 9:19-23.
6, 7. Saida mak la hanesan entre Liurai David no Liurai Saul bainhira Jeová fó konsellu ba sira?
6 Dalan ida neʼebé Jeová uza ninia kbiit atu hadiʼa ema nia hahalok mak liuhusi konsellu ka dixiplina. Mai ita haree oinsá mak Jeová halo ida-neʼe ba Liurai Saul no Liurai David. Bainhira David halo sala-foʼer ho Batseba, ida-neʼe lori susar ba ninia an no ema seluk. Maski David mak liurai, Jeová fó dixiplina ba David. Nia haruka profeta Natan hodi lori konsellu neʼebé makaʼas. (2 Sam 12:1-12) Oinsá mak David simu konsellu neʼe? Nia sai laran kanek tebes no arrepende an kedas. Tan neʼe, Jeová mós hatudu laran-luak hodi fó perdua ba David.—Lee 2 Samuel 12:13. b
7 Maibé, Liurai Saul la simu Jeová nia konsellu. Liuhusi profeta Samuel Jeová haruka ona Saul atu oho ema Amalec no sira-nia animál hotu. Maibé Saul la halo tuir. Nia husik liurai Agag atu moris, no mós la oho animál balu. (1 Sam 15:1-3, 7-9, 12) Tan neʼe, Jeová haruka fali Samuel atu fó konsellu ba Saul. Tuir loloos, neʼe mak tempu ba Saul atu troka ninia hahalok sala. Maibé nia la simu Jeová nia konsellu neʼe, no fó razaun oioin ba ninia hahalok. Saul dehan katak buat neʼebé nia halo mak la sala tanba animál sira-neʼe mak atu hasaʼe nuʼudar sakrifísiu. Tan neʼe, Jeová mós la simu Saul nuʼudar liurai, no Saul la hadiʼa fali ninia relasaun ho Jeová.—1 Sam 15:13-15, 20-22; lee 1 Samuel 15:23. c
Saul la simu konsellu. Nia lakohi Jeová atu hadiʼa ninia hahalok! (Haree parágrafu 7)
David arrepende an no simu Jeová nia konsellu atu hadiʼa ninia hahalok. Oinsá ho Ita? (Haree parágrafu 6)
MAROMAK LA FIHIR EMA
8. Saida mak ita bele aprende husi istória kona-ba nasaun Israel?
8 Jeová mós fó oportunidade ba nasaun sira atu hadiʼa sira-nia hahalok. Iha tinan 1513 molok Kristu, Jeová lori povu Israel sai husi rai-Egiptu, no halo sira sai Ninia povu espesiál. Iha tempu neʼebá, Jeová promete atu tau matan ba sira no hadiʼa sira-nia hahalok. Maski nuneʼe, nasaun Israel ho ulun-toos kontinua hatudu hahalok neʼebé aat, hanesan adora maromak falsu sira. Jeová haruka ninia profeta sira ba Israel hodi bele hadiʼa sira-nia hahalok, maibé sira nafatin la simu. (Jer 35:12-15) Tan neʼe, Jeová mós fó dixiplina makaʼas ba sira. Ikusmai, nasaun Israel iha parte norte monu iha ema Asíria nia liman, no Jeová mós husik rai-Babilónia atu manán nasaun Judá iha parte súl. Ida-neʼe fó lisaun importante mai ita, katak atu bele hetan bensaun husi Jeová, ita tenkesér simu Ninia konsellu ho laran.
9, 10. Bainhira ema iha Nínive hetan avizu husi Maromak, sira halo saida?
9 Jeová mós fó oportunidade ba ema Asíria iha sidade kapitál naran Nínive atu hadiʼa sira-nia hahalok hodi simu Ninia avizu. Jeová haruka Jonas: “Hamriik, bá Nínive, sidade boot neʼe, no fó-hatene katak haʼu sei la tahan tan sira-nia hahalok aat.” Sin, tanba ema nia hahalok aat, Jeová hanoin atu halakon sidade Nínive.—Jonas 1:1, 2; 3:1-4.
10 Maibé, bainhira Jonas lori mensajen todan neʼe ba Nínive, “ema Nínive sira komesa tau fiar ba Maromak”. Sira hotu “halo jejún no hatais hena karón” hodi hatudu katak sira arrepende an duni. Sira-nia liurai mós “hamriik husi nia kadunan”, depois “hatais hena karón no tuur iha ahi-kadesan”. Loos duni, ema iha Nínive simu Jeová nia avizu hodi troka sira-nia hahalok no hakribi sira-nia sala. Tan neʼe, Jeová la halakon sidade Nínive.—Jonas 3:5-10.
