¿Jumajj amttati?
¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼma:
Jan walinakatak Biblia apnaqapki ¿uk kunjamsa uñjañasa?
Yaqhepajj Biblia janjasin kawkïr tʼaqtï nayraqat uñjapki ukwa liytʼapjje ukat ukas yanaptʼkaspa ukham amuyapjje. Ukampis cheqa cristianonakajj janiw Biblian yanaptʼap ukham thaqhapkiti. Jan ukasti Bibliat sum yatjjatapjje (12/15, 3 jana).
“Akapachajj” tʼunjatäkani ukhajj ¿kunas pasani?
“Akapachajj” tukusiniwa sasajja, janiw Oraqen tʼunjäwipat parlkiti, antisas Diosan munañap jan lurapki ukanakan tʼunjäwipatwa parlaski (1 Juan 2:17). Ukhamajj aka Oraqesa ukat suma jaqenakasa qhespiyatäpjjaniwa (1/1, 5 janat 7 janakama).
Abelajj jiwatäkchisa, ¿kunjamsa parlaskakistu? (Heb. 11:4.)
Jupajj chʼollqhe iyawsäwinïnwa. Jiwasajj jupatwa yateqassna. Jichhürunakan iyawsäwip toqew parlaskakistu (1/1, 12 jana).
¿Kunanakas Jehová Diosat jitheqtayistaspa?
Trabajo jan ukajj profesión, kuna kasta kʼuchirtʼäwinaksa ajlltan ukanaka, tamat jaqsut familiarampi chikachasiña, jichhak uñstki uka aparatonak jan sum amuyasis apnaqaña, kʼumar jakasiñ toqet sinti llakisiña, qollqe munaña ukat jachʼa jachʼa tukuña (1/15, 12 janat 21 janakama).
Moisesajj wali altʼat chuymanïnwa, ¿kunsa jupat yateqassna?
Moisesajj pʼeqtʼirjamajj janiw jachʼa jachʼa tukkänti ni jupa pachparukis atiniskänti, jan ukasti Jehová Diosaruw atinisïna. Jiwasajj janipuniw kun lurañ sum yatisasa, chʼamanïsasa jan ukajj peqtʼirïsas jachʼa jachʼa tukuñ munktanti, jan ukasti Jehová Diosaruw confiyasiñ muntanjja (Pro. 3:5, 6). (2/1, 5 jana.)
¿Jiwatat jaktanipkani ukanakajj kawkins jakapjjani?
144.000 ajllitäpki ukanakakiw alajjpachan jakapjjani. Ukat jila partejja aka Oraqen wiñay jakasiñatakiw jaktanipjjani (3/1, 6 jana).
Israelitanakajj ‘chuymanakapan janiw Diosar uñtʼapkänti’ ukajja, ¿kun sañs muni? (Jer. 9:26.)
Jupanakajj janiw Jehová Diosar taqe chuyma istʼjjapjjänti ukat kunanakatï chuymapansa, amuyunakapansa ukat amtanakapansa Diosamp sum apasiñatak jarktʼkaspäna ukanakwa apanukupjjañapäna (Jer. 5:23, 24). (3/15, 9 ukat 10 jananaka.)
¿Kunatsa Jesusajj kusisit jakasïna?
Jesusajj Diosan munañap lurañatakiw jakäna. Jupajj awkiparusa ukat jaqenakarus wal munasïna. Ukhamarusa, Jesusajj Awkipan munatätapsa askit uñjatätapsa sum yatïna. Ukanakaw wali kusisit jakasiñatakejj munasi (4/1, 4 ukat 5 jananaka).
¿Diosan markapajj aka Oraqen kunjam uttʼayatäpjjesa?
Oraqpachankir Jilïr Irpirinaka, sucursal sarayirinaka, tamanak tumptʼir jilatanaka, taman irpir chuymaninaka, tamanaka ukat yatiyirinaka (4/15, 29 jana).
¿Diosajj juiciop apayasajj sinttʼasïnwa sasajj kunats sissna?
Jupajj jan wali jaqenakar juiciop apayanisajj janiw kusiskiti (Eze. 33:11). Kuntï nayra tiempon lurkäna ukanakajj wali munasirïtapwa uñachtʼayistu, janïr juicio apayankasajj yatiyapunirïnwa. Ukajja, jutïrin utjkani uka juicionakapat qhespiñatakiw mä suytʼäw churistu (5/1, 5 ukat 6 jananaka).
Jan wali luririnakarojja, ¿israelitanakajj lawar chʼakkatasat jiwayapjjerïna?
Janiwa. Nayrajja, walja markanakanwa ukham lurapjjerïna. Ukampis Hebreo Arut Qollan Qellqatanak qellqaskäna uka tiemponjja, jan wali luririnakar janïr lawar chʼakkatkasajj jiwayapjjänwa (Lev. 20:2, 27). Ukjja taqenin uñjapjjañapatakiw ukham lurapjjerïna (5/15, 13 jana).
¿Kunatsa oraqpachan sumankañajj jan utjkpacha?
Kunattejj janiw jupanak pachpa apnaqasiñatak luratäpkiti (Jer. 10:23). Ukat niyakejjay Supayajj akapach apnaqchejja, jaqenakajj janiw sumankañ apanipkaspati (1 Juan 5:19). (6/1, 16 jana.)
