1, 2. (a) Yumi mas mekim wanem bambai yumi inap pas gut wantaim Jehova? (b) Taim yumi skelim ol stori bilong Baibel long pasin ol man i mekim taim God i givim tok bilong stretim ol, dispela inap helpim yumi olsem wanem?

 “MI STAP klostu long yu na dispela i gutpela tru. God, Bikpela, yu banis tru bilong mi.” (Sng. 73:28) Wanem samting i kirapim man bilong raitim song long tok olsem em i bilip tru long God? Man bilong raitim song i bin lukim olsem ol man nogut i gat gutpela sindaun, olsem na dispela i mekim em i bel hevi. Em i tok: “Mi bin lukaut gut na bel bilong mi i stap klin, na mi no bin mekim sampela sin. Ating dispela em i lus nating, a?” (Sng. 73:2, 3, 13, 21) Tasol taim em i “go insait long haus bilong [God],” em i stretim tingting bilong em na stap klostu long God. (Sng. 73:16-18) Man bilong raitim song i kisim skul long wanpela bikpela samting: Sapos man i laik pas gut wantaim Jehova, em i mas stap long lain bilong God na redi long harim na bihainim ol gutpela tok bilong stiaim em.—Sng. 73:24.

² Yumi laik pas gut wantaim God tru, em God bilong i stap oltaim oltaim. Olsem na em i bikpela samting long yumi mas harim na bihainim tok em i givim bilong stiaim na stretim yumi. Long dispela rot, Jehova i stretim stretim yumi, olsem em i helpim yumi long bihainim ol pasin em i laikim. Long bipo, God i marimari long ol man, na sampela taim em i marimari long wanpela lain olgeta na em i opim rot long ol i ken kisim ol tok em i givim bilong stretim ol. Ol dispela stori i stap long Baibel, na ol i stap “bilong skulim yumi” na “givim tok lukaut long yumi” long dispela taim bilong las de. (Rom 15:4; 1 Kor. 10:11) Dispela stadi bai skelim sampela bilong ol dispela stori. Yumi bai kisim save long tingting bilong Jehova na olsem wanem yumi inap kisim helpim taim em i stretim stretim yumi.

3. Long Aisaia 64:8 na Jeremaia 18:1-6, Baibel i stori olsem wanem long namba bilong Jehova long bosim ol manmeri? (Lukim piksa long kirap bilong stadi.)

³ Baibel i kolim Jehova olsem man bilong wokim sospen graun, long wanem, em i gat namba bilong bosim ol manmeri na ol kantri. Aisaia 64:8 i tok: “Bikpela, yu papa bilong mipela. Yu olsem man bilong wokim sospen graun, na mipela i olsem graun yu bin kisim na wokim sospen long en. Long han bilong yu yet yu bin wokim mipela olgeta.” Man bilong wokim sospen graun inap yusim graun long wokim wanem wanem samting em i laikim. Graun i no inap tokim man long wanem samting em i mas wokim. Orait yumi ol man tu i no gat rait long tokim God long olsem wanem em i mas stretim stretim yumi, wankain olsem graun i no inap tokim man long wanem kain sospen o dis em i mas wokim.—Ritim Jeremaia 18:1-6.

4. Yu ting Jehova i fosim ol man na ol kantri long larim em i stretim stretim ol? Stori long dispela.

⁴ Jehova i bin stretim stretim lain Israel olsem man bilong wokim sospen graun i save stretim stretim graun. Tasol olsem wanem pasin bilong Jehova i no wankain long pasin bilong man? Jehova i larim ol man i stap fri long mekim disisen bilong ol yet long wanem samting ol i laik mekim. Em i no wokim sampela man i kamap gutpela man na sampela narapela i kamap man nogut. Na tu, em i no save yusim namba bilong em long fosim ol man long bihainim tok bilong em, nogat. Ol man yet i mas mekim disisen long larim Man Bilong Wokim ol, em Jehova, long stretim stretim ol.—Ritim Jeremaia 18:7-10.

