Níhi ngɛ nɛ wa ma nyɛ maa da nɔ kɛ tsɔɔ kaa mɛ ji Mawu bɔfo ɔmɛ. Mɛni níhi nɛ tsɔɔ jã?

Wa kaneɔ ngɛ 1 Mose 6:2 ke: “Mawu binyumu ɔmɛ ekomɛ na kaa yi nɛ ɔmɛ a he ngɛ fɛu; lɔɔ he ɔ, a ngɔ a ti ni nɛmɛ nɛ a suɔ.”

Ngɛ blema Hebri Ngmami ɔmɛ a mi ɔ, munyu nɛ ji “Mawu binyumu ɔmɛ” kɛ “Mawu bimɛ ɔmɛ” ɔ je kpo ngɛ 1 Mose 6:2, 4; Hiob 1:6; 2:1; 38:7; kɛ La 89:6. Mɛni ngmami nɛ ɔmɛ tsɔɔ kɛ kɔ “Mawu bimɛ” nɛ ɔmɛ a he?

E ngɛ heii kaa “Mawu ɔ binyumu ɔmɛ” nɛ wa kane a he ní ngɛ Hiob 1:6 ji Mawu bɔfohi nɛ a ya bua a he nya ngɛ Mawu hɛ mi. Satan nɛ e “ya kpa je ɔ mi tsuo kɛ ya kɛ ba” a hu piɛɛ bɔfo nɛ ɔmɛ a he. (Hiob 1:7; 2:1, 2) Jã nɔuu nɛ wa kaneɔ ngɛ Hiob 38:4-7 ɔ kaa ‘Mawu bimɛ ɔmɛ hwɔ lele’ benɛ Mawu ‘to je ɔ kɔ nya tɛ ɔ.’ Wa ma nyɛ ma de ke mɛ ji Mawu bɔfohi, ejakaa jamɛ a be ɔ mi ɔ, a bɔɛ adesahi lolo. Nɔ́ nɛ munyu nɛ ji, “hiɔwe nibɔ ní ɔmɛ” nɛ a kɛ tsu ní ngɛ La 89:6 tsɔɔ tutuutu ngɛ blema Hebri Ngmami ɔ mi ji, “Mawu binyumu ɔmɛ.” E ngɛ heii kaa jamɛ a munyu ɔ kɔɔ Mawu bɔfohi a he, se pi adesahi.

Ke jã a, lɛɛ mɛnɔmɛ ji “Mawu ɔ bimɛ ɔmɛ” nɛ a tu a he munyu ngɛ 1 Mose 6:2, 4 ɔ? Ngɛ anɔkualehi nɛ Baiblo ɔ tu he munyu kɛ sɛ hlami ɔ nya a, nile ngɛ mi kaa wa maa nya si kaa nihi nɛ Baiblo ɔ ngɛ a he munyu tue ɔ ji Mawu bɔfohi nɛ a ba zugba a nɔ ɔ.

Ni komɛ he we yi kaa bɔfohi kɛ nimli ma ná bɔmi. Munyu nɛ Yesu tu ngɛ Mateo 22:30 ɔ tsɔɔ kaa a sɛ we gba si himi mi ngɛ hiɔwe, nɛ a kɛ nihi hu ná we bɔmi ngɛ lejɛ ɔ. Se kɛ̃ ɔ, bɔfohi tsake a he kɛ pee adesahi nɛ a kɛ nihi po ye ní nɛ a nu ní. (1 Mose 18:1-8; 19:1-3) Enɛ ɔ he ɔ, wa ma nyɛ maa ma nya si kaa ke bɔfohi tsake a he kɛ pee adesahi ɔ, lɛɛ a kɛ yihi hu ma nyɛ ma ná bɔmi.

Níhi ngɛ Baiblo ɔ mi nɛ wa ma nyɛ maa da nɔ kɛ he ye kaa bɔfo komɛ pee jã. Juda 6, 7 ɔ ngɔ yayami nɛ Sodombi nɛ a ya nyɛɛ akɔnɔ yayahi a se ɔ pee ɔ kɛ to “Mawu bɔfohi nɛ hɛɛ blɔ nya sa a, nɛ pee se ɔ, a tsɔ atuã kɛ je mɛ nitsɛmɛ a si himi he ɔ” he. Jamɛ a bɔfo ɔmɛ kɛ Sodombi ɔmɛ tsuo “fiɛ nyumu kɛ yo yakayaka fiɛmi, nɛ a ya nyɛɛ akɔnɔ yayahi a se.” Ngmami nɛ ngɛ 1 Petro 3:19, 20 ɔ ngɔ bɔfohi nɛ a tue gbo ɔ kɛ to ‘Noa be ɔ’ he. (2 Pet. 2:4, 5) Enɛ ɔ he ɔ, waa kɛ nɔ́ nɛ bɔfo tue gboli ɔmɛ pee ngɛ Noa be ɔ mi ɔ ma nyɛ maa to yayami nɛ Sodom kɛ Gomorabi ɔmɛ pee ɔ he.

