Oĩ pruéva ohechaukáva koʼãva haʼe hague ánhel. ¿Mbaʼe pruévapa hína umíva?

Génesis 6:2 heʼi: “Ha ñande Ruete raʼykuéra ohechávo kuimbaʼe rajykuéra iporãitereiha, oiporavo ha oguenohẽ ijapytégui hembirekokuerarã umi oipotavévape”.

Escrituras Hebréaspe jatopa heta vése oñeñeʼẽha “ñande Ruete raʼykuéra” rehe. Por ehémplo: Génesis 6:2, 4 (ÑÑB); Job 1:6 (ÑÑB); Job 2:1; 38:7 (ÑÑB); Salmo 89:6 (NM). ¿Mbaʼépa heʼi koʼã téxto “ñande Ruete raʼykuéra” rehe?

Job 1:6 heʼívo “ñande Ruete raʼykuéra”, oñeʼẽ hína umi ánhel oñembyaty vaʼekuére Ñandejára renondépe, umíva apytépe Satanás. Haʼe oiko vaʼekue okorre ko yvy apére (Job 1:7; 2:1, 2). Upéicha avei, Job 38:4-7 omombeʼu ‘ovyʼa joa hague ñande Ruete raʼykuéra’ Jehová omoĩrõ guare ko yvýpe “ipyenda tenondeguáva” (ÑÑB). Koʼã Ñandejára raʼykuéra oiméne raʼe umi ánhel, ndojejapóigui gueteri upérõ yvypórape. Ha umi “Ñandejára raʼykuéra” oñeñeʼẽha Salmo 89:6-pe, haʼe avei umi ánhel oĩva yvágape Jehová ykére, ndahaʼéi yvypóra ñandeichagua.

Upéicharõ, ¿mávapa rakaʼe umi “ñande Ruete raʼykuéra” oñeñeʼẽha Génesis 6:2, 4-pe? Ñahesaʼỹijo rire mbaʼépa heʼi la Biblia ikatu jaʼe koʼãva haʼe hague umi ánhel ou vaʼekue ko yvy ape ári.

Oĩ ndogueroviaséiva umi ánhel oguerekose hague rrelasión sexuál. Mateo 22:30-pe, Jesús heʼi vaʼekue yvágape ndaiporiha orekóva rrelasión sexuál ni omendáva. Upéicharõ jepe, oĩ vaʼekue ánhel oñembohetéva kuimbaʼéicha ha okaru ha omboyʼu yvyporakuérandi (Gén. 18:1-8; 19:1-3). Upévare ikatu jaʼe umi ánhel oñeno hague kuñanguérandi oñembohetégui yvypóraicha.

La Biblia ohechauka porã upéva añetehápe oiko hague. Judas ombojoja umi Sodomagua rembiapokuéra umi ánhel aña rembiapokuére ‘iñakãraku vaipa haguére ojuehe ha oiko hembipota vai rapykuéri’. Koʼã ánhel “omboyke vaʼekue hembiapo yvágape ha oheja rei ilugár” (Jud. 6,7, NM). Jahechaháicha, umi oiko vaʼekue Sodómape ha umi ánhel ojojogua. Haʼekuéra “oñemeʼẽ opaichagua tekokyʼa ivaietereívape, iñakãraku vaipa ojuehe ha oiko hembipota vai rapykuéri”. Ha 1 Pedro 3:19, 20 oñeʼẽvo ‘Noé oikoveha árare’, ohechauka oĩ hague umi ánhel naiñeʼẽrendúi vaʼekue (2 Ped. 2:4, 5). Upéicharõ, umi ánhel aña rembiapokue ikatu ñambojoja umi hénte Sodoma ha Gomorragua ojapo vaʼekuére.

Ohechaukaháicha umi téxto ñahesaʼỹijo vaʼekue, “ñande Ruete raʼykuéra” oñeñeʼẽha Génesis 6:2, 4-pe, haʼe hína umi ánhel oñembohete vaʼekue yvypóraicha ha hekovai kuñanguérandi.

Apóstol Pedro oñeʼẽ vaʼekue umi espíritu “naiñeʼẽrendúi vaʼekuére Noé tiémpope. Upérõ Ñandejára ipasiénsia ha ohaʼarõ ojejapo aja pe árka” (1 Ped. 3:20, NM). Upépe oñeñeʼẽ umi ánhel odesidi vaʼekuére omoirũ Satanáspe ha oñemoĩ Ñandejárare. Judas avei imanduʼa “umi ánhel omboyke vaʼekuére hembiapo yvágape ha oheja rei ilugár”, ha heʼi ‘umívape Ñandejára oñapytĩ hague kadénape opa árare ha oheja hague chupekuéra pytũmbyetépe og̃uahẽ meve pe ára guasu ojehusga hag̃ua’ (Jud. 6, NM).

¿Mbaʼéichapa umi ánhel Noé tiémpope guare naiñeʼẽrendúi Jehovápe? Pe Ama Guasu mboyve, haʼekuéra ou ko yvy ape ári ha oñembohete yvypóraicha, ha upéva ndahaʼéi vaʼekue Ñandejára rembipota chupekuéra g̃uarã (Gén. 6:2, 4). Hiʼarive ou ojapo hikuái peteĩ mbaʼe hekopeʼỹva: oñeno umi kuña ndive, ha Jehová ndojapói vaʼekue chupekuéra upeicharã (Gén. 5:2). Koʼã ánhel aña ha naiñeʼẽrendúiva oñehundíta og̃uahẽ vove pe tiémpo Jehová omoĩ vaʼekue. Upe aja, Judas ohai haguéicha, haʼekuéra oĩ “pytũmbyetépe” ndaikatuihápe ojapo mbaʼevete, oĩrõguáicha kárselpe.

¿Arakaʼe ha mbaʼéichapa Jesús opredika vaʼekue koʼã “espíritu oĩvape préso”? Pedro heʼi upéva oiko hague Jesús “oikove jey [rire] espírituicha”, térã oñemopuʼã jey rire omanóva apytégui (1 Ped. 3:18, 19, NM). Pedro heʼívo Jesús opredika hague chupekuéra, ohechauka upéva oiko hague ohai mboyve ikuatiañeʼẽ peteĩha. Upévare jaʼekuaa Jesús oikove jey riremi omomarandúne hague koʼã ánhel añáme ojekastigataha chupekuéra. Pe mensáhe Jesús ogueraháva nomeʼẽi esperánsa koʼã ánhelpe, síno heʼi ojehusgataha (Jon. 1:1, 2). Jahechaháicha, Jesús ikatu omeʼẽ koʼã ánhel añáme peteĩ mensáhe okondenáva chupekuéra. ¿Mbaʼérepa? Haʼe ohechauka vaʼekue ojerovia ha iñeʼẽrenduha omano meve. Ha avei oikove jey rupi, ojehecha Satanás ndorekoiha chupe ipoguýpe (Juan 14:30; 16:8-11).

Koʼẽrõite Jesús oñapytĩta ha oitýta pe yvykua pypukúpe Satanáspe ha umi ánhel aña naiñeʼẽrendúi vaʼekuépe (Luc. 8:30, 31; Rev. 20:1-3). Og̃uahẽ meve upe tiémpo, koʼã ánhel aña oĩ pytũmbýpe, ndaikatuihápe ojapo mbaʼevete. Katuete oñehundíta chupekuéra (Rev. 20:7-10).