Saí kima ki tu xikinisa kuila o kizuelu kiki kia lungu ni an’â Nzambi ku diulu. Maji ihi ilondekesa o kidi kiki?

O izuelu ia dianga mu jivelusu izuela: “Bhenhobho an’a Nzambi [ia kidi] a mala, a mona an’a athu a ahatu, kuma auabha; anga a sakana ahatu oso a a uabhela-bhu.”—Dim. 6:2.

Mu Mikanda Ikola ia Hebalaiku, o izuelu “an’a Nzambi [ia kidi] a mala,” ni “an’a Nzambi a mala,” tu i sanga mu divulu dia Dimatekenu 6:2, 4; Jobe 1:6; 2:1; 38:7; ni Jisálamu 89:6. Ihi i londekesa o ibatulu íii ia lungu ni “an’a Nzambi a mala?”

O “an’a Nzambi [ia kidi] a mala,” u tu tanga mu divulu dia Jobe 1:6, exile o ji-anju ja kexile mu diongeka ni Nzambi. Bhu kaxi ka, bhua kexile ué Satanaji, ua kexile “mu ku kondoloka o ngongo.” (Jobe 1:7; 2:1, 2) Kiene kimoxi ué mu divulu dia Job 38:4-7, tu tanga, “o an’a Nzambi” anga ‘a sanguluka,’ kioso Nzambi kia ‘xikikile o ditadi dia ku thunga’ o ixi. O athu enhá ki kala o ji-anju ngó, mukonda Nzambi ka bhangele luua athu mu ixi. O “an’a Nzambi [ia kidi] a mala,” a a tumbula mu divulu dia Jisálamu 89:6, o ji-anju ene ni Nzambi, ki athu mu ixi kana.

A nanhi exile o “an’a Nzambi [ia kidi] a mala,” a a tange mu divulu dia Dimatekenu 6:2, 4? Kála ki londekesa o misoso ia mukuá ia Bibidia, tu tena kuzuela kuila o musoso iú u tumbula o ji-anju ja kexile mu ixi.

Saí athu a mukuá ka xikina kuila o ji-anju a mesena ku zeka ni ahatu. O izuelu ia Jezú i tu sanga mu divulu dia Matesu 22:30, ilondekesa kuila ku diulu ká kazala, ka zeka ué ni ahatu. Maji né kiki, saí kithangana o ji-anju ja di bhangele mikutu ia xitu anga adia, a nua ni athu mu ixi. (Dim. 18:1-8; 19:1-3) Mu kiki-phe, tu tena ku xikina kuila mu mikutu ia xitu, ene a tena ku zeka ni ahatu mu ixi.

O Bibidia i tu tangela kuila saí ji-anju ja bhangele kiki. Mu divulu dia Juda 6, 7, a sokesa o kituxi kia mala akua Sodoma, a kala mu diehelela ku undumbu kála kia bhangele o “ji-anju ja kambele kubhaka o ukota uâ, ja xi o kididi kia a tokala.” Ki kale o ji-anju jiji mba akua Sodoma ‘a kala mu diehelela ku undumbu, ni mu ku bhanga maufusa a xitu.’ Mu divulu dia 1 Phetele 3:19, 20, tu sanga-mu ué kizuelu kia lungu ni Ji-anju ja bhukumukine “mu izuua ia Noué.” (2 Pet. 2:4, 5) Mu kiki, o ituxi ia ji-anju ja bhukumukine mu izuua ia Noué, a tena ku i sokesa ni ituxi ia Sodoma ni Ngomola.

Tu tena ku xikina ngó mu kidi kiki, se tu xikina kuila o “an’a Nzambi [ia kidi] a mala,” a a tange mu divulu dia Dimatekenu 6:2, 4, exile o ji-anju ja di bhangele mikutu ia xitu, anga eza mu bhanga undumbu ni ahatu mu ixi.

O poxolo Phetele uambe kuila o ji-anju jenhojo, ió ‘a xibhakele m’ukulu, kia kingile o muanhu ua Nzambi mu izuua ia Noué.’ (1 Phe. 3:20) Phetele ua kexile mu zuela o ji-anju ja solele ku kala ku mbandu ia Satanaji, mu ku bhukumukina Nzambi. Juda ua tumbula o ji-anju “ja kambele kubhaka o ukota uâ, ja xi o kididi kia a tokala,” kioso kiambe kuila Nzambi, ‘ua ji kuika mua vundu katé o Kizuua kiná kia dikota kia ku fundisa.’—Juda 6.

Kiebhi kia bhukumukine o ji-anju mu izuua ia Noué? Ande dia Dilúvio, o ji-anju jiji, ja bhukumukine, ja di bhangele mikutu ia xitu—Nzambi ka a bhangele phala ku kala ni ukexilu iú. (Dim. 6:2, 4) O ji-anju jiji ja bhangele o undumbu ni ahatu, ja kexile mu ta kituxi. Nzambi ka bhangele o ji-anju phala ku zeka ni ahatu mu ixi. (Dim. 5:2) O ji-anju jiji ja iibha, ja bhukumukine, a-nda ji buika mu kithangana kia xindi Nzambi. Maji mu kindala, ene ala bhu kididi, ‘mua vundu’—mu kaleia mu nzumbi.

Kiebhi ni kithangana kuxi kia bokela Jezú, o ‘ji-anju jene mua vundu?’ Phetele ua soneka kuila kiki kia bhitile kioso Jezú kia ‘mu fukununa mu nzumbi.’ (1 Phe. 3:18, 19) Phetele ua zuela kuila Jezú, ua ‘tudila o njimbu ia kufundisa.’ Mukonda dia Phetele ku tumbula o kizuelu, ua a tudila, kilombolola kuila ua a bokela ande dia Phetele ku soneka o mukanda uê ua dianga. Kilondekesa ué kuila, kioso kia mu fukununa, Jezú ua bhana ngolokela ku ji-anju ja iibha, ia lungu ni kaxtiku keji tambula. Mu ku a bokela, Jezú ka kexile mu ku a bhana kidielelu. Maji ua kexile mu ku a tudila njimbu ia ku a fundisa. (Jona 1:1, 2) Saí kithangana Jezú ua londekesa o kixikanu kiê katé mu kufuá kuê, mu ku bhita kithangana a mu fukununa—iu ua londekesa kuila Diabhu ka mu tundu mu kutena—Jezú uejidile se mukonda diahi ua kexile mu ku a fundisa.—Nzuá 14:30; 16:8-11.

Ku hádia Jezú ua-nda kuta Satanaji mu dikungu ki di moneka hole, kumoxi ni madimonho-mê. (Luka 8:30, 31; Dij. 20:1-3) Ande dia ku bhixila o kithangana kieniókio, o madimonho enhá ala mua vundu, mu ukexilu ua nzumbi, ka-nda fula mu ku a buika.—Dij. 20:7-10.