Kasi Mukukumbuka?
Kasi muli kuŵazga magazini gha Gongwe la Mulinda ghasonosono apa? Yezgani kuzgora mafumbo agha:
Kasi Ŵakhristu ŵakwenera kukawona wuli kaluso ka kujura Baibolo palipose apo lajulika?
Ŵanthu awo ŵali na kaluso aka, ŵakujura Baibolo palipose apo lajulika uku ŵakugomezga kuti vesi lakwamba ilo ŵajurenge liŵawovwirenge. Ŵakhristu ŵaunenesko ŵakuwukwa panji kucita maula yayi. Kweni ŵakuŵazga Baibolo kuti ŵalimanye makora kweniso kuti ŵasange ulongozgi wa Ciuta.—12/15, peji 3.
Kasi “caru” ico cizamuluta ni nchini?
“Caru” ico cizamuluta ni ŵanthu awo ŵakucita yayi khumbo la Ciuta. (1 Yoh. 2:17) Caru capasi na ŵanthu ŵakugomezgeka ŵazamupona.—1/1, peji 5-7.
Nangauli Abelu wali kufwa, kweni kasi wacali kuyowoya kwa ise pa fundo wuli? (Heb. 11:4)
Wakucita nthena kwizira mu cipulikano. Tingasambirako kwa iyo pa nkhani ya cipulikano na kuyezga kuŵa na cipulikano nga cake. Ivyo wakacita vicali vyamoyo.—1/1, peji 12.
Kasi ni vinthu wuli ivyo tikwenera yayi kuvizomerezga kuti vitipatuske kwa Ciuta?
Vinyake ni: nchito, vyakusanguluska ivyo tikusankha, kwendezgana na ŵakusezgeka awo mbabali ŵithu, kutangwanika na vinthu vyakupangika na ŵasayansi, kujipwelelera, kuwona ndalama mwambura kwenelera, na kuzirwiska comene maghanoghano ghithu panji udindo.—1/15, peji 12-21.
Kasi tingasambirako vici kwa Mozesi pa nkhani ya kujiyuyura?
M’malo mwa kujikuzga cifukwa ca mazaza ghake, Mozesi wakathembanga Ciuta, wakajithembanga yayi. Tikwenera yayi kujikuzga cifukwa ca nkhongono, mazaza panji mahara ghithu. Kweni tikwenera kutamira mwa Yehova. (Zinth. 3:5, 6)—2/1, peji 5.
Kasi awo ŵazamuwuskika ŵazamukhala nkhu?
Ŵanthu ŵacoko waka, ŵakukwana 144,000 ŵamukhala kucanya. Kweni ŵanandi awo ŵazamuwuskika ŵazamukhala na umoyo pano pa caru capasi kwamuyirayira.—3/1, peji 6.
Kasi fundo yakuti Ŵaisrayeli ŵakaŵa ŵambura “kukotora mu mtima” yikung’anamuraci? (Yer. 9:26)
Ŵakaŵa ŵakugaluka ndipo ŵakeneranga kuwuskako cilicose ico cikapangiskanga kuti mtima wawo uŵe wambura kupulikira. Vinthu ivi ni maghanoghano, vinthu ivyo ŵakatemwanga, panji vilato ivyo vikasuskananga na khumbo la Ciuta. (Yer. 5:23, 24)—3/15, peji 9-10.
Cifukwa wuli tikuti Yesu nchakuwonerapo ciwemi pa nkhani ya umoyo wacandulo?
Yesu wakaŵa na cilato pa umoyo wake ca kucita khumbo la Ciuta. Wakaŵatemwanga comene Awiske ndiposo wakatemwanga ŵanthu. Kweniso Yesu wakamanyanga kuti wakakondweskanga Adada ŵake. Vinthu ivi ni vyakukhumbikwa comene kuti munthu waŵe na umoyo wacandulo.—4/1, peji 4-5.
Kasi mu cigaŵa ca pa caru capasi ca gulu la Ciuta muli anjani?
Muli Wupu Wakulongozga, makomiti gha munthavi, ŵalaŵiliri ŵakwendakwenda, mawupu gha ŵalara, mipingo, na Kaboni waliyose.—4/15, peji 29.
Cifukwa wuli tingayowoya kuti Ciuta wakaŵa wankhaza yayi pakweruzga ŵanthu?
Yehova wakukondwa yayi na nyifwa ya muheni. (Ezek. 33:11) Ivyo wakacita mu nyengo yakale vikulongora kuti pambere wandaparanye ŵanthu ŵaheni, wakuŵacenjezga dankha. Fundo iyi yikutipa cigomezgo cakuti tizamupona ceruzgo cake ca munthazi.—5/1, peji 5-6.
Kasi pakukoma ŵanthu awo ŵaswa malango, Ŵaisrayeli ŵakacitanga kuŵapayika pa khuni?
Yayi. Mitundu yinyake yakale ndimo yikacitiranga, kweni Ŵaisrayeli ndimo ŵakacitiranga yayi. Mu nyengo iyo Malemba gha Cihebere ghakalembekeranga, ŵanthu ŵakucita uheni ŵakaŵakomanga dankha na malibwe. (Lev. 20:2, 27) Kufuma apo, ŵakapayikanga citanda cawo pa khuni kuti liŵe cenjezgo ku ŵanji.—5/15, peji 13.
Cifukwa wuli ŵanthu ŵangiziska yayi mtende pa caru?
Nangauli ŵanthu ŵafiska vinthu vinandi, kweni ŵangalongozga yayi mendero ghawo. (Yer. 10:23) Satana ndiyo wakuwusa caru, ntheura ŵanthu ŵangiziska yayi mtende. (1 Yoh. 5:19)—6/1, peji 16.
