AMEPUSHO UKUFUMA KU BABELENGA

Bushe “abana ba kwa Lesa wa cine” abo Ukutendeka 6:2, 4 kwalandapo ukuti baikeleko ilyo Ilyeshi lishilabako, ni bani?

▪ Ubushininkisho bulanga ukuti aya mashiwi yalanda pa bana ba kwa Lesa aba ku mupashi. Bushininkisho nshi ubo bwine?

Amashiwi ya kubalilapo muli ifi fikomo yatila: “Abana ba kwa Lesa wa cine bamwene abana banakashi ba bantu, ukuti baali abayemba; kabili baibuulile abanakashi no kuupa onse uo batemwa.”—Ukute. 6:2.

Mu Malembo ya ciHebere, amashiwi ya kutila “abana baume ba kwa Lesa wa cine” na ya kuti “abana ba kwa Lesa wa cine” yasangwa pa Ukutendeka 6:2, 4; Yobo 1:6; 2:1; 38:7; na pa Amalumbo 89:6. Bushe aya malembo yalanga ukuti “abana ba kwa Lesa” ni bani?

“Abana baume ba kwa Lesa wa cine” abo Yobo 1:6 ilandapo, bana ba ku mupashi abalongene kuli Lesa. Pali aba paali na Satana, uwafumine mu “kusabanta pe sonde.” (Yobo 1:7; 2:1, 2) Na Yobo 38:4-7 na yo ilanda pa “bana baume aba kwa Lesa abaweleshe” ilyo Lesa “abikile ilibwe lye sonde ilya pa koona.” Aba bana baume, bafwile bali ni bamalaika, pantu pali ilya nshita ninshi abantunse tabalabumbwa. Ukwabula no kutwishika, “abana baume ba kwa Lesa” abalandwapo pa Amalumbo 89:6, ni bamalaika ababa ku muulu na Lesa, te bantunse iyo.

Nomba bushe “abana ba kwa Lesa wa cine” abalandwapo pa Ukutendeka 6:2, 4, ni bani? Ukulingana ne fishinka fya mu Baibolo ifi twalandapo, kuti twatila aba bana baume ni bamalaika ba kwa Lesa abaishile pe sonde.

Abantu bamo balafilwa ukusumina ukuti bamalaika kuti bafwaya ukuupa. Amashiwi Yesu alandile ayaba pali Mateo 22:30 yalanga ukuti ku muulu takwaba ukuupa. Lelo limo bamalaika balefwala imibili ya buntunse, ica kuti balelya no kunwena pamo na bantu. (Ukute. 18:1-8; 19:1-3) Kanshi, nga ca kutila balefwala imibili ya buntunse, ninshi kuti bapanga ne cupo na banakashi.

Kwaliba ubushininkisho bwa mu Baibolo ubulangilila ukuti bamalaika bamo balicitile ifi fine. Yuda icikomo 6 na 7 ilinganya ulubembu lwacitile abaume ba mu Sodomu abakonkelele bumubili no kucita ifye shiku, kuli “bamalaika abashasungile ififulo ifyo bakwete pa kubalilapo lelo abashile ififulo fyabo ifyabalinga.” Bamalaika na bena Sodomu “bacitile sana ubulalelale kabili baile balekonka bumubili no kucita ifye shiku.” Ilyashi na limbi ilyaba nge li, lyaba pali 1 Petro 3:19, 20 lilanda pali bamalaika abapondweke “mu nshiku sha kwa Noa.” (2 Pet. 2:4, 5) E ico kanshi, ifyacitile bamalaika abapondweke mu nshiku sha kwa Noa fyalipalana no lubembu ulwacitile abena Sodomu na bena Gomora.

Kanshi, kuti caba fye bwino ukusondwelela ukuti “abana ba kwa Lesa wa cine” abalandwapo pa Ukutendeka 6:2, 4 ni bamalaika abafwele imibili ya buntunse no kwisacita ubulalelale na banakashi.

Bushe amashiwi yaba pali 1 Petro 3:19 ayatila Yesu “aile no kubila imbila ku mipashi iyaba mu cifungo,” yalola mwi?

▪ Umutumwa Petro alondolwele iyi mipashi ukuti ni ilya “iishakwete icumfwila mu nshiku sha kwa Noa, lilya Lesa atekele umutima.” (1 Pet. 3:20) Ukwabula no kutwishika, Petro alelanda pali bamalaika abakonkele Satana no kupondokela Lesa. Ilyo Yuda alandile pali bamalaika “abashasungile ififulo ifyo bakwete pa kubalilapo lelo abashile ififulo fyabo ifyabalinga,” atile Lesa “abasungila mu cifungo ca pe umwafiita fititi ukulolela ubupingushi pa bushiku bukalamba.”—Yuda 6.

Cinshi bamalaika mu nshiku sha kwa Noa bacitile ku kulanga ukuti tabakwete icumfwila? Ilyo Ilyeshi lishilaisa, aba bamalaika babifi bafwele imibili ya buntunse, icintu ico Lesa ashabebele ukucita. (Ukute. 6:2, 4) Na kabili, aba bamalaika abacitile ubupulumushi bacitile icintu icabipa nga nshi pantu Lesa tabapangile ukuti balelaala na banakashi. (Ukute. 5:2) Aba bamalaika babifi kabili bacintomfwa bakonaulwa pa nshita iyo Lesa umwine abika. Nga fintu Yuda alanda, aba bamalaika pali ino nshita baba “umwafiita fititi,” e kutila baba kwati baba mu cifungo.

Ni lilali Yesu abilile imbila ku “mipashi iyaba mu cifungo” kabili bukombe nshi abilile? Petro atile Yesu abilile kuli iyi mipashi ilyo “abuushiwe no mubili wa ku muulu.” (1 Pet. 3:18, 19) Na kabili, amashiwi Petro alandile ukuti Yesu “aile no kubila,” yalangilila ukuti ilyo Petro alelemba kalata yakwe iya kubalilapo ninshi Yesu alibila kale imbila ku mipashi. Cimoneka kwati ilyo Yesu abuushiwe, e lyo abilile kuli iyi mipashi yabipa ukuti yali no kukandwa. Imbila abilile tayali ni mbila ya kuti ifintu fikawama kuli iyi mipashi, lelo yali ni mbila ya bupingushi. (Yona 1:1, 2) Apo Yesu alitwalilile uwa cishinka mpaka ne mfwa kabili alibuushiwe, calangilile ukuti Satana takwete amaka pali ena, kanshi alilingile ukubila ubu bukombe bwa bupingushi.—Yoh. 14:30; 16:8-11.

Ku ntanshi, Yesu ali no kukaka Satana na aba bamalaika no kubapoosa mu cilindi icabula impela. (Luka 8:30, 31; Ukus. 20:1-3) Lelo pali ino nshita, aba bamalaika bacipondoka baba umwafiita fititi, umwaba kwati ni mu cifungo, kabili nomba line bali no konaulwa umuyayaya.—Ukus. 20:7-10.