5. Taim ol man i no laik larim Jehova i stretim stretim ol, em bai mekim wanem long ol?

⁵ Olsem wanem sapos wanpela man i bikhet na em i no laik larim Jehova, em Man bilong wokim sospen graun, long stretim stretim em? Olsem wanem Jehova inap yusim namba bilong em olsem man bilong wokim sospen graun? Sapos graun i no gutpela inap long man i ken wokim sospen em i laikim, orait man inap yusim dispela graun long wokim narapela samting, o em inap rausim na tromoi. Dispela samting i save kamap taim man bilong wokim sospen graun i mekim popaia taim em i stretim graun. Tasol Jehova i no save mekim popaia taim em i stretim ol man, nogat, oltaim em i save bihainim stretpela pasin. (Lo 32:4) Taim wanpela man i no larim Jehova i stretim stretim em, orait dispela man yet i gat asua. Jehova i save lukim pasin ol man i mekim taim em i stretim ol, na dispela i save stiaim em long senisim pasin em i bihainim long stretim stretim ol. Taim ol manmeri i bihainim tok bilong Jehova, em inap yusim ol long mekim kain kain wok. Olsem: Ol Kristen God i bin makim ol i stap olsem “ol sospen bilong kisim marimari,” na God i bin stretim stretim ol na ol i kamap olsem ol “sospen bilong mekim gutpela wok.” Tasol ol manmeri husat i sakim tok bilong God, ol bai kamap olsem “ol sospen bilong kisim pe nogut,” olsem ol i no inap mekim wanpela gutpela wok.—Rom 9:19-23.

6, 7. Taim Jehova i givim tok kaunsel, King Devit i mekim wanem? King Sol i mekim wanem?

 ⁶ Wanpela rot bilong Jehova long stretim stretim ol manmeri em olsem, em i save givim tok kaunsel o tok bilong stretim ol. Tingim pasin em Jehova i bihainim taim em i stretim stretim namba 1 na namba 2 king bilong Israel, em Sol na Devit. Bikpela hevi i bin painim King Devit na ol narapela, taim em i mekim pasin adaltri wantaim Batseba. Maski Devit i mekim wok king, Jehova i givim strongpela tok bilong stretim em. God i salim profet Natan i go long Devit bilong givim em strongpela tok kaunsel. (2 Sml. 12:1-12) Devit i pilim olsem wanem? Em i sori tru long rong em i bin mekim. Devit i tanim bel, olsem na God i marimari na rausim sin bilong em.—Ritim 2 Samuel 12:13.

  ⁷ King Sol i bihainim narapela pasin. Em i no putim yau long tok kaunsel. Jehova i bin salim Samuel i go bilong tokim King Sol long kilim i dai olgeta manmeri bilong lain Amalek wantaim ol animal bilong ol. Tasol Sol i no bihainim tok bilong Jehova. Em i no kilim i dai King Agak, na tu, em i no kilim i dai ol gutpela animal. Bilong wanem? Em i mekim olsem, long wanem, em i laik kisim biknem. (1 Sml. 15:1-3, 7-9, 12) Olsem na Jehova i salim Samuel i go bilong givim tok kaunsel long Sol. I stret long Sol i putim yau long tok kaunsel na larim Jehova i stretim stretim em. Tasol Sol i sakim tok na em i no laik senisim pasin bilong em. Em i ting em i gat gutpela risen, olsem na em i no bihainim tok bilong Jehova. Em i tok em i laik ofaim ol animal na givim olsem presen long Jehova. God i rausim wok king long han bilong Sol, na Sol i no pas gut moa wantaim God.—Ritim 1 Samuel 15:13-15, 20-23.

8. Yumi inap kisim wanem skul long pasin em lain Israel i mekim taim Jehova i stretim stretim ol?

⁸ Jehova i opim rot long wanpela lain olgeta long bihainim tok bilong em. Taim Jehova i kisim bek lain Israel long Isip long yia 1513 B.C.E., ol i kamap lain manmeri tru bilong Jehova. God i tok promis long stretim stretim ol. Tasol ol manmeri i no laik bai Jehova i stretim stretim ol, olsem na ol i wok yet long mekim ol pasin i nogut long ai bilong Jehova. Na tu, ol i lotuim ol god giaman bilong ol narapela lain i stap klostu long ol. Planti taim Jehova i salim ol profet i go long ol Israel bilong helpim ol long senisim pasin, tasol ol Israel i sakim tok bilong ol profet. (Jer. 35:12-15) Ol i no bihainim tok bilong Jehova, olsem na Jehova i givim strongpela tok bilong stretim ol. Ol Asiria i bagarapim hap not bilong Israel. Bihain,  ol Babilon i daunim lain Juda. Dispela stori i skulim yumi long wanpela bikpela samting. Olsem: Sapos yumi larim Jehova i stretim stretim yumi, orait dispela bai helpim tru yumi.

