Ha ha i ai e fakamooliaga ko e talahauaga nei kua hagaao ke he tau tama taane fakaagaaga he Atua. Ka ko e heigoa e fakamooliaga?

Ko e tau kupu fakamua ia ne pehē: “Ti kitia ai he tau tama tane he Atua e tau tama fifine he tau tagata kua mitaki ni a lautolu; ti faihoana ai kia lautolu oti ne loto a lautolu ki ai.”​​—Kene. 6:2.

He tau Tohiaga Tapu Heperu, ko e talahauaga “tau tama tane he Atua” ne tu ia Kenese 6:2, 4 mo e Iopu 1:6; 2:1; 38:7. Ko e heigoa ne fakakite mai he tau kupu ia hagaao ke he “tau tama tane he Atua”?

“Tau tama tane he Atua” ne totou e tautolu he Iopu 1:6 ne maaliali ai kua hagaao ke he tau mena momoui fakaagaaga ne tutū ki mua he Atua. Ko ia foki mo lautolu ko Satani, ko ia kua “fano feliuaki ke he lalolagi.” (Iopu 1:7; 2:1, 2) Pihia foki he Iopu 38:4-7, totou e tautolu i ai ko e “tau tama tane oti he Atua” ne “kalaga fiafia” he magaaho ne ‘fakatoka hifo he Atua e maka he malokuaga’ he lalolagi. Ko lautolu ni ko e tau tama taane fakaagelu, ha kua nakaila tufuga ia e tau tagata he mogoia.

Ko hai mogoia e “tau tama tane he Atua” ne totoku he Kenese 6:2, 4? He felauaki mo e tau vala tala faka-Tohi Tapu i luga, kua lata ni ke pehē ko e tala ia kua hagaao ke he tau tama taane fakaagaaga he Atua ne o hifo mai ke he lalolagi.

Ne uka falu ke talia na liga manako e tau agelu ke he fakafetuiaga mahani fakataane mo e fifine. He tau kupu ha Iesu ne fakamau he Mataio 22:30 kua fakakite mai kua nakai tuai fai fakamauaga mo e tau fakafetuiaga fakataane mo e fifine i luga he lagi. Ka e falu mogo ne fakafaliu e tau agelu ke he tau tino tagata, ti kai mo e inu foki mo e tau tagata. (Kene. 18:1-8; 19:1-3) Ti kua maeke ai ke pehē ha kua fakafaliu ke he tino tagata, liga maeke foki ia lautolu ke fai fakafetuiaga fakataane mo e fifine.

Fai kakano faka-Tohi Tapu ke talitonu na taute he falu agelu e tau mena ia. Ia Iuta 6, 7, ne fakatatai e agahala ke he tau tagata taane Sotoma, ne velagia a lautolu ke he tau mena he tino, mo e “tau agelu foki kua nakai taofi ha lautolu a lilifu, ka kua toka e lautolu e mena ne nonofo ai a lautolu.” Ko e tuaga ne tatai ai, ko e tau agelu ia mo e tau Sotoma “ne faivao pihia a lautolu na, mo e mumui atu foki ke he tau tino kehe.” Ko e talahauaga pihia he 1 Peteru 3:19, 20 ne fakamatutaki e tau agelu nakai omaoma mo e “vaha kia Noa.” (2 Pete. 2:4, 5) Ti ko e fua, ko e puhala ne mumuitua e tau agelu nakai omaoma he vahā ha Noa kua maeke ai ke fakatatai ke he agahala ha Sotoma mo Komora.

Ko e talahauaga pihia kua fai kakano ka mailoga e tautolu ko e “tau tama tane he Atua” ne totoku he Kenese 6:2, 4 ko e tau agelu ne fakafaliu e tau tino ha lautolu ti mahani feuaki mo e tau fifine.

Ne fakakite he aposetolo ko Peteru e tau agaaga nei ko lautolu ne “faliuliu i tuai, he fakatalitali mai e fakauka he Atua i tuai ke he vaha kia Noa.” (1 Pete. 3:20) Maaliali ai, kua hagaao a Peteru ke he tau mena momoui fakaagaaga ne kau mo Satani ke he totokoaga. Ne totoku ia Iuta ko e tau agelu ne “nakai taofi ha lautolu a lilifu, ka kua toka e lautolu e mena ne nonofo ai a lautolu,” ti pehē ko e Atua “kua taofi . . . a lautolu ke he tau liliaga tukulagi ki lalo he pouli, ato hoko ke he fakafiliaga he aho lahi.”​​—Iuta 6.

Liuliu fēfē e tau mena momoui fakaagaaga he vahā ha Noa? Ato Fakapuke, ko e tau mena momoui fakaagaaga kelea nei ne fakafaliu ke he tau tino tagata​​—ne nakai ko e finagalo he Atua a ia ma lautolu. (Kene. 6:2, 4) Lafi ki ai, ko e tau agelu ia ne mahani feuaki mo e tau fifine kua taute e lautolu e mena fakalialia. Ne nakai tufuga he Atua e tau mena momoui fakaagaaga ke mahani feuaki mo e tau fifine. (Kene. 5:2) To moumou e tau agelu liuliu mo e kelea muitui nei he magaaho ni he Atua. He mogonei, tuga ne talahau ia Iuta, ko lautolu “ki lalo he pouli,”​​—tuga ko lautolu ha he puipuiaga fakaagaaga.

Magaaho fe mo e puhala fe ne fakamatala a Iesu ke he “tau agaga ha he fale puipui”? Tohi e Peteru na tupu e mena nei he mole e “fakamoui a [Iesu] ke he Agaga.” (1 Pete. 3:18, 19) Mailoga foki, ne pehē a Peteru ne “fakamatala atu” a Iesu. He fakaaoga e Peteru e kupu kua fitā he mole, ne liga fakamatala ai ato tohi e Peteru e tohi fakamua haana. Tuga kua fai magaaho ai he mole e liu tu mai ha Iesu, ne fakapuloa e ia ke he tau mena momoui fakaagaaga kelea kua latatonu ni a lautolu ke tatali ke he fakahala kua lata ma lautolu. Nakai ko e fakamatala kua foaki ha amaamanakiaga ma lautolu. Ko e fakamatala he fakafiliaga. (Iona 1:1, 2) He fakakite e Iesu e tua mo e mahani fakamooli haana ke hoko ke he mate ti fakaliu tu mai ai​​—fakamooli ai kua nakai maeke e Tiapolo ke moua a ia​—​ne ha ha ia Iesu e kakano uho ke talahau pihia e fakahala ia.​​—Ioane 14:30; 16:8-11.

He vahā i mua, to līlī e Iesu a Satani mo e tau agelu ia ti tolo ke he pahua. (Luka 8:30, 31; Fakakite. 20:1-3) Ato hoko ke he magaaho ia, ko e tau mena momoui fakaagaaga nei kua haia a lautolu he pouli fakaagaaga, ti iloa moolioli to fakaotioti a lautolu.​​—Fakakite. 20:7-10.