Igwa nin marahay na dahilan na maniwala na an mga tataramon na ini nanunungod sa espiritung mga aki nin Diyos. Pero ano an ebidensiya?

An inot na bersikulo nagsasabi: “Nagpuon na marisa kan mga aki kan tunay na Diyos an mga aking babayi nin mga tawo, na sinda magagayon; asin nagkua sinda nin magigin mga agom ninda, arin na baga, an gabos nindang napili.”—Gen. 6:2, NW.

Sa Hebreong Kasuratan, an mga tataramon na “mga aki kan tunay na Diyos” asin ‘mga aki nin Diyos’ naglataw sa Genesis 6:2, 4 (NW); Job 1:6; 2:1; 38:7; asin Salmo 89:6. Ano an ipinaparisa kan mga tekstong iyan dapit sa ‘mga aking ini nin Diyos’?

Malinaw na ‘an mga aki nin Diyos’ na mababasa niyato sa Job 1:6 espiritung mga linalang na nagkatiripon sa atubangan nin Diyos. Saro sa sainda si Satanas, na ‘naglilibot sa daga.’ (Job 1:7; 2:1, 2) Siring man, mababasa niyato sa Job 38:4-7 an dapit sa ‘mga aki nin Diyos’ na ‘nag-uurugma’ kan an Diyos ‘nagbugtak kan gapong pangeskina,’ o pundasyon, kan daga. Siguradong sinda mga anghel na aki nin Diyos, huling dai pa kaidto linalalang an mga tawo. ‘An mga aki nin Diyos’ na sinambit sa Job 1:6 siyertong langitnon na mga linalang na kaibanan nin Diyos, bakong mga tawo.

Kun siring, sairisay an “mga aki kan tunay na Diyos” na sinambit sa Genesis 6:2, 4 (NW)? Kauyon kan nainot na mga katunayan sa Bibliya, rasonable sanang magkongklusyon na sinda espiritung mga aki nin Diyos na nagbaba sa daga.

Dipisil para sa iba na akuon an posibilidad na an mga anghel magmawot nin seksuwal na relasyon. An mga tataramon ni Jesus sa Mateo 22:30 nagpapahiling na mayo nin pag-aguman asin seksuwal na relasyon sa langit. Alagad, may pagkakataon na an mga anghel nagsulot nin pisikal na hawak, na nakaibanan pa ngani nin mga tawo sa pagkakan asin pag-inom. (Gen. 18:1-8; 19:1-3) Kun siring, rasonable sanang magkongklusyon na paagi sa pagsulot nin pisikal na hawak, puwede sindang makidurog sa mga babayi.

Igwa nin Makakasuratan na mga basehan para maniwala na may mga anghel na naggibo kaiyan. Sa Judas 6, 7 (NW), an kasalan kan mga taga Sodoma, na nagpadara sa maraot na hurot nin laman, ikinumparar sa “mga anghel na dai nagdanay sa dati nindang puwesto kundi nagbaya sa saindang sadiring tamang irukan.” An pagkakaagid kan mga anghel na idto asin kan mga taga Sodoma iyo na sinda ‘nagpangana sa pakikisaro asin nagpadara sa laman para sa paggamit na bakong natural.’ Sa 1 Pedro 3:19, 20, an masumbikal na mga anghel ikinokonektar man sa ‘mga aldaw ni Noe.’ (2 Ped. 2:4, 5) Kaya, an ginibo kan mga ini kan panahon ni Noe maikukumparar sa kasalan kan mga taga Sodoma asin Gomora.

An siring na kongklusyon rasonable kun naniniwala kita na an “mga aki kan tunay na Diyos” na sinambit sa Genesis 6:2, 4 (NW), mga anghel na nagsulot nin pisikal na hawak asin naggibo nin imoralidad sa mga babayi.

Sinabi ni apostol Pedro na an mga espiritung ini iyo idtong nagin ‘mga masumbikal, kan an pakatios nin Diyos naghalat kan mga aldaw ni Noe.’ (1 Ped. 3:20) Malinaw na an pinanunungdan ni Pedro iyo an espiritung mga linalang na uminiba ki Satanas sa pagrebelde. Sinambit ni Judas an mga anghel na ‘dai nag-ingat kan saindang sadiring katungdan, kundi nagbaya kan saindang inuuntukan,’ na nagsasabing ‘ibinugtak [sinda nin Diyos] sa daing tapos na pagkagapos sa irarom nin kadikluman sagkod sa paghukom sa dakulang aldaw.’—Jud. 6.

Sa anong paagi na an espiritung mga linalang nagin masumbikal kan panahon ni Noe? Bago kan Delubyo, an maraot na espiritung mga linalang na ini nagsulot nin pisikal na hawak—na bakong katuyuhan nin Diyos para sa sainda. (Gen. 6:2, 4) Apuwera kaini, an mga anghel na iyan na nakidurog sa mga babayi naggibo nin sarong bagay na sala nanggad. Dai sinda linalang nin Diyos para makidurog sa mga babayi. (Gen. 5:2) An maraot asin masumbikal na mga anghel na ini lalaglagon sa itinalaan na panahon nin Diyos. Sa ngunyan, arog kan sinabi ni Judas, yaon sinda sa ‘irarom nin kadikluman’—sarong espirituwal na bilangguan, sabi ngani.

Kasuarin asin paano naghulit si Jesus sa ‘mga espiritung ini na nasa bilangguan’? Isinurat ni Pedro na nangyari ini pagkatapos na si Jesus “binuhay sa espiritu.” (1 Ped. 3:18, 19) Tandaan man na sinabi ni Pedro na si Jesus “naghulit.” An pagkasabi ni Pedro sa paaging garo baga nangyari na nagpaparisa na an paghuhulit nangyari bago ginibo ni Pedro an inot niyang surat. Kun siring, minalataw na pagkabuhay liwat ni Jesus, sinabi niya sa maraot na mga espiritu an dapit sa biyong makatanusan na padusa na maninigo sa sainda. Iyan bakong paghuhulit na nagtatao nin ano man na paglaom sa sainda. Imbes, paghuhulit iyan nin paghukom. (Jon. 1:1, 2) Kan ipinahiling ni Jesus an saiyang pagtubod asin kaimbudan sagkod sa kagadanan dangan binuhay siya liwat—na nagpapatunay na mayo nanggad nin kapangyarihan sa saiya an Diyablo—nagkaigwa si Jesus nin basehan sa pagpahayag kan siring na paghukom.—Juan 14:30; 16:8-11.

Sa maabot na panahon, gagapuson ni Jesus asin iaapon si Satanas sa bûngaw pati an mga anghel na idto. (Luc. 8:30, 31; Kap. 20:1-3) Sagkod na dai pa nag-aabot iyan, an masumbikal na mga espiritung ini yaon sa irarom nin makuring espirituwal na kadikluman, asin sigurado an pangultimong kalaglagan ninda.—Kap. 20:7-10.