Informasaun husi Bíblia hatudu katak liafuan neʼe mak kona-ba Maromak nia oan sira iha lalehan. Maibé iha neʼebé mak ita bele hetan informasaun neʼe?

Iha Gênesis 6:2 hatete: “Maromak loos nia oan sira komesa atu haree ema nia oan-feto sira, sira haree katak feto sira-neʼe bonita, no hola sira nuʼudar feen, katak feto hotu neʼebé sira hili.”

Iha Eskritura Lia-Ebraiku, liafuan “Maromak loos nia oan sira” no “Maromak nia oan sira” mosu iha Gênesis 6:2, 4; Jó 1:6; 2:1; 38:7 no Salmo 89:6. Eskritura sira-neʼe fó-hatene saida kona-ba “Maromak nia oan sira”?

“Maromak loos nia oan sira” iha Jó 1:6 mak kona-ba anju sira neʼebé hamutuk ho Maromak iha lalehan, no sira ida mak Diabu Satanás, neʼebé foin “laʼo bá-mai iha rai”. (Jó 1:7; 2:1, 2) Iha Jó 38:4-7 mós temi kona-ba “Maromak nia oan sira” neʼebé “haklalak hamutuk ho haksolok” bainhira Maromak halo mundu. Sira-neʼe mak Maromak nia oan sira iha lalehan, tanba Maromak seidauk kria ema. Nuneʼe mós iha Salmo 89:6 neʼebé temi kona-ba “Maromak nia oan sira”, sira laʼós ema, maibé anju sira iha lalehan neʼebé hamutuk ho Maromak.

Entaun, sé mak “Maromak loos nia oan sira” neʼebé temi iha Gênesis 6:2, 4? Hodi tuir informasaun neʼebé ita foin lee husi livru Jó no Salmos, klaru katak ida-neʼe koʼalia kona-ba anju sira iha lalehan neʼebé tun ba rai.

Ema balu iha dúvida katak anju sira la bele iha hakarak atu halo relasaun seksuál ho ema iha rai. Jesus nia liafuan iha Mateus 22:30 esplika katak la iha duni relasaun seksuál no kaben iha lalehan. Maski nuneʼe, Bíblia hatudu katak anju balu troka sira-nia isin-lolon hodi sai fali ema, no konsege han-hemu hamutuk ho ema. (Gên 18:1-8; 19:1-3) Nuneʼe, ita bele hatene katak bainhira anju aat sira troka sira-nia isin-lolon hodi sai fali ema, sira mós konsege halo relasaun seksuál ho feto sira.

Eskritura sira husi Bíblia mós hatudu katak anju sira bele halo hahalok hanesan neʼe. Porezemplu, Judas 6, 7 kompara mane iha Sodoma neʼebé kaan atu halo sala-foʼer, ho “anju sira neʼebé lakon sira-nia kmanek maibé husik sira-nia kadunan”. Buat neʼebé hanesan ho ema iha Sodoma no anju aat sira mak sira “halo buat aat oioin . . . no hafoʼer an la tuir tan ema nia lisan”. Eskritura iha 1 Pedro 3:19, 20 mós apoia katak anju aat sira halo sala-foʼer iha Noé nia tempu. (2 Ped 2:4, 5) Tan neʼe, anju aat sira-nia hahalok iha Noé nia tempu mak hanesan deʼit ho ema nia sala iha Sodoma no Gomorra.

Informasaun hirak-neʼe ajuda ita atu hatene katak “Maromak loos nia oan sira” iha Gênesis 6:2, 4 mak kona-ba anju sira neʼebé troka sira-nia isin-lolon sai fali ema hodi halo relasaun seksuál ho feto sira iha mundu.

Apóstolu Pedro hatudu katak anju aat sira-neʼe mak anju sira neʼebé “uluk lakohi rona, . . . iha Noé nia loron, wainhira . . . Maromak hatudu pasiénsia barak”. (1 Ped 3:20) Klaru katak Pedro koʼalia kona-ba anju sira neʼebé hili atu hamutuk ho Satanás hodi kontra hasoru Maromak. Livru Judas mós hatete kona-ba “anju sira neʼebé lakon sira-nia kmanek maibé husik sira-nia kadunan” no hatete katak “Maromak kaer sira ho korrente ba nafatin iha nakukun laran, atu simu justisa iha loron boot”.—Jud 6.

Hodi halo saida deʼit mak anju aat sira kontra hasoru Maromak iha Noé nia tempu? Antes Rai-Nabeen, sira mai toʼo rai no troka sira-nia isin-lolon sai fali ema hodi kontra Maromak nia hakarak. (Gên 6:2, 4) Liután neʼe, sira mós halo hahalok foʼer oioin hodi halo relasaun seksuál ho feto sira. Maromak la kria anju sira atu halo relasaun seksuál ho feto iha rai. (Gên 5:2) Tan neʼe, Maromak hakotu lia atu halakon anju sira-neʼe iha tempu neʼebé loos. Maibé toʼo tempu neʼebá, sira iha “nakukun laran”, ka dadur laran iha dalan espirituál.

Maibé oinsá no bainhira mak Jesus haklaken ba “anju aat sira iha dadur laran”? Pedro hatete katak Jesus halo nuneʼe depois “Maromak halo nia moris iha espíritu”. (1 Ped 3:18, 19, MF) Pedro nia liafuan mós hatudu katak bainhira nia hakerek ninia karta primeiru neʼe, Jesus haklaken ona ba anju aat sira. Ida-neʼe hatudu katak karik depois Jesus moris hiʼas fali, nia fó avizu kona-ba kastigu neʼebé sira sei hetan, laʼós “haklaken” hodi lori esperansa ba sira. (Jonas 1:1, 2) Jesus fiar metin toʼo mate no depois hetan moris-hiʼas, ida-neʼe hatudu katak Diabu la iha ona kbiit ba nia. Tan neʼe, Jesus iha direitu atu fó sai avizu kastigu nian hanesan neʼe.—Joao 14:30; 16:8-11.

Iha futuru, Jesus sei kaer Satanás no anju aat sira hodi kesi ho korrente no soe tun ba “rai-kleʼan”. (Lc 8:30, 31, MF; Apok 20:1-3, MF) Toʼo tempu neʼebá, Satanás no anju aat sira sei iha nakukun laran no hein ba tempu neʼebé Maromak sei halakon sira ba nafatin.—Apok 20:7-10.