Pruëbakunam rikätsikuyan angelkuna kayanqanta. ¿Ima pruëbakunapaqtaq parlëkantsik?

Genesis 6:2 textum kënö nin: “Rasumpa Diospa tsurinkunaqa, nunakunapa tsurinkuna shumaqllan kayanqanta rikarmi munapar qallëkuyarqan, y llapan akrayanqanmi warminkuna tikrariyarqan”.

Escritüras Hebrëas nishqanchöqa, ‘rasumpa Diospa tsurinkuna’ y ‘Diospa tsurinkuna’ ninqan palabrakunataqa tarintsik Genesis 6:2, 4; Job 1:6; 2:1; 38:7, y Salmu 89:6 textukunachömi. ¿Imatataq yachatsikuyan tsë textukuna ‘Diospa tsurinkunapita’?

Job 1:6 textuchö “rasumpa Diospa tsurinkuna” nirqa parlëkarqan, Diospa nöpanchö ëllurëkaq o qorirëkaq angelkunapaqmi. Tsëchömi këkarqan, Patsaman rikapakoq shamoq Satanaspis (Job 1:7; 2:1, 2). Jina tsënöllam Job 38:4-7 textuchöpis leyintsik, Diosnintsik Patsata kamarnin “maestra rumita” churariptin “Diospa llapan tsurinkuna sinchipa qaparir paqchillapa alabar” qallëkuyanqanta. Tsëchö Diospa tsurinkuna nirqa, angelkunapaqmi parlëkarqan, porqui tsë witsampaqqa nunaqa manaraqmi kamashqaraqtsu karqan. Jina Salmu 89:6 textuchö “Diospa tsurinkuna” nirqa, Dioswan ciëluchö këkaq angelkunapaqmi parlëkan, y manam ëtsayoq y tulluyoq nunakunapaqtsu.

Tsëpenqa, ¿pikunataq kayarqan Genesis 6:2, 4 textu parlanqan “rasumpa Diospa tsurinkunaqa”? Biblia ninqanta alleq entiendirirmi nintsik, ciëlupita Patsaman shamoq angelkuna kayanqanta.

Ciëluchöqa manam pununakuyantsu ni casakuyantsu nir Jesus parlashqa kaptinmi, wakin nunakunaqa creiyantsu angelkunaqa warmikunawan pununakuyanqanta (Mat. 22:30). Tsënö karpis, atska kutikunachömi angelkunaqa nunaman tikrayarqan, hasta mikuyarqan y upuyarqan nunakuna rurayanqannö (Gen. 18:1-8; 19:1-3). Tsëmi nintsik, nunaman tikrarirqa, angelkunaqa warmikunawan pununakïta puëdiyanqanta.

Tsënö kanqantam, Bibliaqa cläru rikätsikun. Jüdas 6, 7 textuchömi Sodöma markachö täraq nunakuna “warmi pura, ollqu pura mana penqacushpa pununacur, lluta mana allicunata” rurayanqanta parlan, y tsëtam igualatsin, ‘anjelcunapis mana cäsucur llutanta’ rurayanqantawan. Tsë angelkuna y Sodöma markachö nunakunapis, “mana penqacushpa pununacur[mi], lluta mana allicunata” rurayarqan. Jina tsëpaq parlarmi, 1 Pëdru 3:19, 20 (NM) textuchö mana cäsukoq angelkuna rurayanqantaqa igualatsin “Noë kawanqan” witsantawan (2 Pëd. 2:4, 5). Tsëmi Noëpa tiempunchö mana cäsukoq angelkuna rurayanqantaqa igualatsita puëdintsik, Sodöma y Gomörra markachö täraq nunakuna rurayanqan jutsatawan.

Kë pruëbakunata rikarmi nintsik, Genesis 6:2, 4 textu parlanqan, “rasumpa Diospa tsurinkunaqa”, nunaman tikrarkur warmikunawan pununakushqa angelkuna kayanqanta.

Apostul Pëdrum parlarqan, ‘Noë kawanqan witsanchö Diospa paciencian shuyaranqan witsan mana cäsukoq’ espïritukunapaq (1 Pëd. 3:20, NM). Clärum këkan, tsëta nirqa Satanasta qateq angelkunapaqmi parlëkarqan. Jina Jüdaspis pëkunapaqmi kënö nirqan: “Tsenollam waquin caq anjelcunatapis mana cäsucur llutanta rurecuyaptin, allapa tsunyaq paqasman parasiempri cadenarcur Dios llawircushqa juisiu junaq chämonqanyaq” (Jüd. 6).

¿Ima mana allikunatataq rurayarqan tsë mana alli angelkuna Noëpa tiempunchö? Manaraq Apakï Tamya shamuptinmi nunaman tikrayarqan, tsëta rurayänampaq Diosnintsik permïsuta mana qoykaptin (Gen. 6:2, 4). Y manam tsëllatsu, hasta warmikunawanmi punukïkuyarqan, tsë rurayänampaq mana kamashqa këkar (Gen. 5:2). Tsë mana allita ruraq y mana cäsukoq angelkunaqa, Dios dispunishqan höra chämuptinmi ushakäyanqa. Peru tsëkamayaqqa Jüdas ninqannömi, imëka ‘allapa tsunyaq paqaschönö’ carcelashqa cuenta këkäyan.

¿Imëtaq y imanötaq tsë ‘presurëkaq espïritukunata’ Jesus willarqan? Pëdrum willakun, Jesus wanunqampita ‘espïrituchö’ kawariramur tsëta ruranqanta (1 Pëd. 3:18, 19, NM). Jina Pëdruqa, Jesusmi willarqan ninmi. “Willarqan” ninqanqa rikätsikun, Pëdru punta kaq cartanta manaraq qellqanqan witsan pasakushqana kanqantam. Tsëmi rikätsikun, kawariramunqampita ichik tiempukunallata, Jesusqa, mana alli espïritukunata castïguta chaskiyänampaq kaqta willaq ëwanqanta. Awmi, castigashqa kayänampaq kaqtam willarqan (Jon. 1:1, 2). Jesusqa, Diosman markäkunqanrëkur, wanunqanyaq Diosta mana jaqinqanrëkur y kawarimunqanrëkurmi, Diablu mandëta mana puëdinqanta rikätsikurqan, tsëmi kë mana alli espïritukunata, ushakäyänampaq kaqtaqa musyatsita puëdirqan (Juan 14:30; 16:8-11).

Shamoq tiempuchömi, Jesusqa, Satanasta y mana alli angelkunata alli cadenëkur jatun zanja uchkuman jitarkunqa (Lüc. 8:30, 31, NM; Apoc. 20:1-3, NTCN). Tsëpitanam chipyëpa ushakäyanqa. Peru tsë junaq manaraq chämunqanyaqqa, tsë mana cäsukoq espïritukunaqa alläpa paqashchönömi këkäyan (Apoc. 20:7-10, MN).