¿Nemanduʼápa koʼã mbaʼére?
¿Rehesaʼỹijópa raʼe umi rrevísta Ñemañaha osẽ ramovéva? Ehechamína ikatúpa nemanduʼa koʼã mbaʼére:
¿Mbaʼépa pe bibliomancia, ha mbaʼéichapa kristianokuéra ohecha vaʼerã upéva?
Upéva heʼise peteĩ tapicha oavriha la Biblia ha olee pe téxto ohecha raẽvéva, oimoʼãgui upépe ojuhutaha pe konsého oikotevẽva. Umi kristiáno añetegua ndoiporúi mbaʼeveichagua aguería, síno ohesaʼỹijo la Biblia ikatu hag̃uáicha oikuaa porã Jehovápe ha osegi ikonsého. 12/15, páh. 3.
¿Mbaʼépa hína pe “múndo” ohasa térã opátava?
Pe “múndo” ohasátava haʼe hína entéro yvypóra ndojapóiva Ñandejára rembipota (1 Juan 2:17). Ko Yvy ha umi yvypóra ipyʼaporãva noñehundimoʼãi. 1/1, páh. 5-7.
¿Mbaʼérepa ojeʼe Abel osegiha gueteri oñeʼẽ omanómaramo jepe? (Heb. 11:4)
Haʼe osegi oñeʼẽ ijerovia rupive. Ñande ikatu ñaaprende chugui ha jajerovia ñande pyʼaite guive. Abel ehémplo oporopytyvõ koʼág̃a peve. 1/1, páh. 12.
¿Mbaʼe mbaʼépa ikatu ñanemomombyry Jehovágui nañañatendéiramo?
Por ehémplo: ñande traváho, umi vyʼarã, oĩrõ ñane família ohejáva Jehovápe, pe teknolohía, jajepyʼapyeterei ñandejehe, pláta ha ñañemombaʼeguasu. 1/15, páh. 12-21.
¿Mbaʼe ehémplopa oheja ñandéve Moisés hekomirĩ rupi?
Haʼe arakaʼeve noñemombaʼeguasúi oñemeʼẽ haguére chupe autorida ha ndojeroviái ijehénte, síno Ñandejárare. Ndovaléi ñañembotuicha térã ñañemombaʼeguasu jarekóramo autorida ỹrõ ñandekatupyry haguére. Upéva rangue, jajerovia vaʼerã Jehováre ñande pyʼaite guive (Prov. 3:5, 6). 2/1, páh. 5.
¿Moõpa oikóta umi oñemoingove jeýva?
Oĩta 144.000 oikótava yvágape. Péro hetave oĩ oñemoingove jeýtava oiko hag̃ua ko yvy ape ári opa árare. 3/1, páh. 6.
¿Mbaʼérepa jaʼe heta hudío Jeremías tiempopegua ‘noñesirkunsidái hague ikorasõme’? (Jer. 9:26)
Haʼekuéra oñemoĩ Jehováre ha nokambiaséi umi mbaʼe omoĩ vaíva chupekuéra henondépe, tahaʼe opensáva, oipotáva ha omomýiva chupekuéra (Jer. 5:23, 24). 3/15, páh. 9, 10.
¿Mbaʼérepa Jesús oiko vaʼekue vyʼápe?
Haʼe ojapo vaʼekue Ñandejára rembipota, ohayhu vaʼekue itúvape ha yvyporakuérape ipyʼaite guive, ha oikuaa itúva ohayhu ha oguerohoryha chupe. 4/1, páh. 4, 5.
¿Mbaʼe mbaʼépa oĩ Jehová organisasión ko yvy ariguápe?
Pe Kuérpo Governánte, umi komite de sukursál, umi superintendénte viahánte, ansianokuéra, kongregasionkuéra ha maranduharakuéra. 4/15, páh. 29.
¿Mbaʼérepa jaʼekuaa Ñandejára naiñañái hague okastigárõ guare umi hekoañávape?
Jehová ndovyʼái ohundíramo umi tekove añápe (Ezeq. 33:11). Haʼe ningo oporohayhu, ha umi mbaʼe yma ojapo vaʼekue ohechauka oavisa raẽha mbaʼépa ojapóta. Upéva omeʼẽ ñandéve esperánsa ikatutaha jajesalva ohundi vove umi tekove aña. 5/1, páh. 5, 6.
¿Ojukápa rakaʼe isrraelitakuéra umi mbaʼe vai apohápe omosaingóvo chupekuéra peteĩ yvyráre?
Nahániri. Heta tetã yma guare ojapo upéva, péro umi isrraelíta ojukámi umi hembiapo vaietereívape ojapívo chupekuéra itápe (Lev. 20:2, 27). Upe rire oñemosaingo hetekue yvyráre ojehechauka hag̃ua opavave isrraelítape oñatende vaʼerãha ojapóva. 5/15, páh. 13.
¿Mbaʼérepa yvyporakuéra ndaikatúi ogueru pyʼaguapy ko yvy ape ári?
Añetehápe yvyporakuéra ojapóma heta mbaʼe iporãva, péro ndaikatúi ojapo mbaʼeve hekoitépe ijehegui reínte (Jer. 10:23). Satanás oisãmbyhy ko múndo, upévare yvyporakuéra ndaikatúi ogueru pyʼaguapy (1 Juan 5:19). 6/1, páh. 16.
