Ũira ũrĩa ũrĩ ho wonanagia atĩ acio maarĩ ariũ a Ngai a kĩĩroho. Hihi nĩ ũira ũrĩkũ?

 

 

Mũhari wa kerĩ ugaga ũũ: “Ariũ a Ngai makĩona atĩ airĩtu a andũ nĩ athaka; magĩkĩhikia o arĩa methurĩire magatuĩke aka ao.”—Kĩam. 6:2.

Thĩinĩ wa Maandĩko ma Kĩhibirania ciugo “ariũ a Ngai” na “ariũ a Mũrungu,” cionekaga thĩinĩ wa Kĩambĩrĩria 6:2, 4; Ayubu 1:6; 2:1; 38:7; na Thaburi 89:6. Maandĩko macio monanagia atĩa igũrũ rĩgiĩ ‘ariũ acio a Ngai’?

“Ariũ a Ngai” arĩa tũthomaga ũhoro wao thĩinĩ wa Ayubu 1:6 maarĩ ciũmbe cia kĩĩroho iria ciathire kũrũgama mbere ya Ngai. Ũmwe wao aarĩ Shaitani ũrĩa woimĩte “kũriũnga thĩ.” (Ayub. 1:7; 2:1, 2) Ningĩ thĩinĩ wa Ayubu 38:4-7 nĩ tũthomaga ũhoro wa “ariũ a Ngai” arĩa ‘maanĩrĩire nĩ gũkena’ rĩrĩa Ngai ‘aaigire ihiga rĩa thĩ rĩa koine.’ No mũhaka akorũo acio maarĩ araika tondũ hĩndĩ ĩyo andũ matiombĩtwo. Hatarĩ nganja, “ariũ a Mũrungu,” arĩa magwetetwo thĩinĩ wa Thaburi 89:6 ti andũ, ĩndĩ nĩ ciũmbe cia kĩĩroho iria cikaranagia na Ngai igũrũ.

Gũkĩrĩ ũguo-rĩ, “ariũ a Ngai” arĩa magwetetwo thĩinĩ wa Kĩambĩrĩria 6:2, 4 nĩa? Kũringana na Maandĩko macio mekũgwetetwo, nĩ ũndũ wa ũũgĩ gũtua atĩ rĩandĩko rĩu rĩaragĩrĩria ariũ a Ngai a kĩĩroho arĩa maaikũrũkĩte gũkũ thĩ.

Andũ amwe nĩ mekagĩra nganja kana no kũhoteke araika meingĩrie maũndũ-inĩ ma ngomanio. Ciugo cia Jesu thĩinĩ wa Mathayo 22:30 cionanagia atĩ igũrũ gũtikoragwo maũndũ ma kũhikania na ngomanio. O na kũrĩ ũguo, kũrĩ hĩndĩ araika manehumba mĩĩrĩ ya andũ na makĩrĩanĩra na makĩnyuanĩra na andũ. (Kĩam. 18:1-8; 19:1-3) Kwoguo, marĩ na mĩĩrĩ ta ĩyo nĩ kũngĩahotekire makomanie na airĩtu a andũ.

Kũrĩ na itũmi cia Kĩĩmandĩko cia gũtũma twĩtĩkie atĩ araika amwe nĩ meekire ũguo. Rĩandĩko rĩa Judasi 6, 7 rĩringithanagia mehia ma andũ a Sodomu arĩa meingĩrĩtie thĩinĩ wa ngomanio itarĩ cia ndũire na ma ‘araika, arĩa mataigana gũkindĩria ũthamaki-inĩ wao, magĩtiga kũndũ kwao kĩũmbe gwa gũtũũra.’ Ũndũ ũrĩa wahanaine nĩ atĩ araika o hamwe na andũ acio a Sodomu nĩ maakĩrĩrĩirie ‘kũhũũra ũmaraya na makeriragĩria kũgwata mĩĩrĩ ĩrĩa igirĩtio kũgwatwo.’ Narĩo rĩandĩko rĩa 1 Petro 3:19, 20 rĩkuruhithanagia araika aremi na ‘matukũ ma Nuhu.’ (2 Pet. 2:4, 5) Nĩ ũndũ ũcio, mĩtugo ya araika aremi a hĩndĩ ya Nuhu no ĩringithanio na mehia ma Sodomu na Gomora.

