Naa Ni A Zwi Humbula?
Naa no vhala nga vhuronwane thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:
Zwi amba mini u bvumba u tshi shumisa Bivhili, nahone Vhakriste vha fanela u zwi dzhia hani?
U bvumba u tshi shumisa Bivhili ndi maitele a u vhala ndimana huṅwe na huṅwe hune wa vula khayo Bivhilini, u na fulufhelo ḽa uri ndimana ine wa vula khayo i ḓo u thusa u sedzana na vhuleme. Vhakriste vha ngoho a vha iti zwithu zwa manditi. Nṱhani hazwo, vha guda Bivhili u itela u vha na nḓivho yo teaho na u wana vhulivhisi vhu bvaho ha Mudzimu.—12/15, siaṱari 3.
“Shango” ḽine ḽa ḓo fhira ndi mini?
“Shango” ḽine ḽa ḓo fhira ndi vhathu vha re shangoni vhane vha tshila nga nḓila i sa tendelani na zwine Mudzimu a zwi funa. (1 Yoh. 2:17) Ḽifhasi na vhathu vha fulufhedzeaho vha ḓo ponyoka.—1/1, masiaṱari 5-7.
Naho Abele o fa, u kha ḓi amba na riṋe nga nḓila-ḓe? (Vhaheb. 11:4)
U amba na riṋe nga lutendo. Ri nga guda khae na u edzisa lutendo lwawe. Tsumbo yawe i kha ḓi shuma.—1/1, siaṱari 12.
Ndi kha masia afhio ane ra fanela u a ṱhogomela u itela uri ri si ḓisendedze kule na Mudzimu?
Maṅwe masia ndi a tevhelaho: mushumo washu wa u ḓitshidza kana buḓo, mitambo na u ḓimvumvusa hune ra hu khetha, u ḓikonanya na shaka ḽo bviswaho tshivhidzoni, u shumisa thekinolodzhi, u vhilaela nga mutakalo washu, mavhonele a si avhuḓi nga ha tshelede nga nṱhani ha vhuimo hashu.—1/15, masiaṱari 12-21.
Ri nga guda mini kha u ḓiṱukufhadza ha Mushe?
Nṱhani ha u tendela vhuimo hawe vhu tshi ita uri a ḓikukumuse, Mushe o ḓitika nga Mudzimu, hu si nga ene muṋe. Ri songo vhuya ra tendela maanḓa, vhuimo kana vhukoni hashu ha nzulele zwi tshi ri ita uri ri ḓikukumuse; nṱhani hazwo, ri fanela u fulufhela Yehova. (Mir. 3:5, 6)—3/1, siaṱari 5.
Vhane vha ḓo vuswa vha ḓo dzula ngafhi?
Tshivhalo tshiṱuku—tsha vha 144 000—tshi ḓo dzula ṱaḓulu. Vhanzhi vhane vha ḓo vuswa vha ḓo tshila kha ḽifhasi, vha na tshilavhelelwa tsha u tshila lwa tshoṱhe.—5/1, siaṱari 6.
Zwo vha zwi tshi amba mini uri Vhaisiraele vho vha vha songo ‘rubiswa dzimbilu’? (Yer. 9:25)
Vho vha vhe mashandukwa nahone vho vha vha tshi fanela u bvisa zwe zwa ita uri mbilu dzavho dzi rindile—mihumbulo yavho, lufuno lwavho, kana zwiṱuṱuwedzi zwe zwa vha zwi tshi lwisana na zwa Mudzimu. (Yer. 5:23, 24)—3/15, masiaṱari 9-10.
Yesu o vha hani tsumbo ya we a vha na vhutshilo ha ndeme?
O vha e na ndivho vhutshiloni, ya u ita zwi funwaho nga Mudzimu. O vha a tshi funa nga maanḓa Khotsi awe na vhathu. Nga zwenezwo, Yesu o vha a tshi zwi ḓivha uri Khotsi awe u a mu funa nahone u a mu takalela. Zwenezwo ndi khoṋololo ya u wana vhutshilo ha ndeme.—5/1, masiaṱari 4-5.
Tshipiḓa tsha ndangulo ya Mudzimu ya kha ḽifhasi tshi katela mini?
Tshi katela Tshigwada tshi Langaho, komiti dza davhi, vhalavhelesi vha dalelaho, zwigwada zwa vhuhulwane, zwivhidzo na Ṱhanzi iṅwe na iṅwe.—4/15, siaṱari 29.
“Thavha ya muṱwari” yo fhanduwa nga muhumbulo ufhio?
“Thavha ya muṱwari” i imelaho vhuvhusahoṱhe ha Yehova, i fhanduwa nga muhumbulo wa uri Yehova o tika miṅwe Muvhuso wo khetheaho vhukuma. Wonoyu muvhuso wa vhuvhili, ndi Muvhuso wa Messia une Yesu Kristo a ḓo vhusa khawo. (Sak. 14:4)—2/15, siaṱari 19.
Naa Vhaisiraele vho vha vha tshi vhulaha vhathu vho tshinyaho nga u vha fhahea kha danda?
Hai. Dziṅwe tshaka dza kale dzo ita zwenezwo, fhedzi hu si Vhaisiraele. Tshifhingani tsha Maṅwalo a Luheberu, kanzhi vhaitazwivhi vho vha vha tshi thoma nga u vhulahwa, vha kanḓwa nga matombo. (Lev. 20:2, 27) Ngauralo, tshitumbu tshi nga kha ḓi fhahewa kha danda sa tsevho kha vhaṅwe.—5/15, siaṱari 13.
Ndi ngani mulalo shangoni u tshi konḓa?
Naho vhathu vho no khunyeledza zwithu zwinzhi zwavhuḓi, a vho ngo sikwa vhe na vhukoni ha u ḓivhusa. (Yer. 10:23) Sathane u langa shango, ngauralo vhathu vha kundelwa u ita uri hu vhe na mulalo. (1 Yoh. 5:19)—7/1, siaṱari 16.
