Eski ou rapel?

Eski ou’n lir byen bann dernyen nimero Latour Veyer? Be, vwar si ou kapab reponn sa bann kestyon swivan:

Ki si sa bibliomancy e ki mannyer bann Kretyen i devret konsider li?

Bibliomancy i ler en dimoun i zis ouver Labib koumsa menm an krwayan ki premye verse ki son lizye i bat lo la pou ed li. Bann vre Kretyen pa enterpret bann siny. Plito, zot etidye Labib pour ganny konnesans egzakt ek gidans Bondye.​—15/12-E, paz 3.

Ki sa “lemonn” ki pou disparet?

Sa “lemonn” ki pou disparet i bann imen ki pa pe viv zot lavi an armoni avek lavolonte Bondye. (1 Zan 2:17) Later ek bann imen fidel pou sirviv.​—1/1-SC, paz 5-7.

Menm si i ti mor, ki mannyer Abel i ankor pe koz avek nou? (Ebr. 11:4)

I fer li atraver lafwa. Nou kapab aprann avek son lafwa e fer zefor pour imit li. Son legzanp i ankor vivan.​—1/1-SC, paz 12.

Dan ki serten domenn lavi nou devret evite elwanny nou avek Bondye?

Serten se: nou lanplwa ouswa karyer, detant ek divertisman ki nou swazir, nou relasyon avek en dimoun ekskli, fason ki nou servi teknolozi, nou konsern pour nou lasante, en move pwennvi lo larzan, e met tro bokou lanfaz lo nou pwennvi ouswa pozisyon.​—1/1-SC, paz 12-21.

Ki nou aprann avek limilite Moiz?

Olye vin fyer akoz son lotorite, Moiz ti depan lo Bondye e non pa lo son lekor. Nou anvi annan konfyans dan Zeova plito ki annan lanvi pour pozisyon, lotorite ouswa vin fyer akoz nou abilite personnel. (Prov. 3:5, 6)​—1/3-SC, paz 5.

Kote bann dimoun ki resisite pou reste?

En pti group 144,000 pou viv dan lesyel. Me, laplipar dimoun ki pou resisite pou lo later e zot pou annan sa posibilite pour viv pour touzour lo la.​—1/3-E, paz 6.

Pour bann Izraelit, ki i ti vedir pour zot “sirkonsi zot leker”? (Zer. 9:26)

Zot ti touzour pe rebele e alor zot ti pou bezwen retir tou sa ki ti pe anpes zot leker reazir, setadir zot ti devret koriz zot fason panse, santiman ouswa motivasyon ki pa ti an armoni avek sa ki pour Bondye. (Zer. 5:23, 24)​—15/3-SC, paz 9-10.

Dan ki fason Zezi i legzanp en dimoun ki son lavi ti annan en vre bi?

I ti anvi fer lavolonte Bondye e sa ti son bi dan lavi. I ti kontan son Papa en kantite e i ti kontan bann dimoun. Anfet, Zezi ti konnen ki son Papa ti kontan li e i ti annan son laprouvasyon. Sanmenm lakle ki fer lavi annan en vre bi.​—1/4-E, paz 4-5.

Kwa ki enkli dan lorganizasyon Bondye lo later?

I enplik Konsey Direkter, komite biro brans, bann ansyen, kongregasyon ek bann Temwen endividyelman.​—15/4-SC, paz 29.

Akoz nou kapab dir ki Bondye pa ti kriyel ler i ti egzekit son zizman?

Zeova pa pran plezir dan lanmor bann move dimoun. (Ezek. 33:11) Son bann aksyon lepase i montre ki i averti bann dimoun avan ki i egzekit zizman. Sa i kapab donn nou lespwar ki nou pou kapab sirviv sa zizman ki pe vini.​—1/5-E, paz 5-6.

Eski bann Izraelit ti egzekit bann kriminel par met zot anpandan lo poto?

Non. Bann lezot nasyon ki ti fer sa, pa bann Izraelit. Anfet, letan ki Lekritir Ebre ti pe ganny ekrir, bann dimoun ki ti fer bann move keksoz ti premyerman ganny met a mor par ganny saboule avek ros. (Lev. 20:2, 27) Apre sa, zot lekor ti ganny met anpandan lo poto konman en lavertisman pour lezot.​—15/5, paz 13.

Akoz i enposib pour imen anmenn lape?

Menm si imen in kapab akonplir bokou, zot napa sa abilite pour diriz zot lepa. (Zer. 10:23) Satan ki pe kontrol sa lemonn, alor bann imen pa pou kapab anmenn lape. (1 Zan 5:19)​—1/7-SC, paz 16.