To diworoka ndi?
Wa resa nawa yifo yoyipe yoRuhungu ndi? Tara nsene kuvhura o limburure mapuro gana kukwama ko:
Kuruganesa Bibeli monkedi zoumpure, ngapi omu nava yi tara Vakriste?
Kutanta asi kupenuna Bibeli pwankenye etjangwa, morwa kwa pura asi velise nava hova kumona tazi va tantere eyi va hepa kurugana. Vakriste wousili kapi ava ruganesa umpure. Nye awo kulironga Bibeli yipo va gwane ediwo lyousili nomavyukiso gaKarunga.—12/15, epenuno 3.
“Uzuni” musinke ou ngau zonauka po?
“Uzuni” ou ngau zonauka po kuna kara vantu navenye ava ava dili kuparuka kuliza nompango zaKarunga. (1 Joh. 2:17) Evhu novantu wovahungami kapi ngava yi zonagura po.—1/1, epenuno 5-7.
Nampili ngomu ga fa, ngapi omu Abeli ana kuturonga? (Heb. 11:4)
Age kuturonga kupitira mepuro. Ose kuvhura tu lirongere ko kepuro lyendi nokumuhonena. Sihonena sendi kwa kara sili nononkondo.—1/1, epenuno 12.
Nonkedi musinke dimwe omu natu dira kupulisira nkenye eyi yi tu guse ko kwaKarunga?
Nonkedi dimwe kuna kara: Yirugana, yilihafeso eyi atu horowora, kulikwata ukaume nomunekoro va gusa mombunga, kuhara unene yikwakonentu, sinka sosinene kuhamena ukanguki, kukara nomutaro gepuko koyimaliwa ntani kulizerura unene.—1/15, epenuno 12-21.
Yisinke natu lirongera ko kelinunupiko lyaMosesa?
Mevango lyokulinenepeka, Mosesa kapi ga lihuguvarere mwene nye mwaJehova. Nose kapi tuna hara tu linenepeke morwa situmbukira ndi nonkondo ndi udivi ou twa kara nawo, nye tuna hara kuhuguvara mwaJehova. (Yis. 3:5, 6)—3/1, epenuno 5.
Kupi ngava kara ava ngava ka vhumbura?
Sivaro sosinunu sokusika 144 000 ngava ka kara meguru. Wovanzi ngava va vhumbwira keparu lyepevhu, ava ngava hafera eparu lyanarunye moparadisa paapa pevhu.—5/1, epenuno 6.
Yisinke ayi tanta asi Vaisraeli ‘kapi va sikisire mo egwanekero’? (Jer. 9:26)
Awo kwa rundire nomutwe ntani kwa nyokere kutura po marunduruko. Nomutjima dawo, omu mwa kwaterere yitambo nomagazaro gawo kwa donapere unene kosipara saKarunga. (Jer. 5:23, 24)—3/15, epenuno 9-10.
Ngapi Nowa namukadendi va rerere vana vawo mouzuni woudona?
Nowa namukadendi va hepere kupopera vana vawo koyininke yoyidona. Nampili ngomu va dilire kuvhura nkenye apa kukandana vana vawo va dire kudiva eyi ngaga rugana mamuturungu, nye va vhulire kuronga vana vawo usili kuhamena Jehova Karunga, ogu ga nyenga udinikarunga, ano vana vawo va ya kere vagara wovawa.—5/1, epenuno 11.
Yisinke rwa kwatera mo ruha rwepevhu rombunga zaJehova?
Aro kwa kwatera mo Mbungagendesi, nokomitiye domutayi, vatareli wokudingura, nombunga dovakuronambunga, nombungakriste ntani novazuvhisi.—4/15, epenuno 29.
Yisinke ali tanta egaununo ‘lyondundu zomauzwe’?
“Ndundu zomauzwe” kwa fanekesa upangeli waJehova koyisitwa yendi nayinye. Egaununo kutanta asi Jehova kwa tulisa po uhompa wouvali nositambo sokulikarera. Uhompa ou kwa hamena kwaKarunga ano Jesus Kristusa yige hompa gwawo. (Sak. 14:4)—2/15, epenuno 19.
Vaisraeli ngava dipaga vakorokotji pokuvazenzeresa koyitji ndi?
Hawe. Nomuhoko dononzi mosiruwo sanare yido ngadi dipaga vakorokotji monkedi zangoso nye kapisi Vaisraeli. Mosiruwo sina, Vaisraeli pomuhowo ngava dipaga vakorokotji nomamanya. (Lev. 20:2, 27) Makura simpu ngava si zenzeresa kositji ngerondoro kwava wopeke.—5/15, epenuno 13.
Morwasinke mouzuni muna dilire kukara mbili?
Nampili ngomu vantu ava tompora yininke yoyinzi, awo kapi va va sita nevhuliko lyokulipangera vene. (Jer. 10:23) Morwa uzuni mudima kwa kara mepangero lyaSatana, vantu kapi ava vhuru kutulisa po mbili mouzuni. (1 Joh 5:19)—7/1, epenuno 16.
