1, 2. (a) Ia aha tatou no te faatupu i te taairaa piri e o Iehova? (b) Eaha te maitai ia hiˈopoa i te mau faatiaraa Bibilia no nia i te huru o te taata a aˈohia ˈi ratou e te Atua?

 “E MEA maitai . . . ia ˈu ia haafatata ˈtu i te Atua: ua tiaturi au i te Fatu ra ia Iehova.” (Sal. 73:28) No te aha te fatu salamo i na reira ˈi no nia i to ˈna tiaturi i te Atua? Ua taiâ na mua te aau o teie fatu salamo a ite ai o ˈna i te hau o te feia ino. Ua na ô oia: “E tamâraa faufaa ore maori ta ˈu i tau aau nei, e te horoiraa hoi i tau rima i te hapa ore.” (Sal. 73:2, 3, 13, 21) A haere ai râ o ˈna i te “vahi moˈa a te Atua,” ua tia ia ˈna ia faaafaro i to ˈna huru feruriraa e ia faatupu noa i te taairaa piri e o Iehova. (Sal. 73:16-18) Ua haapii teie fatu salamo i te tahi mea faufaa mau: No te faatupu i te taairaa piri e o Iehova, e mea tia ia riro ei melo o to ˈNa nunaa, ia farii i te aˈoraa e ia faaohipa i te reira.—Sal. 73:24.

² E hinaaro tatou e fanaˈo i te taairaa piri e te Atua ora e te parau mau. Mea faufaa ïa ia farii i ta Iehova aˈoraa. Mea na reira hoi o ˈna e ohipa ˈi i nia ia tatou ia riro tatou ei taata o te faaoaoa ia ˈna! I tahito ra, ua imi Iehova i te ravea ia farii te taata e te mau nunaa i ta ˈna aˈo. Ua faatiahia to ratou hiˈoraa i roto i te Bibilia no te haapii e te aˈo ia tatou i teie mau mahana hopea nei. (Roma 15:4; Kor. 1, 10:11) E hiˈopoa anaˈe i teie mau hiˈoraa. E ite mai tatou eaha to Iehova huru e e nafea tatou e maitai ai ma te vaiiho ia ˈna ia ohipa i nia ia tatou.

3. I roto i te Isaia 64:8 e te Ieremia 18:1-6, mea nafea te tiaraa mana o Iehova i nia i te taata i te faahohoˈaraahia? (A hiˈo i te hohoˈa matamua.)

³ Te faataa ra te Isaia 64:8 i te tiaraa mana o Iehova i nia i te taata e te nunaa ma teie faahohoˈaraa: “E Iehova, o oe to matou metua; e araea matou, e na oe matou i hamani: e ohipa anaˈe matou na to rima.” Na te potera noa e faaoti e e riro mai te araea mai tera aore ra tera farii. Aita e parau ta te araea. Hoê â huru no te taata e te Atua. Aita e tiaraa to tatou no te parau i te Atua e nafea ia ohipa i nia ia tatou.—A taio i te Ieremia 18:1-6.

4. Te faahepo ra anei Iehova i te taata aore ra te nunaa ia farii ia ohipa o ˈna i nia ia ratou? No te aha?

⁴ Ua ohipa Iehova i nia ia Iseraela mai te potera i nia i te araea. Mea taa ê râ o ˈna. Ua horoa Iehova i te taata e te nunaa te hoê ô faufaa mau, te tiamâraa e maiti. Aita o ˈna i hamani ia vetahi ei taata ino e i te tahi atu ei taata maitai. Aita atoa o ˈna e faaohipa ra i to ˈna tiaraa mana no te faahepo i te taata ia auraro ia ˈna. Na te taata iho e maiti e vaiiho i te Atua Poiete ra o Iehova ia ohipa i nia ia ratou aore ra aita.—A taio i te Ieremia 18:7-10.