11. Istória kona-ba nasaun Israel no ema Nínive hanorin saida mai ita kona-ba Jeová nia hahalok?
11 Jeová la dada an atu fó dixiplina makaʼas ba ninia nasaun Israel. Maibé ho ema iha Nínive, maski sira la iha relasaun espesiál ho Jeová, sira simu Jeová nia dixiplina hodi arrepende an ho laran, tan neʼe, Jeová mós hatudu laran-sadiʼa hodi la halakon sira. Ida-neʼe hatudu ho klaru katak Jeová mak Maromak neʼebé “la fihir ema”!—Deut 10:17.
JEOVÁ HATENE TEMPU NEʼEBÉ LOOS ATU TROKA NINIA DESIZAUN
12, 13. (a) Tanbasá mak dala ruma Maromak troka ninia hanoin kona-ba ema? (b) Jeová “sente triste” kona-ba desizaun neʼebé nia uluk halo ba Saul no ema Nínive. Neʼe katak sá?
12 Jeová hatene tempu neʼebé loos atu troka ninia desizaun uluk nian hodi tuir ema nia hahalok. Porezemplu, kona-ba Liurai Saul, Bíblia hatete katak Jeová ‘sente triste katak nia hili ona Saul nuʼudar liurai’. (1 Sam 15:11) Bíblia mós hatete katak bainhira ema iha Nínive arrepende an ho laran no husik sira-nia sala, “Maromak neʼebé loos sente triste kona-ba susar neʼebé nia hatete ona atu fó ba sira; no nia la halo susar neʼe monu ba sira”.—Jonas 3:10.
13 Bainhira eskritura sira-neʼe dehan katak Jeová “sente triste”, neʼe katak nia troka ninia hanoin ba ema ka halo mudansa ba desizaun neʼebé nia uluk halo. Kona-ba Saul, uluk Jeová simu nia, maibé ikusmai tanba nia la halo tuir, Jeová la simu tan Saul nuʼudar liurai. Ida-neʼe laʼós tanba Jeová mak halo desizaun sala kona-ba Saul, maibé tanba Saul mak la halo tuir Jeová. Nuneʼe mós ho ema Nínive, Jeová troka ninia hanoin kona-ba sira tanba sira arrepende an. Kuandu ita hatene katak Jeová mak Maromak neʼebé laran-sadiʼa, laran-luak, no prontu atu troka ninia hanoin bainhira ema hadiʼa sira-nia hahalok, ida-neʼe halo ita kontente tebes!
SIMU JEOVÁ NIA DIXIPLINA
14. (a) Ohin loron, oinsá mak Jeová ajuda ita atu hadiʼa ita-nia hahalok? (b) Ita tenke halo saida kona-ba Jeová nia konsellu sira?
14 Ohin loron, Jeová ajuda ita atu hadiʼa ita-nia hahalok liuhusi ninia Liafuan Bíblia no ninia organizasaun. (2 Tim 3:16, 17) Ita hakarak sai prontu atu simu konsellu ka dixiplina naran deʼit neʼebé Jeová fó mai ita, loos ka lae? Maski ita kleur ona iha lia-loos ka ita iha knaar espesiál oioin iha Jeová nia organizasaun, ita hotu presiza nafatin simu Jeová nia konsellu atu sai atan neʼebé diʼak ba nia.
15, 16. (a) Kuandu ita lakon knaar iha kongregasaun, ida-neʼe bele halo ita sente oinsá? (b) Saida deʼit mak bele ajuda ita atu labele moe no laran-tun demais?
15 Dala ruma, ita hetan dixiplina liuhusi matadalan ka konsellu ruma. No bainhira ita halo sala boot, ita presiza hetan dixiplina makaʼas, no karik ita lakon knaar ruma iha kongregasaun. Hanoin toʼok kona-ba irmaun Dennis d neʼebé uluk serbí nuʼudar katuas kristaun. Nia halo sala neʼebé boot tanba halo negósiu neʼebé la moos, no ikusmai hetan dixiplina. Bainhira kongregasaun fó sai avizu katak nia la serbí ona nuʼudar katuas, nia sente oinsá? Nia hatete: “Haʼu laran-tun tebes. Tanba durante tinan 30 nia laran, haʼu iha knaar oioin, hanesan serbí nuʼudar pioneiru regulár, serbí iha Betel, sai atan ba kongregasaun no depois sai katuas. Haʼu mós foin hetan knaar atu hatoʼo diskursu iha reuniaun boot. Maibé derrepente deʼit, haʼu lakon buat hirak-neʼe hotu. Haʼu sente moe tebes no katak ita-nia organizasaun sei la uza ona haʼu.”