9, 10. Ol manmeri bilong taun Ninive i mekim wanem taim Jehova i givim tok lukaut long ol?

⁹ Na tu, Jehova i opim rot long ol manmeri bilong biktaun Ninive bilong Asiria long harim tok lukaut bilong em. Jehova i tokim Jona olsem: “Yu kirap na yu go long dispela bikpela taun Ninive, na yu givim strongpela tok long ol manmeri. Mi lukim pinis planti pasin nogut ol i mekim.” Jehova i wokim disisen pinis long bagarapim taun Ninive, long wanem, ol manmeri i mekim planti pasin nogut.—Jna. 1:1, 2; 3:1-4.

¹⁰ Taim Jona i bringim tok bilong Jehova i go long ol manmeri, ol i kirap long “bilipim dispela tok bilong God.” Olgeta i laik soim olsem ol i tanim bel, olsem na ol i no kaikai, na ol i werim ol klos bilong sori. King tu “i lusim sia king bilong en. Em i rausim gutpela bilas bilong en na putim klos bilong sori, na em i sindaun long sit bilong paia.” Lain Ninive i larim Jehova long stretim stretim ol, na ol i tanim bel. Olsem na Jehova i no bagarapim taun Ninive.—Jna. 3:5-10.

11. Yumi kisim wanem skul long pasin em Jehova i mekim long lain Israel na lain Ninive?

¹¹ Maski lain Israel i stap olsem ol manmeri tru bilong Jehova, em i givim tok bilong stretim ol tu. Lain Ninive i no stap olsem ol manmeri tru bilong God, tasol ol i larim God i stretim stretim ol. Olsem na Jehova i marimari long ol na em i no bagarapim ol. Jehova i no save mekim wantok pasin, nogat. Em i save kotim ol man long pasin ol i mekim.—Lo 10:17.

12, 13. (a) Bilong wanem pasin ol man i mekim i save kirapim God long senisim disisen bilong em? (b) Taim Jehova i senisim tingting, em i mekim wanem long Sol? Na em i mekim wanem long ol manmeri bilong Ninive?

¹² Taim ol manmeri i senisim pasin bilong ol, Jehova i redi long senisim disisen bilong em long samting em i laik mekim long ol. Olsem: Baibel i tokim yumi olsem Jehova i sori tumas, olsem em i senisim tingting bilong em na pilim olsem mobeta em i no bin makim Sol long stap king bilong Israel. (1 Sml. 15:11) Taim ol manmeri bilong Ninive i tanim bel na lusim pasin nogut bilong ol, Baibel i tok: “God i senisim tingting bilong en, na em i no mekim dispela samting nogut em i tok pinis long mekim.”—Jna. 3:10.

¹³ Pastaim Jehova i orait long Sol i mekim wok king. Tasol taim Sol i no bihainim tok, Jehova i rausim wok king long han bilong Sol. Dispela i no makim olsem Jehova yet i bin popaia taim em i makim Sol long mekim wok king, nogat. Dispela i makim olsem Sol yet i bin sakim tok bilong Jehova. Taim ol manmeri bilong Ninive i tanim bel, Jehova i senisim disisen bilong em na em i no bagarapim ol. Yumi belgut long save olsem Jehova i save mekim gut long ol manmeri, marimari, na senisim disisen bilong em taim ol manmeri i senisim pasin bilong ol!

14. (a) Long nau Jehova i save stretim stretim yumi long wanem ol rot? (b) Yumi mas mekim wanem taim God i stretim stretim yumi?

¹⁴ Long nau, Jehova i save yusim Baibel na oganaisesen bilong em long stretim stretim yumi. (2 Tim. 3:16, 17) Taim em i yusim ol dispela rot long givim tok kaunsel o tok bilong stretim yumi, orait yumi mas amamas long kisim ol dispela tok. Maski yumi stap hamas yia long tok i tru o yumi holim hamas wok insait long kongrigesen, yumi mas wok yet long bihainim tok kaunsel i kam long Jehova. Taim yumi kisim tok Jehova i givim bilong stretim stretim yumi, yumi inap bihainim ol pasin em i laikim.

15, 16. (a) Man inap pilim olsem wanem taim em i lusim ol gutpela wok insait long kongrigesen? Stori long dispela. (b) Taim yumi kisim tok bilong stretim yumi na yumi sem nogut tru, wanem samting inap helpim yumi long karim dispela hevi?