5. Eaha ta Iehova e rave ia patoi etaeta te taata ia ohipa o ˈna i nia ia ratou?

⁵ E nafea te Potera Rahi e faaohipa ˈi i to ˈna tiaraa mana ia patoi etaeta ˈtu te taata ia ˈna? A feruri na i te tupu mea fifi anaˈe no te potera ia hamani i te farii ta ˈna i hinaaro e te araea. E nehenehe ta ˈna e hamani i te tahi atu farii e tera araea aore ra e faarue roa ˈtu! Aita anaˈe e nehenehe e faaohipa faahou i tera araea, e pinepine e na te potera te hape. Area râ to tatou Potera, eita roa ˈtu o ˈna e hape. (Deut. 32:4) Aita anaˈe te hoê taata e hinaaro i ta Iehova tauturu, na ˈna noa iho â te hape. E faaohipa Iehova i to ˈna tiaraa mana i nia i te taata ma te faatano i ta ˈna mau haaraa ia au i ta ratou e rave. E faufaahia te taata o te farii i ta ˈna tauturu. Ei hiˈoraa, e “farii o te aroha” te mau Kerisetiano faatavaihia o tei hamanihia ei “farii no te mea maitai.” Area te feia o te patoi etaeta ˈtu i te Atua, e riro ïa ei “farii no te riri i faaauhia no te pohe.”—Roma 9:19-23.

6, 7. Ua aha te arii Davida e te arii Saula a aˈohia ˈi raua e Iehova?

 ⁶ E ohipa atoa Iehova i nia i te taata ma te aˈo ia ratou. E hiˈo anaˈe mea nafea Iehova i te faaohiparaa i to ˈna tiaraa mana i nia i na arii e piti matamua o Iseraela: Saula e Davida. Ua faaturi Davida ia Bate-seba e ua mauiui aˈera o ˈna e vetahi ê atoa. Noa ˈtu e e arii Davida, ua aˈo maitai iho â Iehova ia ˈna ma te tono i ta ˈna peropheta Natana. (Sam. 2, 12:1-12) Ua aha Davida? Ua tatarahapa mau oia e ua fanaˈo i te aroha hamani maitai o te Atua.—A taio i te Samuela 2, 12:13.

 ⁷ Area te arii Saula, aita o ˈna i farii i te aˈoraa. Na roto i te peropheta Samuela, ua aˈo tia ˈtu Iehova ia Saula ia haapohe i te mau taata atoa no Amaleka e ta ratou mau animara. Ua faaroo ore Saula i te faaueraa a te Atua. Aita o ˈna i haapohe i te arii Agaga e i te mau animara maitai roa ˈˈe. (Sam. 1, 15:1-3, 7-9, 12) E nehenehe ta Saula e faaroo i te aˈoraa e e farii ia ohipa te Potera  Rahi i nia ia ˈna. Aita râ o ˈna i hinaaro e taui. Ua manaˈo o ˈna e e tumu maitai ta ˈna no te tâuˈa ore i ta Iehova mau faaueraa. E ua parau atoa e e pûpû o ˈna i te mau animara ei tusia na Iehova. Aita Iehova i hinaaro faahou ia Saula ei arii e aita roa ˈtu Saula i fanaˈo faahou i te taairaa maitai e te Atua mau.—A taio i te Samuela 1, 15:13-15, 20-23.

8. Eaha te haapiiraa e huti mai i te huru o te nunaa Iseraela a aˈohia ˈi ratou e Iehova?

⁸ Te horoa ra Iehova i te taime i te mau nunaa atoa no te auraro ia ˈna. I muri aˈe i te faatiamâraa i te mau Iseraela mai Aiphiti mai i 1513 hou te Mesia, ua maiti Iehova ia ratou ei nunaa taa ê no ˈna. E ohipa ïa te Atua i nia ia ratou. E fanaˈoraa taa ê mau! Ua rave noa râ ratou i te mea ino i to ˈNa aro e ua haamori atoa i te mau atua o te mau nunaa tapiri. Noa ˈtu e ua tono noa Iehova i te mau peropheta no te tauturu ia ratou, aita Iseraela i faaroo. (Ier. 35:12-15) Ua aˈo maitai ïa Iehova ia ratou. Mai te farii i faaauhia no te haamouraa, ua haru to Asura i te basileia apatoerau o Iseraela e to Babulonia i te basileia apatoa o Iuda. Auê ïa haapiiraa puai mau! E faufaahia tatou i te tauturu a Iehova ia farii tatou i te reira.

9, 10. Ua aha to Nineve a faaara ˈi Iehova ia ratou?

