Nuu razón ni cusihuinni dxandíʼ espíritu laacabe. Gunáʼ nga ca razón riʼ yaʼ.

Génesis 6:2 na: «Ca xiiñiʼ Dios ni dxandíʼ que biiyacabe ca xiiñidxaapaʼ ca binni que sicarucaʼ; ne gúpacabe stale xheelacabe, guiráʼ ni gulícabe».

Stiidxaʼ Dios ni gucuá lu diidxaʼ hebreu riquiiñeʼ diidxaʼ «ca xiiñiʼ Dios ni dxandíʼ» ne «guiráʼ xiiñiʼ Dios» lu Génesis 6:2, 4; Job 1:6; 2:1; 38:7 ne lu Salmo 89:6. Xi cuzeeteʼ ca textu riʼ de ca «xiiñiʼ Dios» yaʼ.

«Ca xiiñiʼ Dios ni dxandíʼ» ni cuzeeteʼ Job 1:6 nga ca binni de espíritu ni bidagulisaa nezalú Dios. Ládecabe zeeda Binidxabaʼ, ni zeeda de yegudii ti bieque lu guidubi naca Guidxilayú (Job 1:7; 2:1, 2). Ne lu Job 38:4-7 ridúʼndanu sicaríʼ: «Guiráʼ ca xiiñiʼ Dios bizulú bisisácacaʼ laabe né ridxi nadipaʼ dede gudapanacaʼ» ora gudixhe Dios guié ni naaze Guidxilayú. Ca xiiñiʼ Dios ni rieeteʼ raríʼ nga ca ángel, purtiʼ dxiqué caʼruʼ chaʼ nin ti binni guidxilayú. Ne ora ruzeeteʼ Salmo 89:6 de ca «xiiñiʼ Dios» la? caniʼni de ca binni de espíritu ni nuuné Dios guibáʼ, cadi binni de beela casi laanu.

Yanna, tuu nga «ca xiiñiʼ Dios ni dxandíʼ», cani cuzeeteʼ Génesis 6:2, 4. Pur modo cusiene Biblia ni, zanda guininu binni de espíritu nga cani beeda lu Guidxilayú riʼ.

Nuu binni raca nagana para laacaʼ guni crecaʼ guyuu ángel ni guyuulaʼdxiʼ gatané gunaa, purtiʼ Jesús guníʼ guirutiʼ richaganáʼ guibáʼ ne ratané gunaa (Mat. 22:30). Peru huayuu ángel ni gupa cuerpu casi binni, dede gudocaʼ ne güéʼnecaʼ binni (Gén. 18:1-8; 19:1-3). Nga runi, nápanu razón para guni crenu dxandíʼ gutané ca ángel que gunaa, purtiʼ gunda gúpacaʼ cuerpu casi binni.

Lu Biblia zeeda caadxi razón para guni crenu zacapeʼ nga gúcani. Judas 6, 7 ruchaaga ni biʼniʼ ca binni de Sodoma, cani biʼniʼ cosa dxabaʼ ni gunabaʼ beela ládicaʼ laacaʼ, né ni biʼniʼ «ca ángel ni qué niná ñaana ra bisaana Dios laaca». Nga runi, cásica bichee ca ángel zaqueca nga bichee ca binni de Sodoma, purtiʼ «uyuu nécabe ni cadi xheela cabe». Ne laaca ca ángel ni qué nuzuubaʼ diidxaʼ riʼ nga na 1 Pedro 3:19, 20 bibánicaʼ dxi stiʼ Noé (2 Ped. 2:4, 5). Nga runi, ni biʼniʼ ca ángel ni bidxiideche Dios zeeda gácani cásica ni biʼniʼ ca binni de Sodoma ne Gomorra.

Pur guiráʼ ni maʼ bidúʼyanu, zanda guininu «ca xiiñiʼ Dios ni dxandíʼ» ni rieeteʼ lu Génesis 6:2, 4 nga ca ángel ni gúpacaʼ cuerpu casi binni ne gutanecaʼ gunaa.

Apóstol Pedru guníʼ «qué nuzuuba ca [espíritu] que diidxa chiqué dxi bizáʼ Noé arca» (1 Ped. 3:20). Rihuinni dxíchica binni de espíritu nga cani guyuu lade ca xpinni Binidxabaʼ. Judas laaca bicaa de «ca ángel ni qué niná ñaana ra bisaana Dios laaca» ne laaca guniʼbe «ma nuseguyoo Dios laaca xaʼna guelacahui ni qué zaluxe, para cueza ca dxi cuidxi Dios cuenta laacaʼ» (Jud. 6).

Xi bisihuinni qué nuzuubaʼ ca ángel que diidxaʼ ca dxi bibani Noé. Ante guiaba Nisaguié naroʼbaʼ que gunda gúpacabe cuerpu casi binni, neca qué ñuni mandar Dios laacabe ñúnicabe zaqué (Gén. 6:2, 4). Ne ni jma naxoo bíʼnicabe nga gutanécabe gunaa, ti cosa ni cadi naquiiñeʼ gúnicabe purtiʼ cadi para ngue bizáʼ Dios laacabe (Gén. 5:2). Ca ángel qué iquiiñeʼ ne qué ruzuubaʼ diidxaʼ riʼ zanitilucaʼ dxi naguixhe Dios guni ni. Nga runi, casi bicaa Judas, nuucabe lu «guelacahui» purtiʼ qué gánnacabe xi guiráʼ chiguni Dios.

Padxí ne ximodo byuiʼné Jesús «ca espíritu yeguyoo» que diidxaʼ yaʼ. Lu ca diidxaʼ guníʼ Pedru rusihuinni bizaaca nga despué de biasa Jesús lade gueʼtuʼ, dxi maʼ espíritu laabe (1 Ped. 3:18, 19, TNM). Ne Pedru na «yegüí né» Jesús laacabe diidxaʼ. Modo biquiiñeʼ Pedru diidxaʼ ca cusihuinni guca ni ante gucaabe primé guiʼchiʼ stibe. Nga runi, ruluíʼ despué de biasa Jesús lade gueʼtuʼ gúdxibe ca ángel malu que xi castigu caquiiñeʼ guicaacaʼ. Qué ñábidibe laacaʼ nuu xiixa galán para laacaʼ, sínuque gúdxibe laacaʼ gánnacaʼ zusabanáʼ Dios laacaʼ (Jon. 1:1, 2). Gunda gudxi Jesús ca ángel malu que xi zazaacacaʼ, purtiʼ gúpabe fe, qué nudxiidéchebe Jiobá dede dxi gútibe ne maʼ biásabe lade gueʼtuʼ, nga rusihuinni qué zanda gucaa Binidxabaʼ laabe gúnibe ni na (Juan 14:30; 16:8-11).

Qué zandaa, zundiibi Jesús Binidxabaʼ ne ca ángel ni qué nuzuubaʼ diidxaʼ ne zulaabe laacaʼ ndaaniʼ «dxa bizé roʼ» que (Luc. 8:30, 31; Apoc. 20:1-3). Laga guedandá dxi ca, ziuuruʼ ca espíritu ni qué nuzuubaʼ diidxaʼ que xaʼnaʼ gueelacahui. Ne guirutiʼ qué zanda gulá laacabe ora guedandá dxi guinitilúcabe (Apoc. 20:7-10).