Udi muvuluke anyi?
Dibala dia bibejibeji bia Tshibumba tshia Nsentedi bishale ebi divua dikusankishe anyi? Nanku, anji tangila ni udi mua kuandamuna nkonko idi ilonda eyi:
Kukosa mukanda kudi kumvuija tshinyi? Bena Kristo badi ne bua kumona tshilele etshi mushindu kayi?
Kukosa mukanda ntshilele tshia kubulula Bible ku mpukapuka muitabuje ne: mvese wa kumpala udi mêsu atuishila neakuambuluishe. Bena Kristo balelela kabatu babuka to. Kadi badi balonga Bible bua kupeta dimanya dilelela ne bua kupeta buludiki bua kudi Nzambi.—15/12, dibeji 3.
“Buloba” buikala ne bua kupita ntshinyi?
“Buloba” buikala ne bua kupita mbantu bonso badi pa buloba badi benza malu adi kaayi apetangana ne disua dia Nzambi. (1 Yone 2:17) Buloba ne bantu badi ne lulamatu nebipanduke.—1/1, dibeji 5-7.
Nansha mukadi Abele mufue, mmunyi mutshidiye wakula netu? (Eb. 11:4)
Udi uyukila netu ku diambuluisha dia ditabuja. Ditabuja diende didi mua kutulongesha ne kutusaka bua kudidikija. Tshilejilu tshiende tshitshidi ne mushinga.—1/1, dibeji dia 12.
Mmu nsombelu kayi mutudi ne bua kuikala ne budimu bua kubenga kusemena kule ne Nzambi?
Imue ya kudiyi mmudimu, mushindu wa dijikija lutetuku utudi tusungula, dilamatangana ne muntu udi muipatshibue mu tshisumbu, mushindu utudi tuenza mudimu ne biamu bia bena sianse, kuditatshisha bua makanda a mubidi, kumona makuta mu mushindu mubi ne kuangata mmuenenu wetu anyi tshitudi ne mushinga wa bungi.—1/15, dibeji dia 12-21.
Didipuekesha dia Mose didi ditulongesha tshinyi?
Pamutu ka Mose kulekela muanzu uvuaye nawu umufikisha ku dibandisha makaya, wakeyemena Nzambi pamutu pa kudieyemena. Katuena basue nansha kakese bua muanzu, bukokeshi anyi tshipedi tshitudi natshi bitusake bua kubandisha makaya, kadi tudi basue bua kueyemena Yehowa. (Nsu. 3:5, 6)—1/2, dibeji 5.
Bantu babishabu ku lufu nebasombe penyi?
Bantu bungi bumana kukosa, mmumue ne: 144 000 nebikale ne muoyo mu diulu. Kadi bantu ba bungi babishabu nebapetulule muoyo pa buloba ne ditekemena dia kusombapu bua kashidi.—1/3, dibeji 6.
Tshiambilu tshia ne: bena Isalele ‘kabavua batengudibue mu mitshima’ tshivua tshiumvuija tshinyi? (Yel. 9:26)
Bavua bantomboji ba mutu mukole ne bavua ne bua kumbusha malu avua enza bua muoyo wabu kawikadi witaba mibelu, bu mudi meji avuabu bela, malu avuabu banange anyi majinga abu avua abengangana ne disua dia Nzambi. (Yel. 5:23, 24)—15/3, dibeji dia 9-10.
Mmunyi muvua Yezu tshilejilu tshia muntu uvua ne nsombelu udi ne tshipatshila?
Uvua ne tshipatshila kampanda mu nsombelu wende tshia kuenza disua dia Nzambi. Uvua munange Tatuende bikole ne munange bantu. Nunku, Yezu uvua mumanye ne: Tatuende uvua mumunange ne uvua umuanyisha. Aa ke malu a mushinga bua kuikala ne nsombelu udi ne tshipatshila.—1/4, dibeji 4-5.
Tshitupa tshia bulongolodi bua Nzambi tshia pa buloba ntshienza ne banganyi?
Ntshienza ne Kasumbu kaludiki, komite ya filiale, batangidi bena ngendu, tusumbu tua bakulu, bisumbu ne Ntemu yonso.—15/4, dibeji dia 29.
Bua tshinyi tudi mua kuamba ne: pavua Nzambi upesha bantu manyoka, kavua muena tshikisu?
Yehowa katu usanka bua lufu lua muntu mubi to. (Yeh. 33:11) Malu avuaye muenze kale adi aleja ne: udi udimuija bantu ne dinanga kumpala kua kubanyoka. Bualu ebu budi butupetesha ditekemena dia kupanduka ku kabutu kadi kumpala.—1/5, dibeji 5-6.
Bua kushipa bena tshibawu, bena Isalele bavuaku babakudika ku mutshi anyi?
Tòo. Bisamba bikuabu bia kale bivua bienza nunku, kadi bena Isalele bobu kabavua benza nanku to. Pamuapa mu tshikondo tshia Mifundu ya tshiena Ebelu, bavua banji kushipa benji ba malu mabi pamuapa pa kubasa mabue. (Lew. 20:2, 27) Pashishe bavua bakudika tshitalu ku mutshi bua kudimuija bantu bakuabu.—15/5, dibeji dia 13.
Bua tshinyi bantu ki mbakumbane bua kufila ditalala pa buloba?
Nansha mudi bantu benze malu a bungi, kabena ne bukole bua kulombola biendedi biabu to. (Yel. 10:23) Satana ke udi ukokesha buloba, ke bualu kayi bantu kabakukumbana bua kufila ditalala to. (1 Yone 5:19)—1/6, dibeji dia 16.
