Kaluwore gi nonro mosetim maber, nyiso ni mago gin yawuot Nyasaye ma gin malaike. Ang’o manyiso ni gin malaike?

Ndiko mokwongo mawuoyo kuomgi wacho kama: “Yawuot Nyasaye madier noneno nyi ji ka gin jochia: mi ne gikendo mon kuom duto ma ne giyiero.”—Chak. 6:2, NW.

E ndiko mag dho-Hibrania weche motigo ni “yawuot Nyasaye” yudore e Chakruok 6:2, 4; Ayub 1:6; 2:1; 38:7; kod Zaburi 89:6 (NW). Ndikogi nyiso ang’o e wi “yawuot Nyasaye”?

Nenore maler ni “yawuot Nyasaye” ma owuo kuomgi e Ayub 1:6 ne gin chwech mag roho ma ne ochokore e nyim Nyasaye. Achiel kuomgi ne en Satan, ma ne ‘oa wuotho e piny koni gi koni.’ (Ayub 1:7; 2:1, 2) Kamano bende, Ayub 38:4-7, wacho ni “yawuot Nyasaye” ne ‘okok gi mor’ kane Nyasaye ‘oketo kidi matung’’ mar piny. Omiyo nyaka bed ni ne gin malaike nikech dhano ne pok ochwe gie kindeno. Onge kiawa ni “yawuot Nyasaye” miwuoyo kuomgi e Zaburi 89:6 (NW) gin chwech mag roho modak gi Nyasaye e polo, to ok gin dhano.

To kare “yawuot Nyasaye madier” miwuoyo kuomgi e Chakruok 6:2, 4 (NW) gin ng’a? Kaluwore gi ndiko ma wasewuoyoe malogo, wanyalo wacho ni ndikoni wuoyo kuom yawuot Nyasaye ma gin malaike ma nobiro e piny.

Jomoko neno ni tek negi yie ni malaike nyalo bedo gi gombo mar terruok. Weche Yesu mayudore e Mathayo 22:30 nyiso ni kend kod nindruok ok timre e polo. Kata kamano, kinde moko malaike noserwako dend dhano ma gibiro e piny, mi gichiemo kendo metho gi dhano. (Chak. 18:1-8; 19:1-3) Omiyo, en gima owinjore wacho ni ka girwako del mar dhano ginyalo terore gi mon.

Nitie gik mayudore ei Muma mamiyo wabedo gadiera ni malaike moko notimo kamano. Juda 6, 7 pimo richo mag chwo ma nodak e dala mar Sodom ma ne timo timbe terruok madhoch, gi timbe malaike “ma ne ok orito loch ma nomigi, to noweyo kar dak ma nomigi.” Malaikego koda Jo-Sodom notimo tim machal ma en “terruok gi tim duwruok madhoch.” Ndiko machielo maket gi mano yudore e 1 Petro 3:19, 20, mawacho ni malaike ma nong’anyogo notimo timbegigo “e ndalo mag Nowa.” (2 Pet. 2:4, 5) Kaluwore gi wachno, timbe mag malaike ma nong’ayo e ndalo mag Nowa inyalo pim gi richo ma ne otimore e mier mag Sodom kod Gomorra.

En gima owinjore wacho ni “yawuot Nyasaye madier” miwuoyo kuomgi e Chakruok 6:2, 4, (NW) ne gin malaike ma ne orwako del mag dhano ma giterore gi mon.

Jaote Petro wacho ni chunygo ne gin chwech mag roho ma ‘nodagi winjo wach, kane Nyasaye pod hore korito e ndalo mag Nowa.’ (1 Pet. 3:20) Nenore maler ni jaote Petro ne wuoyo kuom chwech mag roho ma noriwore gi Satan e ng’anyo. Juda wuoyo e wi malaike “ma ne ok orito loch ma nomigi, to noweyo kar dak ma nomigi,” kowacho ni Nyasaye ‘oseketogi e mudho, kotweyogi kod thiwini mochwere nyaka chop ong’ad buchgi e odiechieng’no maduong’.’—Juda 6.

En yo mane ma chwech mag rohogo ne ok owinjo wach e ndalo mag Noa? Kane Ataro mar pi podi, malaike marichogi ne orwako del mag dhano, ma ne en gima Nyasaye ok ne oyienegi mondo gitim. (Chak. 6:2, 4) E wi mano, malaikego ma ne oterore gi nyi dhano notimo gima kuero e wang’ Nyasaye. Nyasaye ok nochweyo malaike mondo onindre gi mon. (Chak. 5:2) E kinde mowinjore, Nyasaye biro ketho malaike marichogo ma nochayo chik. Gie sani, mana kaka Juda wacho, ‘oketgi e mudho’ mandiwa—tiende ni ok oyienegi ng’eyo chenro mag Nyasaye kata matin.

Ne en karang’o ma Yesu noyalone ‘chunygo ma ne nie twech’, to notimo kamano e yo mane? Petro nondiko ni mano notimore bang’ kane Yesu osechier ‘mobedo mangima.’ (1 Pet. 3:18, 19) Onego wapar bende ni Petro nowacho ni Yesu ‘noyalo.’ Wach ma Petro notiyogo ni Yesu ‘noyalo’ nyiso ni Yesu notimo kamano chon kata ka Petro pok nondiko barupe mokwongo. Nenore kare ni, bang’ chier mare, Yesu noyalo ne malaike marichogo e wi kum ma ne gibiro yudo. Ne ok en yalo ma ne dhi miyo gibed gi geno moro amora maber. Ne en yalo manyiso kum ma ne oritogi. (Jona 1:1, 2) Bang’ kane Yesu osenyiso ayanga yie motegno kendo ni omakore chuth gi Nyasaye nyaka e thone kae to ochiere, nonyiso adier ni Jachien ne onge gi teko kuome. Yesu koro ne nigi ratiro duto mar chiwo kum ma kamano.—Joh. 14:30; 16:8-11.

E kinde mabiro, Yesu biro tweyo kendo wito Satan gi malaikenego e abiso. (Luka 8:30, 31; Fwe. 20:1-3) Kapok kindeno ochopo, malaike marichogo nie mudho mandiwa tiende ni gikia chenro mag Jehova, kendo kethruok margi biro maonge kiawa.—Fwe. 20:7-10.