KET kong ni imito ni kiyangi pi two mo ma dong oketo kwoni ka mading adada. Mitte ni omyero ibed ki gen matek adada i kom dokto ma obiyangi-ni, pien kwoni tye i cinge. Tika pe nyuto ryeko ka kong ingiyo rekod me ticce?

I yo acel-li bene, tye me ryeko me ngiyo maber adada lok madok i kom dini. Ka itye i dul dini mo keken, man rom aroma calo iwacci itye ka keto kwoni i yo me cwiny i cing dini meno. Man bene kwako ka ibinongo ma pe tum nyo pe.

Yecu onyutiwa kit ma watwero ngeyone kwede ka diniwa aye tye dini me ada. En owacci: “Yat acel acel gingeyo pi nyige.” (Luka 6:44) Me lapore, ka ingiyo dini moni, nyig ango ma dini meno nyako? Tika lutelane giketo mitigi ducu i kom cente? Tika romi me dini meno gilubo cik me Baibul ka odok i kom lok me lweny ki kwo matir? Me agikkine, tika omyero wagen dini mo keken? Wacuko cwinyi me ngiyo lagam pi lapeny magi.