BE HIẸ FLIN YA?

Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo na kanbiọ he bọdego helẹ:

Etẹwẹ nọ yin yiylọdọ bibliomancie, podọ nukun tẹwẹ Klistiani lẹ dona nọ yí do pọ́n ẹn?

Bibliomancie zẹẹmẹdo nado hùn Biblu do weda etọn depope ji poun, bo hia onú tintan he ji nukun mẹtọn jẹ po nuyise lọ po dọ nuhe yè hia lọ na namẹ anademẹ he sin nuhudo yè tindo. Klistiani nugbo lẹ ma nọ doalọ to afinyọnnuwiwa mẹ. Kakatimọ, yé nọ plọn Biblu nado tindo oyọnẹn he pegan po anademẹ Jiwheyẹwhe tọn po.—15/12, weda 3.

Etẹwẹ yin “aihọn” he na juwayi lọ?

“Aihọn” he na juwayi lọ wẹ gbẹtọvi he tin to aihọn lọ mẹ bọ gbẹzan yetọn ma sọgbe hẹ ojlo Jiwheyẹwhe tọn lẹ. (1 Joh. 2:17) Ṣigba, gbẹtọvi nugbonọ lẹ po aigba lọ po na luntọ́n.—1/1, weda 5-7.

Dile etlẹ yindọ Abẹli ko kú, nawẹ e gbẹ́ to hodọna mí gbọn? (Heb. 11:4)

E to mọwà gbọn yise gblamẹ. Mí sọgan plọnnu sọn yise etọn mẹ bo hodo apajlẹ etọn. Apajlẹ etọn gbẹ́ jẹna ayidego.—1/1, weda 12.

Adà gbẹzan tọn tẹlẹ mẹ wẹ mí ma dona dike nudepope ni hẹn mí jẹla sọn Jiwheyẹwhe dè te?

Delẹ to yé mẹ wẹ: agbasazọ́n, ayidedai, gbẹdido hẹ hagbẹ whẹndo tọn de he yin didesẹ sọn agun mẹ, nuyizan he lẹnunnuyọnẹn detọ́n lẹ, nuhiha gando agbasalilo go, pọndohlan agọ̀ tintindo gando akuẹ go, pọndohlan kavi linlẹn mítọn lẹ yiylọdọ nujọnu hugan.—15/1, weda 12-21.

Fie wẹ mẹhe na yin finfọnsọnku lẹ na fọ́n do?

Gbẹtọ sọha kleun de, enẹ wẹ gbẹtọ 144 000 na yin finfọnsọnku do olọn mẹ. Ṣigba, suhugan mẹhe na yin finfọnsọnku lẹ tọn na yin hinhẹn gọwá ogbẹ̀ to aigba ji, po todido lọ po nado nọgbẹ̀ kakadoi tofi.—1/3, weda 6.

Etẹwẹ e zẹẹmẹdo dọ Islaelivi lẹ ‘ma gboadà to ahun yetọn mẹ’? (Jel. 9:26)

Ahun yetọn gọ́ na atẹṣiṣi po tasinsinyẹn po, podọ yé dona de nuhe zọ́n bọ ahun yetọn do gọ́ na atẹṣiṣi lẹ sẹ̀ taidi, linlẹn, ojlo, kavi mẹwhinwhàn agọ̀ depope he nọ sisẹ́ yé nado ṣiatẹ sọta Jiwheyẹwhe sẹ̀. (Jel. 5:23, 24)—15/3, weda 9-10.

Mẹnu lẹ wẹ adà aigba ji tọn titobasinanu Jehovah tọn bẹhẹn?

E bẹ Hagbẹ Anademẹtọ lọ, wedegbẹ́ alahọ tọn lẹ, nugopọntọ tomẹyitọ lẹ, pipli mẹho agun tọn lẹ tọn, agun lẹ po Kunnudetọ lẹ dopodopo po hẹn.—15/4, weda 29.

Be Islaelivi lẹ nọ hù sẹ́nhẹngbatọ lẹ gbọn pipla yé do pòtin go dali wẹ ya?

Lala. Akọta hohowhenu tọn devo lẹ wẹ nọ wàmọ, e ma yin Islaelivi lẹ. To ojlẹ he mẹ Owe-wiwe Heblu tọn lẹ yin kinkan te, sẹ́nhẹngbatọ lẹ nọ yin hùhù gbọn zannu dindlan do yé dali. (Lev. 20:2, 27) Enẹgodo, oṣiọ mẹhe yin hùhù lọ tọn sọgan yin zizepla do pòtin de go taidi avase de na mẹdevo lẹ.—15/5, weda 13.