Umphostoli uPhetro uveza ukuthi imimoya le yiyo ‘engalalelanga kudala lapho uNkulunkulu elinde ngokubekezela ezinsukwini zikaNowa.’ (1Pe 3:20) Kuyacaca-ke ukuthi uPhetro wayekhuluma ngezingilosi ezakhetha ukuhlamuka njengoSathane. UJuda usitshela ngezingilosi “ezingagcinanga izikhundla zazo zamandla kodwa zadela ikhaya lazo” esithi uNkulunkulu “wazigcina ebumnyameni, zibotshwe ngamaketani angaqamukiyo zilindele ukwahlulelwa ngosuku olukhulu.”​—Ju 6.

Izingilosi zatshengisa njani ukuthi azilaleli ngesikhathi sikaNowa? UZamcolo engakafiki lezizingilosi zazintshintsha zabangabantu, okuyinto uNkulunkulu ayengayihlosanga. (Ge 6:2, 4) Kanti njalo kwakuyisenzo sokuxhwala ukuthi izingilosi zilale labesifazana. Ngokwemvelo uNkulunkulu wayengadalanga izidalwa zomoya ukuthi zihlangane lomuntu wesifazana emacansini. (Ge 5:2) Izingilosi lezi ezimbi, ezingalalelanga zizabhujiswa ngesikhathi sikaNkulunkulu esifaneleyo. Okwakhathesi njengoba uJuda esitsho ‘zisebumnyameni,’ okufanana lokuthi zisejele.

UJesu wayatshumayela nini futhi njani “emimoyeni eyayisentolongweni”? UPhetro wabhala ukuthi lokhu kwenzakala ngemva kokuba uJesu “esevuswe emoyeni.” (1Pe 3:18, 19, The Holy Bible in Ndebele) Nanzelela ukuthi uPhetro uthi uJesu “wayatshumayela.” Ukusebenzisa kwakhe isenzo senkathi edlule kutshengisa ukuthi lokhu kutshumayela kwenzakala yena engakabhali incwadi yakhe yokuqala. Yikho-ke kukhanya angani ngemva kokuvuswa kwakhe, uJesu wakhipha isimemezelo mayelana lesijeziso esizayo okufanele sitholwe yimimoya emibi. Kwakungayisiso simemezelo esasinika imimoya le emibi inhlansi yethemba. Kwakuyisimemezelo sokusola okukhulu kakhulu. (Jna 1:1, 2) UJesu wakwenza kwacaca ukuthi wayethembekile futhi elokholo kwaze kwaba sekufeni kwakhe njalo wavuswa. Khonokho kwatshengisa ukuthi uDeveli kalamandla phezu kwakhe kwasekumnika isisekelo sokuyakhipha lesosimemezelo sokulahla leyomimoya emibi.​—Joh 14:30; 16:8-11.

Ngesikhathi esizayo uJesu uzabopha uSathane lezingilosi zakhe abesebaphosela emgodini ongelamkhawulo. (Luk 8:30, 31; Isam 20:1-3) Kuze kube yileso sikhathi izingilosi lezi ezingalaleliyo zisesimeni sobumnyama njalo kuyacaca ukuthi zizaphetha ngokubhujiswa.​—Isam 20:7-10.