Imenyene nti ntak ndinịm ke ikọ emi aban̄a mme angel. Nso idi mme ntak emi?

Genesis 6:2 ọdọhọ ete: “Nditọiren ata Abasi ẹtọn̄ọ ndikụt nditọiban owo, nte mmọ ẹyede; ndien mmọ ẹda kpukpru iban oro mmọ ẹmekde ẹdọ.”

Ke N̄wed Abasi Usem Hebrew, ikọ oro “nditọiren ata Abasi” ye “nditọ Abasi” ẹdu ke Genesis 6:2, 4; Job 1:6; 2:1; 38:7; ye Psalm 89:6. Nso ke mme itien̄wed oro ẹtịn̄ ẹban̄a “nditọ Abasi”?

Ana in̄wan̄-in̄wan̄ ke “nditọ ata Abasi” oro ikotde iban̄a ke Job 1:6 ẹkedi mme angel emi ẹkesopde idem ke iso Abasi. Satan, emi ‘okoyode ke isọn̄’ ama esịne ke otu mmọ. (Job 1:7; 2:1, 2) Kpasụk ntre, Job 38:4-7 etịn̄ aban̄a “nditọ Abasi” emi ‘ẹkesiode n̄kpo’ ke ini ‘Abasi ekesịnde itiat inụk’ isọn̄. Anaedi mmọ ẹkedi mme angel sia Abasi ikobotke owo kan̄a. “Nditọ Abasi” oro ẹtịn̄de ẹban̄a ke Psalm 89:6 idịghe mme owo, edi ẹdi mme angel emi ẹdude ke heaven ye Abasi.

Mmanie ndien ẹdi “nditọiren ata Abasi” oro ẹtịn̄de ẹban̄a ke Genesis 6:2, 4? Nte ekemde ye mme itie N̄wed Abasi oro inemede mi, enen ndidọhọ ke Genesis 6:2, 4 aban̄a mme angel emi ẹkedide isọn̄.

Ekeme ndisọn̄ ndusụk owo ndinịm ke ekeme ndidọn̄ mme angel ndinyene ebuana idan̄. Ikọ Jesus ke Matthew 22:30 owụt ke owo idọhọ ndọ inyụn̄ inyeneke ebuana idan̄ ke heaven. Edi ndusụk ini mme angel ẹma ẹsimen idem owo ẹsịne, ẹkam ẹdia udia ẹnyụn̄ ẹn̄wọn̄ n̄kpọ ye mme owo. (Gen. 18:1-8; 19:1-3) Mmọdo, enen ndidọhọ ke ini mmọ ẹmende idem owo ẹsịne ntem, ke mmọ ẹkeme ndinyene ebuana ye iban.

Bible owụt ke ndusụk angel ẹma ẹnam oro. Jude 6, 7 emen idiọkn̄kpọ mbon Sodom, emi ẹkewọn̄ọrede ẹtiene obụkidem ke ndinam ido eke mîkemke ye obot, odomo ye idiọkn̄kpọ “mme angel oro mîkomụmke akpa itie mmọ ikama edi ẹkpọn̄de nnennen ebietidụn̄ mmọ.” Mbon Sodom “ẹma [ẹnam] use ẹbe nde kpa nte [mme angel oro] ẹkenamde ẹnyụn̄ ẹwọn̄ọde ẹtiene obụkidem ndinam ido eke mîkemke ye obot.” Ukem mbụk oro ke 1 Peter 3:19, 20 ọdọhọ ke mme angel oro ẹkesọn̄de ibuot ẹkedu ke “eyo Noah.” (2 Pet. 2:4, 5) Ke ntem, se mme angel oro ẹkesọn̄de ibuot ke eyo Noah ẹkenamde edi ukem ye idiọkn̄kpọ mbon Sodom ye Gomorrah.

Se itịn̄de emi esịne ifiọk ke ini ifiọkde ke “nditọiren ata Abasi” oro ẹtịn̄de ẹban̄a ke Genesis 6:2, 4 ẹdi mme angel emi ẹkemende idem owo ẹsịne ẹnyụn̄ ẹsụhọrede ẹdinam oburobụt ido ye iban.

Apostle Peter ọdọhọ ke mme spirit emi ẹdi mbon “emi ẹketụtde utọn̄ ini kiet ko ke ini ime Abasi ekebetde ke eyo Noah.” (1 Pet. 3:20) Ana in̄wan̄-in̄wan̄ ke Peter eketịn̄ aban̄a mme angel emi ẹkemekde nditiene Satan nsọn̄ ibuot. Jude etịn̄ aban̄a mme angel emi “mîkomụmke akpa itie mmọ ikama edi ẹkpọn̄de nnennen ebietidụn̄ mmọ,” onyụn̄ ọdọhọ ke Abasi “ama ọkọbi mmọ ke nsinsi n̄kpọkọbi enịm ke makmak ekịm ebet ubiereikpe akwa usen oro.”—Jude 6.

Didie ke mme angel ẹkesọn̄ ibuot ke eyo Noah? Mbemiso Ukwọ, ndiọi angel emi ẹma ẹmen idem owo ẹsịne—kpa n̄kpọ emi Abasi mîkoyomke mmọ ẹnam. (Gen. 6:2, 4) Akan oro, mme angel oro ẹkenyenede ebuana ye iban do ẹkenam se mîkemke ye obot. Abasi ikobotke mme angel man ẹsinyene ebuana ye iban. (Gen. 5:2) Ẹyesobo ndiọi angel oro ẹkesọn̄de ibuot do ke ekemini Abasi. Kan̄a ke emi, nte Jude ọdọhọde, mmọ ẹdu ke “makmak ekịm”—kpa ndamban̄a ufọk-n̄kpọkọbi.

Ini ewe ke Jesus ọkọkwọrọ ikọ ọnọ ‘mme spirit ke ufọk-n̄kpọkọbi,’ ndien didie ke enye akanam oro? Peter ọdọhọ ke ekedi ke ẹma “[ẹkenam] enye odu uwem ke spirit.” (1 Pet. 3:18, 19) Fiọk n̄ko ete ke Peter ọdọhọ ke Jesus “ọkọkwọrọ ikọ.” Peter nditịn̄ ke usụn̄ emi owụtde ke ekedi ke ini edem owụt ke Jesus ama ọkwọrọ ikọ emi mbemiso Peter ekewetde akpa leta esie. Do, etie nte ke esisịt ini ke Jesus ama ekeset, ke enye ama etịn̄ ufen oro ndiọi angel emi ẹdotde ndibọ ọnọ mmọ. Jesus ikọnọhọ mmọ idotenyịn. Edi ọkọkwọrọ ubiomikpe. (Jonah 1:1, 2) Ke Jesus ama ekenyene mbuọtidem onyụn̄ ọsọn̄ọ ada tutu esịm n̄kpa ẹnyụn̄ ẹnam enye eset—emi okowụtde ke Devil inyeneke odudu ke idemesie—enye Jesus ama enyene ntak nditan̄a orụk ubiomikpe oro.—John 14:30; 16:8-11.

Ke ini iso, Jesus oyomụm Satan ye mme angel oro ọkọbi ke editụn̄ọ ukpe. (Luke 8:30, 31; Edi. 20:1-3) Tutu esịm ini oro, mme angel oro ẹkesọn̄de ibuot ẹdisụk ẹdu ke makmak ekịm eke spirit, ndien owo iditreke-tre ndisobo mmọ taktak.—Edi. 20:7-10.