16 Irmaun Dennis presiza hadiʼa ninia hahalok sala. Maibé saida mak ajuda nia atu labele moe no laran-tun demais? Nia hakaʼas an atu halo tuir nafatin ninia toman neʼebé diʼak, hanesan estuda Bíblia, bá haklaken, no tuir reuniaun beibeik. Nia mós simu ajuda husi irmaun-irmán sira no ita-nia livru sira. Nia hatete: “Bainhira haʼu lee informasaun husi livru Menara Pengawal, 15 Agostu 2009, ho títulu ‘Pernahkah Saudara Melayani? Dapatkah Saudara Melayani Lagi?’, haʼu sente neʼe hanesan karta husi Jeová hodi hatán haʼu-nia orasaun. Konsellu ida neʼebé kona loos haʼu-nia laran mak: ‘Durante tempu neʼebé Ita la iha responsabilidade espesiál iha kongregasaun, diʼak atu tau atensaun kona-ba oinsá mak ita bele hametin ita-nia relasaun ho Jeová.’” Tanba irmaun Dennis simu dixiplina husi Jeová no hadiʼa ninia hahalok, ikusmai, nia hetan fali knaar atu serbí nuʼudar atan ba kongregasaun.
17. Kuandu kongregasaun hasai ema neʼebé halo sala, oinsá mak ida-neʼe bele ajuda ema neʼe? Esplika toʼok.
17 Dala ruma, Jeová nia dixiplina mós envolve hasai ema husi kongregasaun. Ida-neʼe bele proteje kongregasaun husi hahalok aat no mós ajuda ema neʼebé halo sala atu arrepende an. (1 Kor 5:6, 7, 11) Porezemplu hanoin toʼok kona-ba Robert, neʼebé uluk kongregasaun hasai no liutiha tinan 16 mak fila fali. Durante tinan neʼe, ninia família halo tuir Bíblia nia mandamentu kona-ba la ransu no la kumprimentu ho ema neʼebé kongregasaun hasai. Ikusmai, kongregasaun simu fali Robert, no agora nia laʼo ba oin iha lia-loos. Saida mak book Robert atu fila fali ba kongregasaun? Nia dehan katak nia família ninia hahalok ho laran-metin mak book makaʼas nia atu troka ninia hahalok. Nia hatete: “Se haʼu-nia família ransu ho haʼu maski uitoan deʼit, karik ida-neʼe halo haʼu kontente ona no la book haʼu atu hakbesik fali ba Maromak.”
18. Kuandu Maromak fó konsellu ka dixiplina, ita presiza hatudu hahalok saida?
18 Ita barak sei la hetan dixiplina makaʼas hanesan neʼe. Maibé, kuandu Jeová fó konsellu ka dixiplina ruma mai ita, ita sei hatudu hahalok saida? Ita sei simu kedas konsellu neʼe hanesan David? Ka sai ulun-toos hanesan Liurai Saul? Hanoin-hetan katak Badain Sanan-Rai mak ita-nia Aman Jeová. Ita labele haluha katak “Jeová fó dixiplina ba ema neʼebé nia hadomi hanesan aman ida fó dixiplina ba oan neʼebé monu loos ba nia laran”. Tan neʼe, mai ita nafatin ‘simu dixiplina husi Jeová, no keta odi ninia dixiplina’.—Prov 3:11, 12.
a Jeremias 18:6: “‘Oh, umakain Israel nian, haʼu bele halo ba imi hanesan ho buat neʼebé badain sanan-rai neʼe foin halo, loos ka lae?’ Jeová hatete. ‘Haree bá! Hanesan rai-mean iha badain neʼe nia liman, imi mós iha haʼu-nia liman, oh umakain Israel nian.’”
b 2 Samuel 12:13: “David hatete ba Natan: ‘Haʼu halo sala hasoru Jeová.’ Natan hatete ba David: ‘Jeová mós fó perdua ba ó-nia sala. Ó sei la mate.’”
c 1 Samuel 15:23: “Tanba se ó kontra hasoru, neʼe hanesan ó halo hahalok matan-dook nian, no hahalok foti-an mak hanesan uza masonik no adora lulik. Tanba ó la simu Jeová nia liafuan, nia mós la simu ó atu sai liurai.”
d Naran sira laʼós naran neʼebé loos.
