Vena ye kuma kiasikila mu kwikila vo e mvovo miami wan’a mianda a Nzambi miyikanga. Nkia ziku tuna kiau?

Muna tini kiazole tutanganga vo: “O wan’a Nzambi bamwene wan’amakento a wantu vo miote: bayibongele akazi mun’awonso basolele.”—Etu. 6:2.

Muna Sono ya Kiyibere e mvovo ‘wan’a Nzambi aludi’ ye “wan’a Nzambi,” tulenda mio solola muna Etuku 6:2, 4; Yobi 1:6; 2:1; 38:7; ye muna Nkunga 89:6. E sono yayi adieyi isonganga mu kuma kia “wan’a Nzambi” awaya?

O ‘wan’a Nzambi aludi’ beyikwanga muna Yobi 1:6, i vangwa ya mwanda ina yalungalakana vana ndose a Nzambi. Mosi muna yau i Satana ona ‘wavumvulanga ya kuku ya kuna ova nza.’ (Yobi 1:7; 2:1, 2) Diau adimosi mpe muna Yobi 38:4-7 tutanganga vo ‘wan’a Nzambi bayengoloka ye kiese’ vava Nzambi ‘kasikidis’etadi dia konko’ ya nza. Wana awaya nanga i ambasi, kadi muna kolo kiakina o wantu ke bayisemenwa ko. O ‘wan’a Nzambi’ beyikwanga muna Nkunga 89:6 i vangwa ya mwanda bekalanga kun’ezulu yo Nzambi, kansi ke wantu ko.

Aki nani i ‘wan’a Nzambi aludi’ beyikwanga muna lusansu luna muna Etuku 6:2, 4? Mun’owu wa lusansu lwa Nkand’a Nzambi, tulenda vova vo wan’awaya i wan’a Nzambi a mianda ana bayiza ova ntoto.

Diampasi dikalanga kwa akaka mu kwikila vo mbasi balenda kala ye luzolo lwa vukana. E mvovo mia Yesu mina muna Matai 22:30 misonganga vo longo ye mvukana za nitu ke zina ko kun’ezulu. Kansi, vakala ye ntangwa ina ambasi bavwatanga nitu za kiwuntu, badianga yo nua kumosi yo wantu. (Etu. 18:1-8; 19:1-3) Muna kuma kiaki, wau vo bavwata e nitu za kiwuntu bafwana vukana y’akento.

Vena ye ziku ya Nkand’a Nzambi isonganga vo mbasi zakaka zavanga kikilu e diambu diadi. E sono kia Yuda 6, 7 kitezanesanga esumu dia esi Sodomo ana balanda eketo dia nsafu dia nitu ye sumu dia ‘mbasi ana balembi lund’o ukuluntu wau yo yambula ekiau kalu.’ Esi Sodomo ye mbasi zazi, esumu diau adimosi bavanga ‘bayisia mun’evangu dia zumba, balanda eketo dia nsafu dia nitu.’ Diau adimosi mpe, e sono kia 1 Petelo 3:19, 20 kiyikanga e mbasi zazi z’akolami kumosi ye “lumbu ya Noa.” (2 Pet. 2:4, 5) Mana bavanga mbasi z’akolami muna lumbu ya Noa malenda tezaneswa y’esumu dia esi Sodomo ye Ngomora.

Mawonso mama matusadisi mu bakula vo ‘wan’a Nzambi aludi’ beyikwanga muna Etuku 6:2, 4, i mbasi zina zavwata e nitu za kiwuntu yo vukana y’akento.

Petelo wa ntumwa wasonga vo e mianda miami i mina “miateka kolama, e kolo kiavingil’o nlandu a Nzambi muna lumbu ya Noa.” (1 Pet. 3:19, 20) Dialudi vo Petelo mbasi zina zayikama ukolami wa Satana kayika. O Yuda wayika ambasi ana ‘balembi lund’o ukuluntu wau, bayambula kak’ekiau kalu.’ Wavova vo Nzambi “wabalundila muna lufundisu lua lumbu kianene, muna kangwa ya mvu ya mvu, kunansi a tombe.”—Yuda 6.

Mu nkia mpila e vangwa ya mwanda bakolamena muna lumbu ya Noa? Vitila Kizalu, e mianda miami miambi bavwata e nitu za kiwuntu, diambu dina ke bavaninwa nswa ko kwa Nzambi. (Etu. 6:2, 4) Vana ntandu, e mbasi zazi zavukana y’akento, diambu diambi kikilu bavanga. Vava Nzambi kasema e vangwa ya mwanda, kabavanga ko kimana bavukananga y’akento. (Etu. 5:2) E mbasi zazi z’akolami, befwaswa muna ntangwa kasikidisa o Nzambi. Nze una Yuda kavova, owau tulenda vova vo, e mbasi zazi ‘kunansi a tombe kia sina bena’ yovo muna pelezo a kimwanda.

Nkia ntangwa ye aweyi o Yesu kasila umbangi kwa ‘mianda miami muna pelezo?’ Petelo wasoneka vo ediadi diavangama vava Yesu “kavaninw’o moyo muna mwanda” yovo vava kafulwa. (1 Pet. 3:18, 19) Sungamena dio vo Petelo wavova mpe vo Yesu ‘wasia umbangi.’ E mvovo kasadila Petelo misonganga e ziku vo umbangi wau wasiwa una kasonekene nkand’andi antete ko. Nanga kolo kiakete kaka kiavioka vava Yesu kafuluka, i bosi kazayisa kwa mbasi zazi etumbu kina bevewa. Yesu kabavana kana vuvu kimosi ko, kansi umbangi wa lufundisu kabasila. (Yona 1:1, 2) Wau vo Yesu wasikila ye kwikizi yamuna lufwa yo fuluka, wasonga vo Nkadi ampemba kakala ye wisa ko muna yandi. Yesu wakala ye kuma kiasikila mu samuna e mfundisa yayi.—Yoa. 14:30; 16:8-11.

Kuna sentu, Yesu okanga yo tuba Satana ye mbasi zazi muna mbilu. (Luka 8:30, 31; Lus. 20:1-3) Yavana kilwaka ntangwa yayi, e mbasi zazi z’akolami bakinu muna tombe kia sina kia mwanda, o lufwasu lwau ke lufunga ko.—Lus. 20:7-10.