 ⁹ Ua horoa atoa Iehova i te taime i te taata i Nineve, te oire pu o Asura, no te farii i ta ˈna mau faaararaa. Ua parau o ˈna ia Iona: “A tia, a haere i te oire rahi ra i Nineve, e tiaoro atu, ua tae roa mai to ratou ino i mua i tau aro nei.” Ua faaoti Iehova e haamou ia Nineve.—Iona 1:1, 2; 3:1-4.

¹⁰ A faaite ai râ Iona i ta te Atua poroi haavaraa, “ua faaroo atura to Nineve i te Atua, e ua poro atura i te haapaeraa maa, e ua ahu atura i te ahu oto, mai te taata rahi ra e tae noa ˈtura i tei iti.” “Ua tia aˈera [to ratou arii] mai nia mai i to ˈna terono, ua haapae atura i to ˈna iho ahu i nia ia ˈna iho, tapoˈi ihora ia ˈna iho i te ahu oto, e ua parahi ihora i nia i te rehu auahi.” Ua farii to Nineve i ta Iehova mau parau e ua tatarahapa. Aita ïa Iehova i haamou faahou ia ratou.—Iona 3:5-10.

11. Eaha ta tatou e haapii mai no nia ia Iehova i roto i ta ˈna mau haaraa i nia ia Iseraela e Nineve?

¹¹ Noa ˈtu e o Iseraela te nunaa maitihia o Iehova, e mea tia ia aˈo oia ia ratou. E ere to Nineve i te nunaa taa ê o te Atua, ua pee râ ratou i ta ˈna mau aˈoraa. Faaite ihora Iehova i to ˈna aroha hamani maitai ma te ore e haamou ia ratou. Te faaite maitai ra teie na hiˈoraa e aita Iehova to tatou Atua e haapao ra i te huru o te taata!—Deut. 10:17.

12, 13. (a) No te aha te Atua e taui ai i ta ˈna i faaoti ia taui te taata i to ratou haerea? (b) Eaha te auraa e ua tatarahapa Iehova i roto i te tupuraa o Saula e o Nineve?

¹² E taui Iehova i ta ˈna i faaoti no nia i te taata ia taui ratou i to ratou haerea. Ei hiˈoraa, ia au i te Bibilia, ua tatarahapa Iehova i te faaariiraa ia Saula. (Sam. 1, 15:11) I to te taata no Nineve tatarahaparaa e fariuraa mai i to ratou haerea ino, te na ô ra te Bibilia: “Ua tatarahapa ihora te Atua i te ino ta ˈna i parau ra e, e tuu mai i nia ia ratou, e aore aˈera oia i na reira mai.”—Iona 3:10.

¹³ Te auraa o te taˈo Hebera hurihia ei “tatarahapa,” o te tauiraa ïa i te huru aore ra i tei opuahia. I farii na Iehova ia Saula. A faaroo ore ai râ oia, aita Iehova i hinaaro faahou ia Saula ei arii. E ere no te mea ua hape Iehova a maiti ai ia ˈna ei arii. No te mea râ ua faaroo ore Saula. A tatarahapa ˈi to Nineve, taui oioi aˈera Iehova i ta ˈna i faaoti e aita o ˈna i haamou ia ratou. Mea mahanahana mau ia ite e e Atua maitai rahi o Iehova e te aroha faito ore o tei ineine i te taui i ta ˈna i faaoti ia taui te taata i to ratou haerea!

14. (a) E nafea Iehova e haapii mai ai ia tatou i teie mahana? (b) Ia aha tatou ia aˈo mai Iehova?

¹⁴ Te haapii mai nei iho â Iehova ia tatou maoti te Bibilia e ta ˈna faanahonahoraa. (Tim. 2, 3:16, 17) E farii anaˈe ïa i te aˈoraa atoa no ǒ mai i tera mau ravea. Mea maoro anei tatou i te bapetizoraahia? Mea rahi anei ta tatou hopoia i roto i te amuiraa? E tamau noa anaˈe i te farii i ta Iehova aˈoraa ia riro tatou ei farii no te mea maitai.

15, 16. (a) Eaha paha ta te hoê Kerisetiano e manaˈo ia ere o ˈna i ta ˈna mau hopoia? A faataa. (b) Eaha te tauturu mai ia faaruru i te tahi mau huru aau mai te haama ia aˈohia tatou?

