Yu Tingim Yet?
Olsem wanem? Yu bin ritim gut ol tok bilong ol nupela Wastaua? Yu ken traim bekim ol dispela askim i stap daunbilo:
Ol Kristen i mas i gat wanem tingting long pasin bilong yusim Baibel long pasin we i no stret?
Ol man i save opim nating Baibel na ol i bilip olsem ol bai kisim helpim long namba 1 tok ol i lukim. Ol Kristen tru i no bihainim kain pasin olsem, nogat. Ol i stadi long Baibel na kisim stretpela save na larim God i stiaim ol.—12/15, pes 3.
Wanem mining bilong dispela tok,“graun” bai pinis?
Dispela graun bai pinis i makim olgeta manmeri long graun em ol i no bihainim laik bilong God. (1 Jon 2:17) Graun na ol manmeri i bihainim tok bilong God, ol bai abrusim bagarap.—1/1, pes 5-7.
Abel i dai pinis, tasol olsem wanem em i autim tok yet long yumi? (Hib. 11:4)
Em i autim tok long rot bilong bilip. Yumi inap kisim skul long bilip bilong em na wok strong long bihainim. Pasin bilong em i stap gutpela piksa tru long yumi ken bihainim long nau.—1/1, pes 12.
Wanem sampela samting yumi mas was gut na no ken larim wanpela samting i mekim na yumi stap longwe long God?
Wok mani, pasin bilong kisim amamas, bung wantaim wanblut husat i raus, yusim ol kompiuta na ol narapela masin samting, tingting planti long helt, holim tingting kranki long mani, na ting olsem save bilong yumi i moa yet.—1/15, pes 12-21.
Yumi inap kisim wanem skul long pasin daun bilong Moses?
Moses i no tingim namba em i holim na bihainim tingting bilong em yet, nogat, em i larim God i stiaim em. Yumi no laik bai strong, namba, na save bilong yumi i mekim na yumi kisim pasin antap, nogat, yumi mas bilip long Jehova. (Snd. 3:5, 6)—2/1, pes 5.
Ol man i kirap bek ol bai stap we?
Sampela manmeri—144,000—bai kisim laip long heven. Tasol planti manmeri bai kirap bek na stap laip hia long graun.—3/1, pes 6.
Olsem wanem lain Israel i “no save bihainim tok”? (Jer. 9:26)
Ol i bikhet tru, olsem na ol i mas rausim ol pasin we i mekim na ol i no save bihainim tok—ol i mas rausim olgeta kain tingting we i no stret long ai bilong God. (Jer. 5:23, 24)—3/15, pes 9-10.
Olsem wanem i stap bilong Jisas i gat as tru bilong en?
Em i mekim laik bilong God. Em i laikim tru Papa bilong em, na em i laikim ol manmeri. Jisas i save olsem Papa bilong em i laikim em tru na i orait long em. Ol dispela samting bai mekim na i stap bilong yumi i gat as bilong en.—4/1, pes 4-5.
Oganaisesen bilong God long graun i gat wanem ol samting?
Gavening Bodi, ol brens komiti, ol wasman raun, ol lain elda, ol kongrigesen, na ol wan wan Witnes.—4/15, pes 29.
Taim God i givim ol strafe, bilong wanem yumi ken tok em i no man nogut?
Jehova i no save amamas taim ol man nogut i dai. (Ese. 33:11) Ol samting God i mekim long bipo i soim olsem em i save givim tok lukaut paslain long em i kamapim bagarap. Dispela inap opim rot bilong yumi long abrusim ol bagarap long bihain.—5/1, pes 5-6.
Yu ting ol Israel i bin hangamapim ol raskol long pos na kilim ol i dai?
Nogat. Ol narapela kantri bilong bipo i bin mekim olsem, tasol lain Israel i no bihainim dispela pasin. Long taim ol i raitim Ol Skripsa Hibru, ol i save stonim raskolman na kilim em i dai. (Wkp. 20:2, 27) Taim raskolman i dai, ol i save hangamapim em long pos na dispela i ken stap olsem tok lukaut long ol narapela.—5/15, pes 13.
Bilong wanem ol man i no inap kamapim gutaim long graun?
Maski ol man i bin mekim ol bikpela wok, ol i no inap long bosim wokabaut bilong ol yet. (Jer. 10:23) Satan i bosim graun, olsem na ol man i no inap kamapim gutaim. (1 Jon 5:19)—6/1, pes 16.
