E iai māfuaaga talafeagai e talitonu ai o loo faasino atu lenei faaupuga i atalii agaga o le Atua. O ā ni faamaoniga?

Ua faapea mai le Kenese 6:2: “Ona vaavaai mai lea o atalii o le Atua moni i afafine o tagata, ua lalelei lava i latou; ona latou ave lea o i latou e fai ma a latou avā, o fafine uma ua mananaʻo i ai.”

O loo faaaogā i Tusitusiga Eperu faaupuga “atalii o le Atua moni” ma ʻatalii o le Atua.’ E maua nei faaupuga i le Kenese 6:2, 4; Iopu 1:6; 2:1; 38:7; ma le Salamo 89:6. O le ā ua faailoa mai i nei mau e faatatau i “atalii o le Atua”?

O loo faasino atu “atalii o le Atua moni” o loo i le Iopu 1:6, i foafoaga agaga sa faapotopoto i luma o le Atua. Sa aofia ai foʻi ma Satani o lē na “fealualuaʻi i le lalolagi.” (Iopu 1:7; 2:1, 2) I se tulaga talitutusa, o loo taʻua foʻi i le Iopu 38:4-7 ʻatalii o le Atua,’ o ē na “alalaga i viiga” ina ua ʻfaataatia e le Atua le maa tulimanu’ o le lalolagi. O i latou o atalii agaga auā e leʻi oo i le taimi na foafoaina ai tagata. O “atalii o le Atua” o loo i le Salamo 89:6, o loo faasino atu i foafoaga agaga a le Atua o loo i le lagi, ae lē o tagata.

O ai “atalii o le Atua moni” o loo taʻua i le Kenese 6:2, 4? E tusa ai ma faamaoniga faale-Tusi Paia, ua talafeagai ona faasino atu i atalii agaga o le Atua na ō mai i le lalolagi.

E faigatā ona talitonu nisi sa naunau agelu i feusuaʻiga. Ua faaalia i fetalaiga a Iesu i le Mataio 22:30, e lē o se fuafuaga a le Atua le faia o faaipoipoga ma feusuaʻiga i le lagi. Peitaʻi, na liutino tagata agelu, ma na oo lava ina aai ma feinu faatasi ma tagata. (Kene. 18:1-8; 19:1-3) O lea, ua talafeagai ai ona faapea atu sa faia e agelu na liutino tagata feusuaʻiga ma fafine.

E iai faamaoniga faale-Tusi Paia e tatou te talitonu ai na faia e nisi agelu feusuaʻiga. Sa faia e tagata Sotoma feusuaʻiga matagā e lē masani ai. I le Iuta fuaiupu e 7, o loo taʻua ai na “soona faitaaga i latou ma faamalieina o latou tuʻinanauga matagā.” Ae i le fuaiupu e 6, o loo taʻua ai ʻagelu o ē na leʻi taofi i lo latou tulaga na iai muamua, a ua tuua le mea na latou nonofo ai.’ Na tutusa na agelu ma tagata Sotoma, auā na faamalie o latou tuʻinanauga i feusuaʻiga e lē masani ai. O agelu lē usiusitaʻi o loo taʻua i le 1 Peteru 3:19, 20, sa iai i “aso o Noa.” (2 Pete. 2:4,5) O lea, na faia e agelu ma tagata Sotoma ma Komoro feusuaʻiga matagā e lē masani ai.

O nei faamaoniga, e talafeagai ona tatou talitonu ai o “atalii o le Atua moni” o loo i le Kenese 6:2, 4, e faasino atu i agelu na liutino tagata ma faia feusuaʻiga lē mamā ma fafine.

Na faailoa mai e Peteru o nei agaga o ē “na lē usiusitaʻi a o faatalitali ma le onosaʻi le Atua i aso o Noa.” (1 Pete. 3:20) O loo faasino atu Peteru i agelu na auai i le fouvalega a Satani. Na taʻua e Iuta agelu “o ē e leʻi taofi i lo latou tulaga na iai muamua,” e faapea na ʻtaofia e le Atua i latou i noataga e faavavau i le pogisa mo le faamasinoga i le aso tele.’​—Iuta 6.

Na faapefea ona lē usiusitaʻi agelu i aso o Noa? A o leʻi oo i le Lolo, na liutino tagata nei agelu, ae e lē o le fuafuaga lea a le Atua mo agelu. (Kene. 6:2, 4) E lē gata i lea, na faia e na agelu feusuaʻiga e lē masani ai. E leʻi foafoaina e le Atua agelu ina ia feusuaʻi ma fafine. (Kene. 5:2) O le a faaumatia na agelu leaga ma lē usiusitaʻi i le taimi atofaina a le Atua. E pei ona taʻua i le Iuta, o loo iai nei agelu i se tulaga “pogisa,” e pei o loo noanoatia i latou i se falepuipui.

O anafea ma na faapefea ona talaʻi atu Iesu i nei “agaga i le falepuipui”? Na tusi Peteru na tupu lenei mea ina ua ʻtoe faaola mai Iesu i le agaga, ona maliu atu lea o ia ma talaʻi.’ (1 Pete. 3:18, 19) Mātau, na taʻua e Peteru na “talaʻi” Iesu ina ua mavae lona toe faatūina mai. E foliga mai na tupu lenei gaoioiga a o leʻi tusia e Peteru lana uluaʻi tusi. Na talaʻia e Iesu i nei agelu leaga le faasalaga talafeagai o le a oo iā i latou. E lē o se talaʻiga e latou te maua ai se faamoemoe, ae o le talaʻiga o le faamasinoga. (Iona 1:1, 2) Ina ua faaalia le faatuatua ma le faamaoni o Iesu seʻia oo i le oti ma lona toetū mai, ua faamaonia ai e leai se pule a Satani iā te ia. O lea, ua iā Iesu le aiā e faalauiloa ai lenei faasalaga.​—Ioa. 14:30; 16:8-11.

I le lumanaʻi, o le a saisaitia e Iesu Satani ma ana agelu ma lafo i le tō e lē gata. (Luka 8:30, 31; Faaa. 20:1-3) A o leʻi oo i lenā taimi, o loo iai pea nei agelu lē usiusitaʻi i le pogisa faaleagaga, ma ua mautinoa lo latou faaumatiaga aʻiaʻi.​—Faaa. 20:7-10.