Ngɛ nɔ́ nɛ wa susu he nɛ ɔ nya a, wa ma nyɛ maa ma nya si kaa “Mawu binyumu ɔmɛ” nɛ a tu a he munyu ngɛ 1 Mose 6:2, 4 ɔ, ji Mawu bɔfohi nɛ a tsake a he nɛ a kɛ yihi ba ná bɔmi.

Bɔfo Petro tsɔɔ kaa mumi nɛ ɔmɛ ji bɔfohi nɛ ‘bui Mawu tue, be mi nɛ Mawu to e tsui si wawɛɛ ngɛ Noa be ɔ mi ɔ’ nɛ. (1 Pet. 3:20) E ngɛ heii kaa hiɔwe bɔfohi nɛ a ya piɛɛ Satan he kɛ tsɔ atua a, a he munyu nɛ Petro ngɛ tue ɔ nɛ. Yuda wo hiɔwe bɔfohi nɛ “hɛɛ blɔ nya sa a, nɛ pee se ɔ, a tsɔ atua kɛ je mɛ nitsɛmɛ a si himi he ɔ” ta. E tsɔɔ kaa ‘a kɛ kɔsɔkɔsɔ fi mɛ, nɛ Mawu ngɔ mɛ ngɔ to diblii nɛ mi ti mi, nɛ lejɛ ɔ nɛ a maa hi hluu kɛ ya si ligbi ngua a maa su, nɛ a maa kojo mɛ.’​—Yuda 6.

Mɛni blɔ nɔ hiɔwe bɔfohi gu kɛ gbo tue ngɛ Noa be ɔ mi? Loko Nyu Afua a maa ba a, bɔfo yaya nɛ ɔmɛ tsake a he kɛ pee adesahi. Mawu tui e yi mi kaa bɔfohi nɛ a pee jã. (1 Mose 6:2, 4) Jehanɛ se hu ɔ, a kɛ yihi ba ná bɔmi. Jã nɛ a pee ɔ hu hí kulaa. Mawu bɔɛ bɔfohi kaa a kɛ yihi nɛ ná bɔmi. (1 Mose 5:2) Mawu ma kpata bɔfo yayamihi nɛ a gbo tue nɛ ɔ a hɛ mi ngɛ be nɛ sa mi. Kaa bɔnɛ Yuda tsɔɔ, amlɔ nɛ ɔ lɛɛ ‘Mawu ngɔ mɛ ngɔ to diblii nɛ mi ti mi.’ Ke wa ma de ngɛ blɔ ko nɔ ɔ, Mawu wo mɛ tsu.

Mɛni be Yesu ya fiɛɛ kɛ ha ‘mumi nɛ ɔmɛ,’ nɛ mɛni blɔ nɔ e gu kɛ pee jã? Petro ngma kaa Yesu pee jã benɛ a ‘ha nɛ e ba wami mi kaa mumi ɔ’ se. (1 Pet. 3:18, 19) Mo kadi hu kaa Petro de ke Yesu “fiɛɛ.” Bɔnɛ Petro ngma sane ɔ ha a tsɔɔ kaa Yesu fiɛɛ kɛ ha mumi ɔmɛ loko lɛ Petro ɔ e ngma e kekleekle womi ɔ. Ke jã a, lɛɛ e ma nyɛ maa pee kaa benɛ a tle Yesu si ɔ se nɛ e jaje tue gblami nɛ e da blɔ kaa a kɛ ba bɔfo yayami ɔmɛ a nɔ ɔ kɛ tsɔɔ mɛ ɔ nɛ. Tsa pi sɛ gbi nɛ haa nɔ hɛ kɛ nɔ fɔmi nɛ Yesu fiɛɛ kɛ tsɔɔ mɛ. Kojomi sɛ gbi nɛ Yesu fiɛɛ kɛ tsɔɔ mɛ ɔ nɛ. (Yona 1:1, 2) Yesu je hemi kɛ yemi kpo nɛ e ye anɔkuale kɛ ya su gbenɔ mi nɛ Mawu tle lɛ si kɛ tsɔɔ kaa Abosiami be e nɔ he wami. Enɛ ɔ he ɔ, Yesu ngɛ nɔ́ nɛ e maa da nɔ kɛ bu bɔfo yayami ɔmɛ fɔ.​—Yoh. 14:30; 16:8-11.

Hwɔɔ se ɔ, Yesu maa fi Satan kɛ jamɛ a bɔfo yayami ɔmɛ tsuo nɛ e kɛ mɛ maa wo muɔ voo ɔ mi. (Luka 8:30, 31; Kpoj. 20:1-3) Amlɔ nɛ ɔ lɛɛ a ngɔ bɔfo yayami nɛ ɔmɛ kɛ to diblii nɛ mi ti mi, nɛ nyagbe ɔ, a ma kpata a hɛ mi kulaa.​—Kpoj. 20:7-10.