¹⁵ Olsem wanem Jehova i save stretim yumi?  Em i save skulim yumi long ol samting em i laik yumi mas mekim, na em i save stretim tingting bilong yumi. Sampela taim yumi inap kisim strongpela tok bilong stretim yumi, long wanem, yumi mekim bikpela rong. Dispela inap mekim na yumi lusim sampela wok yumi holim insait long kongrigesen. Tingim eksampel bilong wanpela elda nem bilong em Dennis. a Kongrigesen i stretim em, long wanem, em i no bihainim stretpela tingting long ol samting bilong wok bisnis. Taim ol i toksave long kongrigesen olsem Dennis i lusim wok elda bilong em, em i pilim olsem wanem? Em i tok em i pilim olsem em i nogut olgeta. Em i tok: “Inap 30 yia olgeta, mi bin mekim planti gutpela wok. Mi bin mekim wok painia oltaim, wok long Betel, kamap kongrigesen sevan, na bihain mi mekim wok elda. Na tu, mi bin mekim namba 1 tok bilong mi long kibung distrik. Wantu, olgeta dispela samting i lus.” Em i pilim sem nogut tru, na em i tingting planti olsem ating em bai i no inap long mekim gen sampela wok insait long oganaisesen.

¹⁶ Dennis i mas senisim pasin bilong em. Tasol em i sem nogut tru, olsem na wanem samting i helpim em long karim dispela hevi? Em i makim taim bilong stadi long Baibel, autim tok long olgeta taim, na em i go long olgeta miting. Em i tenkyu tru long gutpela helpim em i kisim long ol bratasista na long ol buk na nius bilong yumi. Em i tok: “Long Wastaua bilong Ogas 15, 2009, wanpela atikol i gat dispela het tok, ‘Bipo Yu Bin Mekim Wanpela Wok Long Kongrigesen? Yu Inap Mekim Gen?’ na dispela atikol i olsem wanpela pas i bekim ol beten bilong mi.” Dispela atikol i helpim Dennis long luksave olsem em inap yusim taim bilong em long strongim pasin bilong em long pas gut wantaim Jehova. Em i kisim tok bilong stretim em na dispela i helpim em, na bihain long sampela yia em i mekim gen wok olsem wanpela kongrigesen sevan.

17. Taim man i mekim rong na kongrigesen i rausim em, olsem wanem dispela inap helpim em? Stori long dispela.

¹⁷ Pasin bilong rausim man long kongrigesen em narapela rot bilong Jehova long stretim man. Long dispela rot, man i mekim rong i no inap pulim ol narapela long kongrigesen long mekim wankain rong, na tu, dispela i helpim sinman long tanim bel. (1 Kor. 5:6, 7, 11) Robert i bin raus long kongrigesen na em i stap raus inap olsem 16 yia. Insait long dispela haptaim, papamama na ol bratasusa bilong em i bihainim tok bilong Baibel na ol i no bung wantaim em o toktok wantaim em. Kongrigesen i kisim bek Robert na nau em i stap strong long tok i tru. Em i tok maski em i bin stap raus inap planti yia, wanpela samting we i helpim em long kam bek long tok i tru em olsem, famili bilong em i no bung liklik wantaim em. Em i tok sapos famili bilong em i bin bung liklik wantaim em, o ol i laik save tasol long em i stap orait o nogat, dispela bai mekim na em bai pilim olsem em i no misim ol. Dispela i kirapim laik bilong em long i go bek long Jehova na stap long lain bilong Jehova.

18. Yumi mas mekim wanem taim God i stretim stretim yumi?

¹⁸ Taim God i laik stretim yumi, em i no inap stretim yumi olgeta long wankain pasin. Tasol yumi mas tingim pasin yumi bai mekim taim God i stretim stretim yumi. Bai yumi mekim wanem? Yumi bai redi long kisim tok kaunsel olsem Devit i bin mekim? O yumi bai sakim tok kaunsel olsem Sol i bin mekim? Jehova, em Nambawan Man Bilong Wokim Sospen Graun, em i Papa bilong yumi. No ken lusim tingting olsem Jehova “i save stretim ol man em i laikim tumas, olsem ol papa i save stretim ol pikinini ol i laikim tumas.” Olsem na oltaim yu mas larim Jehova i givim tok bilong stretim yu.—Snd. 3:11, 12.