Nga Osungamene?
Nga wayangalele tanga malongi mavaikiswa mun’Eyingidilu? Avo i wau, teza van’e mvutu za yuvu eyi yilende:
Aweyi Akristu bafwete badikila e fu kia sadila Nkand’a Nzambi nze mpandu?
E fu kiaki i ziula Nkand’a Nzambi kuna kinsalukisa yo tanga tini kiantete kiele betela ye meso ye vuvu vo e mvovo mia tini kiaki mikuvana luludiku ovwidi o mfunu. Akristu akieleka ke bevavilanga luludiku lwa Nzambi mu mpila yayi ko. Kansi, belongokanga o Nkand’a Nzambi kimana bavwa zayi waludi yo luludiku lwa Nzambi.—15/12, lukaya lwa 3.
Nkia “nza” isinga vempoka?
E “nza” isinga vempoka i wantu awonso ana ke bezingilanga ngwizani ko ye luzolo lwa Nzambi. (1 Yoa. 2:17) O ntoto kumosi y’akwa kwikizi bevuluka.—1/1, lukaya lwa 5-7.
Aweyi Abele kevovelanga yamu wau kana una vo wafwa? (Ayib. 11:4)
Muna lukwikilu kevovelanga. Tulenda longoka mayingi muna mbandu andi yo tanginina lukwikilu lwandi. E mbandu andi yakinu o moyo.—1/1, lukaya lwa 12.
Nkia mambu ke tufwete yambula ko vo matuvambula yo Nzambi?
Makaka muna mambu mama i salu, nsaka tusolanga, kikundi ye yitu yeto yavaikiswa muna nkutakani, mpila tusadilanga lekwa yampa ivaikiswanga, tokanena vimpi wa nitu, nzimbu ye lulendo yovo kuyibadikila vo tusundidi akaka.—15/1, lukaya lwa 12-21.
Adieyi tulenda longoka muna lulembamu lwa Mose?
Vana fulu kia yambula vo e wisa kiankitula se nkwa lulendo, Mose wabundang’e vuvu muna Nzambi, ke mu yandi kibeni ko. Ka tufwete yambula ko vo e ngangu yovo wisa kiatukitula akwa lulendo. Tufwete bundang’e vuvu muna Yave. (Nga. 3:5, 6)—1/2, lukaya lwa 5.
Akweyi bezingila awana besinga fuluka?
Lutangu lwakete lwa wantu, i sia vo, 144.000 ma wantu kun’ezulu bezingila. Kansi, ndonga mun’awana befuluka, ova ntoto bezingila yakwele mvu.—1/3, lukaya lwa 6.
Aweyi Aneyisaele bakadila wantu “balembi zengw’e ntima”? (Yer. 9:26)
Aneyisaele akolami bakala. Diavavanga vo bavengomona mawonso mayivisanga ntima miau, nze ngindu, zolela ye makani ke makala ngwizani ko y’oma ma Nzambi. (Yer. 5:23, 24)—15/3, lukaya lwa 9-10.
Ekuma Yesu kenena se mbandu ya kala ye zingu kiakiese?
Yesu ekani kakala diau muna zingu, i sia vo, vanga luzolo lwa Nzambi. Watoma zolanga S’andi. Wasonganga mpe zola muna wantu. Muna kuma kiaki, Yesu wazayanga wo vo S’andi wanzolanga yo kuntonda. Ezazi i nsabi muna kala ye zingu kiakiese.—1/4, lukaya lwa 4-5.
Ayeyi i yîkwa ya nkubik’a Nzambi ova ntoto?
Buka kia Selo Yambuta, afidi a mavula, akengi a zunga, buka ki’akuluntu, nkutakani ye ateleki.—15/4, lukaya lwa 29.
Ekuma tulenda vovela vo Nzambi ke nkwa nsoki ko muna mfundisa zandi?
Yave ke yangalelanga lufwa lwa yimpumbulu ko. (Yez. 33:11) Mana kavanga kuna nz’ankulu mesonganga vo kuna zola kwawonso oteka lukisanga wantu vitila kabak’e nzengo za kubafwasa. Ediadi dikutuvanang’e vuvu kia vuluka vava Nzambi kesinga fwasa e nza.—1/5, lukaya lwa 5-6.
Nga Aneyisaele vana nti bakomanga yimpumbulu muna kubavonda?
Ve. Zula yakaka yavanganga wo, ke Aneyisaele ko. Muna tandu kiasonekwanga Sono ya Kiyibere, entete yimpumbulu vondwa bavondwanga muna matadi yovo mu mpila yakaka. (Fuka 20:2, 27) I bosi bakomanga evimbu vana nti nze lulukisu kw’akaka.—15/5, lukaya lwa 13.
Ekuma wantu ke belendelanga twasa luvuvamu ko ova nza?
Kana una vo wantu mayingi belungisanga, ke bena ye ngangu zafwana ko muna singika ntambi zau. (Yer. 10:23) Wau vo Satana oyalanga nza yayi, o wantu ke balendi twasa luvuvamu ko. (1 Yoa. 5:19)—1/6, lukaya lwa 16.
