Buweisi de di e sori taki den na den yeye manpikin fu Gado. Ma san na den buweisi dati?

Genesis 6:2 e taki: „Den manpikin fu a tru Gado kon si taki den umapikin fu libisma ben moi. Dati meki den bigin teki iniwan uma di den ben wani leki wefi.”

Na ini den Hebrew Buku fu Bijbel wi kan feni den wortu „den manpikin fu a tru Gado” nanga „den manpikin fu Gado” na ini Genesis 6:2, 4, Yob 1:6; 2:1; 38:7 nanga Psalm 89:6. San den tekst disi e sori wi fu den ’manpikin disi fu Gado’?

Soleki fa a sori, dan „den manpikin fu a tru Gado” di Yob 1:6 e taki fu den, na yeye di ben kon makandra na fesi Gado. Wan fu den yeye disi ben de Satan di ben abi a gwenti fu „koiri na grontapu” (Yob 1:7; 2:1, 2). Na ini Yob 38:4-7 wi e leisi taki ’den manpikin fu Gado ben prèise en nanga wan tranga sten’ di a ’meki den ukuston’ fu grontapu. A musu fu de so taki den manpikin disi na engel, fu di na a ten dati Gado no ben meki libisma ete. „Den manpikin fu Gado” di kari na ini Psalm 89:6 na engel di e libi na ini hemel nanga Gado. Den a no libisma.

Sobun, suma na „den manpikin fu a tru Gado” di kari na ini Genesis 6:2, 4? Soleki fa Bijbel e sori, dan wi kan frustan taki a tori dati abi fu du nanga den engel fu Gado di ben kon na grontapu.

Son sma no man bribi taki engel ben o wani abi seks nanga libisma. Mateyus 22:30 e taki dati Yesus ben sori taki trow nanga seks no de na ini hemel. Toku engel ben man teki libisma skin son leisi. Den ben nyan èn dringi srefi nanga libisma (Gen. 18:1-8; 19:1-3). Sobun, wi kan taki dati den ben man abi seks nanga umasma fu di den ben teki libisma skin.

Bijbel e sori taki na dati son engel du. Te wi e leisi Yudas 6, 7, dan wi e si taki den man fu Sodom ben sondu fu di den ben gridi fu abi seks na wan fasi di no fiti. Yudas e agersi a sondu disi nanga a sondu fu den ’engel di ben drai baka gi a libi di Gado ben seti gi den sensi a bigin èn di ben gowe libi a tanpresi fu den’. Den engel disi nanga den sma fu Sodom ben du a srefi sortu sondu. Den „ben prisiri fu du hurudu èn den ben gridi fu abi seks na wan fasi di no fiti”. Na ini 1 Petrus 3:19, 20 wi e leisi tu taki trangayesi engel ben de na ini „a ten fu Noa” (2 Petr. 2:4, 5). Sobun, wi kan taki dati den sani di den trangayesi engel du na ini a ten fu Noa, na a srefi leki a sondu fu den sma fu Sodom nanga Gomora.

Disi e yepi wi fu kon frustan taki „den manpikin fu a tru Gado” di kari na ini Genesis 6:2, 4 ben de engel di ben teki libisma skin èn di ben du hurudu nanga umasma.

Na apostel Petrus e taki dati den yeye disi ben „trangayesi Gado di a ben e wakti nanga pasensi na ini a ten fu Noa” (1 Petr. 3:20). A de krin taki Petrus ben e taki fu yeye di ben horibaka gi Satan di a opo ensrefi teige Gado. Yudas e taki fu engel „di ben drai baka gi a libi di Gado ben seti gi den sensi a bigin èn di gowe libi a tanpresi fu den”. A e taki dati Gado „tai den nanga têgo keti na ini deki dungru, teleki den kisi krutu na a bigi dei”.—Yud. 6.

Na sortu fasi den engel trangayesi Gado na ini a ten fu Noa? Fosi a Frudu, den ogri engel disi ben teki libisma skin. Ma Gado no ben abi dati na prakseri gi den kwetikweti (Gen. 6:2, 4). Boiti dati, den engel di ben abi seks nanga umasma ben du wan bigi sondu fu di Gado no ben meki den fu du dati (Gen. 5:2). Den trangayesi engel disi o kisi pori na wan ten di Gado poti. Ma soleki fa Yudas e taki, dan now den de na ini „deki dungru”. Dati wani taki den de na ini wan agersi strafu-oso.

O ten èn fa Yesus preiki gi „den yeye di de na strafu-oso”? Petrus skrifi taki disi pasa baka di Yesus „kon na libi leki wan yeye” (1 Petr. 3:18, 19). Den tra vers na ini 1 Petrus kapitel 3 e sori taki Yesus ben preiki gi den yeye bifo Petrus skrifi en fosi brifi. Sobun, soleki fa a sori, dan wan pisi ten baka di Yesus kisi wan opobaka, a taigi den ogri yeye sortu strafu den o kisi. A no ben e preiki fu gi den howpu, ma fu krutu den (Yona 1:1, 2). Yesus ben abi ala reti fu krutu den yeye na a fasi dati fu di a sori bribi, a tan gi yesi na Gado te na dede èn baka dati a kisi wan opobaka. Na so a sori taki Didibri no ben abi krakti na en tapu.—Yoh. 14:30; 16:8-11.

Na ini a ten di e kon, Yesus o tai Satan nanga den ogri engel disi, dan a o fringi den go na ini a dipi peti di no abi gron (Luk. 8:30, 31; Openb. 20:1-3). Ma solanga dati no pasa ete, den trangayesi engel disi de na dungru na agersi fasi èn a de seiker taki den o kisi pori te fu kaba.—Openb. 20:7-10.