Nzikisa ke monisa nde bangogo yai ke tadila bana ya Nzambi ya kimpeve. Inki kele nzikisa yango?

Na verse ya zole beto ke tanga nde: ‘Ntangu bana ya Nzambi ya kieleka monaka nde bana-bankento vandaka kitoko, bo yantikaka kukwela bayina ya bo zolaka.’​—Kuy. 6:2.

Na Masonuku ya Kiebreo, bangogo “bana ya Nzambi ya kieleka” mpi “bana ya Nzambi” ke monanaka na ndinga ya kisina na Kuyantika 6:2, 4; Yobi 1:6; 2:1; 38:7; mpi Nkunga 89:6. Baverse yai ke monisa nki na yina me tala “bana ya Nzambi”?

Yo kele pwelele nde “bana ya Nzambi ya kieleka” yina Yobi 1:6, (NW) ke tubila vandaka bigangwa ya kimpeve yina vukanaka na meso ya Nzambi. Satana, yina “vandaka kwenda kutambula na nsi-ntoto,” vandaka mpi na kati na bo. (Yobi 1:7; 2:1, 2) Mutindu mosi na Yobi 38:4-7 (NW), beto ke tanga nde “bana ya Nzambi” ‘tulaka milolo sambu na kiese’ ntangu Nzambi “tulaka ditadi ya ntete ya fondasio” na ntoto. Verse yai ke tubila bawanzio, sambu bantu vandaka me gangama ntete ve. “Bana ya Nzambi” yina Nkunga 89:6 (NW) ke tubila ke tendula bigangwa ya zulu yina kele ti Nzambi, kansi bantu ve.

Ebuna “bana ya Nzambi ya kieleka” yina Kuyantika 6:2, 4 (NW) ke tubila kele banani? Na kuwakana ti banzikisa ya Biblia, yo me fwana na kusukisa nde disolo yai ke tubila bana ya kimpeve ya Nzambi yina kwisaka na ntoto.

Bantu ya nkaka ke monaka mpasi na kundima nde bawanzio lendaka kuvanda ti mpusa ya kuvukisa nitu. Bangogo ya Yezu yina kele na Matayo 22:30 ke monisa nde makwela mpi kuvukisa nitu ke salamaka ve na zulu. Kansi, na ntangu mosi buna, bawanzio vandaka ti dibaku ya kulwata nitu ya kinsuni, ata nkutu kudia mpi kunwa ti bantu. (Kuy. 18:1-8; 19:1-3) Yo yina, yo me fwana na kusukisa nde ntangu bo vandaka kulwata nitu ya kinsuni, bo lendaka kuvukisa nitu ti bankento.

Beto kele ti bikuma ya me simbama na Biblia yina ke pusa na kukwikila nde bawanzio salaka mutindu yina. Yude 6, 7 ke fwanisa disumu ya bantu ya Sodome, yina vukisaka nitu na mutindu yina me fwana ve ti disumu ya “bawanzio yina taninaka ve kisika na bo ya luyantiku kansi yina yambulaka kisika na bo mosi ya kuzingila.” Bawanzio mpi bantu ya Sodome “kudipesaka mpi na mansoni ya nene kibeni mpi lungisaka banzala ya me fwana ve ya kinsuni.” Mutindu mosi 1 Piere 3:19, 20 ke fwanisa bawanzio yina kolamaka ti bantu ya “bilumbu ya Noa.” (2 Pie. 2:4, 5) Yo yina, beto lenda fwanisa masumu ya bawanzio yina kolamaka na bilumbu ya Noa ti masumu ya bantu ya Sodome ti Gomore.

Bangogo yai ya nsuka ke sadisa beto na kubakisa nde “bana ya Nzambi ya kieleka” yina Kuyantika 6:2, 4 ke tubila, vandaka bawanzio yina lwataka nitu ya kinsuni mpi salaka mansoni ti bankento.

Ntumwa Piere ke monisa nde bampeve yai kele bayina “lemfukaka ve na ntangu ya ntama ntangu Nzambi vandaka kuvingila ti ntima-nda na bilumbu ya Noa.” (1 Pie. 3:20) Yo kele pwelele nde, Piere vandaka kutubila bigangwa ya kimpeve yina vukanaka na kukolama ya Satana. Yude ke tubila bawanzio yina “taninaka ve kisika na bo ya luyantiku kansi yina yambulaka kisika na bo mosi ya kuzingila,” mpi tubaka nde Nzambi “me bumbaka bo ti miniololo ya kimakulu na mudidi ya ngolo kibeni sambu na lusambisu ya kilumbu ya nene.”​—Yude 6.

Na nki mutindu bigangwa ya kimpeve kolamaka na bilumbu ya Noa? Na ntwala ya Mvula ya Ngolo, bampeve yai ya mbi lwataka nitu ya kinsuni​—diambu yina vandaka ve na lukanu ya Nzambi sambu na bo. (Kuy. 6:2, 4) Diaka, bawanzio yina vukisaka nitu ti bankento salaka mambu yina me fwana ve. Nzambi gangaka ve bigangwa ya kimpeve sambu na kuvukisa nitu ti bankento. (Kuy. 5:2) Na ntangu yina me fwana, Nzambi ta fwa bawanzio ya mbi yina kolamaka. Ntangu yai, mutindu Yude ke tubila yo, bo kele na “mudidi ya ngolo kibeni”​—yo kele bonso nde bo kele na boloko ya kimpeve.

Nki ntangu mpi nki mutindu Yezu samunaka na “bampeve yina kele na boloko”? Piere sonikaka nde yo salamaka ntangu “Nzambi futumunaka [Yezu] na mpeve.” (1 Pie. 3:18, 19) Simba mpi nde, Piere ke tuba nde Yezu ‘samunaka.’ Mutindu Piere sadilaka ntangu yina me lutaka dezia ke monisa nde yandi samunaka na ntwala nde Piere kusonika mukanda na yandi ya ntete. Yo ke monana nde na ntangu mosi buna, na nima ya lufutumuku na yandi, Yezu samunaka na bampeve ya mbi sambu na ndola yina bo fwete baka. Yo vandaka ve nsangu ya kupesa bo kivuvu kansi ya kusambisa bo. (Yon. 1:1, 2) Mutindu Yezu monisaka lukwikilu mpi kwikama tii na lufwa mpi na nima futumukaka​—yandi monisaka nde Diabulu vandaka ve ti kiyeka na zulu na yandi​—Yezu vandaka ti kikuma ya kuzabisa ndola ya mutindu yai.​—Yoa. 14:30; 16:8-11.

Na bilumbu ke kwisa, Yezu ta kanga mpi ta losa Satana ti bawanzio yina na dibulu ya nda. (Luka 8:30, 31; Kus. 20:1-3) Tii na ntangu yai, bampeve yai ya bankolami kele kaka na mudidi ya ngolo ya kimpeve, mpi bo ke vingila lufwa na bo.​—Kus. 20:7-10.