E tumu maitai no te manaˈo e no te mau tamarii varua a te Atua teie parau. No te aha?

Te na ô nei te irava matamua: “Ua hiˈo aˈera te tamarii a te Atua ra i te mau tamahine a te taata nei, e te maitai ra; ua rave ihora ratou i ta ratou i hinaaro ra ei vahine.”—Gen. 6:2.

I roto i te mau Papai Hebera, e itehia te parau te “tamarii a te Atua” i roto i te Genese 6:2, 4; Ioba 1:6; 2:1; 38:7; e te Salamo 89:6. Eaha ta teie mau irava e faaite maira no nia i teie mau “tamarii a te Atua”?

O vai “te mau tamarii a te Atua” i roto i te Ioba 1:6? Mea papu e o te mau melahi o tei putuputu i mua i te Atua. O Satani atoa, o tei ‘haere noa na i nia i te fenua nei.’ (Ioba 1:7; 2:1, 2) Oia atoa, ia au i te Ioba 38:4-7, “ua pii noa te mau tamarii atoa a te Atua i te oaoa” a ‘tuu ai o ˈna i te ofai tihi’ o te fenua. Mea papu e te parauhia ra no te mau tamaiti melahi, aita hoi te taata i poietehia ˈtura. O ratou atoa ïa ‘te mau tamarii a te Atua’ o te Salamo 89:6 o te ora ra e o ˈNa i nia i te raˈi, e ere te taata.

O vai ïa te “tamarii a te Atua” o te Genese 6:2, 4? Ia au i te mau haapapuraa o te mau irava i faahitihia ˈtura, mea tano ia manaˈo e no te tamarii varua a te Atua tei haere mai i te fenua nei teie parau.

Mea fifi no vetahi ia farii e ua hinaaro te mau melahi e taati. Ia au i te mau parau a Iesu i roto i te Mataio 22:30, aita e faaipoiporaa e e taatiraa i nia i te raˈi. Ua tia râ i te mau melahi ia rave i te tahi taime i te tino taata, ia amu e ia inu atoa e te taata. (Gen. 18:1-8; 19:1-3) Mea tano ïa ia manaˈo e a rave ai i te tino taata, ua tia ia ratou ia taati e te vahine.

Te vai ra te tumu Bibilia no te tiaturi e ua na reira iho â vetahi mau melahi. Te faaau ra te Iuda 6, 7 i te hara a te taata no Sodoma, tei pee noa i to ratou mau hinaaro tia ore, i ta te mau melahi o “tei ore i haapao i to ratou iho toroa ra, faarue ihora râ i to ratou parahiraa.” Eaha te tuatiraa? Ua rave hua te mau melahi e to Sodoma i “te peu taiata e te hinaaro tia ore.” Te faahiti atoa ra te Petero 1, 3:19, 20 i te mau melahi faaroo ore i te “anotau ia Noa ra.” (Pet. 2, 2:4, 5) Te auraa ïa e e nehenehe e faaauhia te haerea o te mau melahi faaroo ore i te anotau o Noa i te hara a Sodoma e Gomora.

E taa maitai ia tatou teie parau ia ite tatou e te “tamarii a te Atua” o te Genese 6:2, 4, o te mau melahi ïa o tei rave i te tino taata e tei faaturi e te vahine.

Ia au i te aposetolo Petero, o teie mau varua tei “ore i faaroo i mutaa ihora, i te faaoromairaa roa o te Atua a tiai ai i te anotau ia Noa ra.” (Pet. 1, 3:20) Te parau ra ïa Petero no nia i te mau melahi tei maiti e apiti i te orureraa hau a Satani. Te faahiti ra Iuda i te mau melahi “tei ore i haapao i to ratou iho toroa ra, faarue ihora râ i to ratou parahiraa.” Ua parau o ˈna e ua ‘tapea te Atua ia ratou i te fifi matara ore i raro aˈe i te pouri, e tae noa ˈtu i te haavaraa i te mahana rahi ra.’—Iuda 6.

Mea nafea te mau melahi i te orure-hau-raa i te anotau o Noa? Hou te diluvi, ua rave teie mau varua ino i te tino taata. E ere hoi tera ta te Atua i opua no ratou. (Gen. 6:2, 4) E ohipa tia ore atoa ta ratou i rave a taati ai e te vahine. Aita ratou i poietehia no te taati e te vahine. (Gen. 5:2) E haamouhia teie mau melahi faaroo ore e te ino i te taime ta te Atua i faaoti. Te tapao nei Iuda e i teie nei, tei roto ratou i te “pouri,” mai te huru ra e ua tapeahia ratou.

Afea e mea nafea Iesu i te aˈoraa i teie mau ‘varua i roto i te tapearaa’? Ia au ia Petero, i muri aˈe i te faatia-faahou-raahia Iesu. (Pet. 1, 3:18, 19) A tapao atoa na e te parau ra Petero e “i aˈo” na Iesu. Ua tupu aˈena ïa te reira hou Petero a papai ai i ta ˈna rata matamua. E au ra ïa e tau taime i muri aˈe i to ˈna tia-faahou-raa, ua aˈo Iesu i te mau varua ino no nia i te faautuaraa tano e tiai ra ia ratou. Aita Iesu i horoa i te tahi noa ˈˈe tiaturiraa, i te hoê râ parau haava. (Iona 1:1, 2) Ua faaite Iesu i to ˈna faaroo e taiva ore e tae roa ˈtu i te pohe e ua faatia-faahou-hia mai oia. E haapapuraa te reira e aore e mana to te Diabolo i nia ia ˈna. Ua tia ïa ia Iesu ia faahiti i tera parau faahapa.—Ioa. 14:30; 16:8-11.

I muri aˈe, e ruuruu e e huri Iesu ia Satani e i teie mau melahi i roto i te abuso. (Luka 8:30, 31; Apo. 20:1-3) A tiai noa ˈi i taua taime ra, tei roto teie mau varua faaroo ore i te pouri taˈotaˈo e e haamouhia iho â ratou.—Apo. 20:7-10.