Ita hanoin-hetan ka lae?
Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:
Oinsá mak ema balu hanoin sala kona-ba Bíblia? Oinsá ema kristaun nia haree kona-ba neʼe?
Ema balu fiar katak bainhira sira loke Bíblia ba pájina naran deʼit, versíkulu primeiru neʼebé sira lee mak sei ajuda sira atu tahan hasoru sira-nia susar. Maibé ema kristaun neʼebé loos la buka kbiit májiku nian husi Bíblia. Duké halo nuneʼe, sira estuda didiʼak Bíblia hodi bele hetan matadalan husi Maromak.—15/12, pájina 3.
Saida mak “mundu” neʼebé liu daudaun?
“Mundu” neʼebé atu liu mak ema hotu neʼebé la halo tuir Maromak nia hakarak. (1 Joao 2:17) Ita-nia planeta mundu nian no ema neʼebé halo tuir Maromak sei la lakon.—1/1, pájina 5-7.
Maski Abel mate ona, oinsá mak nia bele koʼalia ba ita? (Ebr 11:4)
Nia halo nuneʼe “hodi fiar”. Se ita aprende husi Abel nia fiar no hakaʼas an atu halo tuir, neʼe hanesan Abel mak koʼalia ba ita iha dalan neʼebé bele kona ita-nia moris.—1/1, pájina 12.
Saida deʼit mak bele hadook ita husi Maromak?
Ita-nia serbisu, atividade halimar nian neʼebé ita hili, laran-metin ba família neʼebé kongregasaun hasai, tau atensaun demais ba teknolojia, hanoin barak kona-ba saúde, hadomi osan, no hanoin liu kona-ba ita rasik no ita-nia pozisaun.—15/1, pájina 12-21.
Ema Israel “la hetan sirkunsizaun iha sira-nia laran”, neʼe katak sá? (Jer 9:26)
Sira lakohi halo tuir no lakohi troka sira-nia hahalok, no sira-nia hakarak no hanoin mak aat iha Jeová nia oin. Tan neʼe, Jeová haruka sira atu hasai buat aat husi sira-nia laran. (Jer 5:23, 24)—15/3, pájina 9-10.
Ema neʼebé moris hiʼas sei hela iha neʼebé?
Ema naʼin-144.000 sei moris hiʼas iha lalehan. Maibé ema barak liu sei moris hiʼas iha mundu ho esperansa atu moris ba nafatin.—1/4, pájina 6.
Bainhira Jesus atu mate, nia dehan ba naʼok-teen iha ninia sorin atu moris iha lalehan iha loron neʼe ka lae?
Lae. Tanba iha tempu neʼebá Jesus rasik mós la bá kedas lalehan. Tuir loloos, nia “iha rai laran”, katak rate laran, ba loron tolu. (Mt 12:40; Mc 10:34)—1/4, pájina 9.
Maromak nia organizasaun parte rai nian inklui saida?
Neʼe inklui Grupu Administradór, grupu koordenadór ba sukursál, katuas área nian no katuas vizitante sira, grupu katuas nian, kongregasaun sira, no haklaken-naʼin ida-idak.—15/4, pájina 29.
Ema Israel fó kastigu-mate ba ema neʼebé halo krime hodi tara sira iha ai-riin ka lae?
Lae. Maski nasaun barak iha tempu uluk halo ida-neʼe, maibé nasaun Israel la halo. Iha tempu Eskritura Lia-Ebraiku nian, ema fó kastigu-mate ba ema neʼebé halo krime iha dalan seluk, hanesan hodi tuda ho fatuk. (Lev 20:2, 27) Depois neʼe mak ema tara sira-nia mate-isin iha ai-riin ka ai-hun hodi sai nuʼudar avizu ba ema seluk.—15/5, pájina 13.