Kwoguo hatarĩ nganja, “ariũ a Ngai” arĩa magwetetwo thĩinĩ wa Kĩambĩrĩria 6:2, 4 nĩ araika arĩa meehumbire mĩĩrĩ ya andũ na magĩtharia na airĩtu a andũ.

Mũtũmwo Petero akĩaria ũhoro wa maroho macio oigire atĩ nĩmo “marĩa maaremire tene, hĩndĩ ĩrĩa Ngai . . . akirĩrĩirie matukũ-inĩ ma Nuhu.” (1 Pet. 3:20) Hatarĩ nganja, Petero aaragia ũhoro wa ciũmbe cia roho iria ciarũmĩrĩire Shaitani ũremi-inĩ wake. Nake Judasi nĩ arĩtie ũhoro wa araika ‘mataigana gũkindĩria ũthamaki-inĩ wao, no magĩtiga kũndũ kwao kĩũmbe gwa gũtũũra,’ na akiuga atĩ Ngai ‘aamarangithĩirie maikarage mohetwo nduma-inĩ na mĩnyororo ĩrĩa ĩtarĩ hingo ĩkohoka, o nginya rĩrĩa cira wa Mũthenya ũrĩa mũnene ũgakinya.’—Judasi 6.

Ciũmbe cia roho ciaremire na njĩra ĩrĩkũ matukũ-inĩ ma Nuhu? Mbere ya Mũiyũro, maroho macio mooru nĩ meehumbire mĩĩrĩ ya andũ mũgarũ na wendi wa Ngai. (Kĩam. 6:2, 4) Makĩria ma ũguo, nĩ ũndũ wa gũkomania na airĩtu a andũ, araika acio nĩ meekire ũndũ ũtarĩ wa ndũire. Rĩrĩa Ngai ombire ciũmbe cia roho, muoroto wake ndwarĩ cikomanagie na atumia. (Kĩam. 5:2) Araika acio aganu na aremi nĩ makaaninwo nĩ Ngai ihinda rĩrĩa abangĩte. Gwa kahinda gaka, ota ũrĩa Judasi oigĩte, mohetwo “nduma-inĩ” thĩinĩ wa njera ya kĩĩroho.

Nĩ hĩndĩ ĩrĩkũ na nĩ na njĩra ĩrĩkũ Jesu aahunjĩirie ‘maroho macio matũire mohetwo’? Petero aandĩkire atĩ ũndũ ũcio wekĩkire thutha wa Jesu ‘gũcoka gwĩkĩrũo muoyo’ kana kũriũkio. (1 Pet. 3:18, 19) Ningĩ, ũngĩrora nĩ ũkuona atĩ Petero oigire, Jesu “akĩhunjĩria.” Tondũ Petero aahũthĩrire kiugo kĩonanagia ũndũ wĩkĩkĩte-rĩ, ũguo nĩ kuuga atĩ Jesu aahunjĩirie maroho macio mbere ya Petero kwandĩka marũa make ma mbere. Nĩ ũndũ ũcio, kuonekaga atĩ thutha wa kũriũka gwake, Jesu nĩ aamenyithirie maroho macio moru ũhoro wa iherithia rĩao rĩrĩa rĩmetereire. Kũhunjĩrio kũu gũtiaheire maroho macio mwĩhoko o na ũrĩkũ. Jesu aamahunjagĩria ũhoro wa ituĩro rĩao. (Jona 1:1, 2) Tondũ Jesu nĩ onanĩtie wĩtĩkio na wĩhokeku nginya hĩndĩ ya gĩkuũ gĩake na akariũkio, na nĩ ũndũ ũcio akĩonania atĩ Mũcukani ndangĩmũtooria-rĩ, aarĩ na gĩtũmi kĩega gĩa kũmenyithia maroho macio ituĩro rĩu iritũ.—Joh. 14:30; 16:8 -11.

Ihinda rĩũkĩte, Jesu nĩ ekuoha Shaitani na araika acio na amaikie irima rĩtarĩ gĩturi. (Luk. 8:30, 31; Kũg. 20:1-3) Gwa kahinda gaka, maroho macio moru marĩ nduma-inĩ nene ya kĩĩroho, na hatarĩ nganja nĩ matuĩrĩirũo kũniinwo.—Kũg. 20:7-10.