¹⁵ E aˈo mai Iehova ma te haapii ia  tatou aore ra ma te faaafaro i to tatou huru feruriraa. I te tahi taime, e mea tia ia aˈohia tatou aita anaˈe tatou i rave i te mea tia. E ere atoa paha tatou i ta tatou mau hopoia. Te hiˈoraa ïa o Dennis * tei tavini na ei matahiapo. Ua rave o ˈna i te mau faaotiraa tano ore i te pae tapihooraa. Eaha to ˈna huru i te rui i faaitehia ˈi i te amuiraa e e ere faahou o ˈna i te matahiapo? Te na ô ra oia: “Ua inoino roa vau ia ˈu iho. . . . I na 30 tiahapa matahiti i mairi, mea rahi ta ˈu hopoia. E pionie tamau vau, ua tavini au i te Betela, ua faatoroahia vau ei tavini tauturu e ei matahiapo. No horoa noa ˈtura vau i ta ˈu oreroraa parau matamua i te tairururaa mataeinaa. I tera noa taime . . . aita hoê aˈe faahou.” Ua haama o ˈna e ua manaˈo e mea faufaa ore o ˈna i teie nei i roto i te faanahonahoraa.

¹⁶ E mea tia ia taui Dennis i to ˈna haerea. Eaha râ tei tauturu ia ˈna ia faaruru i te haama? Ua haapii oia i te Bibilia e ua haere tamau i roto i te pororaa e i te mau putuputuraa atoa. Ua mauruuru roa ˈtoa oia no te mau faaitoitoraa no ǒ mai i te mau taeae e tuahine e i ta tatou mau papai. No nia i te tumu parau “E nehenehe anei oe e tavini faahou mai na mua ˈˈe ra?” i roto i Te Pare Tiairaa o te 1 no Atete 2009, ua na ô Dennis: “Ua riro [te reira] ei rata tei papaihia no ˈu no te pahono i ta ˈu mau pure.” Ua taa ia Dennis e e nehenehe ta ˈna e faaohipa i to ˈna taime ia piri atu â to ˈna mau taairaa e o Iehova. Ua faufaahia o ˈna i te aˈo ta ˈna i fanaˈo e tau matahiti i muri aˈe ua riro faahou mai nei ei tavini tauturu.

17. E nafea te tiavaruraa e tauturu ai i te hoê Kerisetiano tei hara? A faataa.

¹⁷ O te tiavaruraa te tahi atu ravea e aˈo mai ai Iehova. E paruru te reira i te amuiraa i te haerea viivii o te taata i hara e e tauturu atoa i tera taata ia tatarahapa. (Kor. 1, 5:6, 7, 11) Fatata 16 matahiti to Robert tiavaruraahia. I tera roaraa, ua pee to ˈna na metua, to ˈna mau tuaane e to ˈna teina i te faaueraa Bibilia e ua faaea ratou i te amui e i te aroha ˈtu ia ˈna. Tau matahiti i teie nei to Robert hoˈiraa mai i roto i te faanahonahoraa e te haere nei o ˈna i mua i te pae varua. Na te haerea o to ˈna utuafare i turai ia ˈna ia hoˈi mai i muri aˈe e rave rahi matahiti. Ua parau Robert e e mauruuru roa o ˈna ahani to ˈna utuafare i amui atu ia ˈna maa taime iti noa aore ra i ani noa ˈtu i to ˈna huru. Ua tauturu te reira ia ˈna ia hinaaro e hoˈi ia Iehova ra e i to ˈNa ra nunaa.

18. Ia riro tatou mai teihea huru araea i roto i te rima o te Potera Rahi?

¹⁸ Eita e titauhia ia aˈohia tatou mai tera. Teie râ, e riro tatou mai teihea huru araea i roto i te rima o te Potera Rahi? Eaha to tatou huru ia aˈohia mai tatou? E riro anei tatou mai ia Davida aore ra mai ia Saula? O to tatou Metua te Potera Rahi. Eiaha roa ˈtu e haamoe e “o tei herehia e Iehova ra, o ta ˈna ïa e aˈo mai, mai te metua e aˈo i te tamaiti ta ˈna e here ra.” Eiaha ïa e ‘inoino i te aˈo a Iehova e e fatimauu i ta ˈna aˈoraa mai.’—Mas. 3:11, 12.