Keti Nge Ke Yibuka?
Keti nge tangaka na dikebi yonso banimero ya Nzozulu ya Nkengi ya me katuka kubasika? Tala kana nge lenda pesa mvutu na bangiufula yai ya ke landa:
Bibliomancie kele inki, mpi nki mutindu Bakristu fwete tadila yo?
Bibliomancie kele kikalulu ya kukangula Biblia na kintulumukina ti kivuvu nde verse ya ntete ya nge ta tanga ta vanda ti mambu ya nge kele na yo mfunu. Bakristu ya kieleka ke salaka ve bisalu ya mazi. Kansi bo ke longukaka Biblia sambu na kuzwa nzayilu ya siki-siki mpi lutwadisu ya Nzambi.—12/15, lutiti 3.
“Nsi-ntoto” yina ta luta kele inki?
“Nsi-ntoto” yina ta luta kele bantu ya nsi-ntoto yina ke zingaka ve na kuwakana ti luzolo ya Nzambi. (1 Yoa. 2:17) Ntoto mpi bantu ya kwikama ta guluka.—1/1, balutiti 5-7.
Ata yandi me fwaka, inki mutindu Abele ke landa kutubila beto? (Baeb. 11:4)
Yandi ke tubila beto na nzila ya lukwikilu. Beto lenda longuka na yandi mpi kulanda mbandu ya lukwikilu na yandi. Mbandu na yandi ke pesaka beto kikesa.—1/1, lutiti 12.
Inki kele mwa mambu yina beto fwete bika ve nde yo kabula beto ti Nzambi?
Mambu ya nkaka kele: kisalu na beto, bansaka ya kulutisila ntangu yina beto ke ponaka, kukangama ti bampangi yina bo me basisa na dibundu, kudikotisa na bima ya mpa ya siansi ke basisaka, kudiyangisa kuluta ndilu sambu na mavimpi na beto, nkadilu ya mbi sambu na mbongo mpi kubaka na mbalu mingi bangindu mpi kiyeka na beto.—1/15, balutiti 12-21.
Inki mambu beto lenda longuka na kudikulumusa ya Moize?
Na kisika ya kubika nde kiyeka na yandi kukumisa yandi lulendo, Moize tulaka ntima na Nzambi, kansi na yandi mosi ve. Beto fwete bika ve nde kimfumu, kiyeka to makuki na beto kukumisa beto lulendo; kansi beto fwete tudila Yehowa ntima. (Bing. 3:5, 6)—2/1, lutiti 5.
Bantu yina ta futumuka ta zinga na wapi?
Na kati ya bantu yina ta futumuka kaka bantu 144 000—ta zinga na zulu. Kansi, bantu mingi yina ta futumuka ta zinga na ntoto, ti kivuvu ya kuzinga kimakulu.—3/1, lutiti 6.
Bantu ya Izraele vandaka na ‘ntima yina kele ve ya kuyotisa,’ yo ke tendula nki? (Yer. 9:25)
Bo vandaka ntu-ngolo mpi kolamaka, yo lombaka nde bo katula mambu yina vandaka kukumisa ntima na bo ngolo, disongidila mabanza na bo, bampusa na bo mpi bikuma na bo yina vandaka ve na kuwakana ti ya Nzambi. (Yer. 5:23, 24)—3/15, balutiti 9-10.
Inki mutindu Yezu vandaka mbandu ya luzingu yina kele ti lukanu?
Yandi vandaka ti lukanu na luzingu, yandi salaka luzolo ya Nzambi. Yandi vandaka kuzola Tata na yandi mingi mpi vandaka kuzola bantu. Yo yina, Yezu zabaka nde Tata na yandi vandaka kuzola yandi mpi kundima yandi. Mambu yai ke vandaka na kisina ya luzingu yina kele ti lukanu.—4/1, balutiti 4-5.
Kitini ya organizasio ya Nzambi yina kele awa na ntoto ke tadila mpi inki?
Yo ke tadila Nto-Kimvuka, bakomite ya filiale, bankengi-ntambudi, bimvuka ya bankuluntu, mabundu, nsamuni mosi-mosi.—4/15, lutiti 29.
Sambu na nki beto lenda tuba nde Nzambi vandaka ve muntu ya nku ntangu yandi pesaka bandola?
Yehowa ke sepelaka ve na lufwa ya bantu ya mbi. (Ezek. 33:11) Mambu yina yandi salaka na ntama ke monisa nde yandi ke pesaka bantu balukebisu na zola yonso na ntwala ya kupesa ndola. Diambu yai lenda pesa beto kivuvu ya kuguluka na bandola ya makwisa.—5/1, balutiti 5-6.
Keti bantu ya Izraele vandaka kufwa bangondi na kutulaka bo na nti?
Ve. Makanda ya nkaka vandaka kusala yo, kansi bantu ya Izraele ve. Na ntangu ya ntama, bo vandaka kufwa bantu ya mbi, mu mbandu kulosila bo matadi. (Levi 20:2, 27) Mpi na nima, bo vandaka kutula nitu na bo na nti sambu na kukebisa bankaka.—5/15, lutiti 13.
Sambu na nki bantu lenda tula ve ngemba na nsi-ntoto?
Ata bantu me salaka mambu mingi, bo kele ve ti makuki ya kutwadisa makulu na bo. (Yer. 10:23) Satana ke yalaka nsi-ntoto, yo yina bantu ta kuka ve kutula ngemba. (1 Yoa. 5:19)—6/1, lutiti 16.
