Asoo Ɛkakye?
Wɔgenga Ɛzinzalɛ Arane mɔɔ ɛra kenlensa ye la kpalɛ ɔ? Nea saa ɛbahola wɔabua kpuyia ɛhye mɔ a:
“Ewiade” ne mɔɔ bapɛ nu aze la a le duzu?
“Ewiade” ne mɔɔ bapɛ nu aze la a le alesama mɔɔ bɛ ɛbɛlabɔlɛ nee Nyamenle ɛhulolɛdeɛ ɛnnyia la. (1 Dwɔn 2:17) Azɛlɛ ne nee alesama mɔɔ bɛdi nɔhalɛ la bɛadɛnla ɛkɛ dahuu.
Ebɛle ɛwu bɔbɔ ɛdɛe noko ɔtendɛ ɔkile yɛ, kɛzi? (Hib. 11:4)
Ɔlua diedi zo. Yɛbahola yɛazukoa ye diedi ne yɛava yɛabɔ yɛ ɛbɛla. Ye neazo ne tɛbɔ ɛkɛ na yɛfa yɛdi gyima a ɔbaboa yɛ.
Ninyɛne mɔɔ ɔwɔ kɛ yɛnea boɛ wɔ nwo na yɛandwe yɛ nwo yɛanvi Nyamenle anwo la bie a le boni?
Bie a le: Yɛ gyima, ɛnwomenlelielɛ yɛɛ anyelielɛ ninyɛne mɔɔ yɛkpa, yɛ busuanli mɔɔ bɛdu ye mɔɔ yɛ nee ye babɔ, ɛlɛtɔlɔnek ninyɛne, kpɔkɛdelɛ, ezukoa, nee anwomemaazo.
Duzu a yɛsukoa yɛfi Mosisi mɛlɛbɛnwoaze ne anu a?
Mosisi ammemaa ɔ nwo zo ɔlua tumi mɔɔ ɔnyianle la ati, emomu, ɔvale ɔ nwo ɔdole Nyamenle anwo zo. Yɛngulo kɛ tumi, dibilɛ, anzɛɛ yɛ mɔdenlebɔlɛ maa yɛmemaa yɛ nwo zo; emomu, yɛkulo kɛ yɛfa yɛ nwo yɛto Gyihova anwo zo. (Mrɛ. 3:5, 6)
Menli mɔɔ bɛbadwazo bɛ la bɛadɛnla ni?
Bɛ nuhua ekyi bie—144,000—badɛnla anwuma. Noko akee, bɛbadwazo bɛ nuhua dɔɔnwo ne ala bɛara ngoane nu wɔ azɛlɛ ye azo, bɛbadɛnla aze dahuu.
Duzu a kile kɛ ɛnee Yizilayɛma “ɛtɛyɛle bɛ mrenyanu nzonlɛ wɔ ahonle nu” ɛ? (Gyɛ. 9:26, NW)
Ɛnee bɛte atua yemɔti ɛnee ɔhyia kɛ bɛtwe bɛ nwo bɛfi debie biala mɔɔ maa bɛ ahonle ne solo mɔɔ bie a le bɛ nzuzulɛ, bɛ nganeɛdelɛ, anzɛɛ adwenle mɔɔ ɔtia Nyamenle bodane la anwo. (Gyɛ. 5:23, 24)
Kɛzi Gyisɛse yɛle ɛbɛlabɔlɛ kpalɛ nwo neazo kɛnlɛma ɛ?
Ɛnee ye ɛbɛlabɔlɛ gyi bodane zo, yemɔ a le kɛ ɔbayɛ Nyamenle ɛhulolɛdeɛ. Ɔnyianle ɛlɔlɛ kpole ɔmanle ɔ Ze nee menli. Zɔhane ati, ɛnee Gyisɛse ze kɛ ɔ Ze die ye to nu na ɔkulo ye edwɛkɛ. Ɛbɛlabɔlɛ kpalɛ sanvɛ a le ninyɛne ɛhye mɔ.
Nwane mɔ a boka Nyamenle ahyehyɛdeɛ ne foa mɔ wɔ azɛlɛ ye azo la anwo a?
Neazo Eku ne, ɔfese kɔmatima, neavolɛ adenduvoma, mgbanyima eku, asafo ne mɔ, yɛɛ Dasevolɛ ko biala.
Duzu ati a yɛkola yɛka kɛ Nyamenle ndɛnebualɛ ɛngile kɛ ɔ ti yɛ se ɛ?
Gyihova anye ɛnlie amumuyɛnli ewule nwo. (Yiz. 33:11) Ninyɛne mɔɔ Nyamenle yɛle ye dɛba ne la da ye ali kɛ ɔfi ɛlɔlɛ nu ɔbɔ menli kɔkɔ kolaa na yeazɛkye bɛ. Ɛhye maa yɛnyia anyelazo kɛ yɛbahola yɛanyia yɛ ti wɔ ɛzɛkyelɛ ne mɔɔ la yɛ nyunlu la anu.
Ɛnee Yizilayɛma kenda ɛtanevolɛma wɔ baka zo ku bɛ ɔ?
Kyɛkyɛ. Wɔ tete ne, ɛnee maanle maanle bie mɔ yɛ zɔ, noko tɛ Yizilayɛma ɔ. Mekɛ mɔɔ bɛlɛkɛlɛ Hibulu Ngɛlɛlera ne la ɛnee bɛdumua bɛsi ɛtanevolɛma awolɛ bɛku bɛ. (Sɛlɛ. 20:2, 27) Akee bɛfa ye funli ne bɛkenda baka zo amaa yeayɛ kɔkɔbɔlɛ yeamaa menli mɔɔ ɛha la.
Duzu ati a alesama ɛngola ɛnva anzondwolɛ ɛmmaa ewiade ɛ?
Ɔwɔ nuhua kɛ alesama ɛhola ɛyɛ ninyɛne dɔɔnwo ɛdeɛ, noko bɛnlɛ bɛ ngoane zo tumi. (Gyɛ. 10:23) Seetan a di ewiade ɛhye azo a, yemɔti alesama ɛnrɛhola ɛnrɛva anzondwolɛ ɛnrɛra. (1 Dwɔn 5:19)
